እውን መረጃ

የኤሌክትሪክ ዋጋ ጭማሪ ዳግም እንዲከለስ አለምአቀፍ የገንዘብ ተቋማት እየጠየቁ ነው


ለዉጡን ተከትሎ ከግምት ዉስጥ ያስገባ የኤሌክትሪክ ታሪፍ ማሻሻያ እንዲደረግ ከአለም አቀፍ የገንዘብ ተቋማት ጥሪ ቀረበ

መንግስት ለረጅም ጊዜ ሲጠብቅ የነበረውን የኤሌክትሪክ ታሪፍ ጭማሪ ተግባራዊ ቢያደርግም አለም አቀፍ የገንዘብ ተቋማት ግን ተጨማሪ ክለሳዎች እንዲደረጉ እየጠየቁ መሆኑን ካፒታል ተረድታለች።

የሚኒስትሮች ም/ቤት ሰኔ 13 ቀን 2016 ዓ.ም. ባካሄደው 36ኛው መደበኛ ስብሰባ ላይ የኤሌክትሪክ ታሪፍ ጭማሪን ያፀደቀ ሲሆን ይህም ጭማሪ ከመስከረም 1/2017 ጀምሮ ተግባራዊ እንዲሆን መወሰኑ ይታወቃል።

አገልግሎቱ በአዲሱ የታሪፍ ማሻሻያዉ እስከ 200 ሜጋዋትስ ሰዓት የሚጠቀሙ ደንበኞችን ድጎማ እንደሚያደርግ ገልጿል ። ማሻሻያው በዝቅተኛ የኑሮ ደረጃ ላይ የሚገኙትን ደንበኞች ታሳቢ አድርጓል ቢባልም የተደረገው ጭማሪ በዓመት ዉስጥ 122 በመቶ ደርሷል።

ይሁን እንጂ ከማክሮ ኢኮኖሚ ለውጡ ጋር በተገናኘ እንደ አለም ባንክና የአለምአቀፉ የገንዘብ ተቋምን (አይ.ኤም.ኤፍ) የመሳሰሉ አለምአቀፍ አጋሮች የተለያዩ ድጋፍ ከማድረጋቸው ጋር ተያይዞ መንግስት ያፀደቀውን የታሪፍ ጭማሬ በድጋሚ እንዲያጤነው መጠየቃቸው ነዉ ለማወቅ የተቻለው።

#CapitalNews

#እውን_መረጃ

የኢትዮጵያ ጂዲፒ በውጭ ምንዛሪ ለውጡ ምክንያት ወደ 100 ቢሊዮን ዶላር መውረዱ ተገለጸ

የአገሪቱ  የውጭ ዕዳ የጂዲፒ ጥመርታ ለደሃ ሃገራት ከተቀመጠው ጣሪያ አልፏል

የኢትዮጵያ ኖሚናል ጂዲፒ (የዋጋ ንረትን ታሳቢ ያላደረገ አጠቃላይ የአገር ውስጥ ምርት) በዶላር ሲተመን፣ በሰኔ ወር 2016 ዓ.ም. ከነበረበት 207 ቢሊዮን ዶላር በሦስት ወራት ውስጥ ወደ 100 ቢሊዮን ዶላር መውረዱ ተገለጸ፡፡

የውጭ ምንዛሪ ለውጡ ከመደረጉ አንድ ወር በፊት ማለትም በሰኔ 2016 ዓ.ም. የአገሪቱ አጠቃላይ የአገር ውስጥ ምርት በገንዘብ (በዶላር) ሲሰላ 207 ቢሊዮን ዶላር የነበረ ሲሆን፣ የውጭ ምንዛሪ ለውጡ ከተደረገ በኋላ በ2017 ዓ.ም. መስከረም ወር መጨረሻ ላይ ወደ 100 ቢሊዮን ዶላር መውረዱን የገንዘብ ሚኒስቴር በቅርቡ ባወጣው የሩብ ዓመት አጠቃላይ የመንግሥት የዕዳ ሰነድ አስታውቋል።

የአገሪቱ ጂዲፒ በዶላር ሲተመን ያሽቆለቆበት ምክንያትም ገበያ መር የውጭ ምንዛሪ ግብይት ሥርዓት በሐምሌ ወር 2016 ዓ.ም. ተግባራዊ በመደረጉ እንደሆነ ሰነዱ ያስረዳል።

በዚህና በሌሎች ተያያዥ ምክንያቶች በሰኔ ወር 2016 ዓ.ም. የአገሪቱን ጂዲፒ 32.9 በመቶ ይዞ የነበረው አጠቃላይ የመንግሥት የአገር ውስጥና የውጭ ዕዳ (Public Debt) በመስከረም ወር 2017 ዓ.ም. ወደ 50.3 በመቶ አሻቅቧል።

የመንግሥት (የአገሪቱ) የውጭ ዕዳ መጠን ለብቻው ተነጥሎ ሲታይ፣ በሰኔ ወር 2016 ዓ.ም. ከነበረበት 28.8 ቢሊዮን ዶላር ወደ 31 ቢሊዮን ዶላር ከፍ ያለ ሲሆን፣ ለዚህም ሁለት ምክንያቶች ተጠቅሰዋል።

አንደኛው ምክንያት ገበያ መር የውጭ ምንዛሪ ግብይት ተግባራዊ መደረጉ ሲሆን፣ ሌላው በተጠቀሱት ሦስት ወራት ውስጥ መንግሥት ከዓለም አቀፉ የፋይናንስ ድርጅት (IMF) እና ዓለም ባንክ በድምሩ 1.6 ቢሊዮን ዶላር ብድር የተለቀቀለት መሆኑ ናቸው። 

በዚህ ምክንያት የውጭ ብድር ክምችቱ በ7.5 በመቶ ከመጨመሩ ባለፈ፣ የውጭ ምንዛሪ ለውጡን ተከትሎ የአገሪቱ ጂዲፒ በዶላር ሲተመን፣ በሰኔ ወር ከነበረበት 207 ቢሊዮን ብር በመስከረም ወር 2017 ወደ 100 ቢሊዮን ብር በማሽቆልቆሉ፣ የአገሪቱ አጠቃላይ የውጭ ዕዳ ከጂዲፒው ጋር ያለው ጥምርታ በከፍተኛ ደረጃ ጨምሯል። 

በሰኔ ወር 2016 ዓ.ም. የአገሪቱ የውጭ ዕዳ (የአገር ውስጥ ዕዳን ሳይጨምር) ከጂዲፒው ጋር የነበረው ጥምርታ 13.9 በመቶ ሲሆን፣ በመስከረም 2017 ዓ.ም. ላይ ግን ወደ 30.9 በመቶ ማደጉን ሰነዱ ያመለክታል።

በዚህም ምክንያት የኢትዮጵያ የውጭ ዕዳ ከጂዲፒው ያለው ጥምርታ ዓለም አቀፉ የገንዘብ ተቋም (IMF) እና የዓለም ባንክ ለደሃ አገሮች ካስቀመጡት 30 በመቶ እንዳለፈ ከዚሁ መንግሥታዊ ሰነድ ለመረዳት ተችሏል።

በተመሳሳይ የመንግሥት የአገር ውስጥ ዕዳ ከጂዲፒው ያለው ጥምርታም ለደሃ አገሮች ከተቀመጠው ጣራ ማለፉን ሰነዱ ያመለክታል።

ይሁን እንጂ የውጭ ምንዛሪ ለውጡ ከተደረገ በኋላ የመንግሥት የአገር ውስጥ ዕዳ መጠን በዶላር ሲሰላ በከፍተኛ ደረጃ አሽቆልቁሏል።

የመንግሥት የአገር ውስጥ ዕዳ በሰኔ ወር 2016 ዓ.ም. ከነበረበት 2.29 ትሪሊዮን ብር ወደ 2.3 ትሪሊዮን ብር ያደገ ቢሆንም፣ በዋናነት በውጭ ምንዛሪ ለውጡ ምክንያት የአገር ውስጥ ዕዳው በዶላር ሲተመን በሰኔ ወር ከነበረበት 39.9 ቢሊዮን ዶላር ወደ 19.8 ቢሊዮን ዶላር ማሽቆልቆሉን መረጃው ያመለክታል።

#እውን_መረጃ