Addis Admass

እኒህ ደሴቶች ሰዎች አይኖሩባቸውም። ፔንግዊን እና ሲል የተባሉ የባሕር እንስሳት መገኛ ናቸው። የአሜሪካ የንግድ ሚኒስቴር፣ ደሴቶቹ ላይ ታሪፍ የተጣለበትን ምክንያት አብራርቷል። ኸርድ ኤንድ ማክዶናልድ ደሴቶች ላይ ታሪፍ የተጣለው ሀገራት በደሴቶቹ በኩል ዕቃ የጫነ መርከብ ይዘው እንዳያልፉ ነው ሲሉ ሚኒስትሩ ሀዋርድ ላትኒክ ተናግረዋል።

ደሴቶቹ ከአውስትራሊያ 4 ሺህ ኪሎሜትር ርቀት ላይ ይገኛሉ። የአውስትራሊያ ባለሥልጣናት ደሴቶቹ ላይ ታሪፍ በመጣሉ መገረማቸውን አልደበቁም። የአውስትራሊያ ንግድ ሚኒስትር ዶን ፋሬል፤ "መቼም ይህ ውሳኔ በስህተት የተላለፈ ነው" ሲሉ ኤቢሲ ኒውስ ለተሰኘው ጣቢያ ተናግረዋል። አክለውም፤ "የችኮላ ሥራ" መሆኑን ያሳያል ብለዋል።

በአሜሪካ የቢቢሲ አጋር የሆነው ሲቢኤስ የአውስትራሊያ አካል የሆኑት ሰው አልባ ደሴቶች ላይ እንዴት ታሪፍ ሊጣል ቻለ ሲል ጠይቋል። "አንዳንድ ሥፍራዎችን ዝርዝር ውስጥ ካላካተትን አሜሪካ ላይ የበላይነት መቀዳጀት የሚፈልጉ ሀገራት በዚያ በኩል ሊያልፉ ይችላሉ" ሲሉ ላትኒክ ምላሽ ሰጥተዋል።

ፕሬዚዳንት ዶናልድ ትራምፕ በበርካታ የዓለም ሀገራት ላይ ታሪፍ መጣላቸውን ተከትሎ ባለፈው አርብ የአሜሪካ የአክሲዮን ገበያ ከአውሮፓውያኑ 2020 በኋላ ለመጀመሪያ ጊዜ ከ5 በመቶ በላይ አሽቆልቁሏል።

ሀገራት በመርከብ አማካይነት የንግድ ልውውጥ የሚያደርጉ ሲሆን ከአንድ ወደብ ወደ ሌላኛው የሚያደርጉት ጉዞ ትራንስሺፕመንት ይባላል። ፒው ቻሪቴብል የተባለው የሕዝብ ፖሊሲ ተቋም "አንዳንድ የጥፋት ኃይሎች ይህን ሥርዓት ሊበዘብዙት ይችላሉ" ይላል።

መንግሥታዊ ያልሆነው ድርጅት እንደሚለው፤ በመቶ ሚሊዮን ዶላሮች የሚያወጡ ቱና እና ሌሎች ዓሳዎች በሕገ-ወጥ መንገድ ይተላለፋሉ።
ከኸርድ ኤንድ ማክዶናልድ ደሴቶች ወደ አሜሪካ ምን ያህል ምርት እንደሚጓጓዝ የሚታወቅ ነገር የለም።የዓለም ባንክ መረጃ እንደሚያሳየው፤ ባለፉት ጥቂት ዓመታት ከደሴቶቹ ወደ አሜሪካ የተጋዘው ምርት መጠን አነስተኛ የሚባል ነው። በ2022 አሜሪካ 1.4 ሚሊዮን ዶላር የሚሆን ዋጋ ያለው ሰው አልባ "ማሽን እና የኤሌክትሪክ ዕቃ" ከደሴቶቹ አስጭናለች።

በትራምፕ የታሪፍ መዝገብ ላይ ከተካተቱ ሥፍራዎች መካከል ብሪቲሽ ኢንዲያን የውቅያኖስ ግዛት ይገኝበታል። ይህ ሥፍራ በወታደሮች የተያዘ ሲሆን፤ ለመጎበኘት ፈቃድ ማግኘት ያስፈልጋል።

(ቢቢሲ)

በትላንትናው ዕለት የትግራይ ክልል ጊዜያዊ አስተዳደር ፕሬዚዳንት በመሆን ለሁለት ዓመታት ያገለገሉትን አቶ ጌታቸው ረዳን በምስጋና ያሰናበቱት ጠ/ሚኒስትር ዐቢይ አህመድ፤ በዛሬው ዕለት የትግራይ ክልል ጊዜያዊ አስተዳደር የፕሬዚዳንትነት ርክክብ ሥነስርዓት መካሄዱን በትስስር ገጻቸው ባሰፈሩት መልዕክት ገልጸዋል፡፡

"ባለፈው አንድ ወር ገደማ የኢትዮጵያን ሕገ መንግሥት፣ የፕሪቶሪያን ስምምነትና የዲፕሎማቲክ ማኅበረሰቡን ምክር በማከል ሰፊ ውይይቶች ሲካሄዱ ቆይተዋል:: የአቶ ጌታቸው የሥልጣን ዘመን በሕጉ መሠረት ሲያበቃ የሚቀሩ ቁልፍ ሥራዎችን የሚያከናውን አካል፣ ጊዜያዊ መንግሥቱ መቀጠለ አለበት የሚል ድምዳሜ ከተያዘ በኋላ፣ ይሄንን ሽግግር ማን መርቶ ከግብ ሊያደርስ ይችላል? የሚሉ ውይይቶችን ስናደርግ ቆይተናል::" ብለዋል፤ጠ/ሚኒስትሩ በመልዕክታቸው፡፡

ዛሬ ስለተከናወነው የስልጣን ርክክብ ሥነስርዓት ሲገልጹም፤ "ዛሬ በይፋና በሰላማዊ መንገድ በአዲስ ባህል የሥልጣን ሽግግሩንና ቅብብሎሹን ለማካሄድ የተዘጋጀ ፕሮግራም አከናውነናል። ጄኔራል ታደሰ ባለፉት ሁለት ዓመታት የአቶ ጌታቸው ምክትል ሆነው ያገለገሉ ሰው ናቸው፡፡ ባለፉት ሁለት ዓመታት የነበሩ ድካሞችንና ጥንካሬዎችን በግልጽ የሚገነዘቡ ሰው ናቸው፡፡ አሁን ትግራይ ውስጥ ያለውን ክፍተት ሞልተው ወደፊት ሊወስዱ ይችላሉ የሚል እምነት በብዙ አካላት የታመነ ነው። የትግራይ ሕዝብ የጠማውን ሰላምና ልማት፣ እንደ ሌሎች ወንድሞቹ ወጥቶ የመግባት መሻት ስናሳካ፣ ለኢትዮጵያም ለአፍሪካም እጅግ ጠቃሚ የሆነ ነገር ሠርቶ ለማለፍ ታሪክ የሰጣቸውን ዕድል እንደሚጠቀሙበት ተስፋ አደርጋለሁ።" ብለዋል፤ጠ/ሚኒስትሩ፡፡