Meseret Media

ፖሊስ ጣብያዎች ከደንብ ማስከበር ጋር በመሆን ገንዘብ በመቅጣት ገቢ እንዲያስገቡ መታዘዛቸው ተሰማ

- "እያንዳንዱ የፖሊስ ጣብያ በቅጣት የሚያስገባው የገንዘብ ኮቴ ተጥሎበታል፣ በዛሬው እለት ብቻ 4.2 ሚልየን ብር ተሰብስቧል"

(መሠረት ሚድያ)- በአዲስ አበባ ከተማ የሚገኙ የፖሊስ አባላት ከደንብ ማስከበር ጋር በመሆን ድርጅቶችን እና ግለሰቦችን ገንዘብ በመቅጣት ገቢ እንዲያስገቡ መታዘዛቸው ታውቋል።

ለመሠረት ሚድያ የደረሰው ጥቆማ እንደሚያሳየው የየክፍለ ከተማው ስራ አስፈፃሚዎች በየጊዜው የፖሊስ አዛዦችን እየሰበሰቡ ገንዘብ በተለይ ከነጋዴዎች እና ድርጅቶች በአስገዳጅ ሁኔታ እንዲሰበስቡ ትዕዛዝ ተላልፎላቸዋል።

"በእያንዳንዱ ፖሊስ ጣቢያ ላይ ከላይ የተወሰነ ኮታ አለ፣ ያንን በተሰጠን ጊዜ ገደብ ሰብስበን ማስገባት ግዴታችን ነው" ብለው ቃላቸውን የሰጡ አንድ የፖሊስ ኢንስፔክተር በዚህ ምክንያት ፖሊስ መደበኛ ስራውን ጥሎ ቤት ለቤት እና በየድርጅቱ ገንዘብ ሲጠይቅ ይውላል ብለዋል።

ሌላኛው ደግሞ "ገንዘብ ከምንሰበስብባቸው መንገዶች መሃከል ከደንብ ማስከበር ጋር በመሆን ገንዘብ መቅጣት፣ አስገዳጅ የህዳሴ ኩፖን ማስገዛት፣ ለኮሪደር ልማት በሚል ከነጋዴዎች መዋጮ መጠየቅ ናቸው ያልተስማማ ካለ የንግድ ፈቃድ እስከመታገድ ይደርሳል" በማለት ሁኔታውን አስረድተዋል።

ከሰሞኑ በርካታ የመንግስት ሚድያዎች ፍሳሽ የለቀቁ፣ መንገድ ያበላሹ፣ እና ያልተፈቀደ ስራ የሰሩ በማለት ድርጅቶች ከአስር ሺዎች እስከ መቶ ሺህ ብሮች እንደተቀጡ መዘገባቸው ይታወሳል።

የአዲስ አበባ ከተማ አስተዳደር ደንብ ማስከበር ባለስልጣን ዛሬ ባወጣው አንድ መግለጫ በዛሬው ቀን ብቻ ድርጅቶችን እና ግለሰቦችን 4.2 ሚልዮን ብር እንደቀጣ አስታውቋል።

ባለስልጣኑ እንዳለው በአዲስ ከተማ ክ/ከተማ 1.3 ሚልዮን ብር፣ በአቃቂ ክ/ከተማ 800 ሺህ ብር፣ በየካ ክፍለ ከተማ 600 ሺህ ብር፣ በቦሌ ክፍለ ከተማ 600 ሺህ ብር፣ በአራዳ ክፍለ ከተማ 500 ሺህ ብር በዛሬው እለት ብቻ ከቅጣት ተሰብስቧል።

መረጃን ከመሠረት!

@MeseretMedia

የኢትዮጵያ መንግስት ከአሜሪካ ያጣውን የገንዘብ ድጋፍ ለማካካስ ህዝብን ማስከፈል ሊጀምር መሆኑ ተሰማ

- ኢትዮጵያ በድጋፉ መቆም በከፍተኛ ደረጃ ከተጎዱ የአለም ሀገራት 3ኛ ደረጃን ይዛለች

(መሠረት ሚድያ)- የዶናልድ ትራምፕ አስተዳደር በዩኤስኤድ (USAID) እና ሌሎች ተቋሞች በኩል ኢትዮጵያን ጨምሮ ለበርካታ የአለም ሀገራት ይሰጥ የነበረው ድጋፍ መቆሙን ተከትሎ ከፍተኛ መደናገጥ እና አሳሳቢ ክስተቶች እየተስተዋሉ ይገኛሉ።

ኢትዮጵያ በከፍተኛ ደረጃ የአሜሪካንን ድጋፍ ሲያገኙ ከነበሩ ሀገራት አንዷ ስትሆን በተለይ የጤናው ዘርፍ እና የሰብአዊ እርዳታ ከ80 ፐርሰንት በላይ በአሜሪካ ድጋፍ ላይ የተንጠለጠለ ነበር፣ በድጋፉ መቆም በከፍተኛ ደረጃ ከተጎዱ የአለም ሀገራት 3ኛ ደረጃን ይዛለች።

ባለፉት ሶስት አመታት 2.89 ቢልዮን ዶላር (በአሁን ስሌት 353 ቢልዮን ብር ገደማ) የውጭ እርዳታ ያገኘው የኢትዮጵያ መንግስት በትራምፕ አስተዳደር ድጋፍ መቆም የተፈጠረውን ከፍተኛ ጫና ወደ ህዝብ ለማስተላልፍ መወሰኑን መሠረት ሚድያ ሰምቷል።

"የዛሬ ሶስት አመት 1.5 ቢልዮን ዶላር የነበረው የውጭ ድጋፍ ዘንድሮ ወደ 190 ሚልዮን ዶላር አሽቆልቁሏል። ይሄ ማለት እንደ ወባ፣ ቲቢ፣ ኤችአይቪ ላሉ ታካሚዎች የሚውሉ መድሀኒቶችን ወደ ሀገር ገዝቶ የማስገባት አቅም መንግስት የለውም። ሌላው ቀርቶ ለወላድ እናቶች የሚውሉ መድሀኒቶች እና ቁሳቁሶች በእርዳታ የሚቀርቡ ነበሩ" ያሉን አንድ ከፍተኛ የፌደራል መንግስት የስራ ሀላፊ ችግሩ በመጪው ቀናት መታየት እንደሚጀምር ጠቁመዋል።

"ይህን ችግር ለመጋፈጥ ሲባል ለአደጋ ስጋት መዋጮ የሚውል ረቂቅ አዋጅ ተዘጋጅቷል" ያሉት ሀላፊው የመንግስትም ይሁን የግል ሰራተኛ ከደሞዙ ብር እንዲያዋጣ እንደሚገደድ አረጋግጠዋል።

ለፓርላማ የቀረበው ረቂቅ ህጉ የመንግስትም ይሁን የግል ተቋማት "የአደጋ ስጋት ፈንድ" የሚል ክፍያ ከህዝብ እንዲሰበስቡ እና ለመንግስት እንዲያስገቡ ያዛል። ከዚህም በተጨማሪ ደሞዝተኛ ተቀጣሪዎች ከክፍያቸው ላይ በየወሩ ብር እንዲያዋጡ ህጉ ያስገድዳል።

ይህ በእንዲህ እንዳለ የኢትዮጵያ ብሮድካስቲንግ ኮርፖሬሽን "የአሜሪካ ተራድኦ ድርጅቶች (USAID) እንዴት ነው አፍሪካን ከተኛችበት እየቀሰቀሳት ያለው?" በሚል ትናንት ባቀረበው ዘገባው የእርዳታ ድርጅቱን “የበግ ልብስ የለበሰ ተኩላ” በማለት አንዲት የቀድሞ የአፍሪካ ዲፕሎማት ንግግርን አቅርቧል።

"እነዚህ ድርጅቶች የጤና እና የትምህርት ዘርፍን ለማሻሻል እንደመጡ ይገልጻሉ፤ ነገር ግን በዚህ ረገድ የመጣ ለውጥ የት አለ?" በማለት የሚጠይቁት ግለሰቧ እንደ ኢትዮጵያ ባሉ ሀገራት ያሉ ጤና ጣብያዎች እና የስደተኛ ካምፖች ሙሉ በሙሉ በሚባል ደረጃ በውጭ ድጋፍ እንደሚደጎሙ ሳይጠቅሱ አልፈዋል።

መረጃን ከመሠረት!

@MeseretMedia

ዘመናዊ ቶዮታ መኪና የሚያሸልመው የዘንድሮው ‘ግራንድ አፍሪካን ረን’ በዋሽንግተን ዲሲ ሊካሄድ ነው

- ‘ግራንድ አፍሪካ ረን’ በሚል ተቀራራቢ ስያሜ ሩጫ ሊያዘጋጁ ያሰቡ አካላት ስሙን መጠቀም እንደማይችሉ ታወቀ

(መሠረት ሚድያ)- ዘመናዊ መኪና የሚያሸልመው እና በሺዎች የሚቆጠሩ የዲያስፖራው ማህበረሰብ አባላት በየዓመቱ የሚሳተፉበት የግራንድ አፍሪካን ረን የ5 ኪ/ሜ የመዝናኛ ሩጫ ዝግጅት በመጪው ኦክቶበር በዋሽንግተን ዲሲ ከተማ ለሰባተኛ ዓመት ሊካሄድ መሆኑ ተገለፀ።

እ.አ.አ በኦክቶበር 11/2025 በሚካሄደው ዝግጅት ላይ ከሚካፈሉ ተሳታፊዎች መካከል እድለኛ የሆነ ባለዕጣ የ2025 ቶዮታ ኮሮላ መኪና በዝግጅቱ ማጠናቀቂያ ላይ የዕጣ ማውጣት ስነስርዓት ተከናውኖ እንደሚሸለም ታውቋል።

የመኪና ሽልማቱ በአሌክሳንድሪያ ቶዮታ እንደሚቀርብ መሠረት ሚድያ የደረሰው መረጃ የሚጠቁም ሲሆን ታላላቅ አትሌቶች እና የኪነጥበብ ባለሞያዎች በክብር እንግድነት እንደሚሳተፉም አዘጋጁ ኖቫ ኮኔክሽንስ የላከው ጋዜጣዊ መግለጫ ይጠቁማል።  

የመዝናኛ ሩጫው ዋና አዘጋጅ የሆኑት ዶክተር ጋሻው አብዛ ዝግጅቱ ከአንድ ቀን የ5 ኪሜ የቤተሰብ ሩጫነት የበለጠ ፋይዳ ያለው መርሀግብር መሆኑን ጠቁመው፤ ኢትዮጵያዊያንና ትውልደ ኢትዮጵያንን በማቀራርብ ረገድ ጉልህ ሚና እንዳለው ገልፀዋል።

በተያያዘ ዜና ግራንድ አፍሪካ ረን በሚል ተቀራራቢ ስያሜ ሩጫ ሊያዘጋጁ ያሰቡ አካላት ስሙን መጠቀም እንደማይችሉ እና ከድርጊታቸው እንዲቆጠቡም ተጠይቋል፡፡

ስሙን በዓለም አቀፍ ደረጃ ለመጠቀም ህጋዊ ምዝገባ እና ፍቃድ ያለው ግራንድ አፍሪካን ረንን የሚያዘጋጀው እና ተቀማጭነቱን በዋሽንግተን ዲሲ ያደረገው የኖቫ ኮኔኽንስ ተቋም ብቻ መሆኑ ታውቋል።

ከዚህ ያፈነገጡም በህግ ተጠያቂ እንደሚሆኑ አዘጋጆቹ ገልጸው የግራንድ አፍሪካ ረን ምዝገባ በዝግጅቱ ድረ-ገፅ www.africanrun.com ላይ ከሰኔ ወር መጀመሪያ አንስቶ እንደሚጀመር አስታውቀዋል።

መረጃን ከመሠረት!

በቤንሻንጉል ጉሙዝ ክልል በፀደቁ ሁለት አዳዲስ አዋጆች ዙርያ ቅሬታ ያቀረቡ ፖለቲከኛ ዛሬ ጠዋት ታሰሩ 

(መሠረት ሚድያ)- ከሰሞኑ በቤኒሻንጉል ጉሙዝ ክልል በነበረ የምክር ቤት ስብሰባ ላይ ቀርቦ የፀደቀውን የየእርከኑ የምክር ቤት ተወካዮች ብዛት ለመወሰን የወጣ አዋጅ እንዲሁም የክልሉ ህገ መንግስትን እንደገና ለማሻሻል የወጣውን አዋጅ ተቃውመው ቅሬታ ያስገቡት ፖለቲከኛ ዛሬ ጠዋት ለእስር ተዳርገዋል።

መሠረት ሚድያ እንዳረጋገጠው የቦሮ ዲሞክራያዊ ፓርቲ የፖለቲካ አደረጃጀት ዘርፍ ሃላፊ እና የክልሉ የምክር ቤት ተመራጭ የሆኑን አቶ ዮሐንስ ተሰማ በፀጥታ ሀይሎች ተወስደዋል።

የቦሮ ዲሞክራያዊ ፓርቲ በውሳኔዎቹ ላይ ቅሬታ የነበረው ሲሆን ሶስቱ የምክር ቤቱ አባላት በወቅቱ ተቃውሞ አቅርበው ውሳኔውንም 'የህገ መንግስት አተረጓጎም ላይ የቀረበ ቅሬታ' በሚል ለፌዴሬሽን ምክር ቤት ከተጨማሪ ጥያቄዎች ጋር አቅርበው ነበር።

"በዚህ ሁኔታ ያቀረቡትን ጥያቄ የተለያዩ አንድምታ እየሰጡ ይባስ ብለው ዛሬ አቶ ዮሀንስን አስረውታል" ብለው የክልሉ የመረጃ ምንጫችን ለሚድያችን ተናግረዋል።
‎
የቤንሻንጉል ጉሙዝ ክልላዊ መንግስት ምክር ቤት ከየካቲት 10 እስከ 11 2017 ዓ/ም በአሶሳ ከተማ ባካሄደው መደበኛ ጉባዔ በስራ ላይ የሚገኘውን የክልሉን የምክር ቤት የመቀመጫ ቁጥር ከ99 ወደ 165 አሻሽሏል፡፡

የቦሮ ዲሞክራያዊ ፓርቲ ግን የህዝብና ቤቶች ቆጠራ ሳይደረግ 165ቱ የመቀመጫ ብዛት አሁን በስራ ላይ ለሚገኙ የምርጫ ክልሎች የተከፋፈለበት መንገድ የህዝብ ብዛትን ያማከለ አለመሆኑን እና ነባር የምርጫ ክልሎች የፈረሱበትና አዳዲስ ምርጫ ክልሎች የተቋቋሙበት ሂደት ህገ መንግስቱን የጣሰ በመሆኑን እንዲሁም በቂ ውይይትና ክርክር ያልተደረገበት መሆኑን በመግለፅ ቅሬታውን ገልፆ ነበር።

ፓርቲው በመግለጫው የክልሉ መንግስት "በሰላማዊና ህጋዊ መንገድ ያቀረብነዉን ጥያቄና ቅሬታ በሃይል ለመደፍጠጥ በፓርቲያችንና ፓርቲያችንን ወክለዉ የክልል ምክር ቤት አባል በሆኑ አመራሮቻችን ላይ የጀመረው ዛቻ፣ ማስፈራሪያና ወከባ የተጀመረዉን የመደብለ ፓርቲ የዴሞክራሲ ስርአት ግንባታ ላይ አደጋ የሚጥል በመሆኑ ከድርጊቱ እንዲቆጠብ እናሳስባለን" በማለት የካቲት 28/ 2017 ዓ/ም አሳስበው ነበር።

መረጃን ከመሠረት!

@MeseretMedia

'GTNA' ለሚድያ መገንቢያ የተሰጠውን 5 ሺህ ካሬ ሜትር ቦታ በ1 ቢልዮን ብር ሊሸጥ እያስማማ መሆኑ ታወቀ

- ቦታው ለጋንዲ መታሰቢያ ሆስፒታል ማስፋፊያ ተብሎ የተያዘ ነበር

(መሠረት ሚድያ)- ግሎባል ቴሌቭዥን ኔትዎርክ ኦፍ አፍሪካ (GTNA) በሚል ስያሜ የተቋቋመው እና በአፍሪካ ግዙፉ የሚድያ ተቋም ይሆናል የተባለለት ድርጅት ከአዲስ አበባ ከተማ አስተዳደር በሊዝ የተረከበውን 5ሺ ካሬ ሜትር ቦታ በደላሎች አማካኝነት ሊሸጥ መሆኑ ታውቋል።

GTNA መሬቱን ከተረከበ ሶስት አመት እንዳለፈው የጠቆሙት ምንጮቻችን አሁን ላይ ጋንዲ ሆስፒታል አካባቢ የሚገኘው ቦታው ታጥሮ ለመኪና ፓርኪንግ አገልግሎት ብቻ እየዋለ መሆኑን ከምስሎች እና ቪድዮዎች ጋር አያይዘው ለመሠረት ሚድያ ልከዋል።

"በመጀመርያ በደላሎች አማካኝነት ለሽያጭ የቀረበው በ1.4 ቢልዮን ብር ነበር፣ ገዢ ስላልተገኘ አሁን ላይ እስከ 1 ቢልዮን ብር እየተጠራበት ነው" የሚሉት ምንጮች አፍሪካን ማዕከል አድርጎ የአፍሪካን እውነት ለአለም ያሳውቃል የተባለለት ተቋም መሬቱን ለምን እንደሚሸጥ እንደማያውቁ ተናግረዋል።

አንድ የከተማ አስተዳደሩ ባልደረባ ግን መሬቱ ለሽያጭ መቅረቡን እንደሚያውቁ ለሚድያችን ገልፀው "በዲዛይኑ ላይ የተቀመጠውን ግዙፍ መንትያ ህንፃዎች ለመገንባት አበዳሪ ባንክ አልተገኘም፣ ምናልባት ሀብት ለማሰባሰብ ይሆናል" ብለዋል።

ግሩም ጫላ በተባለ ግለሰብ አማካኝነት በአፍሪካ ትልቅ ሚዲያ ሊገነባ እንደሆነ በርካታ ሚድያዎች ከሶስት አመት በፊት መዘገባቸው ይታወሳል። ለሚድያው ዋና መስሪያ ቤት የሚውለው ቁልፍ ቦታ ከጋንዲ መታሰቢያ ሆስፒታል ይዞታ ጭምር ተወስዶ እንደተሰጠ ምንጮቻችን ጠቁመዋል።

"መንግሥት ለጋንዲ መታሠቢያ ሆስፒታል የማስፋፊያ ህንፃዎች ግንባታ የሚሆን ሰፊ ቦታ አዘጋጅቶ ነበር፣ ይሁንና ከሆስፒታሉ ይዞታ ላይ 5,000 ካሬ ሜትር የሚሆን ቦታ በቂርቆስ ወረዳ 07 የግንባታ ፈቃድ ከሚሰጡ ሰዎች ጋር በተደረገ ውል በሆስፒታሉ ካርታ ላይ ሌላ አዲስ ካርታ ተሰርቷል" የሚሉት እኚህ የከተማ አስተዳደሩ ሰራተኛ በአንድ አጋጣሚ ለምን ብለው በጠየቁ የሆስፒታሉ ሰራተኞች ላይ ማስፈራራት ደርሶባቸው ነበርም ብለዋል።

ከጋንዲ ሆስፒታል ያገኘነው ተጨማሪ መረጃ እንደሚጠቁመው ሆስፒታሉ ለወላድ እናቶች አገልግሎት የሚውል የከርሰ ምድር ውሃ አስቆፍሮ የነበረ ሲሆን እሱም በGTNA ይዞታ ስር ሊሆን ይገባል የሚል አምባጓሮ ተነስቶ በመጨረሻም በ GTNA ይዞታ ስር እንደተጠቃለለ ታውቋል።

መረጃን ከመሠረት!

@MeseretMedia

የኢትዮጵያ አየር መንገድ ከፍተኛ የስራ ሀላፊ የነበሩት ግለሰብ በኬንያ አየር መንገድ የካርጎ ማናጀር ሆነው ተቀጠሩ

- የኬንያ አየር መንገድ ልምድ ያላቸውን ኢትዮጵያውያን እያፈላለገ በከፍተኛ ደሞዝ እየቀጠረ ነው

(መሠረት ሚድያ)- የኬንያ አየር መንገድ (ኬንያ ኤርዌይስ) የኢትዮጵያ አየር መንገድ የጭነት (ካርጎ) እና ሎጂስቲክስ አገልግሎት ማኔጂንግ ዳይሬክተር የነበሩትን አቶ ፍፁም አባዲን መቅጠሩ ተሰማ።

ኬንያ ኤርዌይስ አቶ ፍፁምን የካርጎ ክፍል ዳይሬክተር አድርጎ ከትናንት የካቲት 24/2017 ዓ/ም ጀምሮ በሃላፊነት እንደሾማቸው የመሠረት ሚድያ ምንጮች ጠቁመዋል።

አቶ ፍፁም በኢቪዬሽን ኢንደስትሪ ውስጥ ከ23 አመት በላይ የዘለቀ የስራ ልምድ ያላቸው ሲሆን በኢትዮጵያ አየር መንገድ ውስጥ በካርጎ አገልግሎት ዘርፍ በርካታ እውቀት እንዳላቸው ይነገርላቸዋል።

በተለይ በኮቪድ 19 ወረርሽኝ ወቅት የአቪዬሽን ኢንዱስትሪው በከፍኛ ደረጃ በተጎዳበት ወቅት እና የኢትዮጵያ አየር መንገድም የመንገደኞች በረራ በተቀዛቀዘበት ወቅት ማኔጅመንቱ ባስቀመጠው አቅጣጫ መሰረት የካርጎ ክፍሉ ከፍተኛ እንስቃሴ በማድረግ አየር መንገዱን ከኪሳራ መታደጉ ይታወሳል።

በዚህ አስቸጋሪ ወቅት አቶ ፍፁም የስራ ባልደረቦቻቸውን በማስተባበር ቀን ከሌሊት በመስራት ብቃታቸውን እንዳስመሰከሩ ጉዳዩን በቅርብ የሚያውቁ ለመሠረት ሚድያ ተናግረዋል።

አቶ ፍፁም በትምህርት ዝግጅታቸው ከአዲስ አበባ ዩኒቨርስቲ በመጀመሪያ ዲግሪ የተመረቁ ሲሆን ከአሜሪካው ኒው ሃምፕሻየር ዩኒቨርስቲ እና ከእንግሊዙ ኦፕን ዩኒቨርስቲ ሁለት የማስተርስ ዲግሪ ወስደዋል።

አቶ ፍፁም የዛሬ ሁለት አመት ገደማ ከኢትዮጵያ አየር መንገድ ከለቀቁ በኋላ ኑሮዋቸውን ከቤተሰባቸው ጋር በአሜሪካ አድርገው የነበረ ሲሆን በቅርብ ቀን ግን ወደ ኬንያ፣ ናይሮቢ እንደሚያቀኑ ታውቋል።

ግለሰቡ በትግራይ ጦርነት ወቅት በአንዳንድ አክቲቪስቶች ከፍተኛ የስም ማጥፋት ዘመቻ ተከፍቶባቸው የነበረ ሲሆን ይህ ስም የማጠልሸት ዘመቻ በተመሳሳይ የደረሰባቸው የአየር መንገዱ የቀድሞ ስራ አስፈፃሚ አቶ ተወልደ ገብረማርያም እንዲሁ በተመሳሳይ ስራቸውን በመቀየር ለግዙፉ ደልታ አየር መንገድ በአማካሪነት መስራት መጀመራቸው ይታወሳል።

የኢትዮጵያ አየር መንገድ ተፎካካሪ የሆነው ኬንያ ኤርዌይስ ልምድ ያላቸውን ኢትዮጵያውያን እያፈላለገ በከፍተኛ ደሞዝ እየቀጠረ እንደሆነ ምንጮች ለመሠረት ሚዲያ ገልፀዋል።

መረጃን ከመሠረት!

@MeseretMedia

ዋልታ ከፋና ጋር ከተዋሀደ በኋላ በርካታ የስራ ቅጥሮች በትውውቅ እየተፈፀሙ እንደሚገኙ ሰራተኞች ተናገሩ

(መሠረት ሚድያ)- ፋና ብሮድካስቲንግ ኮርፖሬት በቅርቡ ከዋልታ ሚድያ እና ኮሙኒኬሽን ማዕከል ጋር ውህደት መፈፀሙን ተከትሎ በርካታ ህገወጥ የሆኑ የትውውቅ የስራ ቅጥሮች እንደተፈፀሙ ሰራተኞች ተናግረዋል።

እነዚህ ሰራተኞች ለመሠረት ሚድያ በሰጡት ጥቆማ ፋና ውህደቱን ተከትሎ አብዛኛውን ነባር፣ ጠንካራ እና ታታሪ የሚባሉ ሰራተኞቹን ያገለለ የደረጃ ሹመት ሰጥቷል ብለዋል።

"በሹመቱ 95 ፐርሰንት የሚሆነውን ቦታ ያገኙት የቀድሞዋ የፋና ብሮድካስቲንግ ባልደረባ፣ የአሁኗ የቱሪዝም ሚኒስትር ሰላማዊት ካሳ የቅርብ ወዳጆች ናቸው" የሚሉት ሰራተኞቹ ከዳይሬክተር እስከ ስራ አስፈጻሚነት ደረጃ እንዲሾሙ የተደረጉት በዚህ መልኩ መሆኑን አስረድተዋል።

ቀደም ሲል ለሀገርና ለተቋሙ በታታሪነት የሚሰሩ ሰዎች እንዲገፉ ምክንያት ሆኗል በተባለው አካሄድ ዙርያ አስተያየት የሰጡን አንድ የተቋሙ ሰራተኛ "እንደበቀል እንዳያድጉ እና እንዲገፉ የተደረጉ በርካቶች ናቸው" ብለዋል። በሌላ በኩል ካለምንም መስፈርት፣ ብቃትና ለዘርፉ ልምድ ሳይኖራቸው በስራ አስፈጻሚነት እና በዳይሬክተርነት እንዲሾሙ የተደረጉ በርካቶች እንዳሉ ከነማስረጃው ለሚድያችን ሰጥተዋል።

መሠረት ሚድያ የተመለከተው አንድ የተቋሙ የቅርብ የቅጥር አካሄድ ከዳይሬክተር በታች ያሉት ብቻ ለውድድር ክፍት ሆነው ሌላውን በሹመት መፈፀሙን ያመላክታሉ። በዋልታ ይሰሩ የነበሩ በርካታ አንጋፋ ባለሙያዎችም ከስራ እንደተገለሉ ወይም ዝቅ ብለው እንዲሰሩ እንደተደረጉ በተጨማሪ ታውቋል።

ሚድያውን በዚህ ዙርያ ለማነጋገር የሞከርን ቢሆንም ምላሽ አላገኘንም፣ ወደፊት ተጨማሪ ማብራርያ ካገኘን በዜናው ዙርያ እንመለስበታለን።

ከፋና በተጨማሪ በሌላኛው የመንግስት ሚድያ ኢቢሲ ውስጥ 400 ሰራተኞች በሀሰተኛ ወይም ፎርጅድ ዶክመንት ተቀጥረው መገኘታቸውን መሠረት ሚድያ በቅርቡ መዘገቡ ይታወሳል። ይህን የኢቢሲ ድርጊት ያጋለጠው የተቋሙ ሰራተኛ የሽብር ክስ ቀርቦበት ለእስር ተዳርጎ እንደነበር መረጃ አቅርበን ነበር።

መረጃን ከመሠረት!

@MeseretMedia

የዲጂታል ስክሪን ማስታወቂያ ባለቤቶች ከነገ ጀምሮ የብልፅግና ፓርቲ ማስታወቂያን በግዴታ እንዲያሳዩ ሊደረጉ መሆኑ ታወቀ

(መሠረት ሚድያ)- በአዲስ አበባ ከተማ የሚገኙ የዲጂታል ስክሪን ማስታወቂያ ባለቤቶች እና ህንፃዎቻቸው ላይ የማስታወቂያ ስክሪን የገጠሙ ባለሀብቶች ከነገ ጀምሮ የብልጽግና ፓርቲ መልእክት የሆኑ ምስሎችን እና ጽሁፎችን በአስገዳጅነት እንዲያሰራጩ ጥብቅ ትዕዛዝ እንደተላለፈላቸው ታውቋል።

በራሳቸው ወጪ አውጥተው የሰሩትን የዲጂታል ስክሪን ለፖለቲካ ፓርቲ መልዕክት ማስተላለፊያ መደረጉ በህዝብ ዘንድ ለአንድ ወገን ያደሉ ወይም የፓርቲ አባል እንደሆኑ እንዳይወሰድባቸው የሰጉት ግለሰቦቹ አማራጭ እንዳጡ እና አጣብቂኝ ውስጥ እንደገቡ ተናግረዋል።

የብልጽግና ሹሞች ቁጣ በተቀላቀለበት መልዕክት በአስገዳጅነት ማስታወቂያውን ከነገ ጀምሮ ለማሰራጨት እንዳስገደዷቸው ጨምረው ተናግረዋል።

"ከሳምንት በፊት ለአፍሪካ ህብረት ስብሰባ መሪዎች ሲመጡ 'እንኳን ደህና መጣችሁ' የሚልና ስለ አፍሪካ ህብረት ስብሰባ ተመሳሳይ ትዕዛዝ ተላልፎ  ያስተላለፍነው የፖለቲካ ይዘት የሌለው በመሆኑ ነበር" የሚሉት የማስታወቂያ ድርጅቶቹ "አሁን የታዘዝነው የፖለቲካ ፓርቲ  መልእክት ገበያው በተዳከመበት መሀል ከህዝቡ ጋር እንዳያቃቅረን ስጋት አለን" ብለዋል።

በሌላ በኩል በአፍሪካ ህብረት የመሪዎች ስብሰባ ወቅት በርካታ የመኪና ኪራይ ስራ ላይ የተሰማሩ ድርጅቶች ተሽከርካሪዎቻቸውን በነፃ ለስብሰባው አገልግሎት እንዲሰጡ ተገደው እንደነበር ለመሠረት ሚድያ ተናግረዋል።

"ቢዝነስ በተዳከመበት በዚህ ወቅትም ይሁን ድሮ በአመት አንዴ ጥሩ ስራ የምንሰራው እንደ አፍሪካ ህብረት ያሉ ስብሰባዎች ሲመጡ ነበር" የሚሉት የመኪና አከራዮቹ አሁን ግን እሱንም በግዴታ እንደተነጠቁ እና መኪናዎቻቸው የተመለሱላቸው ስብሰባው ካለቀ በኋላ መሆኑን አስረድተዋል።

መረጃን ከመሠረት!

@MeseretMedia