Development Bank of Ethiopia (DBE)

የኑሮ ውድነትን በዘላቂነት ለመከላከል የሚያስችለው ብቸኛው አማራጭ የስራ ዕድሎችን በማስፋትና ምርታማነትን ማሳደግ እንደሚገባ በኢፌዴሪ የሕዝብ ተወካዮች ምክር ቤት የመንግስት ልማት ድርጅቶች ጉዳዮች ቋሚ ኮሚቴ ገለጸ።

ቋሚ ኮሚቴው የኢትዮጵያ ልማት ባንክ የወልቂጤ ዲስትሪክት የስራ እንቅስቃሴን በተመለከተበት ወቅት እንደገለጸው፣ የአምራች እና አገልግሎት ሰጪ ተቋማትን አቅም በማሳደግ ምርትና ምርታማነታቸውን በመጨመር በሀገራችን የሚፈጠረውን የዋጋ ንረት በዘላቂነት መከላከል ይቻላል ብሏል።

ቋሚ ኮሚቴው፤ የወልቂጤ ዲስትሪክት በቅርበት ሆኖ ድጋፍ እና ክትትል በሚያደርግላቸው ፕሮጀክቶች ምልከታ አካሂዷል። በተደረገው የመስክ ምልከታም በቂ የሆነ ምርትና የግብዓት አቅርቦት መኖሩን መታዘቡን የገለፀ ሲሆን፣ ከስራ ዕድል ፈጠራ እና ከማህበረሰብ አቀፍ አገልግሎቶች ጋር በተያያዘ እየተሰሩ ያሉ ስራዎች አበረታች መሆናቸውን ገልጿል።

የውጭ ምንዛሪ እጥረትን ከመቀነስ እና ከውጭ የሚገቡ ምርቶችን በሃገር ውስጥ መተካት የግል ባለሀብቱ የማይተካ ሚና ይጫወታል ያለው ቋሚ ኮሚቴው፤ በክልሉ የሚገኙ ባለሀብቶች ወደ ምስራቅ አፍሪካ ሀገራት ምርታቸውን ለመላክ አቅደው የሚሰሩበትን ሁኔታ በቅርበት መደገፍ ይገባል ብሏል።

በኢትዮጵያ ልማት ባንክ የወልቂጤ ዲስትሪክት ስራ አስኪያጅ አቶ ጉሩሙ ዶጫ በበኩላቸው፤ ባንኩ የሚደግፋቸው አምራቾች ውጤታማ በሚሆኑበት ወቅት የባንኩም ትርፋማነት የሚጨምር መሆኑን በመረዳት፤ ተቋማቱ ለሚያጋጥማቸው ማንኛውም አይነት ችግር ፈጥኖ መፍትሔ በመስጠት እና ከባለድርሻ አካላት ጋር ተቀናጅቶ በመስራት ምርትና ምርታማነትን ለመጨመር እየሰራ መሆኑን አስረድተዋል።

ሁሉም የሀገሪቱ ዜጎች ባንኩ በሚሰጣቸው የልማት ስራዎች ተጠቃሚ እንዲሆኑ ለማስቻል ከወለድ ነጻ የሆነ የፋይናንስ አገልግሎትን ወደ ስራ ማስገባቱን ጠቁመው፤ ከልማት ስራው በተጨማሪ ባንኩ በተለያዩ ማህበረሰብ አቀፍ ስራዎች ግንባር ቀደም በመሆን እየተንቀሳቀሰ እንደሚገኝ አስረድተዋል፡፡

የኢትዮጵያ ልማት ባንክ መሰረታዊ የሰራተኞች ማህበር ከባንኩ ሰራተኞች ጋር በጋራ በመሆን ለቀድሞ የባንኩ ፕሬዝዳንት ዶ/ር ዮሐንስ አያሌው የሽኝት እና የምስጋና መርሃ ግብር አካሄደ፡፡

የኢትዮጵያ ልማት ባንክ መሰረታዊ የሰራተኞች ማህበር ፕሬዝዳንት አቶ ዮሴፍ ተስፋዬ በመክፈቻ ስነስርአቱ ወቅት እንዳሉት ለባንኩ የዛሬ ስኬት ቁልፍ የአመራር ሚና የተጫወቱትን የቀድሞ የባንኩ ፕሬዘዳንት ዶ/ር ዮሐንስ አያሌው በክብር ለመሸኘት እንዲሁም በቅርቡ የተመደቡትን የባንኩ ፕሬዘዳንት ዶ/ር እመቤት መለሰ እንኳን ደህና መጡ ለማለት ያለመ ፕሮግራም መሆኑን ገልጸዋል፡፡

በፕሮግራሙ ለቀድሞ ፕሬዝዳንት ዶ/ር ዮሐንስ አያሌው እውቅናና ስጦታ ከሰራተኛው ተበርክቶላቸዋል፡፡

የሄደውን አመስግኖ መሸኘት እንዲሁም አዲስ የመጣውን በመልካም ተቀብሎ ምቹ የስራ አካባቢ ፈጥሮ ውጤታማ ስራ መስራት ያስፈልጋል ያሉት አቶ ዮሴፍ አዲስ ተመድበው በመስራት ላይ ለሚገኙት የባንኩ ፕሬዝዳንት ዶ/ር እመቤት መለሰ የእንኳን ደህና መጡ ስጦታ ከሰራተኞች ተበርክቶላቸዋል፡፡

ባንኩ በርካታ ውጤቶችን እንዲያስመዘግብ ከዶ/ር ዮሐንስ ጋር በመሆን ላገለገሉ የባንኩ ምክትል ፕሬዝዳንቶችም ስጦታ ከሰራተኛው ተበርክቶላቸዋል፡፡

በፕሮግራሙ ላይ የተገኙት የኢትዮጵያ የፋይናንስ ተቋማት ሰራተኛ ማህበር ኢንዱስትሪ ፌዴሬሽን ፕሬዝዳንት አቶ ደስታ በርሄ እንዳሉት ዶ/ር ዮሐንስ በፈታኝ ሁኔታ ውስጥ የነበረውን ባንክ መላውን ሰራተኛ አስተባብረው በመስራታቸው በርካታ ስኬቶችን እንዲያስመዘግብ በማድረጋቸው መመስገን ይገባቸዋል ያሉ ሲሆን፣ ለሰራተኛውም የደመወዝ ጭማሪ እና ጥቅማጥቅም መንግስት እንዲፈቅድ በማድረግ የበኩላቸውን ተወጥተዋል ብለዋል፡፡

አዲስ ለተሾሙት የባንኩ ፕሬዝዳንትም ባንኩ ስኬቶችን እንዲያስመዘግብ ከሰራተኛው ጋር በቅንጅት ውጤታማ ስራ እንዲሰሩ አቶ ደስታ በርሄ አደራ ብለዋል፡፡ ባንኩ ከዚህ በፊት እንደ ተቋም የሽኝትና የምስጋና እንዲሁም አዲስ ለተሾሙት ፕሬዚዳንት ደግሞ አቀባበል ያደረገ ሲሆን፣ የአሁኑ መርሃ ግብር ሰራተኛውን በማስተባበር በማህበሩ አማካኝነት የተዘጋጀ ነው።

የኢትዮጵያ ልማት ባንክ ፋይናንስ የሚያደርጋቸው ፕሮጀክቶች የህብረተሰቡን ተጠቃሚነት በማረጋገጥ ትርፋማና ጠንካራ ተቋማት እንዲሆኑ መስራት እንደሚገባ በኢፌዴሪ የሕዝብ ተወካዮች ምክር ቤት የመንግስት ልማት ድርጅቶች ጉዳዮች ቋሚ ኮሚቴ አሳሰበ።

የኢትዮጵያ ልማት ባንክ የሀገሪቱን የግብርና ሜካናይዜሽን ከማዘመንና ከማስፋፋት እንዲሁም የስራ ዕድሎችን ከመፍጠር አኳያ ሚናው የጎላ ነው ያለው ቋሚ ኮሚቴው፤ የህብረተሰቡን የኑሮ ደረጃ ማሻሻል የሚያስችሉ አምራች እና አገልግሎት ሰጪ ተቋማትን በአካባቢው ከሚገኙ ዩንቨርሲቲዎች፣ ኢንዱስትሪ ፓርኮች እና የግብርና ምርምር ተቋማት ጋር በመቀናጀት እንዲሁም የገበያ ትስስር በመፍጠር ሁሉም ባለድርሻ አካላት ተጠቃሚ የሚሆኑበትን ዕድል መፍጠር ይገባል ብሏል።

የቋሚ ኮሚቴ አባላት አክለውም፤ ባንኩ በዋናነት በሚሰጣቸው የሊዝ ፋይናንስ፣ የፕሮጀክት ፋይናንስ እና የተለየ የቢዝነስ ሀሳብ ላላቸው ግለሰቦች የሚሰጠውን የፋይናንስ አቅርቦት ለሀገር ኢኮኖሚያዊ እድገትና ብልጽግና የማይተካ ሚና እንዳለው በመገንዘብ የተጀመሩ የሪፎርም ስራዎችን ማጠናከር ይገባል ብለዋል።

ባንኩ ፋይናንስ የሚያደርጋቸው አምራችና አገልግሎት ሰጪ ተቋማት እየሰሯቸው የሚገኙ ዘርፈ ብዙ ተግባራት በሀገሪቱ የሚከሰተውን የኑሮ ውድነት በመቀነስ የገበያ መረጋጋት ለመፍጠር ከፍተኛ አስተዋፅኦ እንዳላቸው በመገንዘብ ተጨማሪ ፕሮጀክቶችን ወደ ስራ ማስገባት እንደሚገባ የቋሚ ኮሚቴው አባላት ገልጸዋል።

የመንግስት ልማት ድርጅቶች ጉዳዮች ቋሚ ኮሚቴ ምክትል ሰብሰቢ የተከበሩ ስለሺ ኮሬ (ዶ/ር) የግብርና ፕሮጀክቶች የተቀናጀ የግብርና ዘዴዎችን ተጠቅመው ምርታማነት ከመጨመር በሻገር የአካባቢ ስነ-ምህዳር ለመጠበቅ የሚያስችል የተፈጥሮ ማዳበሪያ ዝግጅት በጥናት እና ምርምር በማስደገፍ የማህበረሰቡ የምግብ ዋስትና እንዲረጋገጥ አጠናክሮ መስራት እንዳለባቸው አሳስበዋል።

በኢትዮጵያ ልማት ባንክ የሐዋሳ ዲስትሪክት ስራ አስኪያጅ አቶ ተሾመ ጌታነህ በበኩላቸው፤ባንኩ የሚደግፋቸው የተለያዩ ተቋማት ውጤታማ ሲሆኑ የባንኩም ትርፋማነት የሚጨምር መሆኑን በመረዳት፤ ተቋማቱ ለሚያጋጥማቸው ማንኛውም አይነት ችግር ፈጥኖ መፍትሔ በመስጠት እና ከባለድርሻ አካላት ጋር ተቀናጅቶ በመስራት ምርትና ምርታማነትን ለመጨመር እየሰራ መሆኑን አስረድተዋል።

ተጨማሪም ሁሉም የሀገሪቱ ዜጎች ባንኩ በሚሰጣቸው የልማት ስራዎች ተጠቃሚ እንዲሆኑ ለማስቻል ከወለድ ነጻ የሆነ የፋይናንስ አገልግሎትን ወደ ስራ ማስገባቱንም ጠቁመዋል፡፡

ቋሚ ኮሚቴው በክልሉ ውስጥ በኢትዮጵያ በልማት ባንክ የሚደገፉ የእርሻ ልማት፣ የዱቄት ፋብሪካ፣የቴራዞን ማምረቻ እና ፈርኒቸርና የውስጥ ዲዛይንን የስራ እንቅስቃሴን ተዘዋውሮ ተመልክቷል።