የኦርቶዶክስ ተዋህዶ መዝሙር👏

መጋቢት 29 በኩረ በዓላት

ይህች ቀን ለቅድስት ቤተ ክርስቲያን ልዩ ናት።

በዚህ ዕለት፦
➛ ጥንተ ፍጥረት ነው፦ በዚህች ቀን እግዚአብሔር ፍጥረታትን መፍጠር ጀመረ። "....ሰማይና ምድርን ፈጠረ።" ዘፍ. 1፥1)
➛ በዓለ ጽንሰት ( በዓለ ትስብእት) ነው፦ (ጌታችን ኢየሱስ ክርስቶስ በብሥራተ ቅዱስ ገብርኤል በቅድስት ድንግል ማርያም ማኅፀን ተጸነሰ።) ሉቃ. 1፥26
➛ ጥንተ ትንሳኤ ነው (የክብር ባለቤት ጌታችን ኢየሱስ ክርስቶስ ሞትን ድል አድርጎ የተነሳበት ነው) ማቴ. 28፥1
➛ ዳግም ምጽአት በዚህች ዕለት ነው፦ (በዚህች ዕለት ጌታችን ዳግመኛ ለፍርድ በዚህች ቀን ይመጣል።) ማቴ. 24፥1

በእነዚህ በዓላት ምክንያት ዕለቱ "ርዕሰ በዓላት፣ በኩረ በዓላት" ይባላል።

፮
የቅዱስ ዮሐንስ አፈወርቅ ድርሳን በእንተ ጾም

....ወርቅ በእሳት ውስጥ ሲጨመር ዝገቱ እንደሚርቅ ኹሉ፥ የእነዚህ ኃይላተ ቃላት ፍርሐት በልቡናችን ጽላት ላይ ሲቀረፅም ይህን ያህልና ከዚህ በላይ የዝሙት ዝገትን (ኃጢአትን) ኹሉ እናርቃለን፡፡ ስለዚህ በወዲያኛው ዓለም በእሳተ ገሃነም እንዳንቃጠል በዚህ ዓለም በቃሉ ትምህርት ይህን እሳት በልቡናችን ላይ እናንድደው፡፡ በዚህ ዓለም ሕሊናቸውን ንጹህ ያደረጉ ሰዎች፥ በወዲያኛው ዓለም ያለው እሳት አያቃጥላቸውምና፡፡ ከእነ ኃጢአታቸው ወደዚያ ከኼዱ ግን ያ እሳት ያገኛቸዋልና፡፡ “በእሳት ስለሚገለጥ ያ ቀን ያሳያልና፥ የእያንዳንዱም ሥራ እንዴት መኾኑን እሳቱ ይፈትነዋል” ይላልና (1ኛ ቆሮ. 3፥13)፡፡ ስለዚህ በወዲያኛው ዓለም በሕማም በዋይታ እንዳንመረመር በዚህ ዓለም ያለ ሕማም ያለ ዋይታ ራሳችንን እንመርምር፡፡

“ምንም ብትል ምን ግን ሕጉ (ትእዛዙ) አስጨናቂ ነው" የሚል ሰው አለ፡፡ እንግዲህ ምንድን ነው? እግዚአብሔር ማድረግ የማይቻለንን ነገር እንድናደርግ አዝዞናልን? በፍጹም ማድረግ የማይቻለንን ሕግ (ትእዛዝ) እንድንፈጽም አላዘዘንም ብዬ እመልስልሃለሁ፡፡

ዝም በል! በዚህ አትጸድቅምና ወይም ደግሞ ከቅድሙ ይልቅ የባሰ በደል ትሠራለህና አምላክንም አትውቀስ፡፡ ደጋግመው ኃጢአት የሚሠሩ ሰዎች ለፈጸሙት በደል እነርሱ ራሳቸው ባለ ዕዳ እንደ ኾኑ አድምጥ፡፡ አምስት መክሊት የተቀበለው ባሪያ ሌላ አምስት አትርፎ መጣ፡፡ ኹለት መክሊት የተቀበለውም ሌላ ኹለት አትርፎ ይዞ መጣ፡፡ አንድ መክሊት የተሰጠው ሰው ግን ሳያተርፍ ያቺኑ ይዞ መጣ፡፡ ይባስ ብሎም አትርፎ እንደ መምጣት “ጨካኝ ሰው መኾንህን ዐውቃለሁ” ብሎ በጌታው ላይ የነቀፋ ቃልን ሰነዘረ (ማቴ.25፥24)፡፡

ወዮ! አእምሮ የጎደለው ባሪያ! የገዛ ራሱ ኃጢአት ሳይበቃው እንደ ገና በጌታው ላይ የነቀፋ ቃልን ጨመረበት፡፡ “ያላኖርኸውን ትወስዳለህ፤ ያልዘራኸውም ታጭዳለህ' ብሎአልና (ሉቃ.19፥21)፡፡ ልክ እንደዚሁ ብዙ ሰዎች በዚህ ዓለም በጎ ሥራን ካለመሥራታቸው በላይ እንደ ገና በጌታ ላይ የነቀፋ ቃልን በመናገር ሌላ በደል ይጨምሩበታል፡፡ ኾኖም ግን ጌታችን የማንችለውን ነገር አላዘዘንም፡፡

እግዚአብሔር ማድረግ የማንችለውን ሕግ እንድንፈጽም እንዳላዘዘን ልታውቅ ትወድዳለህን? ብዙዎች ከታዘዙት በላይ አትርፈው ፈጽመዋል፡፡ የተሰጠን ትእዛዝ ጥንቱንም የማይቻል ቢኾን ኖሮ ትሩፋትን መሥራት ባልተቻለ ነበርና፡፡ የድንግልና ሕይወትን በግድ እንድንፈጽመው አላዘዘንም። ብዙዎች ግን ይህ ተችሏቸዋል፡፡ መንኖ ጥሪትን በግድ ገንዘብ እንድናደርገው አለዘዘንም፡፡ ብዙዎች ግን ሀብታቸውን ንቀዋል፤ ትእዛዛተ ወንጌል ለማድረግ እጅግ ቀሊላን መኾናቸውም በሥራቸው መስክረዋል፡፡ የድንግልና ሕይወትን አላዘዘም፤ ድንግልናን እንደ ግዴታ የሚያዝዝ ይህን የማይፈልገውን ሰውንም የግድ ይህን ሕግ እንዲፈጽም ያዝዘዋልና፡፡'' ምክርን ብቻ የሚሰጥ ግን ሰማዒው ምርጫ እንዲኖረው ይፈቅድለታል፡፡ ንዑድ ክቡር የሚኾን ጳውሎስ፡- “ስለ ደናግልም የጌታ ትእዛዝ የለኝም፥ ነገር ግን ምክር እመክራለሁ” ያለበት ምክንያትም ይህ ነው (1ኛ ቆሮ.7፡25)፡፡ እንግዲህ ምክር እንጂ ትእዛዝ እንዳልኾነ ትመለከታለህን? በትእዛዝና በምክር መካከልም ሰፊ ልዩነት አለ፡፡ ትእዛዝ ግዴታ ሲኾን ምክር ግን እንደ ምርጫ የሚከናወን ነውና፡፡ “አስተምር ዘንድ እመክራለሁ እንጂ ሸክም እንዳልኾንባችሁ ትእዛዝን አላዝዝም" አለ፡፡ እንዲህም በመኾኑ ጌታችን ክርስቶስ፦ “ኹላችሁም የድንግልና ሕይወትን ኑሩ" አላለም፡፡ ሰዎች ኹሉ በድንግልና እንዲኖሩ አዝዞና ምክሩን ትእዛዝ አድርጎት ቢኾን ኖሮ ያን ሕይወት መኖር የሚችሉትም ቢኾኑ እንደ አሁኑ በድንግልና መኖራቸው ታላቅ ክብርን ባላስገኘላቸው ነበርና፡፡ በድንግልና የማይኖር ስውም ጽኑ ቅጣት ባገኘው ነበርና፡፡

ይቀጥላል..

(ቅዱስ ዮሐንስ አፈወርቅ ንስሓና ምጽዋት ገጽ 96-116 በገብረ እግዚአብሔር ኪደ የተተረጎመ)

፭
የቅዱስ ዮሐንስ አፈወርቅ ድርሳን በእንተ ጾም

....በዚህ ዓለም ሕይወት የነገሮች አከዋወን እንደዚህ ነውና፡፡ ትኩረትህን ልታመጣው ባለህ ነገር አድካሚነት ላይ የምታደርግ ከኾነ፡ ነገሩን ለማግኘት እጅግ ከባድና አስቸጋሪ ይኾንብሃል፡፡ ትርፉን የምታስብ ከኾነ ግን በፊትህ ያለው ነገር ቀላል ነው፡፡ አንድ የመርከብ አለቃም ማዕበሎችን ብቻ የሚመለከት ከኾነ መርከቢቱን ወደ ወደቡ ሊያደርሳት አይችልም:: ማዕበሎቹን ሳይኾን ንግዱን የሚመለከት ከኾነ ግን ተበረታትቶ ግዙፉን ባሕር ደፍሮ ይሻገረዋል፡፡ አንድ ወታደርም ስለሚያጋጥሙት ቁስሎችና ሞት የሚያስብ ከኾነ ጋሻ ጦር አይታጠቅም፡፡ ከቁስሎቹ ይልቅ ስለሚያገኛቸው ድሎችና ማሸነፎች የሚያስብ ከኾነ ግን ለምለም መስክ እንደሚሮጥ ሰው ኾኖ ወደ ዓውደ ውጊያው እየተፋጠነ ይኼዳል። ማንኛውም በተፈጥሮው ከባድ የኾነ ነገር ቀላል የሚኾነው አስቸጋሪነቱንና ከባድነቱን ብቻ ሳይኾን ከዚያ የሚገኘው ሽልማትንም ጭምር የተመለከትን እንደ ኾነ ነውና፡፡

በተፈጥሯቸው ከባድና አስቸጋሪ የኾኑ ነገሮች እንዴት ቀላል እንደሚኾኑ መማር ትወድዳለህን? ቅዱስ ጳውሎስን አድምጠው፤ እንዲህ ያለውን "የማይታየውን እንጂ የሚታየውን ባንመለከት፥ ቀላል የኾነ የጊዜው መከራችን የክብርን የዘለዓለም ብዛት ከኹሉ መጠን ይልቅ ያደርግልናልና” (2ኛ ቆሮ.4፥17)። የተናገረው ነገር ረቂቅ ነው፡፡ “መከራ ከኾነ ቀላል የሚኾነው እንዴት ነው? ቀላል ከኾነስ - እነዚህ ነገሮች ተቃራኒ ናቸውና - እንዴት መከራ ሊኾን ይችላል?" ሊባል ይችላልና፡፡ ቀላል መኾኑን በምን መንገድ እንደ ኾነ ቀጥሎ በተናገረው ነገር ረቂቁን (የተሰወረውን) ግልፅ አድርጎታል፡፡ እንዴት? "የሚታየውን እንመልከት" በማለት! ቅዱስ ጳውሎስ መጀመሪያ የክብር አክሊሉን አመጣና ቀጥሎም ተጋድሎውን ቀላል አደረገው፡፡ አስቀድሞ ሽልማቱን አሳየና አድካሚነቱን አራቀ፡፡ ስለዚህ አንተም መልከ መልካምና ተሸላልማ የለበሰች ሴትን ስትመለከትና ምኞት ቢመጣብህ፤ ልብህም ሴትዋን ማየት ደስ እንዳሰኘው ብታስተውል ዓይንህን ከዚህ ነቅለህ ከላይ ከሰማይ ያለውን አክሊል ወደ ማየት ከፍ ከፍ አድርገው፡፡ እንደ አንተ ባሪያ የኾነችን ሴት አየህን? ጌታህን አስብ፤ በቀላሉም በሽታህን ማራቅ ይቻልሃል፡፡

የሚማሩ ሕፃናት ወደ ትምህርት ቤት እንዲሁ ያለ ዓላማ የማይኼዱና ተምረው የማይመጡ ከኾነ፣ በስንፍና የማይመላለሱ ከኾነ፣ ይህን ማድረግ የማይሰለቻቸው ከኾነ እንተ ደግሞ ከዚህ የበለጠ ክርስቶስን በዓይነ ሕሊናህ በፊትህ የምትመለከተው ከኾነ እንደዚህ ያለ ነገር አያገኝህም፡፡ "ወደ ሴት ያየ ኹሉ የተመኛትም ያን ጊዜ በልቡ ከእርስዋ ጋር አመንዝሮአል" (ማቴ. 5፥28)፡፡ እኔ እጅግ ደስ ብሎኝና አዘውትሬ የሕግ መልእክታትን (መጽሐፍ ቅዱስን) አነባ'ለሁ፡፡ በዚህ በሽታ በቀላሉ የሚጠቁ ሰዎች ሳይቀሩ ቀኑን ሙሉ ይህን ማድረግ እንደሚቻላቸው ልነግራችሁ እወድዳለሁ፡፡ እናንተ ግን በርግጥ ከዚህ መጠበቅ እንደሚቻላችሁ ልነግራችሁ እወድዳለሁ፡፡ በዚህም ብዙዎች ወደ ጤንነታቸው ይመለሳሉ፡፡ “ወደ ሴት ያየ ኹሉ የተመኛትም ያን ጊዜ በልቡ ከእርስዋ ጋር አመንዝሮአል፡፡”

እነዚህን ኃይላተ ቃላት ማንበብ ብቻ የኃጢአትን ብክለት ኹሉ ማንጻት ይቻላል፡፡ ቁስሎች የሚነጹት (የሚድኑት) በዚህ መንገድ ነውና፡፡ ቁስሎችን የሚያነጻ ሰው አስቀድሞ ጽኑ መድኃኒቶችን ይጨምራል፡፡ እናንተም እነዚህን ኃይላተ ቃላት ስትቀበሉአቸውና ስትተገብሩአቸው፥ ይህን ያህልና ከዚህ በላይ የዝሙትን መርዝ ከእናንተ ታርቃላችሁ፡፡

ይቀጥላል..

(ቅዱስ ዮሐንስ አፈወርቅ ንስሓና ምጽዋት ገጽ 96-116 በገብረ እግዚአብሔር ኪደ የተተረጎመ)

​​​​​​​​ኒቆዲሞስ
የዐብይ ጾም ሰባተኛ ሳምንት።

''እውነት እውነት እልሃለሁ፥ ሰው ዳግመኛ ካልተወለደ በቀር የእግዚአብሔርን መንግሥት ሊያይ አይችልም አለው። ሰው ከውኃና ከመንፈስ ካልተወለደ በቀር ወደ እግዚአብሔር መንግሥት ሊገባ አይችልም። ከሥጋ የተወለደ ሥጋ ነው፥ ከመንፈስም የተወለደ መንፈስ ነው። (ዮሐ 3:3-6)

ጌታችን ወደዚህ ምድር መጥቶ የምስራቹን ቃል ሲያውጅ እስራኤላውያን የተቀበሉት በተደበላለቀ ስሜት ነበር። በአንድ በኩል ሕዝቡ ለብዙ ዘመናት በባርነት ሲገዛ ስለነበር ከሮማውያን ቅኝ ግዛት ነጻ የሚያወጣቸው መሲህ ይፈልጋሉ፡፡

በሌላ በኩል ደግሞ ሕዝቡ ለብዙ ዘመናት በባርነት ቀንበር ስለደከመ ተስፋ በመቁረጥ ተዳክሞ ነበር፡፡ መሲህ ቢመጣ እንኳ ይመጣል ብለው የሚጠብቁት ጦር ይዞ ሰራዊት አስከትሎ ነው ብለው ያምኑ ነበር፡፡ ስለዚህም ነው ክርስቶስን መሲህ ነኝ ብሎ ሲመጣ ለመቀበል ፈቃደኞች አልነበሩም፡፡

ምክንያቱ ደግሞ ጦር ሳይዝ ሰራዊት ሳያስከትል እንዲሁ ባዶ እጁን አርነት ላወጣችሁ መጥቻለሁ እያለ ደጋግሞ ተናግሯልና ነው፡፡ ምንም እንኳ አብዛኛው እስራኤላዊ የክርስቶስን መሲህነት ቢጠራጠርና ባይቀበለውም፣ በፍጹም እምነት እስከ መጨረሻው የተከተሉትም ነበሩ፡፡

ለዚህም ትልቅ ማሳያ የሚሆነን ከፈሪሳውያን ወገን የሆነ ኒቆዲሞስ የተባለ አይሁዳዊ ነው፡፡

ቅድስት ቤተክርስቲያንም ይህን ታላቅ ሰው ለማዘከር የዐቢይን ጾም ሰባተኛ እሁድ በእርሱ ስም ሰይማ ታከብረዋለች። ተከታዮቿ ምዕመናንም የእርሱን አሰረ ፍኖት እንዲከተሉ ትመክራለች ታስተምራለችም፡፡

ኒቆዲሞስ ማነው?

፩. ኒቆዲሞስ ፈሪሳዊ ነው《ዮሐ 3-1》
፪. ኒቆዲሞስ የአይሁድ አለቃ ነው《ዮሐ 3-1》
፫. ኒቆዲሞስ መምህረ እስራኤል ነው《ዮሐ 3-10》
፬. ኒቆዲሞስ ምሁረ ኦሪት ነው 《ዮሐ 7-51》

ኒቆዲሞስ ምን አደረገ?

ለምስጢረ ጥምቀት መገለጥ ምክንያት ሆነ《ዮሐ 3:1-21)
አዋቂ ነን የሚሉትን አሳፈራቸው 《ዮሐ 7-51》
ጌታን ለመገነዝ በቃ《ዮሐ 19-38》

=> ከኒቆዲሞስ ምን እንማር?
አትኅቶ ርእስ ጎደሎን ማወቅ የእውነት ምስክር《ስምዐ ጽድቅ》መሆን ትግሃ ሌሊት እስከ መጨረሻ መጽናት በአጠቃላይ ከኒቆዲሞስ ህይወት ብዙ ቁምነገሮችን እንማራለን፡፡

የኒቆዲሞስ በሌሊት ገስግሶ መምጣት ለምስጢረ ጥምቀት ትምህርት መገለጥ ምክንያት እንደሆነ ሁሉ በቅዳሴው በኪዳኑ በሰዓታቱ በማኅሌቱ መገኘትና መሳተፍ ረቂቅ የሆነው ሰማያዊ ምሥጢር ፍንትው ብሎ አንዲገለጥልን ምክንያት ነውና በምሥጢራት በመሳተፍ ራስን ዝቅ በማድረግ ለታላቅ ክብር እንድንበቃ የእርሱ መልካም ፈቃድ ይሁንልን፡፡

ወስብሐት ለእግዚአብሔር
💚 @ortodoxmezmur 💚
💛 @ortodoxmezmur 💛
❤️ @ortodoxmezmur ❤️