👉👉ቅኔ ዘገብር ሄር
👉 ጉባዔቃና
ሐካይ ገብር ዘግብረሐካይ ልማዱ
ይከሪ ግበ ለወላዲሁ አሐዱ
፪
ገብር ሄር ኢትከሪ ግበ መጸብሓን ክልዔቱ
ዘይከሪ ግበ እስመ ይወድቅ ውስቴቱ
፫ኛ
ሐካይ ገብር እምልቡናሁ ተጽኅቀ
መክሊተአሐዱ ሐካይ ፈረሱ እስመ ውስተግብ ወድቀ
፬ኛ
ሐካይ ገብር ብሂለአብድ ወብሂለሐካይ እምናዕሱ
መቃብሪሁ ለአቤል እስመይከሪ ለእርሱ
፭ኛ
መክሊተ ሐካይ ዕብን ውስተአፈግብ ተሐትመ
አሚን ወጽድቅ እንስሳ ከመኢይባዑ ቅድመ
👉 ዘአምላኪየ
መክሊተ ሐካይ ይስሐቅ ዘቅድመ አቤሜሌክ ጎየ
አዘቅተ መቃብረሙሴ ካልአ ከረየ
እስመ በቀዳሚ የሐስስ ክህደተ አካዝያስ ማየ
፪ኛ
ሐካይ ገብር መቃብረ ሄዋ አሐቲ
ከረየ ወአስተዳለወ ለመክሊት መዋቲ
ከመ አስተዳለወ ቃኤል መቃብረ አቤል ኬልቲ
፫ኛ
አግብርተ ሐካይ ከረዩ ከርሠምድረአዳም ኩሎ
እስመ ማይ መክሊተሐካይ ከርሠምድር ሀሎ
ወበውስቴቱ ረከበ ወርቀ ኢያኔስ ተኃጉሎ
፬ኛ
መክሊተ ሐካይ ይብል እመ አልብየ ምንትኒ
ግብ ማኅፀነእምየ ዓለመ ኮነኒ
ወመክፍለተ ርስትየ ኮነ ግበ ያዕቆብ መፍጠኒ
👉 ሚበዝሁ
ብሂለ ምንትኒ ሐካይ ሶበ ሰምአ ዘንተ ወብሂለ ምንት በከዊኖቱ
ወልደ ቤተ ሐካይ መክሊት አምጣነ ተቀብረ በሕይወቱ
ወይቤ ሐካይ ሚ ፈድፈዱ እለይጸልእዎ ሎቱ
፪ኛ
ኦ አዳም መክሊተ ሐካይ ገብር አንተ እንዘሰብእ
መሬት አንተ ወውስተ መሬት ትገብእ
እስመ እምሬት አንተ ኦ አዳም መክሊተ ሐካይ ጽኑእ
፫ኛ
ምድር ምድር ምድር ስምዒ ትዕዛዘ ሐካይ እግዚእኪ
መክሊተ ሐካይ መዓት እስመ ይመጽእ ኀቤኪ
ይቤ ነቢይ ስውረ ዓይኑ ለዮሴፍ ዘአስተርአየ ኪያኪ
፬ኛ
ይብል ኢዮብ ወርቀ ቤተ ሐካይ ገብር ከመማይ ሕይወትየ
ዲበምድር ተክዕወ መክሊተ ሐካይ ኩለንታየ
ወመሬተ ኮነ ዘኩለንታሁ ፍሉጥ መክሊተ ሐካይ ሥጋየ
፭ኛ
ሐራሴ መሬት ሐካይ ባዕለ ባዕላን ኮነ ወከዊነ ገብር ፈተወ
ዘርዐ ቤተ ሐካይ መክሊት እስመ ምስለ መሬት ተሰነዐወ
ወበዓለመሬት ሐካይ ዘርዐብዝኃወርቅ ይዝርዑ መጸብኃኒሁ ፈነወ
፮ኛ
ይቤ ነቢይ ዐሠርቱ ቃላት ለእግዚአብሔር ቃላቲሁ
ቀዲሙ ተጽኅፋ ዲበ መካልይ አጻብዒሁ
እንዘይብል ይብል ዜነወነ ለነ እግዚአ ነቢያት ዘበዝሁ
፯ኛ
ገብር ሄር ወገብር ምዕመን አስተዳለዉ እስፍንተ
አርባዕተ አልህምተ ወአባግዐ ዐሠርተ
ቅድመገፀ ንጉሥ ያቅርቡ እስመ በቀዳሚ መከሩ ወተዜያነው ግብተ
👉ዋዜማ
መክሊተ ምዕመን ነጋዴወርቅ ጠበብተቤተገብር ሄር
እለይቤሉከ ቦኑ
ኢትፍቱ ከዊነብእሲ ዘክልዔ ልሳኑ
ወኢትርዓይ አንተ ንዋየካልዕከ ፈኑ
መዝገበወርቁ ለዮሴፍ ሰብአ ምንትኑ
መጠንከ ለዮሴፍ መጠኑ
፪ኛ
ብሂል ብእሴ ጽድቅ ገብር ሄር እስመ ከመአብ ወላዲ
መካልይ ደቂቀቤትከ ይበዝሁ አዲ
ወበዲበጸጋ መክሊት ጸጋ መንፈስ ቅዱስ ትወዲ
ፍዳ ኃጥአን መክሊተ አምጣነትፈዲ
ከመዘቦ አብርሃም ነጋዲ
፪ኛ
ይቤለከ ይቤለከ መምሕረ ሃይማኖት መክሊተዘቦ ገብር ሄር
ድኅረ ሰማዕከ አርባዕተ
ኢትትናገር ማዕከለ ምዕመን ክልዔተ ቃላተ
እስመ ይሜንነከ ለከ እንዘ ትትናገር ክልዔተ
ተዘከርሂ ሐዋርያተ
አምጣነ ትረክብ ክብረ ወሰማያዊተ
ወካልአ ኢትዘከር አንተ
👉ሥላሴ
መንግሥተ ሰማይ መክሊተ ምዕመን ብእሴጽድቅ ወብሂለገብር ሄር ዘተደለወት ሶቤሃ
ዐሥሮነ ደናግለሙሴ ትመስል አሜሃ
ወትመስል ወርቀ ዘሙሴ ዘተመሰለት ለሊሃ
ወመዝገበ ኤልያስ ኩለንታሃ
አምጣነ ስርግዉ በወርቅ ውሳጤሃ
ወበጽድቅ ፍናጽድቅ ፍናሃ
፪ኛ
ለዮሴፍ አሐዊሁ አሐወ ቤተ ዮሴፍ መካልይ እለ ዐሠርቱ ሁልቆሙ ኀበሀገረባዕደ ዘርህቀ
ወረዱ ዝጉባኒሆሙ ነሲዖሙ ወርቀ
ከመ ይሳየጡ ዘንተ እክለ ቤተኤልያስ ጽድቀ
እምድኅረ አድለቅለለቀ አድለቅለቀ
ምንዳቤ አሐዱ ሐካይ እስከነተጽሕቀ
ልቡናሁ ለሐካይ ዘወድቀ
፫ኛ
ከዋኔምንትኑ መክሊተ ሐካይ አረጋዊ ወምንት ምንት ደዌሁ ወዘዚአሁ ሕማም
እስመጠፍአ እምአዕይንቲሁ ብዝሐ ወርቅ ንዋም
ወተምኔተየዋህ መክሊት ዘመደሥጋሁ ለካም
እምኑኃዘመኑ ኢይትፌጸም
ወበከመ ኀዘነ እንከ መጠነአዳም
መቃብረ ወረደ በቅድም
👉ዘይዕዜ
ብዝኃ ወርቅ መጽሐፍ በከመይቤ
ድኅረ ሰምዓት ሰምዓት አሚነ ሥላሴ ብዕሥራተ
መካን መክሊተ ምዕመን ወለደት ዐሠርተ
ወበእንተዝ አብዝሐት ትፍስሕተ ወሐሴተ
አብዝኃትሂ ብዕሥራተ ወተናግሮተ
እስከነመላእክት አንከሩ እንዘ ይኔጽሩ ዘንተ
አብዝኃትሂ ብዕሥራተ ወተናግሮተ
፪ኛ
ድኅረሴጠ ሴጠ ወተሳየጠ መክሊተ ሐካይ ነዳይ
ላህመ ቤተ እዝራ ተከብቶ
ነዳይ መክሊተሐካይ ሐነፀ መቅበርቶ
ወበላዕሌሁ ሰሐቁ እለርዕዩ ከዊኖቶ
ወወለተ ምዕመን ወርቅ አስተሐቀረቶ
መክሊተ ሐካይ ነዳይ ኀበኀበይገብር ከንቶ
ወወለተ ምዕመን ወርቅ አስተሐቀረቶ
፫ኛ
ይቤ ሰሎሞን ምሳሌወርቅ ዘየአምሮ እምቅድም
ከመበእሲ ጊጉይ
ይበኪ በከናፍሪሁ ጸላዒ ሐካይ
ወምስለሰብአ ጽድቅ ምዕመን ምንተኒ ኢይትረዓይ
እንዘ ይኔጽሮ ርሁቀ እስመ ይጎይይ
ጸላዒ ሐካይ ዘውሳጤሁ ጠዋይ
እንዘ ይኔጽሮ ርሁቀ እስመ ይጎይይ
👉 መወድስ
ዘመነ ምንትኑ ዘመን ዘመነምንዳቤ
መንፈቀ ወርኃጾም የዋህ ዘይረግሞ እስፍንተ
ዶርሆቤተ ምዕመን መክሊት እንዘ ያወጽእ ዐሠርተ
እስመሰብዕ መክሊተ ሐካይ ኢያውጽአ ምንተ
ወዘኢያዕመረ ኩለታሁ መክሊተ ሐካይ ሰብዕ
ተዋረደ ወተትሕተ
ምዕመንሂ ነጋዴወርቅ ድኅረአስተርአየ ዘንተ
አቀረበ ለእግዚኡ አኮቴተ ወስብሐተ
ወነጋዴወርቅ ምዕመን እመአብዝሐ ማኅሌተ
ፍጡነ ይደልዎ እስመነስአ በረከተ
፪ኛ
ይቤ ነቢይ ዘመነሉዓሌ ዘበደኃሪ ምዕመን ብሂለ ምዕመን ሄር
ኦ ሐካይ ሰብዐ ቤተሐካይ ገብር
መክሊት መክፈልተ ርስትከ ተዐውቀ በምድር
እስመ ትብል ይደልዎ ለዘመደሥጋ መክሊት ዘአቤል መቃብር
ዘመደሥጋሂ መክሊተዘቦ ዘመደ ምዕመን ክቡር
በከመሐካይ ጸላዒሁ ምንተኒ ኢየአምር
ወዘመደሥጋ መክሊት መኮንነፍቅር
ኢይሄሊ ምንተኒመ ወነገረምንት ኢይዜከር
፫ኛ
በከመ ይቤ መጽሐፍ አሚነሥላሴ
በከዊኖቱ ሠናየ መምሕረ ትህትና ወፍቅር
ገብር ሄር ወብሂለ ምዕመን ገብር
ተሰይመ በዲበዐሠርቱ መካልይ አህጉር
እስመገብር ብሂለሄር በዓለ ትህትና ፍጽምት
ወበዓለብዙህ ምስጢር
ምዕመንሂ ዘየአምሮ መጠነምዕመን ክቡር
ይብል ወርቀዮሴፍ ብዝኃትህትናሁ ኢይትነገር
አምጣነ ሐረዮ እምቅድም እግዚአብሔር
አዕላፍ ይባርክዎ ወይሰብሕዎ በማህበር
፬ኛ
ምስለ ብእሴሃ ሐካይ ዘተበዐሰት ብእሲተ ሐካይ መክሊት አምሳለ ራሄል ወርብቃ
ለብእሴሃ ሐካይ ዘየአምራ እራቃ
ሰአለቶ ወተማኅፀነቶ ዲበምድር ወዲቃ
እንዘ ትብል መሐረኒ ወተሰዐለኒ ሊተ እንበለይርዐይ ደቂቃ
ብዝኃወርቅሂ መፍቀሬዛቲ ዘእምቀዲሙ አጽሓቃ
ምዕረ የኃዝና ወምዕረ ያስሕቃ
ወገብር ሄር እንዘ ያርህቃ
ከመ ዮሴፍ ያቀርባ ልቡናሐካይ ብእሴንድቃ
👉 አጭር መወድስ
መክሊተ ሐካይ ወላድ ከዋኒተምንት ይእቲ
ወሊዳ አሐደ እስመተርፈት ዛቲ
👉ሊ/ጉ አባ ገብረማርያም
@beteyared21@beteyared21@beteyared21