💛 የ መዝሙር ግጥሞች 💛

​​የዐቢይ ጾም ሰባተኛ ሳምንትኒቆዲሞስ)

ክፍል ሁለት

በሚታይ አገልግሎት የማይታይ ደጋፊ ከእግዚአብሔር ሲታደል ማንም አያየውምና።ዮሐ ፫፥፱ "ኒቆዲሞስም መልሶ ይህ እንዴት ሊሆን ይችላል አለው፡፡"

ኒቆዲሞስም በሚታይ አገልግሎት የማይታይ የልጅነት ደጋ የሚሰጥበትን ምሥጢር ጥምቀት በምሳሌ በነገረውም አልገባውም ነበር፡፡ ለዚህም ነው "ይህ እንዴት ሊሆን ይችላል" ሲል የጠየቀው ዮሐ፫፥፲€
።"ኢየሱስም መልሶ እንዲህ አለው፦ ፬አንተ የእስራኤል መምህር ስትሆን ይህን
አታውቅምን"

እዚህ ላይ ሁለት ነገሮች ይነሳሉ
፩፦መምህር ብሎ፦ ማለምለም ማክበር በዚህ በጌታችን ንግግር መምህርንን ማክበር እንዳልከን ነው የምንረዳው፡፡
አንድም፦ የኒቆዲሞስን ማንነት ሲመሰክር ነው።
አንድም፦ አቅርቦ ማስተማር ለመምህራን ልማድ ነው ከዚያ አንጻር ሲያስተምረው ነው።
፪፦አታውቅም ማለቱ ተግሳጽን ያመለክታል ምንም እንኳን የአይሁድ መምህራቸው ብትሆንም ይህንን ለመሰለው ታላቅ ምሥጢር አላዋቂ ነህ ሲል ገሥጾታል፡፡
አንድም፦ ጌታችን የነቀፈው አለማወቁን እንጂ መምህርነቱን አይደለም፡፡
አንድም፦/ተግሳጹ ባለማወቁ ሳይሆን ክርክር በማብዛቱ ነው፡፡/
ዮሐ፫፥፲፩ "እውነት እውነት እልሃለው፡- የምናውቀውን እንናገራለን ያየነውን እንመስክራለን ምስክራችንንም አትቀበሉም።"
ያስተማረውን የልጅነት ምሥጢር አይሁድ አምነው አይቀበሉትምና እንዲህ አለ፡፡
እውነት እውነት እልሃለሁ፦ አንድነቱን ተናገረ ያየነውን የሰማነውን እንመሰክራለን ሲል፦ ሶስትነቱን
የምናውቀውን እንናገራለን፦ ያየነውንም እንመሰክራለን ምስክራችንንም አትቀበሉም አለ፡፡

ራሱን ከመጥምቁ ከዮሐንስ ጋር ጀምሮ ኒቆዲሞስን ደግሞ ከአይሁዳ ጋር ቆጥሮ ሲናገር ነው።
አንድም፦ ራሱን ከባሕርይ አባቱ ከአብና ከባሕርይ ሕይወቱ ከመንፈስ ቅዱስ ጋር አንድ አድረጎ ሲናገር ኒቆዲሞስን ደግሞ በሃናና ቀያፋ መስሎ ነው፡፡ ሉቃ ፳፪፥፷፮፥፸፩

አንድም፦ ራሱን ከሐዋርያት ጀምሮ ኒቆዲሞስን በአይሁድ በአሕዛብ በነገስታት መስሎ ነው፡፡ ሐዋ ፫፥፲፫, ፬፥፬
አንድም፦ ራሱን በኋላ ዘመን መምህራን ጋር ቆጥሮ ኒቆዲሞስን በኋላ ዘመን መናፍቃን መስሎ ነው አንዲህ ያለው

ዮሐ ፫፥፲፪ "ስለ ምድራዊ ነገር በነገርኳችሁ ጊዜ ካለመናችሁ ስለሰማያዊ ነገር ብነግራችሁ እንዴት ታምናላችሁ"
በሚታይ አገልግሎት በጥምቀት የሚሰጣችሁን ልደታችሁን ካላመናችሁ ሰማያዊ ልደታችሁን ማለትም ከሙታን ተለይታችሁ ተነሥታችሁ መንግሥተ ሰማያት ትገባላችሁ ብዩ ብነግራችሁ እንዴት ታምናላችሁ ሲለው ነው።/ትንሳኤ ሙታን ሁለተኛው ሰማያዊ ልደት ይባላል/ ማቴ፲፱፥፳፰

አንድም፡- ስለ ምድራዊ ልደቴ ስነግራችሁ ካላመናችሁ ስለ ሰማያዊ ልደቴ ብነግራችሁ እንዴት ታምናላች ሲላቸው ነው፡፡

አንድም፡- የፊተኛው ልደት በኋላኛው ልደት ተገለጠ ተብሎ እንደተነገረ ምድራዊ ልደቱ ያመነ ሰማያዊ ልደቱንም ይቀበላል ሲል ነው፡፡

ዮሐ ፫፥፲፫ ከሰማይ ከወረደው በቀር ወደ ሰማይ የወጣ ማንም የለም እርሱም በሰማይ የሚኖረው የሠው ልጅ ነው።"

ወደ ሰማይ የወጣ የለም ወደ ሰማይ የወጣው ከሰማይ የወረደው ክርስቶስ ነው አንጂ ይህንስ ለምን ይለዋል ቢል ወንጌላዊው የመጣውም የወረደውም አንድ አካል አንድ ባሕርይ ነው ለማለት

አንድም፦ ሰማያዊ ሃብትን ሰማያዊ እውቀትን ገንዘብ ያደረገ የለም ሰማያዊ ሃብትን ሰማያዊ እውቀትን ገንዘብ ያደረገ ከሰማይ የወረደው ክርስቶስ ነው እንጂ ዮሐ ፮፥፴፰ ሉቃስ ፳፬፥፶-፶፪
ዮሐ ፬፥፲፭-፲፭ ሙሴም ከምድረ በዳ እባብን እንደሰቀለ እንዲሁ በእርሱ የሚያምን ሁሉ የዘለዓለም ሕይወት እንዲኖረው እንጅ እንደይጠፋ የሠው ልጅ ይሰቀል ዘንድ ይገባዋል፡፡"
ለምሣሌ፦
አስቀድሞ ሙሴ በተረዳ ላይ እባቡን መስቀሉ ለክርስቶስ መስቀል ምሳሌ ነው ዘኁ ፳፩ ፥፬-፱ ከብረት የተሠራው እባብ የክርስቶስ የምድር እባቡ የዲያብሎስ በአርዌ (እባብ) ምድር መርዝ እንዳለበት በዲያብሎስም ፍዳ ኃጢአት አለበት በአርዌ (እባብ) ብርት መርዝ እንደሌለበት በጌታም ፍዳ ኃጢአት የለበትም ብረት ጽሩይ እንዲሆን ጌታም ጽሩዋ ባሕርይ ነው እስራኤል የምዕመናን የሠው ልጅ ምሣሌ አንድም፦ ተራዳው የመስቀል ብረት የወልድ እግዚአብሔር እባብ የዲያብሎስ ቀርሰሉ የኃጢአት መርዙ የመርገም ሥጋ የመርገመ ነፍስ በርኃው የጋሃነመ እሳት አምሳል ነው
ያን አይተው ሠምተው ይዳኑ አለስቀለት ክርስቶስን አይተው ያጤኑ ሐዋርያት ስምተው ያመኑ ምዕመናን የመኖራቸው ምሳሌ አንድም፦ መልኩን አይተው ድምጹን ሰምተው የዳኑ ከቃሉ ስምተው ያመኑ የዳኑ ድምፁን ብቻ ሠምተው የዳኑ ከርሱ በኋላ ከተነሡ መምህራን ሰምተው ያመኑ የዳኑ የምዕመናን ምሣሌ ያላመኑ ይፈፀሙ ማለቱ ስቅለተ ክርስቶስን አይተው ያላመኑ አይሁድ ስምተው ያላመኑ አሕዛብ ያለመዳናቸው ምሳሌ ነፍስ ያለው እባብ የገደላቸውን ሰዎች ነፍስ የሌለው ብረት እንዳዳናቸው በባሕርይው ሞት የሌለበት አምላክ ዲያብሎስ የሰራቸውን ነፍሳት ተስቅሎ ሞቶ የማዳኑ ምሣሌ ነው ስለምን እራሱን ለብረት መሰለው ቢሉ ብረት ከቆላም ከደጋም አጠረቃቅሞ ይሠሩታል የጌታችንም ልደቱ ከቤተ መንግስት ከቤተ ክህነት ነውና አንድም፦ ብረት አሩይ ነው ሲመቱት ከሩቅ ይሰማል የጌታም ልደቱ ጥምቀቱ ሞቱ ዕርገቱ እስከ ምጽአት ድረስ ሲነገር ይኖራልና ከብረት መስለው ትንቢቱን ያናገረ አምሳሉን ያደረገ እርሱ ባወቀ ነው፡፡

ዪሐ ፫፥፲፮ በእርሱ የሚያምን ሁሉ የዘለዓለም ሕይወት እንዲኖረው እንጂ እንዳይጠፋ እግዚአብሔር አንድያ ልጁን እስኪሰጥ ድረስ ዓለምን እንዲሁ ወዷልና።ዮሐ፬፥፱

አንድ ልጅ ለሁሉ ቤዛ አድርጎ እስከ መስጠት ደርሶ እግዚአብሔር ዓለሙን ወዶታልና ከመኩሉ ዘየአምን ቦቱ አይትኃጎል
በርሱ ያመነ ሁሉ እንዳይጎዳ የዘላለም ሕይወትን ያገኙ ዘንድ እግዚአብሔር አንድያ ልጁን ቤዛ አድርጎ ሠጠን ሲል
አንድም ትምርቱን ሰምተው ቃሉን አምነው ቢፈጽሙት ቢኖሩበት ሞትን አያዩምና ዓለም ያለው የሰውን ልጅ ነው
ዮሐ፫፥፲፯ ዓለም በልጁ እንዲድን እንጂ በዓለም እንዲፈርድ እግዚአብሔር ወደ ዓለም አላከውምና

እግዚአብሔር ባለሙ ሊፈርድበት ልጁን ወደዚህ ዓለም አልሰደደውም እርሱስ ስለካሠለት ሊያድነው ዘንድ እንጂ
አንድም፦ አስቀድሞ ያለተፈረደበት ሆኖ ሊፈርድበት አልሠደደውም ተፈርዶበታልና ከተፈረደበት ፍርድ ሊያድነው ነው እንጂ አንድም፦ በሥጋው ሊፈርድበት አልላከውምና እጅ ለሌለው እጅ እግር ለሌለው እግር ዓይን ለሌለው ዓይን ሊሰጠው ነው እንጂ አንድም፦ በመንፈሳዊ ቅሉ ሊፈርድበት አልሰደደውም ተኃድግ ለኪ ኃጢአትን ሊሰጥ ነው እንጂ።ዮሐ፭፥፳፬

ዮሐ፫፥፲፰ በእርሱ የሚያምን
አይፈረድበትም በማያምን ግን በአንዱ በእግዚአብሔር ልጅ ስም ስላላመነ አሁን ተፈርዶበታል
በግርማ መንግሥቱ በመለኮታዊ ክብሩ በቅድሳን ታጅቦ ለፍርድ ይመጣል በእርሱ ያመነ አይፈረድበትም በእርሱ ባላመነ ግን ፈጽሞ ይፈረድበታል።

በአንድ በእግዚአብሔር ልጅ አላመነምና ተፈርዶበታል ይፈረድበታል።
ዮሐ፫፥፲፱"ብርሃንም ወደ ዓለም ስለመጣ ሰዎችም ስራቸው ክፋ ነበርና ከብርሃን ይልቅ ጨለማን ስለወደዱ ፍርዱ ይህ ነው።"

ብርሃን ክርስቶስ ወደ ዓለም መጥቷልና ሰውም ከብርሃን ጨለማን ከእውቀት ድንቁርናን ከክርስቶስ ሠይጣንን ከወንጌል ኦሪትን ወዷልና፡፡
ዮሐ፫፥፳ "ክፉ የሚያደርግ ሁሉ ብርሃን ይጣላልና ሥራውም እንዳይገለጥ ወደ ብርሃን አይመጣም።

ምግባረ ክፉ የሆነ ሠው ብርሃንን ይጠላል ወደ ብርሃን አይመጣም ሥራው እንዳይገለጥበት ሥራው ሁሉ ክፉ ስለሆነ ኢዮ፳፬፥፲፫-፲፮

ወስብሐት ለእግዚአብሔር

​​በስመአብ ወወልድ ወመንፈስቅዱስ አሐዱ አምላክ አሜን

የዐቢይ ጾም ሰባተኛ ሳምንት(ኒቆዲሞስ)
በዲያቆን ያሬድ መለሰ
ዮሐ፫፥፩ "ከፈሪሳውያን ወገን የአይሁድ አለቃ የሆነ ኒቆዲሞስ የሚባል ሠው ነበር።የኒቆዲሞስን ነገር ያነሳው ለምንድን ነው ቢሉ፦ በእምነት ጸንቶ እስከ መጨረሻው የሚከተለው ነውና፡፡ ሉቃ ፳፬፥፲፫ ፣ ዮሐ፲፱፥፴፱

አንድም ፦ በእርሱ አምኖ በኋላ የሚመሰክር ነውና፡፡ ዮሐ፯፥፶
አንድም፦ ያልተማሩ መጽሐፍት የማያውቁ ብቻ ሳይሆን ከተማሩ ከአዋቂዎች ከአለቆችና ከመምህራንም ወገን በእርሱ ያመኑ እንዳሉ ለመግለጥ

አንድ ሠው ነበር ያለው ታሪክ አያይዞ ነው ቢሉ፦ ብዙዎች በስሙ አመኑ ከተባሉት መካከል ነው ሲል ነው፡፡
ከምዕራፍ ፪ ጋር ሲያያዝን ነው፡፡ በፋሲካ በዓልም በኢየሩሳሌም ሳለ ያደረገውን ምልክት/ገቢረ ተአምራት/ ባየ ጊዜ ብዙ ሰዎች በስሙ አመኑ ብሎ ስለነበር፡፡

ከዚህ ጋር ሲያያዝ ነው ዮሐ፪፥፳፫ አመኑ ከተባሉ ሲደምረው ከፈሪሳውያን ወገን የሚሆን ኒቆዲሞስ የሚባል አንድ ሠው ነበር አለ፡፡ ካመኑት መካከል አንዱ ኒቆዲሞስ ነውና
አንድም፦ ታሪክ አላያያዘም ቢሉ፦ የቃሉን ትምህርት ገቢረ ተአምራቱን ተመልክቶ በእርሱ ያመነ ከፊሪሳዊያን ወገን የሚሆን በትምህርቱ በሀብቱ በሹመቱ የአይሁድ አለቃ የሆነ ኒቆዲሞስ የሚባል አንድ ሠው ነበረ ሲል ነው፡፡

የአይሁድ አለቃቸው ሲል፦ አለቅነቱ በሶስት ወገን ነው በትምህርት/ሊቅ ኦሪት/በሹመት በባለፀግነት (በሀብት)
ዮሐ፫፥፪ "እርሱም በሌሊት ወደ ኢየሱስ መጥቶ መምህር ሆይ እግዚአብሔር ከእርሱ ጋር ከሆነ በቀር አንተ የምታደርገውን እነዚህን ምልክቶችን ሊያደርግ የሚችል የለምና መምህር ሆነህ ከእግዚአብሔር ዘንድ እንደመጣህ እናውቃለን አለው።"በግዕዝ "ወውእቱ መድአ ሃበ እግዚአ ኢየሱስ ቀዲሙ ሌሊቱ።" ትርጉሙ "አስቀድሞ በሌሊት ወደ ጌታ የመጣ"
አማርኛው ከግዕዙ ጋር ሲነጻፀር ቀዲሙ /አስቀድሞ/ የሚለው ይገኝበታል ።"እርሱም በሌሊት ወደ ኢየሱስ አስቀድሞ መጥቶ
አስቀድሞ ወደ እርሱ የመጣ አለ ከምን አስቀድሞ?፦ ሲለው በስቅለት ጊዜ ሥጋውን ከመስቀል ከማወረዱ በፊት ለትምህርት በሌሊት መጣ ሲል ነው።

አስቀድሞ የሚለው ሥጋውን ከማውረዱ በፊት አስቀድሞ ለመማር መጣ ለማለት ነው፡፡ ዮሐ ፲፱
አንድም፦ ከመዓልት ከሚመጡት አስቀድሞ በሌሊት መጣ ሲል ነው
አንድም፦ ከማመን አስቀድሞ የመጣ ሲል ነው፡፡ ኒቆዲሞስ ኋላ ላይ አምኗል ከማመኑ በፊት ነው ለትምህርት የሚመጣ ነበር። ዮሐ ፯፥፵፱

በሌሊት ለምን መጣ?
በሌሊት ለምን መጣ ቢሉ ለወንጌል የተጋ የእግዚአብሔር በረከት እንዳይከፈልበት የሚፈልግ ነውና፡፡
አንድም፦ ውዳሴ ከንቱ ሽቶ መምህር ነኝ እያለ ገና ይማራል ብለው እንዳይንቁት ነው።
አንድም፦ ጨለማ የተባለ ድንቁርናን ይዞ አለማወቅንም ለብሶ ሲል ነው፡፡ ጨለማ የተባለች
አንድም፦ የቀን ልቡና ባካና ነው፡፡ የሌሊት ልቡና የተሰበሰበ ነውና፡፡ በተሰበሰበ አእምሮ ለመማር የሌሊቱ ጊዜ የተመቸ ነው፡፡
አንድም፡- አይሁድን ፈርቶ ነው፡፡ ዮሐ፱፥፳፫
በሌላ በኩል ኒቆዲሞስ የጌታን መምህርነት የመሰከረለት አምኖ ነው ወይስ ሳያምን ነው የሚለው መመልከት ይገባል።

ፍጽም አምኗል ቢሉ፦ አምኖ ነው ቢሉ፦ በህልውና በባሕርይ በመለኮት በሥልጣን ከእግዚአብሔር ጋር አንድ ከሆነ በቀር ማንም ሰው ይህንን ሥራ ሊሠራው አይችልም ሲል ነው፡፡ ዮሐ፩፥፶
ፍጹም አላመነም ቢሉ፦ እግዚአብሔር ያደረበት ሠው ካልሆነ በቀር ይህንን ተዓምራት ማንም ሊሰራው አይችልም ሲል ነው፡፡

ዮሐ፫፥፫ "ኢየሱስም መልሶ እውነት እውነት እልሃለሁ ሠው ዳግመኛ ካልተወለደ በቀር የእግዚአብሔር
መንግስት ሊያይ አይችልም አለው፡፡"

የእግዚአብሔር መንግስት ያለው፦ ሃይማኖትን ነው፡፡ መንግስተ ሰማያት ሃይማኖት ትባላለች ለምን መንግስት ሰማያት በሃይማኖት ነውና የምትወረሰው ደግሞ ወልድ ዋሕድ በምትባል ሃይማኖት የምትወረስ ናትና፡፡

አንድም፦ መንግስተ ሰማያትን ነው
ጻድቃን ከረፍታቸው በኋላ እንደ ከዋክብት ብርሃናዊያን ሆነው ይወርሷታል፡፡
ሠው ዳግመኛ ካልተወለደ በቀር የእግዚአብሔርን መንግስት አይወርስም ሲል ያልተጠመቀ ርኩስ ነው የረከሠ ያልተጠመቀ ሁሉ መንግስተ ሰማያትን አይገባባትም፡፡ አይወርሳትም አያያትም።

ሰው በጥምቀት ዳግም ካልተወለደ በቀር መንግሥተ ሰማያትን አይወርሳትም ሲል ነው፡፡ ዮሐ፩፥፲፩-፲፫

ዳግም ልደት ያለው ጥምቀት ነው፡፡
ለልደት ሥጋ ነው ቢሉ፦ ከእናት ከአባት የምንወለደው አንድ ልደት ሲሆን በጥምቀት ከእግዚአብሔር ሲወለዱ (የምንወለደው) ዳግም ልደት ነው፡፡/ያልተካከለ ንጽጽር/
ለልደት ነፍስ ቢሉ፦ ሰው ሁለተኛ በጥምቀት ከእግዚአብሔር የሚወለደውን ነውና።/የተሰተካከለ ንጽጽር/ ዮሐ፩፥፲፩-፲፫

ጥቅል ትርጉም፦ ያልተጠመቀ/ዳግም ያልተወለደ/ ወልድ ዋሕድ የምትለውን ሃይማኖት አያውቃትም፡፡ መንግስት ሰማያትን አይወርስም ሲል ነው፡፡

ዮሐ፫፥፬ "ኒቆዲሞስም ሰው ከሸመገለ በኋላ እንዴት ሊወለድ ይችላል ዳግመኛ ወደ እናቱ ማኅፀን ገብቶ ይወለድ ዘንድ ይችላልን? አለው።"
ሰው ወደ እናቱ ማኅፀን ወደ አባቱ አብራክ ተመልሶ ዳግም ሥጋዊውን ልደት ይወለድ ዘንድ እንዴት ይችላል? ሲል ነው፡፡
አንድም፦ ዳግም ካልተወለደ ክብር አብራክ ተመልሶ ዳግም ሥጋዊውን ልደት ይወለድ ይገባዋል ሲል ነው
ዮሐ ፫፥፭ "ኢየሱስም መልሶ እንዲህ ሲል እውነት እውነት እልሃለሁ ሠው ከውኃና ከመንፈስ ካልተወለደ በቀር ወደ እግዚአብሔር መንግሥት ሊገባ አይችልም፡፡"
ኒቆዲሞስ ጌታን ዳግም መወለድ ይቻላል ግዴታ ነው ብሎ ጠይቆ ነበርና ለጠየቀው መልስ ሲሰጥ ነው፡፡
ይቻላልን፦ ብሎ ለጠየቀው ልደቱን ነገሮች መወለጃውን አልነገረውም ነበርና ሁለተኛ ከአብራከ መንፈስቅዱስ ከማኅፀነ ዮርዳኖስ ካልተወለደ መንግሥተ ሰማያት መግባት አይችልም የሚለውን የመወለጃውን መንገድ ሲገልጥ ነው።
ይገባዋል፦ ላለው ደግሞ የሚያሰጠውን ክብር ነገረው ሲል ነው።
ዮሐ፫፥፮ "ከሥጋ የተወለደ ሥጋ ነው ከመንፈስም የተወለደ መንፈስ ነው፡፡
በሥጋዊ ግብር የሚወለድ ግዙፍ ሥጋ ነው ልደቱም ሥጋዊ ነው ከረቂቅ መንፈስቅዱስ የምትወለድ ነፍስ ግን ረቂቅ ናት፡፡
አንድም፦ ከሥጋ የተወለደ ሥጋዊውን ክብር ያገኛል ከመንፈስ የተወለደ ግን መንፈሳዊውን ክብር ያገኛል ሲል ነው።
ዮሐ፫፥፯ "ዳግመኛ ልትወለድ ያስፈልጋችኋል ስላልሁህ አታድንቅ፡፡
ዳግመኛ መወለድ ይገባል ግዴታ ነው ሲለው ነው።
አንድም፦ የምትወለድበት መንገድ ይሄ ነው ብዬ ስለነገርኩህ ቃል አታድንቅ ሲለው ነው፡፡
ዮሐ፫፥፰ "ነፋስ ወደ ወደደው ይነፍሳል ድምጹንም ትሰማለህ ነገር ግን ከወዴት እንደመጣ ወዴትም እንዲሄድ አታውቅምን ከመንፈስ የተወለደ ሁሉ እንዲሁ ነው፡፡"
ንፋስ ወደ ወደደው ይነፍሳል ከወዴት እንደመጣ ወዴትም እንደሚሄድ ግን አይታወቅም የንፋስ መኖር ባህር ሲገሥጽ ዛፍ ሲያናውጽ ይታወቃል፡፡ ከመንፈስቅዱስ የሚወለዱትም ልደት የማይታይ በሥራቸው የሚታወቅ ሲል ነው እንዲሁ በእምነት ተቀብለውት በሚሠራው ሥራ ይታወቃል፡፡