Lawyer_Henok ⚖️Ethio Law🥇ኢትዮ ሕግ

የፍ/ቤት ፕሬዝዳንት በእስራት ተቀጣ
---------------------------------------------
ስልጣንን ያለ አግባብ በመጠቀም እና የማይገባውን ጥቅም ለማግኘት ወንጀል በፈጸመ የፍርድ ቤት ፕሬዝዳንት ላይ የ6 ዓመት ጽኑ እስራትና በገንዘብ መቀጮ ቅጣት ማስተላለፉን የቤንች ሸኮ ዞን ከፍተኛ ፍርድ ቤት ገለጸ።

በወንጀሉ ተባባሪ የነበረች ሌላ ግለሰብም የእስራትና የገንዘብ መቀጮ ቅጣት ማስተላለፉን ከፍተኛ ፍርድ ቤቱ ገልጿል።

የቤንች ሸኮ ዞን ከፍተኛ ፍርድ ቤት ፕሬዝዳንት አቶ ቢኒያም ባቡ እንደተናገሩት አንደኛ ተከሳሽ አቶ ሙሉጌታ መሰረት እና 2ኛ ተከሳሽ ወይዘሮ ፈጠነች በዛብህ በፈጸሙት የሙስና ወንጀል የቅጣት ውሳኔ መተላለፉን ገልጸዋል።

አንደኛ ተከሳሽ አቶ ሙሉጌታ መሰረት የደቡብ ቤንች ወረዳ ፍርድ ቤት ዳኛና ፕሬዝዳንት ሆነው እየሰሩ በነበሩበት ወቅት ከሁለተኛ ተከሳሽ በፍርድ ቤቱ የግዥና ንብረት አስተዳደር ቡድን መሪና ቼክ ፈራሚ ሆና ከምትሰራው ከወይዘሮ ፈጠነች በዛብህ ጋር ለራሳቸውና ለሌሎች ሰዎች ጥቅም ለማስገኘት በማሰብ ለፍርድ ቤቱ ከተመደበው በጀት ውስጥ ከተቋሙ ስራ ጋር ለማይገናኝ አላማ የተቋሙ ሰራተኛ ላልሆኑ ነጋዴዎች በ2013 ዓ.ም 163ሺ ብር አበል ክፍያ ፈጽመዋል ብለዋል።

በዚሁ መዝገብ ግለሰቧ በ2014 ዓ.ም ለሌላ ነጋዴ 197ሺ 706 እንዲሁም በ2015 ዓ.ም 721ሺ 442 ብር ፣ በ2016 ዓ.ም 309ሺ 822 ብር ክፍያ እንዲፈጸም በማድረግ በድምሩ 1 ሚሊየን 361ሺ 768 ብር በአበል ክፍያ እንዲፈጸም አድርገዋል ብለዋል።

በዚህም ያለአግባብ ስልጠናቸውን በመጠቀም ወንጀሉ በሚሰጠው ሙሉ ፍሬ ተካፋይ ለተቆሙ የተመደበውን በጀት ለታለመለት አላማ እንዳይውል ማድረጋቸው በሰውና በሰነድ ማስረጃ ተረጋግጧል ብለዋል።

በዚህም የቤንች ሸኮ ዞን ከፍተኛ ፍርድ ቤት ከዐቃቤ ህግ በቀረበለት መዝገብ ላይ ግራ ቀኙን ሲያከራክር ቆይቶ በትላንትናው ዕለት የቅጣት ውሳኔና ፍርድ ሰጥቷል ብለዋል። በዚህም አንደኛ ተከሳሽ እጃቸው ከተያዘበት ከቀን 27/05/2016 ዓ.ም ጀምሮ በሚታሰብ የ6 ዓመት ጽኑ እስራትና የ7ሺ 500 ብር መቀጮ እንዲቀጡ ወስኗል ብለዋል።

2ኛ ተከሳሽ እጃቸው ከተያዘበት ከቀን 27/05/2016 ዓ.ም ጀምሮ የሚቆጠር በ5 ዓመት ከ6 ወር ጽኑ እስራትና በ5ሺ 500 ብር የገንዘብ መቀጮ እንዲቀጡ ፍርድ የተሰጠ ሲሆን አንደኛና ሁለተኛ ተከሳሽ በጋራ ያጎደሉትን 1ሚሊየን 345ሺ 320 ብር በጋራ እንዲከፍሉ የተወሰነ ሲሆን 2ኛ ተከሳሽ በግል በኦዲት የተገኘባቸውን ተጨማሪ 16ሺ ብር 448 ብር እንድትመልስ ውሳኔ መሰጠቱን ገልጸዋል።

አቶ ቢኒያም በመጨረሻም በዞኑ የተለያዩ አካባቢዎች የሙስና ወንጀሎች አይነትና የመፈጸሚያ ስልቶቹ ከጊዜ ወደ ጊዜ እየተበራከቱ መምጣታቸውን ገልጸው ህዝቡ ሙስናን በመፀየፍና ተፈጽሞ ሲገኝ ጥቆማ በምስጠት የዜግነት ግዴታውን ሊወጣ ይገባል ብለዋል።

እነሆ 2ኛው ዕትም በገባያ ላይ
መፅሐፉ ከስሕተት የሚታደግ ስለመሆኑ

መፅሑፉ ከተዘጋጀበት ምክንያቶች አንዱ በ5 የሰበር ዳኞች የተሰጡ አስገዳጅ የሕግ ትርጉሞች በ7 የሰበር ዳኞች እና በፌዴራሽን ምክር ቤት የተለወጡ ለመሆናቸው ለማወቅ አለመቻል ነው፡፡
በዚህ መፅሐፍ ውስጥ ከ50 በላይ በ5 የሰበር ዳኞች የተሰጡ አስገዳጅ የሕግ ትርጉሞች ነገር ግን በ7 የሰበር ዳኞች እና በፌዴራሽን ምክር ቤት የተለወጡ እና እነሱን የተኩ አስገዳጅ የሰበር ትርጉም እና የፌደራሽን ምክር ቤት ሕገ-መንግስታዊ ትርጉሞች የአንባቢን ድካም እና ፋለጋ ለመቀነስ በየሕጉ ዘርፍ ተሰንደው የቀረቡ በመሆኑ መፅሐፉ ከእነዲዚህ ዓይነት ስህተት ለመታደግ የሚያስችል ነው፡፡

እነሆ ለቅምሻ!!!

በፍርድ ቤት የሚሰጥ ጊዜያዊ የእግድ ትዕዛዝን የመያዣ መብትን አይፈጥርም፡፡

መንግስት በስልጣን ተዋረድ ካሉት የመንግስት አንዱ የሚመለከተው አካል ለምሳሌ ወረዳ ተከራክሮ ከተሸነፈ በኋል ከፍለ-ከተማ ወይም ዞን ወይም የከተማ አስተዳደር ቢሮ በፍ/ብ/ሥ/ሥ/ህ/ቁ.358 መሰረት የመንግስትን መብትና ጥቅም ለማስከበር በሚል ክስ ማቅረብ አይችሉም፡፡
አንዱ ተከሳሽ በሌላኛው ተከሳሽ ላይ ክርክር ማቅርብ ይችላል፡፡

ፍ/ቤት በተከራከሪ ወገኖች ክርክር ባልተነሳበት እና በማያውቁት ነጥብ ላይ ጭብጥ ይዞ ውሳኔ መስጠት የሚችልበት ልዩ ሁኔታ

ከመንግስት በኪራይ የተገኘን የንግድ መደበርን ለማከራየት የአከራዩን ፍቃድ የግድ አስፈላጊ ነው፡፡
የመድን ኩባንያ በሚሰጠው የ3ኛ ወገን የመድን ሽፋን የተቋረጠ ጥቅምን (consequential loss) ለመክፍል ግዴታ የለበትም

ተወካይ በውክልና ያገውን ንብረት አልመልስም ያለው ንበረቱን ለማስተዳደር ያወጣው ወጭ ይከፈልኝ በሚል ከሆነ ይህ የተወካይ ተግባር የእምነት ማጉደል ወንጀልን አያቋቁምም፡፡
በክርክር የተረታ የመንግስት አካል ካርታ በማምከን ንብረቱን መንጠቅ አይችልም፡፡

በህጻን ስም የተመዘገበ ቤት ለወላጅ ዕዳ ለፍርድ ማስፈፀሚያነት በሃራጅ ማሸጥ አይቻልም፡፡

በግልፅ በተከራካሪ ያልተነሳን የሥረ-ነገር ሕግ ይርጋን ፍርድ ቤት በራሱ ማንሳት አይችልም፡፡

በሁኔታ ጋብቻ የማይፈረስ በመሆኑ ባልና ሚስት በየፊናቸው ለረጅም ዓመታት የቆዩ ቢሆንም የጋራ ሃብት ክፍፍል በይርጋ አይተገድም
በውል አዋዋይ ፊት የተደረገ የስጦታ ውል እና ኑዛዜ በፍርድ ቤት አይፈርስም፡፡

በሰበር ውሳኔ መሰረት በብድር ውል ለባንኮች የተደረገን ልዩ የሕግ ጥበቃ

በኮንስትራክሽን ስራ ዘርፍ የተሰማራ ድርጅት መደበኛውን የሰራተኛ ቅነሳ ስነ-ስርዓት የመከተል ግዴታ የየሌለበት ቢሆንም ሰራተኛ ሲቀንስ ግን የሰራተኞችን ስንብት ክፍያ የመከፍል ግዴታ አለበት፡፡

ከማይንቀሳቀስ ንብረት ጋር በተያያዘ የመንደር ውል ህጋዊ የሚሆንባቸው 5/አምስት/ ሁኔታዎች 👉(Abraham Yohanes)

✅ የማንይቀሳቀስ ንብረትን ለማስተላለፍ ወይም የማይንቀሳቀስ ንብረት ላይ ያለ መብትን ለማስተላለፍ የሚደረግ ውል በ ፍርድ ቤት ወይም ውል ለማዋዋል ስልጣን በተሰጠው አካል ፊት ካልተደረገ ተቀባይነት የለውም። ነገር ግን ከተወሰኑ የሰበር ችሎት ውሳኔዎች በመነሳት የመንደር ውል ህጋዊ ተብለው የሚቆጠሩበት ሁኔታዎች አሉ። እነዚህ 5 ሁኔታዎች የሚከተሉት ናቸው።

❶ኛ የሽያጭ ውል መኖሩ ከታመነ ወይም ካልተካደ

✅ ገዢ ውል እንዲፈፀምለት ክስ አቅርቦ ከሳሽ መከላከያ መልሱ ላይ በመካከላቸው ውል መኖሩን ካመነ ወይም ካልካደና በሌሎች ነጥቦች ላይ መልስ ከሰጠ ፍርድ ቤቱ በራሱ አነሳሽነት ውሉ በፍርድ ቤት ወይም ውል ለማዋዋል ስልጣን በተሰጠው አካል ፊት አልተደረገም ብሎ ውድቅ ሊያደርገው አይችልም።

❷ኛ በማህበር በመደራጀት የተሰራ ቤት በሽያጭ ማስተላለፍ (ሰ/መ/ቁጥር 36294 ቅፅ 8)

✅ በማህበር በመደራጀት እየተሰራ ያለ ቤት ቤቱ ተጠናቆ ካርታ እስኪወጣለት ድረስ የማህበሩ አባል የሆነ ሰው ይህን ቤት ቢያስተላልፍ ቤት የመስራት መብቱን ወይም እጣውን እንዳስተላለፈ እንጂ የማይንቀሳቀስ ንብረትን እንዳስተላለፈ አይቆጠርም። የማህበሩ አባል በስሙ ካርታና የባለቤትነት ማስረጃ እስካልተሰጠው ድረስ ቤቱ ወይም እየተሰራ ያለው ቤት በማህበሩ አጠቃላይ ይዞታ ስር የሚገኝ በመሆኑ የማህበሩ አባል ለ 3ኛ ወገን ሊያስተላልፍ የሚችለው እጣውን ወይም ጥቅሙን እንጂ የማይንቀሳቀስ ንብረት ላይ ያለውን መብት አይደለም። እንዲህ አይነት ውሎች የግድ ስልጣን በተሰጠው አካል ፊት ሊረጋገጡ አይገባም።

❸ኛ ያልነበረን ቤት ሰርቶ ለማስተላለፍ የሚደረግ ውል (ሰ/መ/ቁጥር 32222 ቅፅ 7)

✅ ብዙን ግዜ እንዲህ አይነት ውል ከ Real Estate ቤቶች ግንባታ ጋር የተያያ ነው። ምንም እንኳን ውላቸው ላይ የማይንቀሳቀስ ንብረት ሽያጭ ውል ቢሉም ዉሉ በሚደረግበት ግዜ ቤቱ ያልነበረ በመሆኑ የማይንቀሳቀስ ንብረት ባለሀብትነት ከአንዱ ወደ ሌላው ተላልፏል ሊባል አይችልም። ያልነበረን ቤት ሰርቶ ለማስተላለፍ የሚደረግ ውል የግንባታ ውል እንጂ የማይንቀሳቀስ ንብረት ሽያጭ ውል ሊባል የሚችል ባለመሆኑ ውሉ በፍርድ ቤት ወይም ውል ለማዋዋል ስልጣን በተሰጠው አካል ፊት መረጋገጥ አይኖርበትም።

❹ኛ አዋዋይ ፊት ቀርቦ ነገር ግን አስተዳደራዊ ወይም የፕሮቶኮል ጉዳዮች ለተወሰነ ግዜ ሳይፈፀምበት የቆየ የመንደር ውል (የሰ/መ/ቁጥር 36740 ቅጽ 8)

✅ ችሎቱ በዚህ መዝገብ ላይ በሰጠው ውሳኔ መሠረት በግራ ቀኙ መሀከል የተደረገው የመንደር ውል ስልጣን በተሰጠው አካል ፊት ቀርቦ ነገር ግን አስተዳደራዊ ወይም የፕሮቶኮል ጉዳዮች የተሟሉት የተወሰነ ግዜ ከቆየ በኋላ ቢሆንም ውል ለማዋዋል ስልጣን በተሰው አካል ፊት ያልተደረገ ነው በሚል ውድቅ ሊደረግ አይገባም የሚል ነው።

✅ ችሎቱ በዚህ መዝገብ ላይ እንዳለው ቤቱን የሚመለከቱ እዳና እገዳ ለማጣራትና ክፍያ ለመፈፀም የውልና ማስረጃ ምዝገባ ጽ/ቤት በውል ላይ ማህተም ሣያሣርፍበትና የፕሮቶኮል ቁጥር ሰጥቶ ሣያረጋግጥበት የተወሰነ ጊዜ ያለፈ ቢሆንም እነዚህ አስተዳደራዊ ጉዳዮች እስኪከናወኑ ድረስ በውል ላይ ማህተም ሣያርፍበት መቆየቱ ወይም የፕሮቶኮል ቁጥር ሣይሰጠው መዘግየቱ ውል እንዳልተደረገ የሚያስቆጥረው ነው ለማለት አያስችልም፡፡

❺ኛ የሊዝ መብትን ለማስተላለፍ የሚደረግ ውል (የሰ/መ/ቁጥር 191095 & 225796)

✅ በሊዝ የተገኘ ይዞታ ላይ ግንባታ ከመጀመሩ በፊት ወይም ተጀምሮ በግማሽ ከመጠናቀቁ በፊት የሊዝ መብት ዘመኑ እስከሚጠናቀቅ ድረስ በቦተው የመጠቀም መብትን ማስተላለፍ ይቻላል። ነገር ግን የሚተላለፈው በቦታው ላይ ግማሽ ግንባታ ከተከናወነ በኋላ ከሆነ በቦታው ላይ የመጠቀም መብት ብቻ ሳይሆን በቦታው ላይ ከተሰራው ህንፃ ጭምር በመሆኑ የሊዝ መብት ማስተላለፍ የማይንቀሳቀስ ንብረት እንደ ማስተላለፍ ይቆጠራል። ስለዚህ ሁለት ነገር መታየት ይኖርበታል። የመጀመሪያው አንድ ሰው መሬት በሊዝ ወስዶ ምንም አይነት ግንባታ ካልፈፀመበት ወይም ግንባታ ጀምሮ በግማሽ ከማጠናቀቁ በፊት የሊዝ መብቱን በመንደር ውል ማስተላለፍ ይችላል። ሁለተኛው የግንባታው ደረጃ ግማሽና ከዛ በላይ የደረሰ ከሆነ ግን የሚተላለፈው በቦታው ላይ የመጠቀም መብት ብቻ ሳይሆን በቦታው ላይ የተገነባውን የማይንቀሳቀስ ንብረት ጭምር በመሆኑ ውሉ ውል ለማዋዋል ስልጣን በተሰጠው አካል ፊት ቀርቦ መረጋገጥ ይኖርበታል።

ምክር ቤቱ በሙስና የተጠረጠሩ ሁለት የፌዴራል ከፍተኛ ፍርድ ቤት ዳኞችን አሰናበተ
----
የሕዝብ ተወካዮች ምክር ቤት ባካሄደው 15ኛ መደበኛ ጉባዔው የሁለት የፌዴራል ከፍተኛ ፍርድ ቤት ዳኞች የስንብት ውሳኔን አጽድቋል፡፡

የስንብት ውሳኔውን ሪፖርት እና የውሳኔ ሃሳብ የሕግና ፍትህ ጉዳዮች ቋሚ ኮሚቴ ሰብሳቢ የተከበሩ ወ/ሮ እጸ-ገነት መንግስቱ አቅርበዋል፡፡

ዳኛ አዱኛ ነጋሳ እና ዳኛ አክሊሉ ዘሪሁን የተጣለባቸውን ሕዝባዊ ኃላፊነት ባለመወጣት ከባድ የዲሲፕሊን ጥፋት መፈጸማቸውን ወ/ሮ እጸ-ገነት አብራርተዋል፡፡

የተሰጣቸውን ሹመት አላግባብ በመጠቀም፣ ዳኛ አዱኛ ነጋሳ ገንዘብ እና ቼክ በመቀበል ፤ ዳኛ አክሊሉ ዘሪሁን የአስር ሚሊዮን ብር ቼክ በመቀበል ከባድ የዲሲፕሊን ቅጣት መፈጸማቸውን ሰብሳቢዋ ጠቅሰዋል፡፡

ጉዳዩን አስመልክቶ ቋሚ ኮሚቴው ከፌዴራል ዳኞች አስተዳደር ጉባኤ ጋር በጥልቀት እንደመከረበት ወ/ሮ እጸ-ገነት ተናግረው ፣ ውሳኔውን ምክር ቤቱ እንዲያጸድቅላቸው ጠይቀዋል፡፡

ውሳኔውን በተመለከተ የምክር ቤት አባላት አስተያየቶችን የሰነዘሩ ሲሆን፣ “ቅጣቱ አስተማሪ አይደለም፤ አስተማሪ የሕግ ተጠያቂነት ሊረጋገጥ ይገባል ፤ ወደ መረጠን ሕዝብ ስንሄድ አገልግሎት እና ፍትህ የምናገኘው በገንዘብ ነው ስለሚሉን ውሳኔው ተገቢ ነው” ብለዋል፡፡

በአንጻሩ፣ “ቋሚ ኮሚቴው ዳኞቹ ከመሰናበታቸው አስቀድሞ የፌዴራሉን ከፍተኛ ፍርድ ቤት ውሳኔ ማዳመጥ ይገባዋል፤ የፌዴራል ዳኞች አስተዳደር ጉባኤን ውሳኔ እንደ ምስክር ተጠቅሞ ዳኞችን ከስራ ማሰናበት የዳኞቹን መብት ይጋፋል” የሚሉ አስተያየቶች ቀርበዋል፡፡

በተነሱት ጥያቄዎች እና አስተያየቶች ምላሽ እና ማብራሪያ ከቀረበ በኋላ ውሳኔው ውሳኔው ውሳኔ ሃሳብ ቁጥር 5/2017 ሆኖ በሁለት ድምጸ-ተኣቅቦ እና በአብላጫ ድምጽ ጸድቋል፡፡(ፓርላማ)

ከተሻሻለው የመንገድ ትራንስፖርት ትራፊክን ለመቆጣጠር የወጣው የሚኒስትሮች ምክር ቤት ደንብ ፦

➡ ከፖሊስ በተሽከርካሪ ላይ የደረሰውን የጉዳት አይነት የሚገልጽ የፅሁፍ ማስረጃ ሳይቀበሉ ጥገና የሚያከናውኑ ጋራዦች / የጋራዥ ባለቤቶች / በወንጀል ህግ የሚጠየቁት እንዳለ ሆኑ የ20 ሺህ ብር ቅጣት ይጣልባቸዋል።

➡ አመታዊ የተሽከርካሪ ምርመራ ያላደረገ የተሽከርካሪ ባለንብረት 3,000 ብር ይቀጣል።

➡ የአሽከርካሪ ብቃት ማረጋገጫ ፈቃድ ሳይኖረው ተሽከርካሪ ያሽከረከረ ማንኛውም ሰው 5,000 ብር ይቀጣል።

➡ የአሽከርካሪ ብቃት ማረጋገጫ ፈቃድ ሳይኖረው ተሽከርካሪ በማሽከርከር በንብረት ላይ ጉዳት ያደረሰ ማንኛውም ሰው 7000 ብር ይቀጣል።

➡ ከባለቤትነት ወይም በይዞታው የተያዘውን ተሽከርካሪ የአሽከርካሪ ብቃት ማረጋገጫ ፈቃድ ለሌላው ሰው አሳልፎ የሰጠ ማንኛውም የተሸከርካሪ ባለንብረት 3,000 ብር ይቀጣል።

🚨የትራፊክ ግጭት ወይም ጉዳት አድርሶ በቦታው ላይ ያልቆመ ወይም ባደረሰው የትራፊክ ጉዳት የተጎዳውን እና ሕክምና የሚያስፈልገውን ሰው ወደ ህክምና በመውሰድ እንዲታከም ያላደረገ 👉 በወንጀል ህጉ መሰረት ይጠየቃል።

➡ ወጣት አሽከርካሪዎች፣ ጀማሪ አሽከርካሪዎች ፣ ሞተር ሳይክል አሽከርካሪዎች ፣ የንግድ ተሽከርካሪ አሽከርካሪዎች እና አደገኛ ጭነት የጫኑ አሽከርካሪዎች የአልኮል መጠን በትንፋሽ በየትኛውም መጠን ከተገኘ 2,000 ብር ቅጣት ይጠብቃቸዋል።

➡ የአሽከርካሪ ብቃት ማረጋገጫ ፈቃድ ታግዶበት ሳለ ያሽከረከረ 3,000 ብር ቅጣት ይጣልበታል።

➡ አልኮል መጠን በትንፋሽ ውስጥ ፦
🍻 0.24 እስከ 0.6 ሚሊግራም/ሊትር 1,500 ብር ያስቀጣል።
🍻 0.61 እስከ 0.8 ሚሊግራም /ሊትር 2,000 ብር ያስቀጣል።
🍻 0.81 እስከ 1.0 ሚሊግራም/ሊትር 2,000 ብር ያስቀጣል።
🍻 1.0 ሚሊግራም/ሊትር በላይ የተገኘበት 3,000 ብር ይቀጣል።

➡ በተሽከርካሪ ላይ ተገቢ ያልሆነ አካል የጨመረ ወይም ከተፈቀደለት ወንበር ውጭ ተጨማሪ ወንበር ወይም መቀመጫ የጨመረ የተሽከርካሪ ባለንብረት 400 ብር ይቀጣል።

➡ የህዝብ ማመላለሻ ተሽከርካሪ ሞተር እየሰራና በተሽከርካሪው ውስጥ መንገደኞች እያሉ ነዳጅ መሙላት 1,500 ብር ያስቅጣል።

➡ ቴሌቪዥን ወይም ሌሎች ምስሎችን ተሽከርካሪ ውስጥ እየተመለከተ ያሽከረከረ 1,500 ብር ይቀጣል።

➡ የደህንነት ቀበቶ ሳያስር ወይም ተሳፋሪዎች የደህንነት ቀበቶ ማሰራቸውን ሳያረጋግጥ ያሽከረከረ 1,500 ብር ይቀጣል።

➡ የተንቀሳቃሽ ስልክ በእጁ ይዞ እያነጋገረ፣ ወይም መልዕክት እየጻፈ እየላከ ወይም እያነበበ ያሽከረከረ 1,500 ብር ይቀጣል።

➡ ጫት ቅሞ ወይም እየቃመ ወይም አደንዛዥ ዕፅ ወስዶ ያሽከረከረ 1,500 ብር ይቀጣል።

➡ የተሽከርካሪ የፊት ወይም የኃላ ሰሌዳ ሳይኖረው ያሽከረከረ 1,500 ብር ይቀጣል።

➡ ለአውቶብስ ብቻ ተብሎ በተለየ መንገድ ላይ ያሽከረከረ 1,500 ብር ይቀጣል።

➡ ቀይ መብራት የጣሰ 1,500 ብር ይቀጣል።

➡ የትራፊክ ተቆጣጣሪ ትዕዛዝ ያልፈጸመ፣ ወይም የተሳሳተ መረጃ የሰጠ ወይም እንዲቆም ሲታዘዝ በእንቢተኝነት ሳይቆም የሄደ 1,000 ብር ይቀጣል።

➡ የአሽከርካሪ ብቃት ማረጋገጫ ፈቃድ ኖሮት ሳይዝ ያሽከረከረ ወይም የአሽከርካሪ ብቃት ማረጋገጫ ፈቃዱን ሳያሳድስ ያሽከረከረ 1,000 ብር ይቀጣል።

➡ ከተፈቀደው ፍጥናት በታች ያሽከረከረ ወይም የቀኙን ጠርዝ ሳይዝ በዝግታ ያሽከረከረ 1,000 ብር ይቀጣል።

➡ ከመጠን በላይ ድምጽ እያሰማ ወይም የጆሮ ማዳመጫ እያዳመጠ ያሽከረከረ 1,000 ብር ይቀጣል።

➡ መንገድ ላይ ያለን ውሃ በተሽከርካሪው አማካኝነት እግረኛ ላይ እንዲረጭ ያደረገ 1,000 ብር ይቀጣል።