"ቤተ ማርያም መንፈሳዊ ሚዲያ💒

🌹#ቅድስት_ክርስቶስ ሰምራ🌹

☞ወር በገባ በ24 እናታችን ቅድስት ክርስቶስ ስምህ ናት የእናታችን ቅድስት ክርስቶስ ሰምራ በረከቷ ልመናዋ አማላጅነቷ ይደረግልንና ያደረገችው ተአምር ይህ ነው፡፡
☞በሸዋ ክፍለ ሀገር የሚኖር ጥበበኛ ወይም ዐዋቂ የሆነ ረንድ የንጉሥ ጭፍራ ወይም ወታደር ነበር ሰውየው መካን ነበረና ልጅ ባለመውለዳቸው ከሚስቱ ጋር ለብዙ ጊዜ ሲያዝኑ ኖሩ፡፡

☞ከዕለታት በአንደኛው ቀን በጥቡዕ ልቡና በፍጽም መታመን በእናታችን
በቅድስት ክርስቶስ ሠምራ ሥዕል ፊት በብዙ ለቅሶ ልጅ ብንወልድ
ለቤተክርስቲያን የሐር መጋረጃና የወርቅ ጃንጥላ መብዓ እናቀርባለን ሲሉ
ብፅዓት አደረጉ፡፡
☞እንዲህምበ ብለው የሎሚ ወይም የለውዝ ፍሬና ከቅድስት ክርስቶስ ሠምራ
ቅጽረ ቤተ ክርስቲያን ዐፈር ወይም እምነት ይዘው ወይም ወስደው ወደ ሀገራቸው
ተመልሰው ሄዱ፡፡
☞ከጥቂት ዓመታት ወይም ጊዜ በኃላ የዚያ ሰው ሚስት ፀነሰች ወንድ ልጅም
ወለደችና ታላቅ ደስታ አደረጉት እግዚአብሔር አመሰገኑ እናታችን ቅድስት
ክርስቶስ ሠምራን አከበሯት ከፍ ከፍም አደረጓት፡፡
☞አስቀድመው ስለተሳሉት መብዓ የወርቅ ጃንጥላ የቤተ መቅደስ መጋራጃ
ለእናታችን ለቅድስት ክርስቶስ ሠምራ ቤተክርስቲያን አምጥተው ሰጡ፡፡
☞ከዚያም ከአበ ምኔቱ ወይም ከገዳሙ አስተዳደር ከአባ ዘመንፈስ ቅዱስ
ቡራኬና ታላቅ በረከት ተቀብለው እግዚአብሔንና ኤናታችን ክርስቶስ ሠምራን
እያመሰገኑ በሰላም በታላቅ ደስታ ወደቤታቸው ሄዱ፡፡
☞የእናታችን የቅድስት ክርስቶስ ሰምራ አማላጅነቷ ለሁላችን ይደረግልን
ለዘለዓለሙ አሜን፡፡
☞(ገድለ ቅድስት ክርስቶስ ሰምራ)
☞ሲራክ ተክለጻድቅ የተዋህዶ ልጅ

☞ ወር በገባ በ 24 ቀን የሙሴ ጸሌም ወርሐዊ መታሰቢያ ነው፡፡☞ብዙ መነኮሳት ወደ አቡነ ሙሴ እየመጡ የሕይወት ትምህርትን ይማሩ ነበር፡ ከነዚህ የሕይወት ትምሕርታቸው መካከል በጥቂቱ እንመልከት፡፡

☞1ኛ☞አባ ሙሴ በገዳመ አስቄጠስ እያለ ከገዳማውያን አንዱ ጥፋት ሠራና
ማኅበሩ ለፍርድ ተሰበሰበ፡፡ አባ ሙሴ ግን በጉባኤ ላይ አልነበረም፡፡ ስለዚህ
ካህኑ ተልኮ ና ሁላችንም አንተን እየጠበቅን ነው አለወ፡፡ አባ ሙሴም በሚያፈስስ
ከረጢት አሸዋ ሞልቶ ያንንም በጀርባው ተሸክሞ ከኀላው እያፈሰሰ ወደ ጉባኤው
አመራ፡፡ ጉባኤተኞቹ ተገርመው ለምን እንደዚህ እንዳደረገ ጠየቁት፡፡ እርሱም
የእኔ ኃጢአቶች በኀላዬ እንደዚህ አሸዋ በዝተው ይፈሳሉ ነገር ግን ላያቸው
አልቻልኩም ዛሬ ግን በሌላው ላይ ለመፍረድ መጥቻለሁ አላቸው፡፡ ይህን ሲሰሙ
ዝም አሉ፡፡ ያን ወንድምም በይቅርታ አለፋት፡፡
☞2ኛ☞በሌላ ጊዜ በገዳመ አስቄጠስ ያሉ መነኮሳት ተሰብስበው የአባ ሙሴን
ትዕግሥት ለመፈተን ሲሉ ይህ ጥቁር መነኩሴ ለምን እዚህ መጣ ብለው
ተናገሩት፡፡ እርሱም ዝም አለ፡፡ ጉባኤው ሲበተን አባ ክፋ ስንናገርህ ምንም ሐዘን
አልተሰማህም ነበርን? ሱሉ ጠየቁት፡፡ እሱም ተሰምቶኝ ነበር ግን እንዳልናገረው
አንደበቴን ተቆጣጠርኩት አላቸው፡፡
☞3ኛ☞አንድ ጊዜ የአካባቢው ገዥ ሰለ አባ ሙሴ ዝና ሰምቶ ያየው ዘንድ ወደ
ገዳመአስቄጠስ መጣ፡፡ ይህን የሰማው አባ ሙሴ ሸሽቶ ወደ ጫካ ገባ፡፡
በመንገድም ላይ የገዥው መልእክተኞች አገኙትና እባክህን አባ ሙሴ የት
እንዳለ በኣቱን አሳየን አሉት፡፡ ከርሱ ምን ትሻላችሁ እርሱ ኮ ቂላቅል ነው
አላቸው፡፡
☞ይህን የሰማው የአካባቢው ገዥ ወደ ቤተ ክርስቲያኑ መጣና የሆነውን ሁሉ
ለአገልጋዮቹ ነገራቸው፡፡ ብዙ ሰዎች ስለ አባ ሙሴ ሲያወሩ ሰምቼ ለማግኘት
መጥቼ ነበር በመንገድ ላይ ያገኘነው አንድ አረጋዊ ሰው ግን የአባ ሙሴ በኣት
የት እንደሆነ ስንጠይቀው ከእርሱ ምን ትሻለችሁ እርሱ ኮ ቂላቅል ነው አለን
ብለው ነገራቸው፡፡
☞አገልጋዮቹም በጣም ተናደዱና ምን ዓይነት ሰው ነው ስለ ቅዱሱ ይህን
የሚናገር ብለው ጠየቁት፡፡
☞ትልቅ ጠቆር ያለ አሮጌ ልብስ የለበሰ ነው፡፡ አላቸው፡፡ አገልጋዮቹም
ተገርመው ይህማ ራሱ አባ ሙሴ ነው ይህን ያለህ ሊያገኝህ ስላልፈለገ ነው
አሉት፡፡ የአካባቢው ገዥም ከአባ ሙሴ ሁኔታ ከንቱ ውዳሴን ስለ መሸሽ ትልቅ
ትምህርት ተምር ተመለሰ፡፡
☞4ኛአባ ሙሴ በኣት ሠርቶ ወደ ጴጥራ ሲሔድ በአካባቢው ውኃ ሰላልነበረ
ተጨንቆ ነበር፡፡ አንድ ድምፅ ሒድ ስለምን ነገር አትጨነቅ አለው፡፡ ሰለዚህም
በዚያ መኖር ጀመረ፡፡ አንድ ቀን በጴጥራ እያለ አበው ሊጎበኙት መጡ
የነበራቸውን ውኃ ጥቂት ነበረችና በርሷ ምግባቸውን አበሰለ፡፡ የሚያጠጣቸው
ግን አላገኘም፡፡ ስለዚህ ወደ ውጭ እየወጣ ውኃ ይሰጠው ዘንድ እግዚአብሔርን
ይለምን ነበር፡፡ በመጨረሻም ዝናብ ዘነበና የውኃ ማጠራቀሚያዎቹን ሁሉ ሞላ፡፡
☞እነዚያም አባቶች ትወጣና ትገባ የነበረው ለምን እንደሆነ እባክህ ንገረን
አሉት፡፡ እናንተ በእግድነት ስትመጡ ውኃ አልነበረኝም ስለዚህ ያንተን አገልጋዮች
ወደ እኔ ልከሃቸዋል ነገር ግን ውኃ የለኝም ስለዚህ እባክህ ውኃ ስጠኝ እያልኩ
እግዚአብሔርን ለመለመን ነበር አላቸው፡፡
☞5ኛ☞በአንድ ወቅት በገዳመ አስቄጠስ ጾም ታወጀ፡፡ በዚያም ሳምንት አባ
ሙሴን ለማየት ከግብፅ ወንድሞቹ መጡ፡፡ አባ ሙሴም በእንግድነት
ተቀበላቸውና ምግብ ያበስልላቸው ጀመር፡፡ የእሳቱን ጢስ የተመለከቱ ጉረቤቶቹ
አባ ሙሴ ትእዛዝ አፍርሶ ምግብ ያበስላል ብለው ለገዳሙ ሓላፊዎች ተናገሩት፡፡
ሓላፊዎችም አሁን ተውት ሲመጣ እኛው ራሳችን እናናግረዋለን አሏቸው፡፡
☞ሓላፊዎችም አባ ሙሴን ጠርተው ለምን ምግብን እንዳበሰለ ተረዱ፡፡
በቀዳሚ ሰንበት ማኅበሩ ሁሉ ወደ ቤተክርስቲያን ሲጣ በዐደባባይ አባ ሙሴ
ሆይ የሰውን ትእዛዝ አልጠበቅም የእግዚአብሔር ትእዛዝ /እንግዳ ሆኜ መጥቼ
ተቀብላችሁኛል የሚለውን ግን ጠብቀሃል ብለው አመሰገኑት፡፡
☞የጻድቁ አባታችን የአቡነ ሙሴ ጸሊም የሕይወት ትምህርቶች ከብዙ በጥቂቱ
በእኔ በሀጥያተኛው ለበረከት ያክል ይቺን ጻፍኩላችሁ፡፡
☞የጹሁፍ ምንጭ(በዲያቆን ዳንኤል ክብረት ከተጻፈው "በበረሓ ጉያ
ውስጥ"ከተሰኘው መጽሐፍ የተወሰደ)
☞ከጻድቁ አባታችን ከአባ ሙሴ ጸሊም የሕይወት ትምህርት ተምረን ፍሬ
ለማፍራት ፈጣሪ ማስተዋሉን ያድለን፡፡
☞የጻድቁ አባ ሙሴ ጸሊም በረከታቸው ይደርብን፡፡
☞ሲራክ ተክለጻዲቅ የተዋህዶ ልጅ
☞

†✝† እንኳን ለቅዱስ አቡነ ተክለ ሃይማኖት ዓመታዊ በዓል በሰላም አደረሳችሁ፤ አደረሰን። †✝†

††† በስመ አብ ወወልድ ወመንፈስ ቅዱስ አሐዱ አምላክ አሜን! †††

††† ቅዱስ ተክለ ሃይማኖት ሐዋርያዊ †††

††† ልደት †††

††† መልካም ዛፍ መልካም ፍሬን ያፈራልና ተክለ ሃይማኖትን
የወለዱት ደጋጉ: ጸጋ ዘአብ ካህኑና እግዚእ ኃረያ ናቸው::
እርሱ በክህነቱ: እርሷ በደግነቷ: በምጽዋቷ ጸንተው ቢኖሩ
እግዚአብሔር ጣፋጭ ፍሬን ሰጥቷቸዋል::

በዳሞቱ ገዢ በሞተለሚ አደጋ ቢደርስባቸው ቅዱስ
ሚካኤል: ጸጋ ዘአብን ከሞት: እግዚእ ኃረያን ከትድምርተ
አረሚ (ከአረማዊ ጋብቻ) አድኗቸዋል:: በኋላም የቅዱሱን
መወለድ አብስሯቸዋል::

ጻድቁ አቡነ ተክለ ሃይማኖት የተጸነሱት መጋቢት 24 ቀን
በ1206 ዓ/ም ሲሆን የተወለዱት ደግሞ ታኅሣሥ 24 ቀን
በ1207 ዓ/ም ነው:: በተወለዱበት ቀንም ብዙ ተአምራት
ተገልጸዋል:: ቤታቸውም በበረከት ሞልቷል::

††† ዕድገት †††

የጻድቁ የመጀመሪያ ስማቸው "ፍሥሃ ጽዮን" ይሰኛል::
ይሕንን ስም ይዘው: አባታቸው ጸጋ ዘአብን ተከትለው
አድገዋል:: በተለይ ቅዱሳት መጻሕፍትን (ብሉያት:
ሐዲሳትን) ተምረዋል:: በሥጋዊው ጐዳናም ብርቱ አዳኝ
እንደ ነበሩ ይነገራል:: ዲቁናም ከወቅቱ ጳጳስ አባ ጌርሎስ
ተቀብለዋል::

††† መጠራት †††

አንድ ቀን ፍሥሃ ጽዮን ለአደን ወጥቶ ሲያነጣጥር ድንገት
ከሰማይ አስደንጋጭ ድምጽ ተሰማ:: የክብር ባለቤት
ጌታችን ኢየሱስ ክርስቶስ አእላፍ መላእክት እያመሰገኑት
በሚካኤል ክንፍ ተቀምጦ ወረደ::

የወጣቱን አዳኝ ፍርሃቱን አርቆ ጌታችን ተናገረ:: "ከዛሬ
ጀምሮ ስምህ ተክለ ሃይማኖት (ተክለ ሥላሴ) ይሁን::
ከዚህ በኋላ አራዊትን ሳይሆን ነፍሳትን ታድናለህ:: ዘወትር
ካንተ ጋር ነኝ" ብሎ በግርማ ዐረገ:: ቅዱስ ተክለ
ሃይማኖት ከዚህ ጊዜ በኋላ ሰዓትን አላጠፉም::
ንብረታቸውን ለነዳያን በትነው በትር ብቻ ይዘው ቤታቸው
እንደ ተከፈተ ወደ ምናኔ ወጡ::

††† አገልግሎት †††

ቅዱስ ተክለ ሃይማኖት ከጳጳሱ ቅስና ተቀብለው የወንጌል
አገልግሎትን ጀመሩ:: በመጀመሪያ ስብከታቸው እዚያው
ሽዋ (ጽላልሽ) አካባቢ ብቻ በ10ሺ የሚቆጠሩ ሰዎችን
አሳምነው አጠመቁ:: ያን ጊዜ ኢትዮጵያ 2 መልክ ነበራት::

1ኛ. ዮዲት (ጉዲት) በፈጠረችው ጣጣና በእስላሞች
ተጽዕኖ ወደ ደቡብ አካባቢ ያለው ነዋሪ አንድም ሃይማኖቱን
ክዷል: ወይም በባዕድ አምልኮ ተጠምዷል::
2ኛው ደግሞ በዛግዌ ነገሥታት ጥረት ክርስትናና ምናኔ
ተነቃቅቶ ነበር::

ግማሹ ሃገር በጨለመበት ወቅት የደረሱት ሐዲስ ሐዋርያ
አባ ተክለ ሃይማኖት በወጣት ጉልበታቸውና በኃይለ
መንፈስ ቅዱስ ብዙ ቦታዎችን አደረሱ:: ሕዝቡን:
መሣፍንቱን ወደ ሃይማኖት መልሰው: ማርያኖችን
(ጠንቋዮችን) አጥፍተዋል::

††† ገዳማዊ ሕይወት †††

††† ቅዱስ ተክለ ሃይማኖት በወንጌል ብርሃን ኢትዮጵያን
ከማብራታቸው ባለፈ ገዳማዊ ሕይወትንም አስፋፍተዋል::
እርሳቸው ከሁሉ የተሻሉ ሳሉም በ3 ገዳማት በረድዕነት
አገልግለዋል::

እነዚህም በአቡነ በጸሎተ ሚካኤል ገዳም ለ12 ዓመታት:
በአቡነ ኢየሱስ ሞዐ ዘሐይቅ ገዳም ለ7 ዓመታት: በደብረ
ዳሞ ከአቡነ ዮሐኒ ጋር ለ7 ዓመታት: በአጠቃላይ ለ26
ዓመታት አገልግለዋል::

በአቡነ ኢየሱስ ሞዐ ከመነኮሱ በኋላም ወደ ምድረ ሽዋ
(ዞረሬ) ተመልሰው በአንዲት በዓት ውስጥ ለ22 ዓመታት
ቆመው ጸልየዋል:: በተሰበረ እግራቸውም 6 ጦሮችን
በግራና በቀኝ ተክለው ለ7 ዓመታት ጸልየዋል::

††† ስድስት ክንፍ †††

ኢትዮጵያዊው ጻድቅና ሐዋርያ ቅዱስ ተክለ ሃይማኖት
ከኢትዮጵያ ወደ ኢየሩሳሌም ተጉዘው ከቅዱሳት መካናት
ተባርከዋል:: ጻድቁ ምድረ እሥራኤል የገቡት በየመንገዱ
መንፈሳዊ ዘርን እየዘሩ: እያስተማሩና እያሳመኑ ነበር::

ከወቅቱ ሊቀ ጳጳሳት አባ ሚካኤል ጋርም ተገናኝተው
ቡራኬን ተሰጣጥተዋል:: ዋናው ጉዳይ ግን ከዚህ በኋላ
ነው:: ጻድቁ እመቤታችንና ጌታችን ከጽንሰታቸው እስከ
ዕርገታቸው የረገጧቸውን ቦታዎች ሲመለከቱ በፍጹም
ተደሞ እንባቸው ይፈስ ነበር::

ምክንያቱም እግዚአብሔር ስላበቃቸው ተክለ ሃይማኖት
የሚያዩት ቦታውን አልነበረም:: በገሃድ:-
*በቤተ መቅደስ ብስራቱን
*በቤተ ልሔም ልደቱን
*በቤተ ዮሴፍ ግዝረቱን
*በፈለገ ዮርዳኖስ ጥምቀቱን
*በቤተ አልዓዛር ተአምራቱን ይመለከቱ ነበር::

የጉብኝታቸው የመጨረሻ ክፍል ወደ ሆነው ቀራንዮ
ደርሰው ጌታቸውን እንደ ተሰቀለ ሆኖ ቢመለከቱት
ከዓይናቸው ይፈስ የነበረው ቁጡ እንባ መልኩን ቀየረና
ዓይናቸው ጠፋ::

በዚያች ቅጽበት ስም አጠራሯ የከበረ እመቤታችን ድንግል
ማርያም ፈጥና ደርሳ አቡነ ተክለ ሃይማኖትን ወደ ሰማይ
አሳረገቻቸው::

††† በዚያም:-
*የብርሃን ዐይን ተቀብለው
*6 ክንፍ አብቅለው
*የወርቅ ካባ ላንቃ ለብሰው
*ማዕጠንተ ወርቁን ይዘው
*ከ24ቱ ካህናተ ሰማይም ተደምረው
*ሥላሴን በአንድነቱና ሦስትነቱ ተመልክተው
*"ስብሐት ወክብር ለሥሉስ ቅዱስ ይደሉ" ብለው መንበረ
ጸባኦትን አጥነው ወደ መሬት ተመልሰዋል::

††† ተአምራት †††

የቅዱስ ተክለ ሃይማኖት ተአምራት እንደ ሰማይ ከዋክብት
የበዛ ነው::
*ሙት አንስተዋል
*ድውያንን ፈውሰዋል
*አጋንንትን አሳደዋል
*እሳትን ጨብጠዋል
*በክንፍ በረዋል
*ደመናን ዙፋን አድርገዋል::

ብዙ ደቀ መዛሙርትን አፍርተው ደብረ ሊባኖስን
መሥርተዋል:: በዚያም ሴትና ወንድ መነኮሳት እንደ
ሕጻናት አብረው ኑረዋል:: በዘመናቸው ሰይጣን
ታሥሯልና::

††† ዕረፍት †††

††† ጻድቅ: ሰማዕትና ሐዋርያ አቡነ ተክለ ሃይማኖት ብርሃን
ሆነው: መከራን በብዙ ተቀብለው: እልፍ አእላፍ ፍሬን
አፍርተው: በተወለዱ በ99 ዓመት: ከ8 ወር: ከ1 ቀናቸው
ነሐሴ 24 ቀን በ1306 ዓ/ም ዐርፈዋል:: ጌታ: ድንግል
ማርያምና ቅዱሳን ከሰማይ ወርደው ተቀብለዋቸዋል:: 10
ትውልድ የሚያስምር ቃል ኪዳንም ተቀብለዋል::

††† በዚህ ዕለት አባታችን ተክለ ሃይማኖት ለ22 ዓመታት
የቆሙበት ቀኝ እግራቸው መሠበሩንና በአንድ እግራቸው
ለ7 ዓመታት ቆመው መጸለያቸውን ቅድስት ቤተ ክርስቲያን
ታስባለች::

††† ጥር 24 ቀን የሚከበሩ ዓመታዊ የቅዱሳን በዓላት
1አቡነ ቅዱስ ተክለ ሃይማኖት
2.ቅድስት ማርያ ግብጻዊት
3.ታላቁ አባ ቢፋ
4.አባ አብሳዲ ቀሲስ
5.ቅዱሳን ጻድቃነ ሐውዚን

††† ወርኀዊ በዓላት
1.አቡነ ዘዮሐንስ (ዘክብራን ገብርኤል-ጣና)
2.ቅድስት እናታችን ክርስቶስ ሠምራ
3.ቅዱስ ቶማስ ዘመርዓስ
4.ቅዱስ ሙሴ ጸሊም
5.ቅዱስ አጋቢጦስ
6.ሃያ አራቱ ካህናተ ሠማይ

††† "በድካም : አብዝቼ በመገረፍ : አብዝቼ በመታሠር :
አትርፌ በመሞት ብዙ ጊዜ ሆንሁ:: በድካምና በጥረት :
ብዙ ጊዜም እንቅልፍ በማጣት : በራብና በጥም : ብዙ
ጊዜም በመጦም : በብርድና በራቁትነት ነበርሁ . . .
የቀረውን ነገር ሳልቆጥር ዕለት ዕለት የሚከብድብኝ
የአብያተ ክርስቲያናት ሁሉ አሳብ ነው::" †††
(፪ቆሮ ፲፩፥፳፫)

††† ወስብሐት ለእግዚአብሔር †††