ዳጉ-ጆርናል/Dagu-Journal

በእስክንድር ነጋ የሚመራዉ የፋኖ ሀይል ከመንግስት ጋር የሚያደርገዉ ድርድር በአሜሪካ ወይም በአውሮፓ እንዲሆን ጠየቀ

ከሰሞኑ ታዛቢዎች በተገኙበት ከመንግስት ጋር ውይይት እንዳደረገ እና ለድርድር ዝግጁ እንደሆነ የገለፀው በእስክንድር ነጋ የሚመራው የፋኖ ክንፍ ድርድሩ በውጭ ሀገራት እንዲሆን እየጠየቀ መሆኑ ታውቋል።

የመሠረት ሚድያ ምንጮች እንደተናገሩት ታጣቂ ክንፉ ድርድሩ በአውሮፓ አልያም በአሜሪካ እንዲደረግ ቅድመ ሁኔታ አስቀምጧል።

መንግስት በዋናነት በእስክንድር ከሚመራው የፋኖ ክንፍ  ጋር በቅርቡ በቴክኒክ ኮሚቴ ደረጃ እንደተወያየ እስክንድር ከኢትዮ 360 ጋር ባደረገው ቃለ መጠይቅ ገልፆ ነበር። አክሎም በድርድሩ ላይ የኢጋድ፣ የአውሮፓ ህብረት፣ የአፍሪካ ህብረት እና የአሜሪካ ተወካዮች መገኘታቸውን ገልፆ ነበር።

በውይይቱ ላይ በፋኖ ክንፉ በኩል የተነሱ ነጥቦች መከላከያ አካባቢውን በግዜያዊነትም ቢሆን ለቆ መውጣት፣ ክልሉን ማስተዳደር፣ በፌደራል መንግስቱ በስልጣን መወከል፣ የድሮን ጥቃት ማቆም፣ ለተጎዳው ህዝብ ለህይወት ሳይቀር ካሳ መክፈል እና የመሳሰሉት ናቸው ተብሏል።

በመንግስት በኩል ደግሞ ትጥቅ በመፍታት ወደ ማሰልጠኛ መግባት፣ ጎጃም አካባቢ ላይ ያለውን ነገር ማስተካከል፣ በየከተማው ያለውን አደረጃጀት መረጃ መቀበል፣ ተጠያቂ የሚሆኑ አባላቱን አሳልፎ መስጠት እንዲሁም በምክክር ኮሚሽኑ ውስጥ መካተት ናቸው ተብሏል።

"በመንግስት ዝግ ስብሰባ ላይ ሲያጨቃጭቅ የነበረው የነእስክንድር ክንፍ አቅም ጉዳይ ሲሆን ግምገማውም በሀገር ውስጥና በውጭ ተቀባይነትን ለማግኘት መነጋገሩ እንደ  አማራጭ ተወስዷል" ያሉን ጉዳዩን በቅርበት የሚያውቁ ምንጫችን ሸዋ ላይ ድርጅቱ የተሻለ አቅም እንዳለው፣ ነገር ግን ጎጃም ላይ የለም የሚባል ደረጃ ላይ እንደደረሰ መረጃ ቀርቦ ንግግር ተደርጎበታል ብለዋል።

"ቢያንስ ሸዋን ማቃለሉ እንደ ጥሩ እድል በመታየቱ እና የድርድር ዝርዝር መረጃም የሚቀበሉ አለም አቀፍ ተቋማትም በመንግስት የንግግሩ ቦታ ስለተጓጓዙ ውይይቱ ተደርጓል" በማለት ሂደቱን አስረድተዋል።

"ነገር ግን አሳሳቢው ጉዳይ አሁንም ልክ እንደነ ጃል ሰኒ እንዳይሆን ነው፣ ሙሉ ሰላም ለማምጣት የተወሰነ ቡድን ሳይሆን ሁሉንም አካታች መሆን አለበት" ያሉን ደግሞ በጉዳዩ ዙርያ አስተያየት የሰጡን ተንታኝ ናቸው።

"መንግስት ነገሮችን ያቀሉልኛል ብሎ እየሄደበት ያለው ይህ ነው። ሁሉም ወደ ንግግሩ መግባት አለበት፣ አልያ እንደ  ኦሮምያ አይነት ሁኔታ ይፈጠራል፣ ይባስ ብሎም በቀረው ፋኖ ታጣቂ እና በመንግስት መካከል የሚኖረው ሁኔታ ይባስ ሊካረር ይችላል" በማለት ለሚድያችን ተናግረዋል።

Via መሠረት ሚዲያ
#ዳጉ_ጆርናል

ከ340 ሚሊየን ብር በላይ ወጪ የተደረገበት  ማርህይወት የእናቶችና ህፃናት ልዩ የህክምና ማዕከል በይፋ ተመረቀ

ማርህይወት የእናቶች እና ህጻናት ልዩ የህከምና ማዕከል አገልግሎቱን በተገቢው መንገድ ለመስጠት እንዲያስችለው እራሱ ባስገነባው ባለ 5 ወለል ሀንጻ ላይ እንዲሁም ልምድ ባካበቱ ከ10 በላይ ስፔሻሊስት እና ሰብ ስፔሻሊስት ሃኪሞችን በመያዝ ደረጃውን በጠበቀ መልኩ አገልግሎት እየሰጠ እንደሚገኝ የምርቃት መርሐግብሩን አስመልክቶ የማርህይወት የእናቶች እና ህጻናት ልዩ የህከምና ማዕከል ዋና ስራ አስኪያጅ ባለቤት አቶ ሀብታሙ አሰፋ በሰጡት ጋዜጣዊ መግለጫ ላይ ገልጸዋል።

ከፍተኛ የህክምና ባለሞያዎችን ጨምሮ በቋሚና በጊዜያዊነት ከ90 በላይ ለሚሆኑ ሰዎች የስራ እድል የፈጠረው ማርህይወት የእናቶች እና ህጻናት ልዩ የህከምና ማዕከል በውስጡ እጅግ ዘመናዊ የቀዶ ሀክምና ክፍሎች፣ እናቶች እና ህጻናት ተኝተው የሚታከሙበት መደበኛ እና ቪአይፒ ክፍሎች፣ አርተፊሻል መተንፈሻ ማሽን ፣ የጨቅላ ህጻናት ጽኑ ህሙማን ክፍልን ጨምሮ እጅግ ዘመናዊ አልትራሳውንድ ፣ ኤክስ ኤሪ እና የተሟላ የላቦራቶሪ ክፍሎችን የያዘ ማዕከል እንደሆነደግሞ የገለጹት የማዕከሉ ማኔጂንግ ዳይሬክተር ዶክተር ዳግማዊ እዝራ ተናግረዋል።

ስራ ከጀመረ ከጥቅምት 2017ዓ.ም ጀምሮ እስካሁን ከ 750 በላይ ታካሚዎችን ያስተናገደው የህክምና ማዕከሉ  በቀጣይ አንድ አመት ውስጥ የተራቀቀ የመካንነት ህክምና እና ላፓራስኮፒ ወይም በካሜራ የታገዙ ቀዶ ህክምናዎችን ለመጀመር የታቀደ ሲሆን ሙሉ በሙሉ የተፈጥሮ ጸሀይ ኢነርጂን በመጠቀም ከአየር ብክለት የጸዳ 24 ሰዓት የማይቋረጥ የኤሌክትሪክ ሀይል ያለው ሲሆን በተመሳሳይ ደግሞ ራሱ በስቆፈረው የከርሰ ምድር ውሃ ንጽህናው የተጠበቀ ተቋም ለመፍጠር ችሏል።

በምረቃው መርሐግብር ላይ የአዲስ አበባ ጤና ቢሮ ኃላፊ ዶክተር ዮሐንስ ጫላን ጨምሮ ከፍተኛ የመንግስት የስራ ኃላፊዎ ሌሎችም ጥሪ የተደረገላቸው እንግዶች ተገኝተዋል።

በሚሊዮን ሙሴ
#ዳጉ_ጆርናል