በትረማርያም አበባው Betremariam Abebaw

▶️፲፩. መክ.7፥10 ላይ "ከዚህ ዘመን ይልቅ ያለፈው ዘመን ለምን ተሻለ? ብለህ አትናገር። የዚህን ነገር በጥበብ አትጠይቅምና" ይላል። ብዙውን ጊዜ ያለፈውን ዘመን ከአሁኑ ጋር እያነጻጸርን ያለፈውን ጥሩ ዘመን እደነበረ የአሁኑ ደግሞ ካለፈው የማይሻል እናደርጋለን። አንዳንድ ጊዜ ደግሞ የአሁኑን ካለፈው የተሻለ ዘመን እንደሆነ እንናገራለን። ይህ በቤተክርስቲያን ዘንድ እንዴት ይታያል?

✔️መልስ፦ ስለዘመናት የሚያውቅ እግዚአብሔር ነው። ባለፈው ዘመን ይህ ሆኖ በአሁኑ ዘመን ይህ ለምን ተደረገ አትበል ማለት ስለሁሉ አለማወቅ ስለሚገድበን ሁሉን ለእግዚአብሔር ስጥ ማለት ነው። በሁሉ ዘመን እግዚአብሔር ማመስገን እንጂ ከዚህ በዘለለ መመራመር አይጠቅምም ማለት ነው።

▶️፲፪. "በኃጥኣን የሚደረገው ሥራ የሚደርስባቸው ጻድቃን አሉ። ለጻድቃንም የሚደረገው ሥራ የሚደርስላቸው ኃጥኣን አሉ። ይህም ደግሞ ከንቱ ነው አልሁ" ይላል (መክ.8፥14)። የዚህ ንባብ ትርጓሜ ምንድን ነው?

✔️መልስ፦ በኃጥኣን የሚደረገው ሥራ የሚደርስባቸው ጻድቃን አሉ ማለት ለምሳሌ እንደ ነቢዩ ሳሙኤል ነው። መግደል የኃጥኣን ሥራ ቢሆንም ጻድቁ ሳሙኤል ግን አጋግን ገድሎታልና። ለጻድቃን የሚደረገው ሥራ የሚደርስላቸው ኃጥኣን አሉ የሚለው እንደ ሳኦል ነው። አለመግደል የጻድቃን ሥራ ቢሆንም ክፉው ሳኦል አጋግን ሳይገድለው ቀርቷልና ነው።

▶️፲፫. "ንጉሥሽ ሕፃን የሆነ መኳንንቶችሽም ማልደው የሚበሉ አንች አገር ወዮልሽ!" ይልና "ንጉሥሽ የጌታ ልጅ የሆነ መኳንንቶችሽም ለብርታት በጊዜ የሚበሉ የማያፍሩም አንች ሀገር ሆይ የተመሰገንሽ ነሽ" ይላል (መክ.10፥16-17)። የንባቡ ትርጓሜ ምንድን ነው? ሐሳቦቹስ አይጋጩም? አንዱ የተጠነቀቀበት ሌላኛው የተመሰገነበት ልዩነቱ ምን ላይ ሁኖ ነው?

✔️መልስ፦ ንጉሥሽ ሕፃን የሆነ ማለት ንጉሥሽ ሕፃነ አእምሮ የሆነ ሀገር ወዮልሽ ማለት ነው። መኳንንቶችሽም ማልደው የሚበሉ ማለት የተሾሙት ሊፈርዱ ሆነው ሳለ ፍርዱን ትተው ራሳቸውን ብቻ የሚንከባከቡ መኳንንት ወዮላቸው ማለት ነው። ቀጥሎ ንጉሥሽ የጌታ ልጅ የሆነ የሚለው ንጉሡ በመልካም ሥራው የተከበረ ከሆነ ሀገር የተመሰገነች ትሆናለች ማለት ነው። መኳንንቶችሽም ለብርታት በጊዜ የሚበሉ ማለት ፈርደው ከፍርድ በኋላ የሚበሉ ከሆኑ በሥራቸው ሀገር ትመሰገናለች ማለት ነው።

▶️፲፬. መክ.7፥8 ላይ "የነገር ፍጻሜው ከመጀመሪያው ይሻላል" ሲል ምን ለማለት ነው?

✔️መልስ፦ ከዚህ የነገር ፍጻሜ የተባለው የቀማችሁትን መልሱ የሚለው ሲሆን መጀመሪያ የተባለው "ቀሙ" የሚለው ነው። የነገር ፍጻሜው ከመጀመሪያው ይሻላል ማለት ቀሙ ከማለት የቀማችሁትን መልሱ ማለት ይሻላል ማለት ነው።

▶️፲፭. "የሰው ድካም ዅሉ ለአፉ ነው። ነፍሱ ግን አትጠግብም" ይላል (መክ.6፥7)። ምን ማለት ነው?

✔️መልስ፦ ሰው የደከመበት ነገር ሁሉ ለአፉ ነው ማለት ለጊዜያዊ ነገር ብቻ ነው። ነፍሱ ግን አትጠግብም ማለት ሰውነቱ ግን በቃኝ አትልም ማለት ነው።

▶️፲፮. "በዐይን ማየት በነፍስ ከመቅበዝበዝ ይሻላል" ይላል (መክ.6፥9)። ምን ማለት ነው?

✔️መልስ፦ ከዚህ በነፍስ መቅበዝበዝ የተባለው ባዕለ ጸጋ ራሱ መስጠት ሲገባው በግብዝነት ስጡልኝ ብሎ በሌሎች ሰዎች አማካኝነት ምጽዋት መስጠትን ነው። በዐይን ማየት የተባለው ራሱ ሄዶ ለነዳያን መመጽወትን ነው። ስለዚህ በግብዝነት በሌላ ሰው አማካኝነት ምጽዋት ከመስጠት ራስ ሄዶ በዓይን አይቶ መስጠት ይሻላል ማለት ነው።

▶️፲፯. "ከሣቅ ኀዘን ይሻላል። ከፊት ኀዘን የተነሣ ልብ ደስ ይሰኛልና" ይላል (መክ.7፥3)። ከፊት ኀዘን የተነሣ ልብ ደስ የሚሰኘው እንዴት ነው?

✔️መልስ፦ ይህ ለአላዋቂ ሰው የተነገረ ነው። ለአላዋቂ ሰው ከሚስቁለት ይልቅ ፊትን ማኮሳተር ይሻለዋል ለማለት ነው። ይኸውም ፊትን ሲያኮሳትሩበት ወደልቡ ይመለሳልና። በዚህም የልቡና ደስታን ያገኛልና ነው።

▶️፲፰. "ደጋሚ ሳይደግምባት እባብ ብትነድፍ ለደጋሚው ትርፍ የለውም" ይላል (መክ.10፥11)። ለማለት የተፈለገው ሀሳብ ምንድን ነው?

✔️መልስ፦ ከዚህ ደጋሚ የተባለ ባለመድኃኒት ሐኪም ነው። ሐኪም እባብ የነደፈውን ሰው ካላዳነው ለሐኪሙ ትርፍ የለውም ማለት ነው። የሐኪም ትርፉ በሽተኞችን ማዳን ነው ለማለት ነው።

▶️፲፱. "የሰማይ ወፍ ቃሉን ይወስደዋልና። ባለክንፎችም ነገሩን ይናገራሉና በልብኽ ዐሳብ እንኳ ቢኾን ንጉሥን አትስደብ። በመኝታ ቤትኽም ባለጠጋን አትስደብ" ይላል (መክ.10፥20)። የሰማይ ወፍ እና ባለክንፎች የተባሉት እነማን ናቸው?

✔️መልስ፦ ከዚህ የሰማይ ወፍ እና ባለክንፍ የተባለ ነገረ ሠሪ ነው። ባለክንፍ የሰማይ ወፍ ፈጣን እንደሆነ ሁሉ ነገርህን ነገረ ሠሪ በፍጥነት ለንጉሡ ተናግሮ ያስቀጣሀልና ንጉሡን አትማው ማለት ነው።

▶️፳. "ከዚህም ዅሉ በላይ ልጄ ሆይ ተግሣጽን ስማ። ብዙ መጻሕፍትን ማድረግ ፍጻሜ የለውም። እጅግም ምርምር ሰውነትን ያደክማል" ይላል (መክ.12፥12)። ብዙ መጻሕፍትን ማድረግ ፍጻሜ የለውም ሲልና እጅግም ምርምር ሰውነትን ያደክማል ሲባል ምን ማለት ነው?

✔️መልስ፦ ብዙ መጻሕፍትን ማድረግ ፍጻሜ የለውም ሲል ብዙ ብሎ የጠቀሰው የሟርት፣ የጥንቆላ መጻሕፍትን ነው። ከቅዱሳት መጻሕፍት ውጭ የሆኑ እነዚህን ክፉ መጻሕፍት አታንብብ ማለት ነው። እጅግም ምርምር ሰውነትን ያደክማል ማለት ክፉ መጻሕፍትን ማንበብ በነፍስም በሥጋም ይጎዳል ማለት ነው።

▶️፳፩. መክ.10፥15 ወደ ከተማ መሄድ ጠቢብ ያደርጋልን?

✔️መልስ፦ ወደ ከተማ መሄድ ብሎ ከዚህ የገለጸው ምጽዋትን ነው። ተመጽዋች በከተማ እንደሚበዛ በከተማው ሰዎችን መናገሩ ነው። ስለዚህ መመጽወት ጠቢብ ያደርጋል ማለት ነው።

▶️፳፪. "ቁጣ በሰነፎች ብብት ያርፋልና" ይላል (መክ.፯፥፱)። ቁጣ በሰነፎች ብብት ያርፋልና ሲል ምን ማለቱ ነው?

✔️መልስ፦ ብብት ያለው ልብ ለማለት ነው። በሰነፍ ሰዎች ልቡና ቁጣ ይሠለጥናል ማለት ነው።

▶️፳፫. "እኔም ከሞት ይልቅ የመረረች ነገር አገኘሁ። እርሷም ልቧ ወጥመድና መረብ የሆነ በእጆቿም መሳሪያ ያላት ሴት ናት። በእግዚአብሔርም ፊት ደግ የሆነ ከእርሷ ያመልጣል። ኃጢአተኛ ግን ይጠመድባታል" ይላል (መክ.፯፥፳፮)። ልቧ ወጥመድና መረብ የሆነ በእጆቿም መሣሪያ ያላት ሴት ሲል ምን ማለቱ ነው?

✔️መልስ፦ ይህች ሴት በእጇ ፈትፍታ እያበላች ሰውን በሽንገላ የምታጠምድ ዓይነት ሴት ናት።

▶️፳፬. መክ.7፥9 በመንፈስ መቆጣት ማለት ምን ማለት ነው?

✔️መልስ፦በመንፈስ መቆጣት አይገባም። በመንፈስ መቆጣት ማለት ቁጣን በቃል ወይም በነገር መግለጽ ማለት ነው።

▶️፳፭. መክ.10፥7 ንጉሥ እንደ አገልጋይ ሎሌም እንደንጉሥ የሆነበት ምክንያቱ ምንድን ነው?

✔️መልስ፦ ክፉ ንጉሥ ሲነግሥ ደግ ንጉሥ እንደ አገልጋይ ሲኖር፣ ንግሥና የማይገባው አገልጋይ ደግሞ ተሹሞ ይገኛል ማለት ነው።

▶️፳፮. መክ.7፥28 ላይ ሰሎሞን ነፍሱ የወደደችውን እንዳላገኘ ሲናገር መሓ.3፥4 ላይ ግን ነፍሱ የወደደችውን እንዳገኘ ይናገራል። አይጋጭም ወይ?

✔️መልስ፦ አይጋጭም። የሰው ልጅ ያለው ነገር ከእግዚአብሔር በጸጋ የተሰጠ ነው። ይህ ጸጋም በተለያዩ ምክንያቶች ሊነሣ ይችላል። ስለዚህ ሰሎሞን ነፍሱ የወደደችውን ቢያገኝም ነገር ግን ጥበቡ የጸጋ እንጂ የባሕርይ ስላልሆነ ሁሉን አላገኝም።


© በትረ ማርያም አበባው

▶️፲፭. "ሰነፍ እጆቹን ኰርትሞ ይቀመጣል። የገዛ ሥጋውንም ይበላል። በድካምና ነፋስን በመከተል ከኹለት እጅ ሙሉ ይልቅ አንድ እጅ ሙሉ በዕረፍት ይሻላል" ይላል (መክ.4፥5-6)። እጆቹን ኰርትሞ ይቀመጣል ሲል ምን ዓይነት አቀማመጥ ነው? አንድ እጅ ሙሉ እና ኹለት እጅ ሙሉ የተባሉት ምንድን ናቸው?

✔️መልስ፦ ከሁለት እጅ ሙሉ ይልቅ ማለት በሐሰት ከሚገኝ ሁለት እጅ ይልቅ፣ አንድ እጅ ሙሉ በዕረፍት ይሻላል ማለት በእውነት የሚገኝ አንድ እጅ ይሻላል ማለት ነው። እጅን ኮርትሞ መቀመጥ ማለት እጅን አጣጥፎ መቀመጥ ነው። ይኸውም ሳይሠሩ በስንፍና መኖር ነው።

▶️፲፮. "ወደ እግዚአብሔር ቤት በገባኽ ጊዜ እግርኽን ጠብቅ። ለመስማት መቅረብ ከሰነፎች መሥዋዕት ይበልጣልና። እነርሱም ክፉ እንዲያደርጉ አያውቁምና" ይላል (መክ.5፥1)። እግርኽን ጠብቅ ሲል ምን ማለት ነው? ለመስማት መቅረብ ያለው ምን ለመስማት ነው?

✔️መልስ፦ ወደ እግዚአብሔር ቤት በገባህ ጊዜ እግርህን ጠብቅ ማለት መልአክ እንዳይቀሥፍህ ወዲያ ወዲህ አትበል ማለት ነው። እንዲሁም ከቤተ እግዚአብሔር ሄደህ እንደገና ወደ ቤተ ጣዖት እንዳትሄድ እግርህን ጠብቅ ማለት አትሂድ። የጠቢባንን ቃል ለመስማት መቅረብ ጥበብን ያስገኛል። የሰነፍ መሥዋዕት ግን ከኃጢአት ንጹሕ ሆኖ ስለማያቀርበው ጥበብን ጸጋን አያገኝም ማለት ነው።

▶️፲፯. "ሰው በጥበብና በዕውቀት በብርታትም ከደከመ በኋላ ለሌላ ላልደከመበት ሰው ዕድሉን ያወርሳልና። ይህም ደግሞ ከንቱ ትልቅም መከራ ነው" ይላል (መክ.፪፥፳፩)። ዕድሉን ያወርሳል ሲል ምን ማለቱ ነው?

✔️መልስ፦ እድሉን ያወርሳል ማለት ጥሮ ግሮ ያገኘውን ሀብት ያወርሳል ማለት ነው። ከዚህ እድል ያለው ሀብቱን ነው። ሰው ጥሮ ግሮ ያገኘውን በሞተ ጊዜ ሌላ ይወርሰዋል። ይህ ደግሞ መከራ ነው ማለት ነው።

▶️፲፰. "ከፀሐይ በታችም የተሠራው ሥራ ሁሉ በእኔ ላይ ክፉ ነውና ሕይወትን ጠላሁ" ይላል (መክ.2፥16)። ሰሎሞን "ሕይወትን" ጠላሁ ሲል ምን ማለቱ ነው?

✔️መልስ፦ ሕይወትን ጠላሁ ማለቱ አዋቂውም ሰነፉም በእኩልነት የሚሞቱ ከሆነ መኖርን (ኑሮዬን) ጠላሁ ብሏል። ሰሎሞን ሞት መኖሩን ሲያስብና ሞት እንደማይቀርለት ሲያስብ የመኖር ጥቅሙ ምንድን ብሎ በዚህ ምድር መኖርን ጠላሁ ማለቱ ነው።

▶️፲፱. "ሰው በጥበብና በዕውቀት በብርታትም ከደከመ በኋላ ለሌላ ላልደከመበት ሰው ዕድሉን ያወርሳልና ይህም ደግሞ ከንቱ ትልቅም መከራ ነው" ይላል (መክ.2፥21)። የኔ ሀገር ሰው ልፋቱም ጥረቱም ለልጆቹ የሚያወርሰውን ጥሪት ማግኘት ነው። ይህ እንዴት ከንቱ ይሆናል?

✔️መልስ፦ ሰው ሠርቶ ለልጆቹ ማውረሱ መልካም ነው። ነገር ግን ከሞተ በኋላ ያ የለፋበት ነገር ለእርሱ ምንም የሚጠቅመው ነገር የለም ማለት በሰበሰበው ነገር በሥጋ አይጠቀምበትም ማለት ነው። ይህ ከሆነ ሰው ሁሉ ለዘለዓለማዊው ሕይወት የሚጠቅመውን ሥራ መሥራት ይገባዋል ማለት ነው።

▶️፳. "ሰነፍ እጆቹን ኮርትሞ ይቀመጣል የገዛ ሥጋውንም ይበላል" ይላል (መክ.4፥5)። "የገዛ ሥጋውን ይበላል" ሲል ምን ማለቱ ነው?

✔️መልስ፦ የገዛ ሥጋውን ይበላል ማለት የሚበላው አጥቶ ሥጋውን ያከሳል ያመነምናል ማለት ነው። በተጨማሪም ወገኖቹን ያማል ማለት ነው። ሌላውን ሰው ማማት ያለቢላዋ የሰውን ሥጋ መብላት ነውና። ይኸውም የሚበላው አጥቶ ከዘመዶቹ ሲበላ ይኖርና አንድ ቀን ዘመዶቹ የመለሱት እንደሆነ እነርሱ አግኝተው እኔ ባጣ ያባርሩኝን እያለ ያማቸዋል ማለት ነው።

▶️፳፩. "ብርንና ወርቅን የከበረውንም የነገሥታትና የአውራጃዎችን መዝገብ ሰበሰብሁ። አዝማሪዎችንና አረሆዎችን የሰዎች ልጆችንም ተድላ እጅግ የበዙ ሴቶችንም አከማቸሁ" ይላል (መክ.2፥8)። አረሆዎች የተባሉት እነማን ናቸው? ትርጉሙ ምንድን ነው?

✔️መልስ፦ አረሆዎች የሚላቸው ሴት አዝማሪዎችን ነው። የግእዙ መጽሐፍ ቅዱስና የእንግሊዘኛው የበለጠ ግልጽ አድርገውታል። ግእዙ "አስተጋባእኩ ሊተ ብሩረ ወወርቀ ወጥሪተ መንግሥት ወበሐውርተ። ወገበርኩ ሊተ ኀላይያነ ወኀላይያተ" ያለውን እንግሊዘኛው "I gathered me also silver and gold, and the peculiar treasure of kings and of the provinces: I gat me men singers and women singers" ብሎታል (KJV).

▶️፳፪. መክ.3፥18 ላይ "እኔ በልቤ ስለሰው ልጆች እንደ እንስሳ መሆናቸውን ያሳይ ዘንድ እግዚአብሔር ይፈርድባቸዋል አልሁ" ይላል። ሰውን እንደ እንስሳ ሲል እንዴት? ይፈርድባቸዋል ሲልስ ምን ማለት ነው?

✔️መልስ፦ ሰውም እንስሳም ሞታቸው ተመሳሳይ ነው። ሰውም ሲሞት በደመ ነፍሱ አራቱ ባሕርያት ተለያይተው ይፈርሳል ይበሰብሳል። እንስሳትም እንዲሁ ሲሞቱ አካላቸው ይፈርሳል ይበሰብሳልና ነው። ይፈርድባቸዋል ማለት ሰዎች እንደ እንስሳ እንዲሞቱ ያደርጋቸዋል ማለት ነው። "እንደ" የሚለው አነጻጻሪ በጥቂት ነገር ስለተመሳሰሉ የተነገረ እንጂ በሁሉ ነገር የሰው ሞትና የእንስሳት ሞት ይመሳሰላል ማለት አይደለም። ለሰው ከደማዊት ነፍስ በተጨማሪ የማትሞት የማትፈርስ ነባቢት ነፍስም አለችውና።

▶️፳፫. መክ.5፥5 ላይ "ተስለህ የማትፈጽም ከሆነ ባትሳል ይሻላል" ይላል። ከስእለት ጋር ያለው የቤተ ክርስቲያን አስተምህሮ ምንድን ነው? ሰው ስእለት ተስሎ የተሳለው ባይፈጸምለት ስእለቱን አያስገባም። ይህ ኃጢአት ይሆንበታል? ከዚህ ጋር ስእለት በምንሰጥበት ጊዜስ ግራህ ስትሰጥ ቀኝህ አትወቅ ከሚለው ቃል አንጻር ሰዎች በዐውደ ምሕረት ላይ ተጨብጭቦላቸው የሚሰጡትን ስጦታ እግዚአብሔር አይቀበልም ማለት ነው? ቢያብራሩልኝ?

✔️መልስ፦ ስእለት የምንፈልገውን መልካም ነገር ያደርግልን ዘንድ ከእግዚአብሔር ጋር የምንዋዋለው ስምምነት ወይም መሓላ ነው። ስምምነቱ እኛም የምንፈልገው ሲደረግልን የሚፈጸም ይሆናል። የጠየቅነው ነገር ካልተረደገ ስእለት መስጠትም አለመስጠትም ይቻላል። የፈቃድ ነው። የተሳልነው ስእለት በአደባባይ ከሆነ በአደባባይ በዐውደ ምሕረት መስጠት በደል አይሆንብንም። ነገር ግን ለከንቱ ውዳሴ ብለን ከሰጠን ዋጋችንን በምድር ስላገኘን ሰማያዊ ዋጋችንን ይቀንስብናል።

▶️፳፬. መክ.1፥7 ብዙ ውሃ ወደ ባሕር ሲጨመር ይመላ የለም ወይ?

✔️መልስ፦ ውሃ ወደ ውቂያኖስ ሲፈስ ከውቅያኖስ ያለውም በተለያዩ ምክንያት ስለሚተን መሙላት አይችልም። ይህ ብቻ አይደለም። የውቅያኖሱ ውሃ ሊጨምር ይችላል እንጂ ውቅያኖስ ሰፊ ስለሆነ አይሞላም ማለት ነው።

▶️፳፭. መክ.2፥14 የሁለቱ (የብልህ እና የአላዋቂ) መጨረሻ እንዴት ነው አንድ የሚሆነው?

✔️መልስ፦ ያው ሁለቱም በመሞት አንድ ስለሆኑ እንጂ ከሞት በኋላ ባለው ሕይወትስ ይለያያሉ። ጻድቁ በገነት፣ ኃጥኡ በሲኦል ይኖራልና። ሥጋቸው በመበስበስ፣ በመፍረስ ግን የሁለቱም አንድ ነው። ከዚህ የተጠቀሰውም ይህ ነው።

▶️፳፮. መክ.2፥17 ላይ እንዴት ሁሉ ክፉ ነው ይላል? እንደ gnostic ቁስ አካል ክፉ ነው እያለ ነው?

✔️መልስ፦ አይደለም። ከዚህ እየተነገረ ያለው ስለ ቁስ (Matter) አይደለም። ጉዳዩ ከፀሐይ በታች ስለሚደረጉ ድርጊቶች እንጂ ስለፍጥረታቱ አይደለም። በሰዎች ክፉ ድርጊት ምክንያት የዓለም ሕይወት (ኑሮ) ክፉ ሆነብኝ ማለት ከበደኝ ማለቱ ነው። ፍጥረታት ሁሉ ሲፈጠሩ እግዚአብሔር መልካም እንደሆኑ አየ ስለተባሉ በተፈጥሯቸው ክፉ አሉ አንልም።

💙 የጥያቄዎች መልስ ክፍል 158 💙

▶️፩. "ትውልድ ይኼዳል። ትውልድም ይመጣል። ምድር ግን ለዘለዓለም ነው" ይላል (መክ.1፥4)። ምድር ያለው ምንን ነው?

✔️መልስ፦ ምድር ያላት ይህችን የምንኖርባትን መሬት ነው። በመጽሐፍ ቅዱስ ዘለዓለማዊነት በሁለት ይተረጎማል። አንደኛው ብዙ ዘመንን ዘለዓለም ይለዋል። ሌላኛው ፍጻሜ የሌለውን ነገር ዘለዓለም ይለዋል። ከዚህ ምድር ግን ለዘለዓለም ነው ሲል ሰው ሰባ ሰማንያ ዓመት ብቻ ኖሮ ሲሞት ምድር ግን ብዙ ዘመን ትኖራለች ማለት ነው።

▶️፪. "ለማልቀስ ጊዜ አለው። ለመሣቅም ጊዜ አለው። ዋይ ለማለት ጊዜ አለው። ለመዝፈንም ጊዜ አለው" ይላል (መክ.3፥4)። ለመዝፈንም ሲል ለመዘመር ማለት ነው?

✔️መልስ፦ መጻሕፍት መዝሙርን ዘፈን እያሉ የሚገልጹበት መንገድ አለ። ከዚህ ለልቅሶ ጊዜ አለው ማለቱ ሰው ተቸግሮ፣ መከራ ደርሶበት የሚያለቅስበት ጊዜ አለ ማለት ነው። ለመዝፈንም ጊዜ አለው ማለት ሰው ደስ ብሎት የሚያመሰግንበት ጊዜም አለ ማለት ነው እንጂ ዘፈን ጽድቅ የሚሆንበት ጊዜ አለ ለማለት አይደለም።

▶️፫. "ለመውደድ ጊዜ አለው። ለመጥላትም ጊዜ አለው። ለጦርነት ጊዜ አለው። ለሰላምም ጊዜ አለው" ይላል (መክ.3፥8)። ለመጥላትም ጊዜ አለው የተባለው ምን ማለት ነው?

✔️መልስ፦ ለመጥላት ጊዜ አለው ማለት እግዚአብሔር እስራኤላውያንን በበደላቸው ምክንያት የሚጠላበት ጊዜ አለ ማለት ነው። ይህም እግዚአብሔር በባሕርይው ጥላቻ ኖሮበት የሚጠላቸው ሆኖ አይደለም። እርሱ በባሕርይው ፍቅር ነውና። በበደላቸው ምክንያት ይፈርድባቸዋል ለማለት ነው።

▶️፬. መክ.2፥14 ላይ "የጠቢብ ዓይኖች በራሱ ላይ ናቸው" ሲል ምን ማለት ነው? ቢብራራ።

✔️መልስ፦ የጠቢብ ዓይኖቹ በራሱ ላይ ናቸው ማለት የራሱን በደል እየመረመረ፣ ንስሓ እየገባ ይኖራል ማለት ነው። እንዲሁም በራስ ያለ ዓይን ወደ ሰማይ እንደሚመለከት ጠቢብ ሰውም ሰማያዊ ነገርን ይመለከታል ማለት ነው።

▶️፭. መክ.5፥18 ላይ "ከፀሐይ በታችም በሚደክምበት ድካም ሁሉ ደስ ይለው ዘንድ ነው። ይህ ዕድል ፈንታው ነውና" ይላል። ካልተሳሳትኩ ከዚህ በፊት እንደተማማርነው ዕድል ፈንታ የሚባል ነገር በሃይማኖት እንደሌለ አይተናል። ወይስ ዕድል እና ዕድል ፈንታ ይለያያሉን? ይህ ክፍለ ንባብ እንዴት ይተረጎማል?

✔️መልስ፦ እድልና እድል ፈንታ ልዩነት የላቸውም። ከዚህ ቀድም እድል ፈንታ የለም ያልነው ሥነ ምግባርን መሠረት ባደረገ ጉዳይ ነው። የሰው ልጅ በሚሠራው ሥራ መሠረትነት ገነትን ይወርሳል ወይም ወደ ሲኦል ይገባል እንጂ በእድል አይገባም ማለታችን ነበር። ድኅነት በእድል ሳይሆን ነጻ ፈቃዳችንን ተጠቅመን በምንሠራው ሥራ እና በእግዚአብሔር ቸርነት የሚደረግ መሆኑን ለመግለጽ ነው። ከዚህ ከመጽሐፈ መክብብ እድል ፋንታ ብሎ የገለጸው ነጻ ፈቃዳችንን ተጠቅመን በሠራነው ሥራ ምክንያት የሚደርስብን ወይም የሚደርሰን ውጤቱ ነው። ለምሳሌ ለኃጥኣን እድል ፋንታቸው ገሀነመ እሳት ናት ስንል በምድር በሠሩት ክፉ ሥራቸው ምክንያት ገሀነም ይገባሉ ማለታችን ነውና።

▶️፮. "ከፀሐይ በታች በሚደከምበት ድካም ሁሉ የሰው ትርፉ ምንድን ነው?" ይላል (መክ.1፥3)። ይህን ጥያቄ መልሼ ልጠይቅ። አንድ ክርስቲያን ከፀሐይ በታች ትርፉ ምንድን ነው?

✔️መልስ፦ ከፀሐይ በታች በዚህ ምድር ሳለን የመኖራችን ትልቁ ትርፍ መንግሥተ ሰማያትን ለመውረስ የሚያበቃ ሥራን መሥራት ነው። በዚህች ምድር መኖርን ለዘለዓለማዊው ሕይወት ዝግጅት ለማድረግ ካልተጠቀምንበት ትርፉ ኪሳራ ነው።

▶️፯. "ደግሞም ከፀሐይ በታች በጻድቅ ስፍራ ኃጥእ በኃጥእም ስፍራ ጻድቅ እንዳለ አየሁ" ይላል (መክ.3፥16)። የዚህ ንባብ ትርጓሜ ምንድን ነው?

✔️መልስ፦ በዚህች ምድር በጻድቅ ስፍራ ማለት ጻድቃን በሚኖሩበትና በኖሩበት ቦታ ኃጥኣንም ይኖራሉ ማለት ነው። ኃጥኣን በሚኖሩበት ቦታም ጻድቃን ይኖራሉ ማለት ነው። ይህ የሚሆነው ግን ከፀሐይ በታች በዚህ ምድር ነው እንጂ በመንግሥተ ሰማያት ጻድቃን ብቻ ሲኖሩ፣ በገሀነም ኃጥኣን ብቻ ይኖራሉ።

▶️፰. መክ.1፥3 ላይ "እግዚአብሔር ይደክሙበት ዘንድ ክፉ ድካምን ለሰው ልጆች ሰጥቷልና" ይላል። ከዚህ ላይ 'ክፉ ድካም' የተባለ ምንድን ነው?

✔️መልስ፦ ክፉ ድካም የተባለው በዚህ ምድር የምንደክመው ድካም ነው። የእግዚአብሔርን ሕጉን በማፍረሳችን፣ ክፉ ሥራን በመሥራታችን የመጣብን ስለሆነ ክፉ ድካም ብሎታል።

▶️፱. "ሕልም በሥራ ብዛት ይታያል" ይላል (መክ.5፥3)። ሕልም በሥራ ብዛት ይታያል ሲል ምን ማለት ነው?

✔️መልስ፦ ሰው ቀን ሲሠራ የዋለውን ማታ በሕልሙ የሚናገርበት ጊዜ መኖሩን የሚያመለክት ነው።

▶️፲. "ከሰማይም በታች የተደረገውን ዅሉ በጥበብ እፈልግና እመረምር ዘንድ ልቤን አተጋኹ። እግዚአብሔር ይደክሙባት ዘንድ ይህችን ለሰው ልጆች የሰጠ ክፉ ጥረት ናት" ይላል (መክ.1፥13)። ክፉ ጥረት የተባለችው ምንድን ናት?

✔️መልስ፦ ክፉ ጥረት ማለት ክፉ ድካም ማለት ነው። ጥረት የሚለው ጣረ ከሚለው አማርኛ የተገኘ ነው። ይኸውም በበደላችን ምክንያት የምንደክመው ድካም ነው። ምሥጢሩ ጥረህ ግረህ ብላ ከሚለው ጋር አንድ ነው።

▶️፲፩. "ጥበብንና እብደትን ሞኝነትንም ዐውቅ ዘንድ ልቤን ሰጠኹ። ይህም ደግሞ ነፋስን እንደ መከተል እንደ ኾነ አስተዋልኹ። በጥበብ መብዛት ትካዜ ይበዛልና። ዕውቀትንም የሚጨምር ኀዘንን ይጨምራልና" ይላል (መክ.1፥17-18)። ነፋስን እንደ መከተል ነው ሲል ጥበብን ይጨምራል? በጥበብ መብዛት ትካዜ ይበዛልና ሲባል ምን ማለት ነው?

✔️መልስ፦ ነፋስን መከተል ከንቱ ድካም ነው። ነፋስን በመከተል የሚገኝ ጥቅምም ስለሌለ ትርፉ ድካም ብቻ ነው። በጥበብ መብዛት ትካዜ ይበዛል ማለት ጠቢብ ሲያጠፋ የአዋቂ በዳይ ተብሎ ይፈረድበታል ማለት ነው። ጥበብን ያበዛ ሰው በጥበቡ ካልሠራበት ይጠየቅበታልና ነው። ወዘሰ የአምር ገቢሮታ ለሠናይት ወኢየገብራ ኃጢአተ ትከውኖ እንዲል።

▶️፲፪. "ለሰው ከሚበላና ከሚጠጣ በድካሙም ደስ ከሚለው በቀር የሚሻለው ነገር የለም። ይህም ደግሞ ከእግዚአብሔር እጅ እንደ ተሰጠ አየኹ" ይላል (መክ.2፥24)። ምን ማለት ነው?

✔️መልስ፦ ሰው ሲበላ፣ ሲጠጣ እና ደክሞ በሚያገኘው ገንዘብ ደስ ይለዋል ማለት ነው። ምግብ መጠጥ ከእግዚአብሔር ይገኛል። ሰው የፈለገ ቢደክም ረድኤተ እግዚአብሔር ካልተጨመረበት ምንም አያገኝምና ነው።

▶️፲፫. "ነገርን ዅሉ በጊዜው ውብ አድርጎ ሠራው። እግዚአብሔርም ከጥንት ዠምሮ እስከ ፍጻሜ ድረስ የሠራውን ሥራ ሰው መርምሮ እንዳያገኝ ዘለዓለምነትን በልቡ ሰጠው" ይላል (መክ.3፥11)። ዘለዓለምነትን በልቡ ሰጠው ሲል ምን ማለት ነው?

✔️መልስ፦ ሰው የእግዚአብሔርን ሥራ እንዳያውቅ እግዚአብሔር ለሰው ዘለዓለምነትን በልቡ ሰጠው ማለት ሰው እግዚአብሔርን በባሕርይው ለዘለዓለም አያውቀውም ማለት ነው።

▶️፲፬. "አኹን ያለው በፊት ነበረ። የሚኾነውም በፊት ኾኖ ነበር። እግዚአብሔርም ያለፈውን መልሶ ይሻዋል" ይላል (መክ.3፥15)። እግዚአብሔርም ያለፈውን መልሶ ይሻዋል ሲባል ምን ማለት ነው?

✔️መልስ፦ ለሰው ምጽዋትን የሚሰጥን ሰው እግዚአብሔር ክብር በመሥጠት ይሻዋል ማለት ያከብረዋል ማለት ነው።