EBC (Ethiopian Broadcasting Corporation)

የዩሮፓ ሊግ የምድብ የመጨረሻ ጨዋታዎች ዛሬ ይደረጋሉ
***************

ሁሉም ጨዋታዎች ምሽት 5 ሰዓት ሲደረጉ የእንግሊዙ ማንቸስተር ዩናይትድ ወደ ሮማንያ አቅንቶ ከስትዋ ቡካሬስት ጋር ይጫወታል፡፡

በዩሮፓ ሊጉ ምንም ጨዋታ ካልተሸነፉት ሶስት ቡድኖች አንዱ የሆነው ማንቸስተር ዩናይትድ ምርጥ 8 ውስጥ ሆኖ ለማጠናቀቅ በጨዋታው ነጥብ ማግኘት ይጠበቅበታል፡፡

በዩናይትድ በኩል ሜሰን ማውንት፣ ፊል ጆንስ እና ሉክ ሾው በጉዳት ጨዋታው የሚያልፋቸው ሲሆን ማርከስ ራሽፎርድም ከስብስቡ ጋር አልተጓዘም፡፡

የሮማኒያው ቡድን በዩሮፓ ሊጉ 8ኛ ደረጃ ላይ የሚገኝ ጠንካራ ቡድን ነው፡፡

በሌሎች ተጠባቂ ጨዋታዎች ሮማ ከኢንትራክት ፍራንክፈርት ቶተነሀም ከ ኤልፍስቦርግ ምሽት 5 ሰዓት ይጫወታሉ፡፡

የፌደራል ፖሊስ SWAT ቡድን ለዱባይ ፖሊሳዊ ውድድር ልምምድ እያደረገ ነው
*****************

በተባበሩት ዐረብ ኢምሬትስ በተዘጋጀው የዓለም አቀፍ ፖሊሳዊ ውድድር (2025 SWAT Challenge) ላይ ለመወዳደር ወደ ዱባይ ያቀናው የኢትዮጵያ ፌደራል ፖሊስ SWAT ቡድን ልምምድ እያደረገ ይገኛል፡፡

ቡድኑ በአልሩዋይ ከተማ በሚገኘው ማሰልጠኛ ማዕከል ነው ልምምዱን እያከናወነ የሚገኘው።

ይህ ዓለም አቀፍ ፖሊሳዊ ውድድር በፈርንጆቹ ከየካቲት 1 እስከ 5 እንደሚካሄድ የኢትዮጵያ ፌደራል ፖሊስ መረጃ አመልክቷል።

አሜሪካ ለኤች አይ ቪ ቫይረስ ህክምና የምትሰጠውን ድጋፍ እንደምትቀጥል ገለፀች
********************

በዓለም አቀፍ ደረጃ ከኤች አይቪ ቫይረስ ጋር ለሚኖሩና በቫይረሱ ምክንያት ችግር ላይ ለሚገኙ አካላት ህክምናና ድጋፍ እንዲያገኙ አሜሪካ የምትሰጠውን ድጋፍ እንደምትቀጥል የሀገሪቱ የውጭ ጉዳይ ሚኒስትር ማርኮ ሩቢዮ አስታውቀዋል፡፡

ፕሬዝዳንት ዶናልድ ትራምፕ በትረ ስልጣናቸውን በተቀበሉበት ቀን ካስተላለፏቸው ትእዛዞች መካከል አሜሪካ የምትሰጠው ማንኛውም የውጭ እርዳታ ለሚቀጥሉት 3 ወራት እንዲቆም መወሰናቸው ይታወሳል፡፡

በተለይም ለዓለም ጤና ድርጅት 18 በመቶ የገንዘብ ምንጭ የሆነችው አሜሪካ በ12 ወራት ውስጥ ከዓለም ጤና ድርጅት አባልነት ለመውጣት መወሰኗ ድርጅቱ “ጤና ለሁሉም” በሚል እየሰራቸው ለሚገኙ ስራዎች ከፍተኛ የፋይናንስ ችግር እንደሚገጥመው ሲገለፅ ቆይቷል፡፡

የአሜሪካ የውጭ ጉዳይ ሚኒስትር ማርኮ ሩቢዮ ይፋ ባደረጉት መረጃ ሃገሪቱ በ55 ሀገራት ከኤች አይ ቪ ቫይረስ ጋር ለሚኖሩ ወገኖች እየሰጠች የነበረውን አስቸኳይ ድጋፍ እንደምትቀጥል አረጋግጠዋል፡፡

ለህይወት አድን መድሃኒት መግዣ፤ ለህክምና፣ ለምግብና መጠለያ እንዲሁም በስራው ላይ ለሚገኙ የአስተዳደር ወጪዎች የአሜሪካ ድጋፍ ይቀጥላል ነው የተባለው፡፡
https://web.facebook.com/EBCzena/posts/pfbid0awFXVBndBvptzSaw7E7hhi3AXRwcZEGfXKN6PvKMPs1MfQ13xvhwjkr2mFxhnKaNl

ሜታ ኩባንያ ለዶናልድ ትራምፕ 25 ሚሊዮን ዶላር ካሳ ለመክፈል ተስማማ
*************

ከአምስት ዓመት በፊት በተካሄደው የአሜሪካ ምርጫ፣ ፌስቡክ ዶናልድ ትራምፕን የምርጫ ውጤትን አለመቀበል እና በአሜሪካ አለመረጋጋት እንዲከሰት ምክንያት የሚሆኑ ይዘቶችን በፌስቡክ ገጻቸው ላይ አጋርተዋል በሚል እገዳ ጥሎባቸው ነበር።

ይህን የተቃወሙት ዶናልድ ትራምፕ ሜታ ሀሳብን የመግለጽ ነፃነቴን አሳጥቶኛል ሲሉ ጉዳዮን ወደ ሕግ መውሰዳቸው ይታወሳል።

በዚህም የሜታ ኩባንያ ላይ ክስ መስርተው ሲከራከሩ ቆይተዋል።

ዶናልድ ትራምፕ ለሁለተኛ ጊዜ ወደ ነጩ ቤተ መንግስት ሲመለሱ ክርክሩ ቢቀጥልም ሜታ ኩባንያ ክርክሩን በድርድር ለማቋረጥ እና 25 ሚሊዮን ዶላር ካሳ ለመክፈል መስማማቱ ተገልጿል።https://web.facebook.com/EBCzena/posts/pfbid0oReD4iapuLiNauKr2BPZ67Bjbst2ShNSRXJjYhJ1LDwW7KEtgiXnBtKwAP3giWPZl

የደቡብ ሱዳን ህዝቦች ነፃነት ንቅናቄ ፓርቲ ዋና ፀሐፊ በብልፅግና ፓርቲ ጉባኤ ለመታደም አዲስ አበባ ገቡ
*******

የደቡብ ሱዳን ህዝቦች ነፃነት ንቅናቄ ፓርቲ ዋና ፀሐፊ ፒተር ላም ቦዝ በብልፅግና ፓርቲ ሁለተኛ ጠቅላላ ጉባኤ ለመታደም አዲስ አበባ ገብተዋል።

የደቡብ ሱዳን ህዝቦች ነፃነት ንቅናቄ ፓርቲ ዋና ፀሐፊ ፒተር ላም ቦዝ ቦሌ ዓለም አቀፍ አውሮፕላን ማረፊያ ሲደርሱ የንግድና ቀጠናዊ ትስስር ሚኒስትር ካሳሁን ጎፌ(ዶ/ር)፣ የውጭ ጉዳይ ሚኒስትር ድኤታ አምባሳደር ብርቱካን አያኖ እንዲሁም የውጭ ጉዳይ ሚኒስቴር ኢንስቲትዩት ምክትል ዳይሬክተር አብዲ ዘነበ(ዶ/ር) አቀባበል አድርገውላቸዋል።

የብልጽግና ፓርቲ ሁለተኛ ጠቅላላ ጉባኤውን " ከቃል እስከ ባህል" በሚል መሪ ሐሳብ ከጥር 23 እስከ 25 በአዲስ አበባ የሚያካሂድ ሲሆን ጉባኤ ላይ ለመሳተፍ የተለያዩ ሀገራት አጋር ድርጅቶች ተወካዮች አዲስ አበባ እየገቡ ይገኛል።

በጉባኤው ላይ የጎረቤት ሀገራት እና የብሪክስ አባል ሀገራት እህት ፓርቲዎች ከፍተኛ አመራሮች እደሚታደሙ ይጠበቃል።

በእድሉ ፈቀደ

በደቡብ ምዕራብ ኢትዮጵያ ክልል የተቀናጀ የተፋሰስ ልማት ስራ ተጀመረ
******************

በደቡብ ምዕራብ ኢትዮጵያ ህዝቦች ክልል ካፋ ዞን ሺሾ እንዴ ወረዳ በተጀመረው መርሐ ግብር ላይ የተገኙት የክልሉ ርዕሰ መስተዳድ የኢኮኖሚና መሰረተ ልማት ዘርፍ አማካሪ ምትኩ በድሩ (ዶ/ር ኢ/ር) እንደገለጹት፤ በየዓመቱ የሚከናወነው የተፋሰስ ልማት ሥራ በክልሉ ውጤታማ እየሆነ ይገኛል ብለዋል።

ክልላዊ የተፈጥሮ ሀብት ሽፋን በየጊዜው እንዲጎለብት የተፋሰስ ልማት ሥራው አስተዋጽኦ እያበረከተ ነው ብለዋል።

ውጤቱን ቀጣይ ለማድረግ እና የአርሶ አደሩን ዘላቂ ተጠቃሚነት ለማረጋገጥ ትኩረት ተሰጥቶ እንደሚሰራ ተናግረዋል።

የካፋ ዞን ምክትል አስተዳደርና ገቢዎች መምሪያ ኃላፊ አቶ ደመላሽ ንጉስ ከዚህ ቀደም በለሙ ተፋሰሶች አርሶ አደሮች የሥነ ሕይወታዊ ሥራዎችን በማከናወን ተጠቃሚ መሆናቸውንም አስገንዝበዋል።https://web.facebook.com/EBCzena/posts/pfbid0e9g1NNm1kcszc7SoAajLrnsbHyuYWMsRCFTSdhm8q2ipdnVon1qgKTLSNCWzFGa2l

ምክር ቤቱ የአጠቃላይ ትምህርት ረቂቅ አዋጅን አጸደቀ
******************

የሕዝብ ተወካዮች ምክር ቤት ባካሄደው 17ኛ መደበኛ ስብሰባው የአጠቃላይ ትምህርት ረቂቅ አዋጅን አጽድቋል።

የረቂቁን ሪፖርትና የውሳኔ ሀሳብ ለምክር ቤቱ ያቀረቡት የሰው ሀብት ልማት፣ሥራ ስምሪትና ቴክኖሎጂ ጉዳዮች ቋሚ ኮሚቴ ሰብሳቢ ነገሪ ሌንጮ (ዶ/ር)፤ ረቂቅ አዋጁ ትምህርትን በእኩልነት እና ፍትሃዊነት በመላ ሀገሪቷ ተደራሽ ለማድረግ የጎላ ሚና እንዳለው ተናግረዋል።

እንዲሁም ረቂቅ አዋጁ የመምህራንን ጥራት እና ጥቅም የሚያስጠብቅ፣ የትምህርት ጥራትን ለማስጠበቅ እና የትምህርት አስተዳደሩን ብቃት ለማረጋገጥ ድርሻው ከፍተኛ መሆኑን ጠቅሰዋል።

በተጨማሪም፣ የአስተማሪነት ሙያ እንዲከበር እና በሂደትም የብቃት ማረጋገጫ ፍቃድ ለመስጠት ረቂቅ አዋጁ ከፍተኛ ሚና እንዳለው ሰብሳቢው ገልጸዋል።

ረቂቅ አዋጁ አዋጅ ቁጥር 1368/2017 ሆኖ በሁለት ተቃውሞ፣ በአሥር ድምጸ ተዓቅቦ እና በአብላጫ ድምጽ መጽደቁን የምክር ቤቱ መረጃ ያመላክታል።

ቀሲስ በላይ መኮንን በ5 ዓመት ጽኑ እስራት እና በ10 ሺህ ብር የገንዘብ መቀጮ ተቀጡ
****************

የፌደራል ከፍተኛ ፍርድ ቤት ልደታ ምድብ 3ኛ የሙስና ጉዳዮች ወንጀል ችሎት ቀሲስ በላይ መኮንን በ5 ዓመት ጽኑ እስራት እና በ10 ሺህ ብር የገንዘብ መቀጮ እንዲቀጡ ወሰነ።

የፌደራል ከፍተኛ ፍርድ ቤት ልደታ ምድብ 3ኛ የሙስና ጉዳዮች ወንጀል ችሎት በእነ ቀሲስ በላይ መኮንን መዝገብ ላይ የቀረቡ የግራ ቀኝ ማስረጃዎችን መርምሮ በዛሬው የችሎት ቀጠሮ በጽኑ እስራትና በገንዘብ መቀጮ እንዲቀጡ ወስኗል።

የፍትሕ ሚኒስቴር የሙስና ጉዳዮች ዳይሬክቶሬት ዐቃቤ ሕግ በተከሳሾች ቀሲስ በላይ መኮንን፣ በግብርና ኢንቨስትመንት ላይ የተሰማራው እያሱ እንዳለ፣ በኮሚሽን ስራ ላይ የተሰማራው በረከት ሙላቱ እና አለምገና ሳሙኤል እንዲሁም የኒሞና ንግድ ስራ ኃላ/የተ/የግል ማህበር ስራ አስኪያጅ አበራ መርጋ በተባሉ ተከሳሾች ላይ በ1996 ዓ.ም የወጣውን የወንጀል ህግ ቁጥር 32 ንዑስ ቁጥር 1 (ሀ) እና የሙስና ወንጀሎች ለመደንገግ የወጣውን አዋጅ ቁጥር 881/2007 አንቀፅ 32 ንዑስ ቁጥር 2 እና ንዑስ ቁጥር 3 ስር የተመለከተውን ድንጋጌ እና በ1996 ዓ.ም የወጣውን የወንጀል ሕግ ቁጥር 382 ንዑስ ቁጥር 1 ስር የተመለከተውን ድንጋጌ መተላለፋቸውን ጠቅሶ ዝርዝር ክስ አቅርቦባቸው ነበር።

https://web.facebook.com/EBCzena/posts/pfbid025EF1WUSAsPFeRVbsmhMYcaoyGHdy5HEfDe1n5az163YwkXPP1wvyNMGkuXpu3X35l

በኢትዮጵያ ፕሪሚየር ሊግ ሁለት ጨዋታዎች ዛሬ ይካሄዳሉ
****************

በኢትዮጵያ ፕሪሚየር ሊግ 17ኛ ሳምንት መርሐ ግብር ዛሬ ሁለት ጨዋታዎች ይካሄዳሉ።

ቀን 9 ሰዓት ላይ ኢትዮ ኤሌክትሪክ ከ ወልዋሎ አዲግራት ዩኒቨርስቲ ይጫወታሉ፡፡

የዘሪሁን ሸንገታው ኢትዮ ኤሌክትሪክ በ18 ነጥብ 12ኛ ደረጃ ላይ የሚገኝ ሲሆን በጨዋታው ባለድል ከሆነ እስከ 9ኛ ደረጃ ድረስ መምጣት ይችላል፡፡

ወልዋሎ አዲግራት ዩንቨርስቲ በዘንድሮው ዓመት እየተቸገሩ ካሉ ቡድኖች መካከል አንዱ ሲሆን፤ በደረጃ ሰንጠረዡም 18ኛ ደረጃ ላይ ይገኛል፤ ከወራጅ ቀጠናው ለመውጣት ከዚህ በኋላ ባሉት ጨዋታዎች ውጤታማ መሆን ይጠበቅበታል፡፡

በአዳማ ሳይንስና ቴክኖሎጂ ዩኒቨርሲቲ ስታዲየም የሚካሄደው የፕሪሚየር ሊጉ ጨዋታ ሲቀጥል ምሽት 12 ሰዓት ላይ ሀዋሳ ከተማ እና መቻል ይገናኛሉ፡፡
https://web.facebook.com/EBCSPORT/posts/pfbid0286MLBy2UkxkLoXKC4aZWEBQXhoHNn4aeTKpoBd2icdZb1vNUABB4SVkM1BK4m8PGl

ከአያት በተወረሰ ፍቅር ኢትዮጵያን የሚያገለግሉት ምሁር፦ አሉላ ፓንክረስት (ዶ/ር)
**********************

ታዋቂ የማህበራዊ አንትሮፖሎጂስት እና ተመራማሪ ናቸው። በኢትዮጵያ እድገት፣ ባህላዊ ቅርሶች እና ማህበራዊ ሽግግር ላይ ባደረጓቸው ሰፊ ጥናቶች ዕውቅናን አትርፈዋል።

የመልሶ ማቋቋም፣ የምግብ ዋስትና፣ ማህበራዊ ጥበቃ፣ ሀገር በቀል ዕውቀት እንዲሁም ባህላዊ የግጭት አፈታትን ጨምሮ የተለያዩ መስኮችን በጥናቶቻቸው በስፋት ዳስሰዋል።

አሉላ ፓንክረስት(ዶ/ር) የተወለዱት በአውሮፓውያኑ 1962 በኢትዮጵያ ነው። አባታቸው ሪቻርድ ፓንክረስት ህይወታቸውን ሙሉ ለኢትዮጵያ የሰጡት የሲልቪያ ፓንክረስት ልጅ ናቸው። እንዲሁም በጣሊያን ወረራ ወቅት ለኢትዮጵያ በመወገን ጠንካራ ተቃውሞ ሲያሰሙ የነበሩት ዝነኛ ጋዜጠኛ እና የመብት ተሟጋቿ ሲልቪያ ፓንክረስት አያታቸው ናቸው። ቤተሰቦቻቸው ለኢትዮጵያ ያላቸው ጥልቅ ፍቅር በትምህርታቸው ምርጫ ላይ ጭምር ተፅዕኖ አሳድሯል፡፡

አሉላ ፓንክረስት (ዶ/ር) ከተለያዩ የምርምር ተቋማት ጋር በመተባበር በርካታ ጥናታዊ ሥራዎችን በማሳተም ለኢትዮጵያ ማኅበራዊ የምርምር ዘርፍ ከፍተኛ አስተዋፅኦ አበርክተዋል። በተለይም ፍልሰት በቤተሰብ እና በማኅበረሰብ ላይ የሚያሳድረውን ማኅበራዊ እና ኢኮኖሚያዊ ተጽዕኖ የሚያብራሩ ሥራዎችን አበርክተዋል።

የአሉላ ፓንክረስት (ዶ/ር) የኢትዮጵያ ፍቅር ከአያት የተወረሰ ነው፡፡ አያታቸው ሲልቪያ ፓንክረስት የጣሊያንን የግፍ ወረራ ለዓለም ማኅበረሰብ ያጋለጡ ብርቱ የኢትዮጵያ ጠበቃ ነበሩ፡፡

ሙሉ ፅሁፉን ለማንበብ ማስፈንጠሪያውን ይጫኑ፡-
https://ebc.et/newsdetails.aspx?newsid=9570