የዲያቆን አቤንኤዘር ተክሉ ገጽ

የተሰበረ የውኃ ማጠራቀሚያ አይኹንላችሁ! (ኤር. 2፥9-13)


ነቢየ እግዚአብሔር ኤርምያስ በሙሾና በልቅሶ፤ ከፍ ባለ ሕመም ውስጥ ኾኖ ያገለገለ፤ ከ“ዐበይት” ነቢያት መካከል አንዱ ነው። ገና እጅግ ወጣት በነበረበት ጊዜ (ኤር. 1፥6) ለነቢይነት የተጠራው ኤርምያስ፣ ሕዝበ እግዚአብሔር ተብላ የተጠራችው እስራኤል እጅግ በኀጢአት በተዘፈቀችበት፤ ከያህዌ ይልቅ ሌሎች አማልክትን በማፍቀር በነሆለለችበት፤ የማያረኩና ጥምን የማይቆርጡ ምንጮችን ለራስዋ በቆፈረችበት ወራት መምጣቱ፣ ልቡን በሥጋትና በፍርሃት፣ በጥርጣሬም ንጦት እንመለከታለን።


የኤርምያስ አገልግሎት፣ “ትነቅልና ታፈርስ ዘንድ፥ ታጠፋና ትገለብጥ ዘንድ፥ ትሠራና ትተክል” (1፥10) ዘንድ እንዲል፣ መንታ ገጽታ ያለው ነው። እግዚአብሔር በሕዝቡ መካከል ሊነቅል፣ ሊያፈርስ፣ ሊያጠፋና ሊገለብጥ ያለው ነገር አለ፤ እርሱም ኀጢአት ነው። ለዚህ ደግሞ ሕዝቡ ኀጢአትን በማድረግ እጅግ አመጸኛ ኾኖ ተገኝቶአል፤ እናም እግዚአብሔር፣ “ሕዝቤ ሁለቱን ክፉ ነገሮች አድርገዋልና” (ቊ. 13) በማለት በሕዝቡ ላይ ክርክሩን ወይም ቅሬታውን ያሰማል፤ (ቊ. 9)፤ እስራኤል፣ በዙሪያቸው ያሉትን አሕዛብ በመመልከት ከእግዚአብሔር ይልቅ ሌሎች አማልክትን ወድደዋል፤ ሕዝቡም ታማኝነታቸውን ከያህዌ ይልቅ ለቆጵሮስ(ኪቲም) እና ከቄዳር የባሕር ዳርቻ ማዶ ላሉ አማልክት ገልጠዋል። በሚያስደንቅ ኹኔታ እስራኤል፣ ኀጢአትዋ አማልክትን ከሚያመልኩ ከነዚህ ሕዝቦች እንኳ ይበልጣል።

በምን? ብለን ብንጠይቅ፣ አማልክትን የሚከተሉ ሕዝቦች አማልክቶቻቸውን ፈጽሞ አልተዉም፤ “ሐሰተኞች አማልክት ቢሆኑም እንኳ አማልክቱን የሚቀያይር ሕዝብ የለም፤” (ቊ. 11 አት) እንዲል። እስራኤል ግን ከነዚህ አሕዛብ እጅግ በሚከፋ ኹኔታ፣ “ክብር ያጐናጸፍኳቸውን እኔን አምላካቸውን ምንም ሊያደርጉላቸው በማይችሉ ከንቱ አማልክት ለውጠውኛል።” (ቊ. 11 አት) የሚል ጠንካራና ሕጋዊ ክስ ከያህዌ ቀርቦባታል። ይህ የይሁዳ ኀጢአት ደግሞ ያመጣው መቅሰፍት አለ፤ ሰማያት እንዲረገሙና እንዲንቀጠቀጡ አድርጎአል (ቊ. 12)።

አሕዛብ ምንም ላላደረጉላቸው አማልክት ታማኝ ነበሩ፤ እስራኤልን ያከበረው የክብር አምላክ እግዚአብሔር ግን በእስራኤል መካከል ተተወ፤ ተካደ፤ ተረሳ፤ ከእርሱ ፊታቸውን መለሱ። እንዲህ ያለ ዓመጽ በፍርድ መዘጋቱ አይቀሬ ነው። አስቀድሞ ግን እግዚአብሔር በተደጋጋሚ ኃጢአተኞችን ከመቅጣቱ በፊት፣ ወደ ንስሐ እንዲመጡ ይማጸናቸዋል። የእግዚአብሔር ልብ በይሁዳ እጅግ አዝኖአል፤ አሕዛብ አማልክቶቻቸውን አልለወጡም፤ ይሁዳ ግን “እኔን የሕያውን ውኃ ምንጭ ትተውኛል፥ የተቀደዱትንም ጕድጓዶች፥ ውኃውን ይይዙ ዘንድ የማይችሉትን ጕድጓዶች፥ ለራሳቸው ቆፍረዋል።” ብሎ እግዚአብሔር ልብን በሚነካ ሃዘን ይናገራቸዋል። የእግዚአብሔር ሕዝብ በደል እጥፍ ድርብ ነው፤ የሕያውን ውኃ ምንጭ መተዋቸው ሳያንስ፣ ውኃ መያዝ በማይችሉ ቀዳዳ የውኃ ማጠራቀሚያዎች እጅግ ታምነዋል።

በጥንቱ ዘመን የጉድጓድ ውኃ እጅግ ውድና አስፈላጊ ነገር ነበር፤ ለብዙ አገልግሎትም ይውላል። ነገር ግን እስራኤል የእግዚአብሔርን የሕይወት ውኃ ምንጭ ትተው፣ ውኃ የማይይዙ የተሰባበሩ፤ እጅግ ያነሰ አቅርቦት ያላቸውን የውኃ ጕድጓዶች ለማግኘት ደከሙ። ከቊ. 14 ጀምሮ እንደምናነበው ከዚህ የተነሣ፣ እስራኤል ሕጋዊ ልጅነቷን አጥታ ባሪያ ኾና በምርኮና በስደት ከገዛ ምድሯ ተነቀለች። ሰው እግዚአብሔር የሠራለትንና ያዘጋጀለትን የሕይወት ውኃ ምንጭ ትቶ፣ ለራሱ ጥም የሚያረካበትን ቢያዘጋጅ መቀጣቱና መተዉ አይቀርም።

እስራኤል የእግዚአብሔር ብቻ ነች፤ ልክ እንዲኹ በአዲስ ኪዳንም ያለነው አማኞች የክርስቶስ ብቻ ነን፤ በኵራትነታችን በክርስቶስ ለእግዚአብሔር አብ ነን፤ ጠጡ የተባልነውና ጥምን የሚቆርጠው የሕይወት ምንጭ ውኃ መንፈስ ቅዱስ ነው (ዮሐ. 7፥37-39)፤ “ማንም የተጠማ ቢኖር ወደ እኔ ይምጣና ይጠጣ” የሚለው ቃል፣ ዛሬም ሕያውና የሚሠራ ነው። ልክ እስራኤል ያህዌን ትታ፣ የአሕዛብን አማልክት በመከተል ያህዌን ብዙ እንደ በደለች፣ ዛሬም ሰዎች እግዚአብሔር በልጁ ለአንዴና ለመጨረሻ ጊዜ የሠራውን የቤዝወት፣ የማስታረቅ፣ የማዳን ሥራ ትተው፤ ከክርስቶስ ውጭ ሌላ ቤዛ፤ ከመሲሑ ውጭ እንግዳ መታረቂያ፤ ከኢየሱስ ውጭ ሌላ መድኃኒት፤ ከመንፈስ ቅዱስ ውጭ ሌላ የሕይወት ምንጭ ውኃ በመፈለግ ይንከራተታሉ። በክርስቶስ ዕረፉ፤ በርሱ ላይ ምንም አትደርቡ፤ ብቻውን በቂና ሙሉ፤ ብቃት ያለው አዳኝ ነውና!

ነገር ግን እንደ እስራኤል፣ እንዲህ ያለውን ኀጢአት ማድረግ በፍጻሜው ቅጣትና መተውን ማምጣቱ አይቀርም። እናም የምትባዝኑ፣ ከክርስቶስ ይልቅ ሌላ ቤዛና ተስፋ የምትፈልጉ፤ ከመንፈስ ቅዱስ ውጭም ሌላ እርካታና ጥጋብ የምትሹ አይረባችሁምና ወደ ነፍሳችሁ እረኛ በመመለስ ዕረፉ፤ እፎይ ዐረፍኩ በሉ!

“በማያቋርጥ ፍቅር ጌታችንን ኢየሱስ ክርስቶስን ለሚወዱ ሁሉ ጸጋ ይሁንላቸው።” (ኤፌ. 6፥24)


My blog link - http://abenezerteklu.blogspot.com/2025/05/29-13.html

"የምንበላው የማርያምን ሥጋ ነው" እያለ፣ በመሆኑ በማርያም የምንጋርደው ክርስቶስ የለም ከሚሉት በላይ አዚ-ማም ማን አለ?! ከባድ ጥ-ንቆላ ተደርጎባችኹ አታስተውሉምን?!

ጌታ መንፈስ ቅዱስ ሆይ፤ የወንጌል እውነትን ከሰንበት ትምህርት ቤት ወደ ጳጳሳት ስላሳደግህ ተባረክ። [እነ አባ ማርቆስና ያሬድም እንደ አባ በርናባስ ወደ ፊት ቢመጡ ተመኘነ]!

ግንቦት ልደታና የሕይወት ትዝታዬ!
 (ከዛሬ አራት ዓመት በፊት የተጻፈ)

የዛሬ አሥራ ሰባት ዓመት ገደማ፣ ነፍሴ ከግንቦት አንድ አምላኪያን እጅ ያመለጠችበት ቀን ነው። በዚያን ቀን፣ በአርሲ ነጌሌ ሶጊዶ ማርያም ቤተ ክርስቲያን በዓለ ንግሡ ላይ ላገለግል ተጠርቼ በዚያ ነበርኩ። “የተሸሸገ ጣዖት” በሚል ርዕስ፣ የያዕቆብ ሚስት ራሔል ጣዖትን መሸሸጓንና በዚህም የደረሰባትን በማንሳት አንስቼ አገለገልሁ፤ እኛም ይህን ማድረግ እንደሌለብን ብርቱ ማስጠንቀቂያ በማኖር ጭምር። ነገር ግን በዚያን ቀን ሳስተምር፣ ከታቦቱ ጎን ትምህርቴን ቆሞ ይሰማ የነበረ፣ የገጠር ከተማይቱ ጠንቋይ ደም በሰረበ ዓይኖቹ ይመለከተኝ ኖሯል።

ስብከቱን ጨርሼ ስወርድ ቀሳውስቱን፣ ጠንቋዩ ሰውዬ አንቈራጠጣቸው፤ ማን እንደ ኾነ ስጠይቅ ጠንቋይ እንደ ኾነ ነገሩኝ። ወዲያው ታቦታቱን የተሸከሙት ቀሳውስት፣ ለበአሉ ደም ወደ ፈሰሰበት ቦታ አቀኑ፤ ደሙን ተራመዱ፤ ከዚያም ኹሉ ነገር፣ በጠንቋዩ አጋፋሪነት ተከናወነ። የእኔ የጣዖትን ነገር ነቅፎ ማስተማር ጠንቋዩን አላስደሰተውም፤ እናም የምመለስበት ቀን ጠብቀው በመንገድ ላይ እኔን የሚያጠቁ ሰዎች ተዘጋጁ፤ ነገር ግን እጅግ ፈጣን ሯጭ ነበርኩና [“ሚሽነሪ” አገልጋዮች ለካ ስፖርት የሚሠሩትና ሩጫ የሚለማመዱት እንዲህ ባለ ቁርጥ ቀን በረው ለማምለጥም ጭምር ነው?]፣ በበረራ ነፍሴን ከእጃቸው በእግዚአብሔር ረድኤት አስመለጥኹ።

በዚያን ቀን እንዳገለግልና ጣዖትን በመቃወም እንዳስተምር አስበውበት የጋበዙኝ ወንድሞች ለማና አበራ ነበሩ፤ (ዛሬ የት ኾነው ይኾን?)።
በግንቦት አንድ ቀን በማርያም ስም ወደ ወንዝ ተወርዶ ለባዕድ አምልኮ ማረድ፣ የተቀቀለና የተቆላ እህል መድፋት፣ የበሰለ ቂጣ መወርወር፣ ቅቤ ዛፎችን መቀባት፣ አድባራት ሥር መሰብሰብ፣ መለማመንና አማልክትን መማጠን እጅግ የተለመደ ተግባር ነው። ድርጊቱ እጅግ የባዕድ አማልክት ልምምድ ያለበት ቢኾንም፣ አንዳንዶች የማርያምን ልደት የማርያም ወላጆች በሊባኖስ ዱር ውስጥ እንዳከበሩ፣ እኛም ከቤት ወጣ ብለን በዓሏን እናከብራለን ሲሉ፣ ሌሎች ደግሞ ከፍጹም የባዕድ አምልኮ ልምምድ ጋር በማያያዝ ሲያከብሩ ይስተዋላል። የማርያምን ልደት በሚያከብሩ በአንዳንዶች ዘንድ ታቦታት ባዕድ አምልኮ ወደሚፈጸምባቸው ወንዞች የሚወርዱበት ጊዜም እጅግ ብዙ ነው።

ምንም እንኳ ኦርቶዶክሳዊት ቤተ ክርስቲያን “ክርስቶስን ብቻ ነው የማመልከው” ብትልም፣ እንዲህ ያሉ ግልጥ ባዕድ አምልኮአዊ ልምምዶችን በአደባባይ ስታወግዝና ከመጽሐፍ ቅዱስ ውጭ መኾናቸውን ስትኮንን አይስተዋልም። ግንቦት አንድ ቀን፣ የሚከናወነው ኹሉም ተግባራት ከባዕድ አምልኮ ጋር ፍጹም ቁርኝት ያለው ነው። ይህን ሃይማኖታዊ ሽፋን መስጠት፣ ባዕድ አምልኮን በግልጥ የመደገፍ ያህል እንጂ ፈጽሞ እውነት ነው ሊያስብለው አይችልም። ባዕድ አምልኮ በእግዚአብሔር ፊት ጽዩፍና እጅግ አስነዋሪ ተግባር ነውና። እንዲህ ዓይነት ልምምድ ያላቸውን እግዚአብሔር እጅግ ይጠየፋል። ከእርሱ ውጭ ሊታመን፣ ሊለመን፣ ሊማጠን የሚገባ መለኮታዊ ኀይል በላይ በሰማይ፤ በታች በምድር ፈጽሞ የለምና።

እንዲሁም፣ የክርስቶስን መስቀል የሚጋርድ የትኛውም ትምህርት፣ ልምምድ፣ ማኅበራዊ እሴት እርሱ የክርስቶስ መስቀል ጠላት (ፊልጵ. 3፥18)፣ እንግዳ ትምህርት (2ቆሮ. 10-13)፣ አዲስ ወይም ልዩ ወንጌል (ገላ. 1፥8)፣ በጌታ ትምህርት ደግሞ እንክርዳድ (ማቴ. 13፥25) ተብሎ ተጠርቶአል። “በግንቦት አንድ፣ እኛ ማርያምን እናከብርበታለን እንጂ ጣዖት አናመልክም” የሚል ማመካኛ ወይም ማሳበቢያ ፈጽሞ አያስፈልግም። ምክንያቱም በዕለቱ የሚከናወነው ተግባር ኹሉ መስቀሉን፣ ሞቱን፣ ትንሣኤውን የሚናኝና የሚመሰክር አንዳች ነገር የለውምና።

ጌታ በመስቀል ላይ የሠራው የመስቀሉ ሥራ ሕይወታችን ነው፤ የክርስቶስ ትንሣኤ የደመቅንበት ሞገሳዊ ጌጣችን ነው፤ ከእርሱ ትምህርትና ሕይወት ውጭ ሌላ ትምህርት፣ ሌላ ልምምድ የለንም፤ ከክርስቶስ በቀር የምንሰብከው ሌላ ርዕስና አጀንዳም ፈጽሞ የለንም። እና በአጭር ቃል ግንቦት አንድ ማርያምን የማክበር ተብሎ ሽፋን ቢሰጠውም፤ ባይሰጠውም፣ ፍጻሜው  ከክርስቶስ ወንጌል ውጭ የኾነ ትምህርትና ልምምድ መኾኑን መዘንጋት አይገባም፤ በምትወዱትና በምታከብሩት ነገር በኩል የሚመጣ፣ የትኛውንም ባዕድ ንግግርና ትምህርት ከመከተል ራሳችሁን ጠብቁ።

 ጌታችንን ኢየሱስ ክርስቶስን ባለመጥፋት ከሚወዱ ሁሉ ጋር ጸጋ ይሁን፤ አሜን። (ኤፌ. 6፥24)

ክርስቶስ ያስታርቃል ወይስ ይፈርዳል?!

በአንድ ወቅት አንድን አባት ለመፈተንና ለማስወገዝ፣ ኹለት ወንድሞች ተመካክረው ጠየቁአቸው። “አባታችን ክርስቶስ ያስታርቃል ወይስ ይፈርዳል?” ብለው፣ እኒህም አባት ራሳቸውን ጠያቂዎቹን ልጆች ጠየቁአቸው፤ አንዱ ያስታርቃል አለ ሌላኛው ደግሞ ይፈርዳል። የኹለቱንም ዐሳብ በሚገባ ካደመጡ በኋላ፦

"ላንተ ያስታርቅ፤ ላንተ ይፍረድ።" አሉ።

በአጭሩ፤ አዎን ክርስቶስ ኢየሱስ ጻድቅ ፈራጅ፤ ቅን አስታራቂም ነው!

ማርያምን ከጌታ የሚያስበልጡማ በኦርቶዶክስ ቤት አይነኩም!


ማስረጃው ይኸው!

በኦርቶዶክስ ቤተክርስቲያን ውስጥ፣ ስለ ማርያም የሚሰሙ “ስብከቶች” ማርያም ያለ እግዚአብሔር ሳይኾን፣ እግዚአብሔር ያለ ማርያም ሕይወት አልባ የሚያስብል ብካይና የተመረዘ ትምህርት አለ። ነገረ ማርያም በነገርነቱ ሳይኾን፣ “እንደ ተሰቀለው ክርስቶስ” በደረጀ ስብከቱና እምነቱ አለ!

ሊቀ ጳጳስ ገብርኤል “ማርያም ቤዛ አይለችም” ብለው ሲናገሩ፣ ከኢየሱስ የመስቀል ሥራ ጋር አነጻጽረው መናገራቸው በአደባባይ እየታወቀ፣ የኦርቶዶክስ ካራ ጀማ በአንድነት ተሰባስቦ፣ “ቤዛ ዐውድ አለው፣ እንኳን ማርያም ወ/ሮ ቤዛና ነቢይ ሙሴም ቤዛ ተብለዋል” ... የሚል ኢየሱስንና የመስቀሉን ሥራ በግልጥ የሚነቅፍ ምላሽ ሲሰጡ አየን። ከዚህ የሚከፋው ደግሞ፣ ማርያምን ያከበሩ ለማስመሰልና እውነተኞች ለመምሰል፣ ከእግዚአብሔር በላይ አድርገዋት ሲያቀርቡ ነው።

ይህ “ሰባኪ” የሚናገረውን ከዚህ በታች ልጥቀስ።

“… እርሷ[ማርያም] የኹሉም ነገር ጥንስስ ናት፤ ሰማይና ምድር እየተባሉ የሚጠሩት ነገሮች በሙሉ መነሻቸው ለፍጥረት ይኾናል እንጂ ፍጻሜያቸው ለእመቤታችን ነው። ኸረ እንደውም ይህ ነገር አይድነቃችሁ፣ እግዚአብሔር አምላክ ፍጥረትን ያዘጋጀው፣ ለእመቤታችን ነው ብዬ ብነግራችሁስ! ኹሉም ነገር የተፈጠረውና የተገኘው ስለ እርስዋ ሲባል ነው። በጣም የሚደንቃችሁ እነዚህ ፍጥረታት ሁሉ ከመኖራቸው በፊት፣ … እግዚአብሔር የራሱ ዓለም ነበረው። ያ ዐለሙ በኅሊናው ታስባ የነበረችው እመቤታችን ናት። ለእግዚአብሔር ኅሊና መታሰቡ እንደ እናቱ ብቻ እንዳይመስላችሁ፤ እመቤታችን ለእግዚአብሔር ዓለሙም ጭምር ናት …”

በዚህ ልጅ ንግግር ውስጥ አእላፋት ኑ-ፋቄ--ዎች አሉ። ኹለቱ ላይ ብቻ ላተኲር፣

1. እውን ፍጥረት የተፈጠረው ለእመቤታችን ሲባል ነው? የፍጥረት ፍጻሜስ ማርያም ናት? … እኒህ ጥያቄዎች ቀላል ግን ሙሉውን የነገረ መለኮት ትምህርት ሊቀይሩ የሚችሉ ናቸው፤ ምክንያቱም ፍጥረት ለፍጥረት እንደ ተፈጠረ ጨርሶ አይነግረንምና፤ የፍጥረት መፈጠርን ዓላማ ከመጽሐፍ ቅዱስ ልጥቀስ፣

በአጭር ቃል መጽሐፍ፣ “ምድርና ሞላዋ ለእግዚአብሔር ናት፥ ዓለምም በእርስዋም የሚኖሩ ሁሉ።” (መዝ. 24፥1) ይላል። ሲፈጥርም አዝዞ የተፈጸመለት፤ ምድርን በቃሉና በኃይሉ የፈጠረ፣ ዓለሙን በጥበቡ የመሠረተ፣ ሰማያትን በማስተዋሉ የዘረጋ ጌታ እግዚአብሔር ብቻ ነው፤ (ዘፍ. 1፥3፡6፡9፡11፡14፡20፡24፡26፤ ኢሳ. 40፥12-14፤ ኤር. 10፥12-16፤ ዮሐ. 1፥3)፤ ይህ ብቻ ያይደለ በቀንና በሌሊት ላይ ፀሐይና ጨረቃን ያሠለጠናቸው፤ የፈጠራቸውም ርሱ ብቻ ነው (ዘፍ. 1፥16፤ መዝ. 136፥7፤ አሞ. 4፥13፤ ዮሐ. 1፥3፤ ቈላ. 1፥15-16፤ ዕብ. 11፥3)

- ፍጥረት የተፈጠረው ለእግዚአብሔር ሊሰግድና ለክብሩ ሊኖር ብቻ ነው፣

“አንተ ብቻ እግዚአብሔር ነህ፤ ሰማዩንና የሰማያት ሰማይን ሠራዊታቸውንም ሁሉ፥ ምድሩንና በእርስዋ ላይ ያሉትን ሁሉ፥ ባሕሮቹንና በእነርሱ ውስጥ ያለውን ሁሉ፥ ፈጥረሃል፥ ሁሉንም ሕያው አድርገኸዋል፤ የሰማዩም ሠራዊት ለአንተ ይሰግዳሉ።” (ነህ. 9፥6)፣

“ … በስሜ የተጠራውን ለክብሬም የፈጠርሁትን፥ የሠራሁትንና ያደረግሁትን ሁሉ አምጣ” (ኢሳ. 43፥7)፣

“ሀያ አራቱ ሽማግሌዎች በዙፋን ላይ በተቀመጠው ፊት ወድቀው፥ ከዘላለም እስከ ዘላለም በሕይወት ለሚኖረው እየሰገዱ፦ ጌታችንና አምላካችን ሆይ፥ አንተ ሁሉን ፈጥረሃልና ስለ ፈቃድህም ሆነዋልና ተፈጥረውማልና ክብር ውዳሴ ኃይልም ልትቀበል ይገባሃል እያሉ በዙፋኑ ፊት አክሊላቸውን ያኖራሉ።” (ራእ. 4፥101-11)።

- ፍጥረት በክርስቶስ ለክርስቶስ ተፈጥሮአል፣

“እርሱም የማይታይ አምላክ ምሳሌ ነው፤ የሚታዩትና የማይታዩትም፥ ዙፋናት ቢሆኑ ወይም ጌትነት ወይም አለቅነት ወይም ሥልጣናት፥ በሰማይና በምድር ያሉት ሁሉ በእርሱ ተፈጥረዋልና ከፍጥረት ሁሉ በፊት በኵር ነው፤ ሁሉ በእርሱና ለእርሱ ተፈጥሮአል፤” (ቈላ. 1፥15-16)።

ጥቂት ነገር ልጨምር፣ አስቀድሞ፣ የእስራኤል ልጆች ምድርን በተመለከተ ልክ እንደ አሕዛብ ወይም እንደ አንዳንድ የኦርቶዶክስ ሰባኪያን ደካማ አመለካከት ነበራቸው፣ ያሉበትና የሚኖሩበትን ብቻ የእግዚአብሔር እንደ ኾነ ያስባሉ፡፡ ዮናስና አንዳንዶች እግዚአብሔር የሌለበት የምድር ክፍል ያለ መሰላቸው፤ እንደ ዳዊት ያሉ ቅዱሳን ግን እስራኤል ብቻ ሳትኾን አሦርም፤ ግብጽም፤ ባቢሎንም ምድር ኹሉም የእግዚአብሔር ናቸው ብለው ያምናሉ።

ጌታ እግዚአብሔር በእነዚህ አገር ካሉ አማልክት እጅግ የተለየና ታላቅ ነውና። ምድርና መላዋ የርሱ ከኾነች፤ ለርሱ ክብርና ፈቃድ ብቻ ትታዘዛለች ማለት ነው። ምክንያቱም “ምድርና በእርስዋ የሞላባት ሁሉ የጌታ ነውና።” (1ቆሮ. 10፥26)፡፡

የፍጥረት ፍጻሜ ግቡም፣ “በዘመን ፍጻሜ ይደረግ ዘንድ ያለው አሳቡም በሰማይና በምድር ያለውን ሁሉ በክርስቶስ ለመጠቅለል ነው።” (ኤፌ. 1፥10) ተብሎአል፡፡

2. ማርያም ከፍጥረት በፊት ነበረችን? ማርያም ዓለም በሌለበት ዘመን ለእግዚአብሔር ዓለሙ ነበረች? … እንዲህ ብሎ ማስተማር በራሱ፣ “ከሰንበት ተማሪ” ያነሰ ማንነትን መያዝ ነው። አንድ ጤናማ የኦርቶዶክስ ሰንበት ተማሪ የማርያምን ፍጡርነት እንዴት ይስታል? “እናቷ ሐና አባቷ ኢያቄም” ብሎ ገና በማለዳ እየሰማ አድጓልና። ግን ከኦርቶዶክስ ውጭ ያለ የካቶሊክንም ትምህርት የቀዳ ሰው፣ እንደዚህ “ሰባኪ” መቃዠቱ አይቀርም።

ካቶሊካውያን ማርያምን “ኃይለ አርያማዊት” ማለታቸውን ከዚህ በፊት አንስተን መልስ ሰጥተንበታል፤ ኦርቶዶክሳውያንም በመጽሐፋቸው ያለውን ትተው ከካቶሊክ የተቀዳ ትምህርት ይዘው “ከፍጡራን በላይ፤ ከፈጣሪ በታች” የሚል አስተምህሮ ይዘዋል። ይህን እውን ለማድረግም፣ እግዚአብሔር ፍጥረትን ሲፈጥር፣ አስቀድሞ ሚካኤልን እንዳማከረውና ሲያማክረውም “ስለ ማርያም ብሎ ፍጥረትን እንዲፈጥርና ጊዜው እስኪደርስ ማርያም በሚካኤል ክንፍ ሥር ታትማ ትቆይ” የሚል ተረት ተዘጋጅቶለታል።

መጽሐፍ ግን በግልጥ፣ “የጌታን ልብ ያወቀው ማን ነው? ወይስ አማካሪው ማን ነበር? ወይስ ብድራቱን ይመልስ ዘንድ ለእርሱ አስቀድሞ የሰጠው ማን ነው?” (ሮሜ 11፥34-35) ይላል፡፡ ማርያም በእግዚአብሔር ኅሊና ትታወቅ ነበር ማለት የእግዚአብሔርን ቅድመ ዕውቀት እንጂ የማርያምን ብቃት አያሳይም፡፡ እግዚአብሔር ገና ያልተደረገውን ሲያውቅ አማካሪም ረጅም የለበትምና!

ዐሳቤን ልቋጭ፣ መጽሐፍ፣ “ሁሉ ከእርሱና በእርሱ ለእርሱም ነውና፤ ለእርሱ ለዘላለም ክብር ይሁን፤ አሜን።” (ሮሜ 11፥36) እንደሚል፣ ፍጥረት ያለ ሰው ዐሳብ በእግዚአብሔርም ዕቅድ ብቻ መጥቶአል። ደግሞም ኹሉም ነገር በርሱ በኩል ካልኾነ በቀር፣ ሊሳካና ሊዋብ፤ ሊራመድና ሊጸና አይችልም፤ ፍጥረተ ዓለሙ ያለ እግዚአብሔር መናና ወና ነው። እኛ ከኀጢአታችን እንኳ ነጻ መውጣት ያልቻልን ደካማ ፍጥረት ነበርን! ኹሉም እንደገና “የጸጋው ክብር ይመሰገን ዘንድ” (ኤፌ. 1፥6) በውዴታ ምስጋናና ክብርን ለእግዚአብሔር ይሰጠዋል።

ቅዱስ ጳውሎስ በጥቂቱ እግዚአብሔርን በማወቁ በታላቅ ደስታ ያመሰግነዋል፤ በርግጥም እኛም እግዚአብሔርን ያወቅነው በፍጥረቱና (ሮሜ 1፥20-21) በተለይም ደግሞ በልጁ በኩል በኾነልን መገለጥ ነው (ዮሐ. 1፥18)፤ ያወቅነውን እግዚአብሔርን ባለማወቃችን ይበልጥ እናመልከዋለን እናመሰግነዋለን እንጂ ከቶ ወዴትም አንሄድም!

Furiin dhugaa Yasuus malee hinjiru!

Jechoota gurguddoo dubbii Waaqummaa keessaa inni tokko Furii dha. Kakuu duraa keessatti qabeenyi lubbuudhaaf furii ta'e caqasameera (Fkn. 13:8); warri Israa'el lafa ykn mana isaani erga gurguratan booda furii gochuudhaan deebisifachuu danda'u ture (Leewo. 25:24-34). Raajiin Muuseen ummata Israa'el gabrummaa Gibxi jalaa sababa bilisa baaseef furii ykn bilisa baasaa ta'eera ykn jedhamee yaamameera. (Ho. Erg. 7:35).

Kana irraa kan ka'een hiikni furii, (1) waan qabamee gad lakkisisuuf ykn deebisisuuf gatii kafalamuu; (2) beenyaa (3) jijjiiraa jedhamee hiikamuu danda'a. Isaan kun hundi  garuu gaadiduudhaan kan tajaajilan malee isaa furii dhugaa fi dhumaa miti.

Goftaan Yasuus Kristoos garuu warra isatti amanan hundaaf furii dhugaa ta'e mul'ate (Mar. 10:45; Room 3:24; Efe. 1:7; 1Ximo. 2:5-6; Hibr. 9:13). Furii ta'uudhaafis wantootni armaan gadii akka dirqamaatti ka'aamu;
1. Qaamni tokko furii namaaf ta'uudhaaf, matummaan isaa idaa kaffaluu fi broo irraa bilisa ta'u qaba. Yasuus cubbu kan hinbeeknee waan ta'eef idaa cubbuu nurraa kafaluu danda'a,
2. Furii ta'uudhaaf akka keenya ta'u qaba. Foon uffachuun Goftaa Yasuuf kanaaf ture,
3. Waaqayyoo gadiitti cubbuu namaatiif furii kan ta'u danda'u tokkolee hinjiru. Sababni isaas murtoo du'a kan nurratti dabarsee isa. Murtoo dabarsee kana kan nurraa furuus isa malee kan biraa hinjiru.

Kanaafis cubbuu raawanneef du'a kan nuratti murteesse innumtii furii nuuf ta'e nu fayyisee. Maqaan isaa yaa ebbifamu. Dhugaan kana yoo ta'e furiin nuuf raawatamuu isaatiin maal argannee? kan jedhuuf;

(1) ammaaf Dhiifama cubbuu  arganeerra; guutumaan guututti  immoo dhufaati 2ffaa Kristoosiin arganna (Room 8:23)

(2) Cubbuu mo'achuudhaan Kristoosiin duuka bu'udhaaf mana Hafuura Qulqullu taaneerra;

(3) Kana irraan kan ka'eenis gara boqonnaa Kristoositti galleera. Kanaaf furii arganneen dhiifama cubbuu argachuudhaan jireenya hinduune Kristoos wajjiin arganneera.

Eegaa Kristoosiin alatti uumamaan kamuu furii cubbuu ta'u hin danda'u; Kristoos garuu "... jireenya isaatiif muummee ka hin qabne ta'uu isaatiin... "(Hib. 7:16) furii bara baraa warroota isatti amananiif ta'eera.

"Jaalala addaan hin cinneen Gooftaa keenna Yesus Kristosiin warra jaalatan maraaf, kennaan isaa ka bilisaa isaaniif haa ta'u." (Efe. 6:24)

Liinkii telegraami - https://t.me/ebenezertek
Liinkii biloogii - https://abenezerteklu.blogspot.com/2025/04/furiin-dhugaa-yasuus-malee-hinjiru.html?m=1