orthodox new mezmur

#የንጋቴ_ብስራት

ሃብታም በሃብቱ፣ ሰሪ በጥበቡ፣ ተናገሪም በቃሉ፣ ጉልበተኛው በችሎታው፣ ባለስልጣን በትዕዛዙ ሊያነጋው ከቶ የማይችለውን ምሽት ያነጋህልኝ የንጋቴ ብስራት እግዚአብሔር ሆይ ተመስገን። ነጋ ስል የምሽቱ ሰዓት አልቆ ለቀኑ ስፍራውን መልቀቁ አይታየኝም ይልቁንስ በአንተ ትዕዛዝ ስፍራን እንደተለዋወጡ እንጂ። አንተ ሳትለው አንዳች አይሆንምና።

ጨለማውን በቃልህ የምታዝ፣ ለፀሐይ እና ለጨረቃ ምርቲን የምትሰጥ፣ ፍጥረትን የምታሰማራ፣ ሁሉን የምታስተዳድር ልዑል አምላክ እግዚአብሔር ክብር ለስምህ ይሁን። አንድ ቀን በህይወቴ ሲጨመር ምክንያቱ የአንተ ምህረቱ ነው እንጂ ከእኔ የሆነ አንዳች በጎ ምግባር ኖሮ አይደለም። ምግባሬ አይደለም አንድን ቀን ሊያሻግረኝ ቀርቶ የሰከንዳትን ዕድሜ እንኳን ሊያኖረን አይችልም።

ፈሶ በማያልቅ በምህረት አቅም እኔ ልጅህ በህይወት ቆሜ አለሁና ተመስገን እልሃለሁ። በዐይኔ ከማየው ጨለማም ባለፈ የህይወቴ ጨለማ ከእኔ ላይ የገፈፍክ፣ የኃጢአቴን ቀንበር ወስደህልኝ የጽድቅህን በፍታ ያለበስከኝ፣ መቅበዝበዜ ገዶህ ከላይ ከሰማያት የወረድክልኝ፣ መጥፋቴ አሳዝኖህ ልትፈልገኝ የመጣህ፣ የህመሜ ፈዋሽ አለመኖሩን አውቀህ መድሃኒት ሆነህ በምድር የተገለጥክ ጌታዬ መድሃኒቴ ኢየሱስ ክርሰቶስ ሆይ ክብር ለስምህ ይሁን።

አይነጉም ያልኳቸው ምሽቶች ነጉ፣ አይታለፉም ያልኳቸው ጊዜያት አለፉ፣ አይሄዱም ያልኳቸው ዕለታት እንደ ቀልድ በእጅህ መዳፍ ውስጥ ይዘኸኝ ያንን ሁሉ አሻገርከኝ። እኔ አንተን እያየው አንተ ህይወቴን እያየህልኝ የሚመጣውን ክፉ ሁሉ እየመከትክልኝ ይኸው አለሁኝ።

ታልፏል ሲባል ቀላል ቢመስልም ነገር ግን ከዚህ ጀርባ አንተ ያደረክልኝ ስፍር የሌለው ምህረት ይታወሰኛል። ነግቷል ሲባል ልማድ ቢመስለም ነገር ግን ከዚህ በስተኋላ የርህራሄህ ጥልቀት ፊቴ ላይ ድቅን ይልብኛል። አዎ ልምድ ስለሆነ አይመሽም፣ ጊዜው ስለሆነም አይነጋም፣ የምታነጋ እና የምታመሽ አንተ እንጂ ሰዓታት አውቀው ተፈራርቀው አይደለም። ሁሉ በትዕዛዝ የሚፈጸምልህ ቅዱስ አምላክ ነህና የምስጋናን መስዋዕት እሰዋልሃለሁ።

ደግሞ ጎህ ሲቀድ ሲሆን ማለዳ
ትውስ ይለኛል የፍቅርህ ዕዳ
ልቤን ተጭኖት የአንተ ውለታ
ዕጹብ እላለሁ ጠዋትም ማታ

የቀኑን ብርሃን ያሳየኸኝ ተመስገን። አሜን

✍ ዲያቆን ተስፋ መሠረት
📆 የካቲች 23 2017 ዓ.ም ተጻፈ

@orthodox_new_mezmur
@orthodox_new_mezmur

#መች_መች_ነው ?

ለአንዳንድ ድርጊቶቻችን የነበርንበት ሁኔታ ወሳኝ ሊሆን ይችላል። እንደሰው ለቅሶ ላይ ቆመን የሳቅ መለከት አንነፋም። ሰርግም ላይ ሆነን ሙሾ ስናወርድ አንገኝም። ጸጥታ በጽኑ በሚፈለግበት ቦታ ስንጮህ ብንገኝ እንደ እብድ እንታያለን። ለዚህም ባለንበት ሁኔታ እና ቦታ ልክ በእኛ የሚሆነው ነገር ይወሰናል። ነገር ግን አሁን እንደ ሰው ብቻ ሳይሆን እንደ ክርስቲያን ባለንበት ሁኔታ መወሰን አለብን ወይ የሚለውን ሃሳብ እንመልከት።

ለምሳሌ ምስጋናችን ለእግዚአብሔር የሚሰዋው መች መች ነው? ነገር ሲሞላልን? ሁኔታው ሲሳካልን? ህይወት ሲደላደልልን? በረከት ብለን የምናስበው ሲቀርበን? በትምህርት ወይ በስራ ሲሰምረልን? ተወዳድረን ስንረታ? ተሰልፈን ስንቀድም? ከንድተን ስንጨብጥ? አይተን ስንደርስ? በዚህ ውስጥ አመስግነን ይሆናል። በእርግጥ በዚህ ውስጥ ማመስገን እጅግ ቀላል እና ለማንኛውም ሰው የሚቻል ነው።

ነገር ግን ክርስቲያን መች መች ነው ማመስገን ያለበት? በመጽሐፍ “ሁልጊዜ ስለ ሁሉ በጌታችን በኢየሱስ ክርስቶስ ስም አምላካችንንና አባታችንን ስለ ሁሉ አመስግኑ።”( ኤፌ 5፥20) “ሳታቋርጡ ጸልዩ፤ በሁሉ አመስግኑ”(1ኛ ተሰሎ 5፥17-18) “እንግዲህ ዘወትር ለእግዚአብሔር የምስጋናን መሥዋዕት፥ ማለት ለስሙ የሚመሰክሩ የከንፈሮችን ፍሬ፥ በእርሱ እናቅርብለት።”(ዕብራውያን 13፥15) “እግዚአብሔርን ሁልጊዜ እባርከዋለሁ፥ ምስጋናውንም ዘወትር በአፌ ነው።” (መዝሙር 34፥1) ተብሎ ተጽፏል።

ሁል ጊዜ እግዚአብሔርን ማመስገን፣ በሁሉ ማመስገን፣ ዘወትር የምስጋና መሥዋዕት ለእርሱ መሠዋት ይህ ማለት ምን ማለት ነው? ሃዘን ሲገጥመንም ማመስገን? ሳይሳካ ሲቀርም ማመንገን? ሁኔታው ሲጠምም ማመስገን? ፈተናው ሲያይልም ማመስገን? ከባድ ሁኔታ ላይ ነኝ ስንልም ማመስገን? አዎ በዚህ ሁሉ ነገር ውሰጥ ሆነን ማመስገን ማለት ነው።

በመርህ ደረጃ ይህን ቃል ከእግዚአብሔር ብንወስድም ቅሉ ወደ መሬት በማውረድ ረገድ እና በህይወት ይህንን ከመላድ አኳያ ብዙዎቻችን ችግር አለብን። እግዚአብሔርን ማመስገን የሚታየን ሰኬት ያለነው ነገር ሲሆንልን ብቻ ነው። ይሄ ደግሞ ዘወትር፣ ሁል ጊዜ እና በሁሉ የተባለውን የእግዚአብሔርን መርህ እንድንጥስ ያደርገናል።

ይህን ሃሳብ በጣም ለማቅረብ እንዲያመች በህይወታችሁ ከባድ ያላችሁትን ጊዜ አስቡት። አይገፋም ያላችሁትን ወቅት አሰላስሉት። አያልፍም ያላችሁትን ምሽት እስኪ አሰታውሱት። በእርግጥ በዛ ጊዜ አመስግኑ ብንባል ምስጋና ነው ወይስ ማጉረምረም ነው የሚቀድመን? መዘመር ነው ወይስ ማልቀስ ይቀልን ይሆን? የቱን ነው ያደረገነው? የቱንስ ነው የምናደርገው?

እግዚአብሔር ሆይ አንተ ሁል ጊዜ ትክክል ነህ በማለት ፈንታ ምነው ተውከኝ፣ ምነው እኔን ብቻ የምትፈትነኝ፣ ምን አድርጌህ ነው የምታሰቃየኝ፣ በቃ ለዚህ ነው የፈጠርከኝ ስንል ተሰምተን አናውቅ ይሆን? በሃዘን ባህር ውሰጥ እንኳን ተውጠን ጌታ ሆይ አንተ መልካም ነህ አንተ ሁሌ ትክክል ነህ ስምህ ይመስገን ማለት ነው የክርስትናው ውበቱ።

ይህ ካልሆነ ግን፣ ሲሞላልን ካመሰገንን ግን ከማያምነው መሻላችን ቀርቷል። እግዚአብሔር አባቱ የሆነለት ሰው በምንም አይነት ሁኔታ ውሰጥ ሲያጉረመርም አይሰማም። ምክንያቱም አስተዳዳሪው እግዚአብሔር የህይወቱን መልህቅ በእጁ የያዘ ስለሆነ በምንም ነገር አይናወጥም። ይልቁንስ ተስፋውን እና እምነቱን በእግዚአብሔር ላይ በማድረግ ይጸናል እንጂ። መች መች ነው የሚለው ጥያቄ ለምስጋና አይጠየቅም ምክንያቱም ምስጋናችን የሁልጊዜ ነውና።

ጌታ እግዚአብሔር ሆይ ዘወትር በህይወታችን ያለመወላወል እና በሁኔታ ሳንወሰን አንተን የምናመሰግንበት ጸጋ እና አቅም ለሁላችን ስጠን። አሜን

✍ ዲያቆን ተስፋ መሠረት
📆 የካቲት 17 2017 ዓ.ም ተጻፈ

@orthodox_new_mezmur
@orthodox_new_mezmur

#ሳይጨመር

የብዙ ነገር ድምር እና ክምችት ሙላት ተብሎ ሊጠራ ይችላል። ሰዎች አሁን ባለኝ እዚህ ነገር ላይ ይሄ ቢጨመር፣ ይሄ ደግሞ ቢታከል ሙሉ ነኝ ሲሉ መስማት የተለመደ ነው። ሙላትን ሰው እንደየጎድለቱ ሊተምነው ይችላል። ጤና ኖሮት ገንዘብ የጎደለው ጤናው ብቻ ሙላት አይሆንለትም፣ ገንዘብ ኖሮት ጤና ያጣ ደግሞ ገንዘብ ምን ይሰራልኛል ይላል።

ሰው እንደየ ክፍተቱ ለሙላት ያለው ምልከታም የተለያየ ነው። አንድ ጥያቄ ግን ላንሳ .. በእርግጥ ሰው የፍላጎቱ ሙላት ላይ ሊደርስ ይችል ይሆን? አለኝ ያለው ሌላ እንዲኖረው ሲተጋ እንጂ ሲያመሰግን አይታይም። ለዚህም ሰው ሙላቴ የሚለው በህይወቱ ካሉት ነገሮች በመነሳት እንደሆነ የሚታመን እና ቅቡልነት ያለው ሃሳብ ነው።

እስኪ አለኝ ከምትሉት ነገር ሁሉ ውጡና አንዱን እግዚአብሔርን አስቡት። ያላችሁን ሁሉ አጥታቹ እግዚአብሔርን ብቻ ስላላችሁ ሙሉ እንደሆናችሁ ይሰማችኋል? ይህ በጣም መሰረታዊ ነገር ነው። በእርግጥ ይህ ይሰማችኋል? እግዚአብሔር ብቻውን ሙላት ከልሆነላችሁ ቆም ብሎ ማሰብ ያስፈልጋችኋል።

በእኛ ህይወት የትኛው ስሌት ልክ ሊሆን ይችላል ?
እግዚአብሔር ሲደመር ገንዘብ = ሙላት ነውን?
እግዚአብሔር ሲደመር ጤና = ሙላት ነውን?
እግዚአብሔር ሲደመር ክብር = ሙላት ነውን?
እግዚአብሔር ሲደመር ዝና = ሙላት ነውን?
እግዚአብሔር ሲደመር እውቅና = ሙላት ነውን?
እግዚአብሔር ሲደመር ውበት = ሙላት ነውን?
እግዚአብሔር ሲደመር ስኬት = ሙላት ነውን?
እግዚአብሔር ሲደመር ከፍታ = ሙላት ነውን?
እግዚአብሔር ሲደመር ስልጣን = ሙላት ነውን?
እግዚአብሔር ሲደመር የሰው ፍቅር = ሙላት ነውን?

እግዚአብሔር ሲደመር ትዳር = ሙላት ነውን?
እግዚአብሔር ሲደመር ጉልበት = ሙላት ነውን?
እግዚአብሔር ሲደመር ዕድሜ = ሙላት ነውን?
እግዚአብሔር ሲደመር ስራ = ሙላት ነውን?
እግዚአብሔር ሲደመር ሃብት = ሙላት ነውን?
እግዚአብሔር ሲደመር ተወዳጅነት = ሙላት ነውን?

እግዚአብሔር ሲደመር ተሰሚነት = ሙላት ነውን?
እግዚአብሔር ሲደመር ቤተሰብ = ሙላት ነውን?
እግዚአብሔር ሲደመር ልጅ = ሙላት ነውን?
እግዚአብሔር ሲደመር ዘመድ = ሙላት ነውን?
እግዚአብሔር ሲደመር ጎረቤት = ሙላት ነውን?
እግዚአብሔር ሲደመር ጥሩ ጓደኛ = ሙላት ነውን?
እግዚአብሔር ሲደመር ወዳጅ = ሙላት ነውን?

ነውን? በእርግጥ እነዚህ ሁሉ ሙላት የሚመስሉ ነገር ግን በፍጹም ያልሆኑ ናቸው። ትክክለኛው ቀመር ይሄ ነው። እግዚአብሔር + ምንም = ሙላት። ምንም ባይኖረኝ እግዚአብሔርን ብቻ ስላለኝ ሙሉ ነኝ ማለት ከፍተኛ የእምነት ብርታት እና አስተውሎት ይፈልጋል። እግዚአብሔርን ማንም ሳይጨመር ሙላቴ ነህ፣ ምንም ሳይጨመር ሙላቴ ነህ ማለት ትችሉ ይሆን?

ከእቃ እና ከአይነት ምንም፣ ከሰው እና ከፍጥረት ማንም ሳይጨመር እግዚአብሔር ሙላት የሚሆን አምላክ ነው። እጅግ የጎደለው እግዚአብሔርን ያለው ሰው ሳይሆን እግዚአብሔርን ሳይኖረው ሁሉን ያለው ነው። ምክንያቱም እርሱን የሌለው ምንም ቢኖረው ያለው ነገር ሁሉ ምንም ስለሆነ ነው። ያለ እግዚአብሔር ሁሉ ምንም ነው። ከእግዚአብሔር ጋር ምንም ግን ሙላት ነው።

አስተውሉ በሲደመር መርህ የምትመላለሱ ከሆነ እጅግ ከባድ ነው። ምንም ሳይደመር፣ አንዳች ሳይጨመር እርሱ እግዚአብሔር ሙላታችሁ ይሁን። ይህን እምነት ያለው ሰው በምንም ሁኔታ ውስጥ እግዚአብሔርን አይተውም። በሲደመር መርህ የሚመላለስ ሰው ግን ያንን የሚደመረውን ፍላጋ መባዘኑ አይቀርም። እና ምንም አትደምሩ ምንም።

እግዚአብሔር ሙላት ያልሆነው ሰው የቱምንም የስኬት ጣራ ቢመለከት አያርፍም። ምክንያቱን ሁሉን ባለው በእግዚአብሔር ስላለረፈ። እግዚአብሔር ላይ ተደምሮ ሙላት የምንለው ነገር ደግሞ እግዚአብሔርን  የመተካት (በእኛ ላይ ጣዖት የመሆን) አቅሙ ከፍተኛ ነው። በማስተዋል ያለምንም ተደማሪ እና ተጨማሪ ነገር እግዚአብሔርን ሙላቴ ማለት ይብዛልን። አሜን

✍ ዲያቆን ተስፋ መሠረት
📆 የካቲት 18 2017 ዓ.ም ተጻፈ

ይቀላቀሉ  👇👇 ለሌሎች ያጋሩ 

@orthodox_new_mezmur
@orthodox_new_mezmur

ስለ ብዙ ምህረትህ .....

ለቁጥር በሚታክት የምህረት ብዛት እያኖርከኝ እንደሆነ ሳስብ እገረማለሁ። መቆሜን ሳስብ ዛሬ ላይ መድረሴን ሳሰላስል ትዝታዬ ከእኔ የሆነ በጎ ነገር ሳይሆን የምህረትህ ጉልበት ነው። ሁል ጊዜ መኖሬ ሁል ጊዜ በማማርህ ውስጥ የተሰወረ ነው። ለአፍታ ምህረትህን ብታቁርጥ ለነፍሴ ህልውና ገደብ ትሆናለህ። በማይሰለች የምህረት ብዛት ነፍሴን እያረሰረስካት ድርቀቷን አስቀርተሃል።

የበደሌን ክምር ጠራርጎ የወሰደው የምህረትህ ጎርፍ ነው። ርቆ ያለውን ማንነቴን የምህረትህ ፉጨት ድምጽ ነው ጠርቶ ያቀረበኝ። የኃጢአቴን ትውስታ ከውስጤ ያስወጣው የምህረትህ አቅም ነው። ቆምኩ ስል ትውስታኔ ምህረትህ ነው፣ ኖርኩኝ ስል ሀሳቤ እና ማሰላሰሌ ምህረትህ ነውና ክብርህን ከፍ ከፍ አደርጋለሁ። ስለ ብዙ ምህረትህ አመሰግንሃለሁ። አሜን

✍ ዲያቆን ተስፋ መሠረት
📆 ጥር 18 2017 ዓ.ም ተጻፈ

@orthodox_new_mezmur
@orthodox_new_mezmur