Meseret Media

#ከዜናዎቻችን| መንግስት ዘንድሮ ከፍተኛ መጠን ያለው ገንዘብ በታክስ መልክ ከህዝብ እና ከንግዱ ማህበረሰብ ለመሰብሰብ አቅዷል

(መሠረት ሚድያ)- በዘንድሮ አመት የፌደራል እና የክልል ገቢዎች መስሪያ ቤቶች በሁሉም ዘርፍ ላይ ምንም አይነት መዝገብ ቢቀርብ እርሱን ውድቅ በማድረግ በራሳቸው ስሌት ጭምር እጥፍ እና ከዛ በላይ የሆነ ታክስ እያስከፈሉ እንደሆነ ታውቋል፣ ይህ ደግሞ የታክስ ከፋዩን ማህበረሰብ ማማረር ጀምሯል።

"እያቀረብነው ያለው መዝገብ ጥቅሙ ምንም እየሆነ ነው" የሚሉት ታክስ ከፋይ ነጋዴዎች ግብር መክፈላችን ተገቢ ከመሆኑ ጋር እየተጣለብን ያለው የተጋነነ ግብር ከስራ ውጪ የሚያደርግ ነው ብለው ለመሠረት ሚድያ ተናግረዋል።

አክለውም "ከላይ ትእዛዝ መጥቷል" እያሉ ኪሳራ እና ባዶ መቀበል አቁመዋል ብለው ሁኔታው ከበፊቱ እንደተባባሰ ገልፀዋል።

"ገቢዎች የቀረበላቸውን መዝገብ ሳይመለከቱ ደስ ያላቸውን ጨምረው ክፈሉ ይላሉ። ይሄ ደግሞ ነጋዴውን እያጨናነቀ ነው ያለው። ካለው የስራ መቀዛቀዝ፣ ፈረሳ፣ ኮሪደር ልማት ግንባታ፣ በአንዳንድ ቦታዎች ላይ ያሉ ግጭቴች ጋር ተዳምሮ ከሌለን አቅም ላይ የሚጣለው ግብር ከስራ ውጪ የሚያደርግ ነው ብለው ነጋዴዎቹ አቤቱታቸውን አሰምተዋል።

"ለምሳሌ እኔ አምና ከነበረኝ ገቢ ላይ በ2016 በግማሽ ቅናሽ አሳይቷል፣ ይሄም የሆነው በአንዳንድ ቦታዎች ላይ ባለው ጦርነት ምክንያት ገበያ በመቀዝቀዙ ነው። ሆኖም ግን አምና ከከፈልኩት ግብር ላይ ዘንድሮ በእጥፍ ግብር ተወስኖብኛል" ያለው አንድ አስተያየት ሰጪ ይሄ መሬት ላይ ካለው አካሄድ ጋር ያልተጣጣመ ህግ እና መመሪያ የሚያስከትለው መቃወስ ከባድ ነው ብሏል።

አክሎም "ከሰሞኑ የገቢዎች ሚኒስቴር ባካሄደው የ 4 ወር አፈፃፀም ግምገማ ወደፊት ኪሳራ እና ባዶ የሚያሳውቁትን ለማስቀረት በእቅድ ላይ መሆኑን ተመልክቻለሁ። ይሄ ነገር ልዩ ትኩረት የሚሻ ይመስለኛል" ብሏል።

ሌላ ግብር ከፋይ ደግሞ "መውጫ መግቢያ አጣን፣ ዘግተህ ስጠፋ አሸባሪ ይሉሀል፣ እንዲሁም ሱቅህን ያሽጉታል። ከፍተህ ስትቀመጥ የገዛህበት ደረሰኝ ይሉሀል፣ ከሌለህ እቃህን ይወስዳሉ" በማለት ምሬቱን ገልጿል።

(#ከዜናዎቻችን በሳምንቱ በቪድዮ ዩትዩብ ላይ ያቀረብናቸውን የተመረጡ መረጃዎች ቆየት ብለን በድጋሜ በፅሁፍ የምናቀርብበት አምድ ነው)

መረጃን ከመሠረት!

@MeseretMrdia

#ከዜናዎቻችን| ከሰሞኑ እየተፈፀመ ባለው አፈሳ ከ80 ሺህ በላይ ሰው ተይዞ ሊሆን እንደሚችል ጥቆማ ተሰጠ

(መሠረት ሚድያ)- በአዲስ አበባ ተጀምሮ አሁን ላይ በበርካታ የኦሮሚያ ከተሞች እንዲሁም ሌሎች ክልሎች የተስፋፋው የወጣቶች የአፈሳ እና እገታ ድርጊት አሳሳቢ መሆኑን ቀጥሏል።

በድርጊቱ ዙርያ የቅርብ መረጃ ያላቸው እና ስሜ አይጠቀስ ያሉ አንድ የፌደራል መንግስት ምንጫችን የዛሬ ሶስት ሳምንት ገደማ በጀመረው አፈሳ እስከ 80 ሺህ ሰዎች ተይዘዋል የሚል ግምገማ እንዳለ ለመሠረት ሚድያ ተናግረዋል።

"ጉዳዩ በፌደራል መንግስት እውቅና እና በኦሮሚያ ክልል ባለስልጣናት የሚተገበር ነው። ለወታደራዊ ምልመላ እየወጡ ባሉ ማስታወቂያዎች በቂ የሰው ሀይል እየተገኘ አይደለም" ያሉት ግለሰቡ በተለይ "ስራ የፈቱ፣ ወይም ስራ የሌላቸው" የተባሉ በቀን ስራ የሚተዳደሩ ሰዎች እየተያዙ መሆናቸውን ተናግረዋል።

መሠረት ሚድያ ከሰሞኑ በሰራቸው ተከታታይ ዘገባዎቹ ከአዲስ አበባ በተጨማሪ እንደ ጅማ፣ ሀዋሳ፣ ሻሸመኔ፣ ባቱ እና ነቀምት ባሉ ከተሞች በርካታ ወጣቶች ታፍሰው መንግስት ወዳዘጋጃቸው ካምፖች እና መጋዘኖች እየተወሰዱ እንዳሉ ጠቁሟል።

በአዲስ አበባ እና አዳማ የጀመረው አፈሳ እና የገንዘብ ድርድር ወደ ሻሸመኔ እና ሌሎች ከተሞች መስፋፋቱ የታወቀ ሲሆን ባሻሸመኔ 10 ቀበሌ ስታድየም ዋናው በር ፊት ለፊት ባለው መጋዘን ውስጥ እና 02 ቀበሌ ምክር ቤት ጀርባ (ወይም ብሔራዊ ትምህርት ቤት ጎን ባለው አዳራሽ) በርካታ ወጣቶች ታጭቀው እንደሚገኙ መረጃዎች ያሳያሉ።

"ዙሪያ ገባው በሚሊሻ ተከቧል፣ ቤተሰብ አይደለም መጠጋት ለራስም ያሰጋል። ግን ምን እየሆነ ነው ያለው?" ብለው የሻሸመኔ ነዋሪዎች እየጠየቁ እንዳለ የታወቀ ሲሆን ከመሸ መንቀሳቀስ ከባድ እንደሆነባቸው እና የሚሊሻው አፈሳ ተባብሶ እንደቀጠለ መናገራቸው ታውቋል።

"ስልክህን ይፈተሻል ብለው መንገድ ላይ ይቀበሉህና ጠዋት ሚሊሻ ቢሮ ና ይላሉ። ስትሔድ ለማነው የሰጠኸው ተብለህ ወንጀለኛው አንተው። መሮናል። እኔም አንድ የኦሮሞ ወጣት ነኝ የታገልኩት ግን ለዚህ አልነበረም በማለት መልዕክቱን ያደረሰኝ ደግሞ አንድ የከተማው ወጣት ነው" ብሎ አንድ ወጣት ያጋጠመውን ለመሠረት ሚድያ አጋርቷል። 

ይሁንና የኦሮሚያ ኮሚኒኬሽን ይህ አለ የሚባለው አፈሳ "ሀሰት" መሆኑን ዛሬ ባወጣው መግለጫው ጠቅሷል። ይህን መረጃ የሚያራግቡ 'ቡድኖች' የኮነነው መግለጫው ሀሰት ከማለት ውጪ ከህዝብ በብዛት እየተነሱ ያሉ ጥያቄዎችን እና ጥቆማዎች ላይ አስተያየት ከመስጠት ተቆጥቧል።

ፎቶ: ፋይል

(#ከዜናዎቻችን በሳምንቱ በቪድዮ ዩትዩብ ላይ ያቀረብናቸውን የተመረጡ መረጃዎች ቆየት ብለን በድጋሜ በፅሁፍ የምናቀርብበት አምድ ነው)

መረጃን ከመሠረት!

@MeseretMedia

#ከዜናዎቻችን| የቢሾፍቱ ከተማ አብዛኛው ስፍራ ለዱባይ ባለሀብቶች በሊዝ እንደተሸጠ የተነገራቸው ነዋሪዎች በአንድ ሳምንት እንዲነሱ መታዘዛቸውን ተናገሩ

(መሠረት ሚድያ)- ከተማዋን 'በምስራቅ አፍሪካ የቱሪዝም ማዕከል' ለማድረግ እየተሰራ ካለው ስራ ጋር በተያያዘ በርካታ የከተማው ቦታ ለተባበሩት አረብ ኤምሬቶች ባለሀብቶች ሊሰጥ እንደሆነ በመጀመርያ የተሰማው የዛሬ ሁለት ወር ገደማ ነበር።

"እስከ 80 ፐርሰንት የሚደርስ የከተማው ቦታ ለኤምሬትስ ኢንቨስተሮች ሊሰጥ ነው የሚል መረጃ አለን፣ በዛ ላይ ትንሽ የቤት እድሳት ለማድረግ እንኳን ስንሞክር በከተማው አስተዳደር 'እዚህ ብዙ ስለማትቆዩ ማደስ አትችሉም' እየተባልን ነው" ብለው ነዋሪዎቹ በወቅቱ ለመሠረት ሚድያ ተናግረው ነበር።

ይህን በተመለከተ መሠረት ሚድያ የቢሾፍቱ ከተማ ማዘጋጃ ቤት ሀላፊ የሆኑትን አቶ ገብሬ ዳቢን አነጋግሮ የነበረ ሲሆም "እኔ የከተማው ኢንቨስትመንት ቦርድ ውስጥ አባል ነኝ፣ ግን በዚህ ደረጃ እንዲህ አይነት ኢንቨስትመንት ይመጣል የሚል መረጃ የለኝም" ብለው ተናግረው ነበር።

ሀላፊው የቤት እድሳት ክልከላውም ምናልባት ከተማው ውስጥ ወጥነት ያለው የቤት አሰራር እንዲሆን ከሚሰራው ስራ ጋር የተያያዘ ሊሆን እንደሚችል ገልፀው ነበር።

ነዋሪዎቹ ግን ትነሳላችሁ የሚለው ቃል ከመንግስት እስካሁን ባይወጣም ወደፊት ግን ሊነሱ እንደሚችሉ ስጋታቸውን ገልፀው ነበር።

አሁን በደረሰን መረጃ መሰረት ደግሞ ከ15 እና 20 አመት በላይ በቢሾፍቱ የኖሩ ነዋሪዎች "ቦታው ለዱባይ ባለሀብት በሊዝ ተሽጧል፣ ስለዚህ በአንድ ሳምንት ውስጥ ልቀቁ ተብለናል" በማለት ተናግረዋል።

ይህን ተከትሎ ለገበሬ ባለይዞታዎች ከሳ መክፈል እንደተጀመረ የታወቀ ሲሆን ከፍተኛ የመንግስት ባለስልጣናት ህዝቡን ሰብስበው የአየር ካርታ ላላቸው 105 ካሬ መሬት እንደሚሰጡ ተናግረዋል።

በአንድ ሳምንት ውስጥ ልቀቁ የተባሉት እነዚህ ነዋሪዎች የገበሬ ቤት የሆነውን አረንጓዴ ቀለም፣ የሌላውን ህዝብ ደግሞ ቀይ ቀለም እየቀቡ ለይተው እንደጨረሱ ታውቋል።

የኦሮሚያ ክልልም ሆነ የፌደራሉ መንግስት እስካሁን በግልፅ ምን ያህል መሬት ለኤምሬትስ ባለሀብቶች እንደሸጡ ይፋ አላደረጉም።

(#ከዜናዎቻችን በሳምንቱ በቪድዮ ዩትዩብ ላይ ያቀረብናቸውን የተመረጡ መረጃዎች ቆየት ብለን በድጋሜ በፅሁፍ የምናቀርብበት አምድ ነው)

መረጃን ከመሠረት!

@MeseretMedia

#ከዜናዎቻችን| ቤተመንግስት ተገኘ የተባለው ወርቅ ከተሸጠ የመንግስት አካላት ተጠያቂነት እንደሚጠብቃቸው እናት ፓርቲ ገለፀ

(መሠረት ሚድያ)- ፓርቲው ባወጣው መግለጫው ጠቅላይ ሚኒስትር አብይ አህመድ በቅርቡ ከሕዝብ ተወካዮች ምክር ቤት አባላት ለቀረቡላቸው ጥያቄዎች ምላሽ በሰጡበት ወቅት “ባደረግነው የብሔራዊ ቤተ መንግሥት እድሳት ተቆልፎበት የተቀመጠ 400 ኪ.ግ. ወርቅ ኮሚቴ አቋቁመን ወደ ብሔራዊ ባንክ አስገብተናል” በሚል ያቀረቡት ገለፃ ላይ ለህዝብ ማብራርያ እንዲሰጡ ጠይቋል።

"የጠቅላይ ሚኒስትሩ ንግግር ግልጽ አይደለም" ያለው ፓርቲው "ከእርሳቸው ወደ ሥልጣን መምጣት አስቀድሞ ለ44 ዓመታት ደርግ እና ኢህአዴግ ሲመሩ ይህ የተጠቀሰው ወርቅ ከእይታ ተሰውሮ ተደብቆ የተገኘ አዲስ ግኝት ወይንስ የአገር ቅርስ በመሆኑ ለጥፋት እንዳይጋለጥ ተጠብቆ የቆየ ነው?" የሚለው ምላሽ እንደሚፈልግ ገልጿል።

ፓርቲው አክሎም "የተጠቀሰው ወርቅ ለኢትዮጵያ ሕዝብ እንደተነገረው ወርቅ ሳይሆን ከወርቅ የተሠሩ የተለያዩ መገልገያዎች ከሆኑ ወደ ብሔራዊ ባንክ እየተላለፈ ያለው ወርቅ ሳይሆን ከወርቅ በላይ የሆነ የአገር ቅርስ የትላንት እኛነታችን መገለጫ ከሆኑ ነገሮች በግንባር ቀደምነት የሚጠቀስ መሆኑን በመጥቀስ በዚህ ጉዳይ ላይ ማብራሪያ መጠየቅ አግባብነት ይኖረዋል" ብሏል።

እናት ፓርቲ በመግለጫው በጠቅላይ ሚኒስትሩ የተጠቀሰው ወርቅ በቤተ መንግሥት አገልግሎት ላይ ይውሉ የነበሩ ከወርቅ የተሠሩ መገልገያዎች ወይንም ለነገሥታቱ ከውጭ አገራት መንግሥታት የተበረከቱ ከወርቅ የተሠሩ መገልገያዎች ከሆኑ እነዚህ ወርቅ ተብለው በወርቅ ዋጋ የሚገመቱና ተመዝግበው በብሔራዊ ባንክ የሚቀመጡ ባንኩም አግባብነት አለው ባለው ጊዜ የሚሸጠው ንብረት ሊሆኑ ከቶውንም አይችሉም ብሏል።

ይህን መሰል የአገር ቅርስ ወደ ተራ ወርቅነት ተለውጦ መልኩን እንዲቀይርና በወርቅም ሆነ በሌላ መልኩ ተሸጦ ወደ ገንዘብ የሚለወጥ ከሆነ የኢትዮጵያ መንግሥት በአጠቃላይና የኢትዮጵያ ብሔራዊ ባንክና የኢትዮጵያ ቅርስ ባለሥልጣን በተለይ የጋራ ተጠያቂነት እንደሚጠብቃቸው በመረዳት ከዚህ መሰል የጥፋት ሥራ እንዲታቀቡ እናት ፓርቲ በጽኑ ያሳስባል በማለት መግለጫውን አጠቃሏል።

መሠረት ሚድያ በቅርቡ በሰራቸው ተከታታይ ዘገባዎች ይህ በጠቅላይ ሚኒስትሩ ፓርላማ ላይ የተነገረለት ወርቅ ጥፍጥፍ ወርቅ ሳይሆን የኢትዮጵያ ነገስታት ለዘመናት ሲገለገሉባቸው የነበሩ ከከበሩ ማእድናት የተሰሩ ቁሳቁሶች፣ ዘውዶች እና የወርቅ እቃዎች እንደሆኑ ይፋ አድርጎ ነበር።

ጉዳዩ የበርካታ ዜጎች መነጋገርያ ቢሆንም መንግስት እስካሁን በጉዳዩ ዙርያ ማስተባበያም ሆነ ማረጋገጫ አልሰጠም።

ፎቶ: ፋይል

(#ከዜናዎቻችን በሳምንቱ በቪድዮ ዩትዩብ ላይ ያቀረብናቸውን የተመረጡ መረጃዎች ቆየት ብለን በድጋሜ በፅሁፍ የምናቀርብበት አምድ ነው)

መረጃን ከመሠረት!

@MeseretMedia