የቅዱስ ሲኖዶስ አስቸኳይ ምልዓተ ጉባኤ በነገው ዕለት ይጀመራል

የቅዱስ ሲኖዶስ አስቸኳይ ምልዓተ ጉባኤ በነገው ዕለት በመንበረ ፓትርያርክ ቅድስተ ቅዱሳን ማርያም ገዳም በሚደረግ ሥርዓተ ጸሎት እንደሚጀመር ተገለጸ።

በወሊሶ አካባቢ በብፁዕ አባ ሳዊሮስ መሪነት በተፈፀመው ኢ-ቀኖናዊ "የኤጲስ ቆጶሳት" ሢመትን አስመልክቶ ብፁዕ ወቅዱስ አቡነ ማትያስ ባደረጉት አስቸኳይ ጥሪ መሠረት፤ ከእሁድ ጥር 14 ቀን 2015 ጀምሮ በአገር ውስጥ እና በውጭ አገራት የሚገኙ የቅዱስ ሲኖዶስ አባላት ወደ መንበረ ፓትርያርክ ጠቅላይ ጽ/ቤት እየገቡ ይገኛሉ።

በዚህም መሰረት፤ የቅዱስ ሲኖዶሱ አስቸኳይ ምልዓተ ጉባኤ በነገው ዕለት አመሻሽ ላይ በመንበረ ፓትርያርክ ቅድስተ ቅዱሳን ማርያም ገዳም በሚደረግ ሥርዓተ ጸሎት የሚጀመር መሆኑን ከተዋሕዶ ሚዲያ ማዕከል ያገኘነው መረጃ አመላክቷል።

በርካታ አህጉረ ስብከት የተፈፀመውን የቀኖና ጥሰት አስመልክቶ እንደማይቀበሉት እየገለጹ የሚገኙ ሲሆን፤ መላው ኦርቶዶክሳውያንም በአሁኑ ሰዓት የቅዱስ ሲኖዶስን ውሳኔ በመጠባበቅ ላይ ናቸው።

በሕገ ወጥ መንገድ "ኤጲስ ቆጶሳት" ተብለው ቅድስት ቤተ ክርስቲያንን ለመውረር የተላኩት መነኮሳት በአዲስ አበባ ከተማ በተለያዩ ሆቴሎች በመዘዋወር እየኖሩ እንደሚገኙም ለማረጋገጥ መቻሉን የተ.ሚ.ማ መረጃ አመላክቷል።
    ------ETHIO-MEREJA-----
       T.me/ethio_mereja