Sheger Press️️

#ለእሳትነት የቅድስና ማዕረግ የደረሰው አባት

ታላቁ ሊቅ አርእስተ ሊቃውንት ከሚባሉ አባቶች አንዱ ነው። አባቱ ኤስድሮስ እናቱ ኤሚሊያ ይባላሉ። ባልና ሚስት ከተቀደሰ ትዳራቸው አምስት ወንድና አንድ ሴት ልጅ አፍርተዋል። የሚገርመው እህቱ ቅድስት ማቅሪና ገዳማዊት ስትሆን አምስቱም ወንዶች ጳጳሳት መሆናቸው ነው። የሁሉ የበላይ የሆነው ግን ቅዱስ ባስልዮስ ነው። ቅዱስ ባስልዮስ ዘቂሳርያ ከሦስት መቶ አሥራ ስምንቱ ሊቃውንት አንዱ ነው። የቅዱስ ኤፍሬም ሶርያዊም መምህር ነው። ቅዱስ ባስልዮስ ገዳማዊ ጻድቅ፣ ብዙ ምሥጢር የተገለጸለት ሊቅ፣ የብዙ ምዕመናን አባት፣ የቂሣርያ ሊቀ ጳጳሳት፣ ብዙ ተአምራት ያደረገና ከከዊነ እሳት ከፍጹምነት የደረሰ ነው። በአራተኛው መቶ ክፍለ ዘመን ለመጀመሪያ ጊዜ የነዳያንን ሆስፒታል ያስገነባ እርሱ ነው።

በርካታ ድርሰቶችም ደርሷል። መጽሐፈ ቅዳሴን ዛሬ በምናውቀው መንገድ ያሰናሰለው እርሱ ሲሆን በርካታ ሥርዓቶች ሰርቷል የብሉይና የሐዲስ ኪዳን መጻሕፍትንም ተርጉሟል። ቅዱስ ባስልዮስ በቂሣርያ ማዛካ ቀጰዶቅያ ትምህርት ቤት ተምሯል፡፡ በዛም የረጅም ጊዜ ጓደኛው ቅዱስ ጎርጎርዮስ ዘእንዚናዙን ተዋውቋል፡፡ ሁለቱም በአቴንስ በ342 ዓ.ም አካባቢ ጀምሮ ለስድስት ዓመት ተቀምጠዋል፡፡ ባስልዮስ አቴንስን በ348 ለቆ ወደ ግብጽና ሶርያ ከተጓዘ በኋላ በሀገሩ በቂሣርያ የሕግ ሥራ በመለማመድና የንግግር ችሎታ ሲያስተምር እንደቆየ ታሪኩ ያስረዳል፡፡ ቅዱስ ባስሊዮስ ጥሩ ተናግሮ የማሳማን ጸጋ የታደለ ነበር፡፡ እርሱ ግን ሕጋዊ የማስተማር ሥራውን ትቶ ሕይወቱን ለእግዚአብሔር ሰጠ፡፡                                                                                       

ይልቁንም በመንፈሳዊ ትምህርት ተስቦ በ350 ዓ.ም በአስተሳሰብ ከእሱ ጋር የሚመሳሰሉትን  በክርስትና ሕይወት እንዲጓዙ ወንድሙን ጴጥሮስን ጨምሮ ማሰባሰብ ጀመረ፡፡ አንድ ላይ ሆነው በቤተሰቡ ርስት ላይ አኔዚ አጠገብ ገዳም መሠረቱ፡፡ እኅቱ ማክሪናና ሌሎች ሴቶችም ራሳቸውን ለቅዱስ ተግባር በመነሣት ከባስልዮስ ጋር ይተባበሩ ነበር፡፡ ቅዱስ ባስልዮስና ቅዱስ ጎርጎርዮስ ዘእንዚናዙ የአርያኒዝም የክህደት ትምህርት የቀጰዶቂያን ክርስቲያኖች እንዳይከፋፍል ሲታገሉ ቆዩ፡፡ በኋላም በትልቅ የጉባኤ ክርክር ከታዋቂ አርያናውያን ቴዎሎጂየንና ተናጋሪዎች ጋር ክርክር ለማድረግ ተስማሙ፡፡ በንጉሥ ቫሌነስ ተወካዮች መሪነት ከተደረገው ክርክር በኋላም ጎርጎርዮስና ባስልዮስ አሸናፊዎች ሆነው ወጡ፡፡

ከዚህ በኋላ ቅዱስ ባስልዮስ የቂሣሪያን ከተማ አስተዳደር ተረከበ፡፡ አውሳቢየስ ግን በባስሊዮስ ፈጣን ችሎታና ዕድገት በማኅበረሰቡ ባገኘው ተቀባይነት በመቅናት ወደ ነበረበት የገዳም ብቸኝነት ኑሮ እንዲመለስ ፈቀደለት፡፡ ጎርጎርዮስ ግን በዚህም በዚያም ብሎ ባስልዮስን እንዲመለስ አሳመነው፡፡ በዚያች ከተማም ለበርካታ ዓመታት ውጤታማ አስተዳዳሪ ሆነ የተደነቀበትን ሥራ ሁሉ ለአውሳብዮስ ተወለት፡፡ በ362 ዓ.ም አውሳቢዮስ ሲሞት ቅዱስ ባስልዮስ እንዲተካው ተመረጠ፡፡ በዛውም ዓመት የቂሣሪያ ሊቀ ጳጳስ ሆነ፡፡ ቅዱስ ባስልዮስ ለሃይማኖቱ ቀናኢ የሆነ፣ በስብከቱ የሚታወቅ ደግና ለሰው አዛኝ ነበረ፡፡ በዚያም ወቅት ድርቅ ባስከተለው ረኀብ ምክንያት በግሉ ምግብና የሚጠጣ ነገር በማዘጋጀት ድሆችንና አቅመ ደካሞችን የሚያበላ፣ ሀብቱንም ድሆች እንዲጠቀሙ በነበረበት ቤተክርስቲያን አካባቢ የሚያድል አባት ነበር፡፡                                   

በገዳማዊ ኑሮ ያሉትን እየረዳንና በዓታቸውን እያጸናን የበረከታቸው ተሳታፊ እንሁን፡፡


ድጋፍ ለማድረግ:- ሙትአንሳ  ማር  ቅዱሰ ሚካኤል አንድነት  ገዳም


ኢትዮጲያ ንግድ ባንክ
1000442598391

ወይም

አቢሲኒያ ባንክ
141029444


የገዳሙ ስልክ ቁጥር:-0918077957 ወይም 0938644444

                     

#ክብሩና ሥልጣኑ ከሰማይ ከፍታ ከፍ የሚል አባት


ዓይናችን በገለጽንበት ቅጽበት ከሚታይ ነገር ላይ እንደሚያርፈው ሁሉ አባታችን በተወለዱ ጊዜ አንደበታቸው ከምስጋና የተገኘ፣ ስለሀገራችን መቶ ዓመት ተዘቅዝቀው የጸለዩ፣ ገና በ3 ዓመታቸው በገዳም መኖር የጀመሩና ከማሕጸን ጀምሮ ለመንፈስ ቅዱስ አገልግሎት የተለዩ፣ ከተወለዱ ጀምሮ እህል ያልቀመሱ፣ በምድረ በዳ እንደመላእክት የኖሩ፣ ከጌታችን ጋር መሞት አይገባኝም ብለው የተከራከሩ ታላቅ ቋድቅ አባት አቡነ ገብረ መንፈስ ቅዱስ፡፡ ትውልዳቸው ግብጽ ንሒሳ ውስጥ ነው፡፡

አባታቸው ስምዖን እናታቸው አቅሌስያ ይባላሉ፡፡ ሠላሳ ሦስት ዓመት በትዳር የቆዩት ቅዱሳን በሩካቤ ስጋ የተዋወቁት ለሦስት ቀናት ብቻ ነው፡፡ ይህም ልጅ እንዲሰጣቸው እግዚአብሔርን እየለመኑ ነው፡፡

በተጋቡ በሰላሳ ዘመናቸው አቅሌሲያ ቤተ እግዚአብሔር ገብታ ከሥላሴ ሥር ወድቃ ስትማጸን “ክብሩና ሥልጣኑ ከሰማይ ከፍታ ከፍ የሚል ንጽሕናው ከሚካኤል ከገብርኤል የሚተካከል ክህነቱ እንደ መልከጼዴቅ እንደ መጥምቁ ዮሐንስ እንደ ነቢዩ ኤልያስ የሆነ ልጅ እንቺ ተቀበይ” የሚል ድምጽ ሰማች፡፡ መጋቢት 29 ፀንሳ በታኅሣሥ 29 ደም ግባቱ እጅግ የሚያምር ወንድ ልጅ እንደወለደች መልአኩ ቅዱስ ገብርኤል በሰው አምሳል መጥቶ “የዚህ ልጅሽ ስሙ ገብረ መንፈስ ቅዱስ ይሁን” አላት፡፡ ወዲያውም ሕፃኑ ከእናቱ ጭን ወርዶ ለአብ ለወልድ ለመንፈስ ቅዱስ ሦስት ጊዜ ሰገዶ “ከጨለማ ወደ ብርሃን ለአወጣኸኝ ለአብ ለወልድ ለመንፈስ ቅዱስ ምስጋና ይሁን” አለ፡፡ እመቤታችን የቅድስት ድንግል ማርያምም ባረከችው ቅዱሳን መላዕክት ዘወትር ከእርሱ ጋር ነበሩ፡፡ ከዚህም በኋላ መልአኩ ቅዱስ ገብርኤል ሕፃኑን አባ ዘመደ ብርሃን የተባሉ አባት ላሉበት ገዳም ሰጣቸው፡፡

ሕፃኑንም የቤተ ክርስቲያንን ትምህርት ሁሉ እያስተማሩ አሳደጉት፡፡ ትምህርቱን በጨረሰ ጊዜ ዲቁና ሰጡት፡፡ ፍጹም የእግዚአብሔር ጸጋ አድሮበታልና ሥራው ሁሉ በዕውቀት የተመላና የተቃና ሆነ፡፡ እንደ ቅዱስ እንጦንስም አስኬማ ሰጡት፡፡ ከዚህም በኋላ አቡነ ገብረ መንፈስ ቅዱስ ቅስናን ተቀበሉና በጾም በጸሎት ተጠምደው በታላቅ ተጋድሎ መኖር ጀመሩ፡፡ እንደ ሐዋርያትም የተአምራትና የፈውስ ሀብት ተሰጣቸውና ድውያንን የሚፈውሱ፣ ሙታንን የሚያነሡ፣ አጋንንትን የሚያወጡ ሆኑ፡፡ ወደ ሰማያት አርገው በረከትና ጸጋ የተቀበሉ፣ አጋንንትን የሚያሳድዱበት፣ ድውያንን የሚፈውሱበት ታላቅ ጸጋ ተሰጣቸው፡፡ ከሰው ተለይተው ወደ ጫካ ገብተው ከስድሳ አንበሶችና ከስድሳ ነብሮች ጋር የሚኖሩት አባታችን፣ እንስሳቱ እርሳቸውን የረገጡትን መሬት ልሰው ጠግበው ይኖራሉ፡፡

ሰውነታቸው አንድ ክንድ ከስንዝር በሚረዝም ጠጉር የተሸፈነው አባታችን ወደ ሀገራችን መጥተው ተጋድሏቸውን ቀጠሉ፡፡ የእግዚአብሔር መልአክ ቅዱስ ገብርኤልም ገዳማቶቻቸው ወዳሉባቸው ወደ ምድረ ከብድና ወደ ዝቋላ ተራራ ወሰዳቸው፡፡ በእነዚህ ገዳማት እየተመላለሱ ሲጸልዩና ሀገራችንን ሲባርኩም ኖረዋል፡፡ ሰው የገዛ ፊቱን በመስታወት እንደሚያይ በሀገራች ያለውን የኃጢአት ስራ ባዩ ጊዜ በዝቋላ ሐይቅ አንድ መቶ ዓመት ተዘቅዝቀው መላው ኢትዮጵያን እንዲምርካቸው ጸልየው ቃል ኪዳን ተቀብለዋል፡፡ የመጨረሻ እረፍታቸውም በምድረ ከብድ ገዳም ነው፡፡ ይህ እረፍታቸውም በየዓመቱ መጋቢት 5 ታስቦ ይውላል፡፡ ገዳማትንና ገዳማውያንን እያሰብን ከበረከታቸው እካፈል፡፡
     

ድጋፍ ለማድረግ:- ሙትአንሳ  ማር  ቅዱሰ ሚካኤል አንድነት  ገዳም


ኢትዮጲያ ንግድ ባንክ
1000442598391

ወይም

አቢሲኒያ ባንክ
141029444


የገዳሙ ስልክ ቁጥር:-0918077957 ወይም 0938644444