Addis Admass

የአሜሪካ ትምህርት ዲፓርትመንት 1 ሺ 300 ሰራተኞችን አባረረ

• 60 ዩኒቨርስቲዎች በመብት ጥሰት ወንጀል ምርመራ እየተደረገባቸው ነው



የአሜሪካ የትምህርት ዲፓርትመንት 1ሺ 300 ሰራተኞቹን በማባረር የሰው ሃይሉን በ50 በመቶ ገደማ መቀነሱን አስታወቀ፡፡ የትራምፕ አስተዳደር አዲሷ የትምህርት ዲፓርትመንት ሃላፊ ሊንዳ ማክማዎን፣ "የአሜሪካን የትምህርት ሥርዓት ወደ ታላቅነቱ ለመመለስ ጉልህ እርምጃ ነው" ብለውታል፤ የሰው ሃይል ቅነሳውን፡፡

የትምህርት ዲፓርትመንት ሃላፊዋ ስለጉዳዩ በx ገጻቸው ባሰፈሩት መረጃ፤ "የሰው ሃይል ቅነሳው ለውጤታማነት፣ ለተጠያቂነትና ሃብቶች እጅጉን አስፈላጊ ወደሆኑበት ቦታ መመራታቸውን ለማረጋገጥ ያለንን ቁርጠኝነት ያንፀባርቃል፡- ለተማሪዎች፣ ለወላጆችና ለአስተማሪዎች።" ብለዋል፡፡

አክለውም፤ "የትጉህ የመንግሥት ሰራተኞችን ሥራና ለዲፓርትመንቱ ያበረከቱትን አስተዋፅዖ አደንቃለሁ። እርምጃው የአሜሪካ የትምህርት ሥርዓት ታላቅነትን ለመመለስ ጉልህ እርምጃ ነው።" ብለዋል፡፡


ዘ ጋርዲያን እንደዘገበው፤ የትምህርት ዲፓርትንቱ በቅርቡ ካደረገው የሠራተኛ ቅነሳ በኋላ፣ የሰው ሃይሉ ከቀድሞው 4ሺ100 ሰራተኞች ወደ 50 በመቶ ገደማ የሚቀንስ ይሆናል፡፡ የዲፓርትመንቱ መረጃ እንደሚጠቁመው፤ ባለፉት 7 ሳምንታት ተጨማሪ 572 ሰራተኞች 'በፈቃደኝነት የመልቀቂያ እድሎችንና ጡረታን' ተቀብለዋል፡፡.


ይህ በእንዲህ እንዳለ፣ የአሜሪካ ትምህርት ዲፓርትመንት፣ 60 የአገሪቱ ዩኒቨርሲቲዎች. የሲቪል መብት ጥሰት ወንጀል ምርመራ እየተካሄደባቸው ስለመሆኑ ከትላንት በስቲያ ሰኞ አስታውቋል።


የትራምፕ አስተዳደር እስራኤል በጋዛ ላይ የምታደርገውን ጦርነት በመቃወም የሚካሄዱ ሰልፎችን በአይሁድ ተማሪዎች ላይ ያነጣጠረ “ፀረ-ሴማዊ ትንኮሳና መድልዎ” ሲል ፈርጇል።

ትራምፕ 80ሺ ዶላር የሚያወጣ አዲስ ቴስላ ገዙ

ለኤለን መስክ ያላቸውን ድጋፍ ለማሳየት ነው ተብሏል

በቴስላ ላይ አድማና ተቃውሞ የሚያደርጉትን ነቅፈዋል



የአሜሪካው ፕሬዚዳንት ዶናልድ ትራምፕ፣ የኤሌክትሪክ መኪና አምራች ኩባንያ (ቴስላ) መሥራች ለሆነው ኢለን መስክ ድጋፋቸውን ለማሳየት፣ አዲስ ብራንድ ቴስላ እንደሚገዙ ከትላንት በስቲያ ሰኞ ቃል ገብተው ነበር፡፡ በቃላቸው መሰረትም በትላንትናው ዕለት 80 ሺ ዶላር የሚያወጣ (10 ሚ. ብር ገደማ) አዲስ ቀይ ቴስላ ሸምተዋል፡፡

ትራምፕ በዋይት ሃውስ በርካታ ቴስላ መኪኖች ቀርበውላቸው ከመስክ ጋር ሆነው ሲያማርጡና መኪና ውስጥ እየገቡ ሲሞክሩ የታዩ ሲሆን፤ "ቴስላ ቆንጆ መኪና ነው" ሲሉ አድናቆታቸውን ገልጸዋል፡፡

መስክ በትራምፕ አስተዳደር አዲስ የተቋቋመውን የመንግስት ውጤታማነት ዲፓርትመንት (DOGE) ለመምራት በፕሬዚዳንቱ መሾሙ የሚታወቅ ሲሆን፤ የመንግስት መ/ቤቶችን ወጪና ብክነት በመቀነስ ውጤታማነትን ለማረጋገጥ ሠራተኞችን መቀነስን ጨምሮ ሌሎች እርምጃዎችን እየወሰደ ይገኛል፡፡ በርካታ "ግራ ዘመም" ዲሞክራቶች ግን በፕሬዚዳንት ትራምፕና በመስክ እየተወሰደ ያለውን እርምጃ ክፉኛ ይቃወሙታል፡፡


ትራምፕ የመስክ ኩባንያ የሚያመርተውን ቴስላ መኪና የገዙትም በአሜሪካ በቴስላ ተሽከርካሪዎች ላይ ተቃውሞ መነሳቱንና የኩባንያው የአክስዮን ዋጋ መቀነሱን ተከትሎ ነው።

ባለፈው ሳምንት ቁጥራቸው 350 ገደማ የሚሆኑ ተቃዋሚዎች፣ በኦሪጎን ፖርትላንድ በሚገኘው የቴስላ የኤሌክትሪክ መኪና መሸጫ ደጃፍ ላይ ተቃውሞ ያሰሙ ሲሆን፤ በተያዘው መጋቢት ወር መጀመሪያ ደግሞ ኒውዮርክ በሚገኘው የቴስላ መሸጫ ቢሮ ደጃፍ ላይ በተከሰተው አመጽ የተሞላበት ተቃውሞ ዘጠኝ ሰዎች ለእስር ተዳርገዋል፡፡


የቢሊየነሩን ቴስላ ኩባንያ ለማክሰርና ለመጉዳት በአክራሪ ግራ ዘመም ፖለቲከኞች የሚደረገውን የአድማ ዘመቻ "ህገ ወጥ" ሲሉ ትራምፕ ነቅፈውታል፡፡ የተቃውሞ እንቅስቃሴውን ለመቀልበስና ለመስክ ድጋፋቸውን ለማሳየትም ነው 80 ሺ ዶላር አውጥተው "ብራንድ ኒው" ቴስላ የገዙት፡፡

አዲስ ለገዙት ቴስላ አውቶሞቢል ቼክ እንደሚጽፉ ለጋዜጠኞች የተናገሩት ትራምፕ፤ ምንም ዓይነት የዋጋ ቅናሽ እንዲደረግላቸው እንደማይፈልጉ ተናግረዋል፡፡ ከረዥም ጊዜ ጀምሮ መኪና እንዳያሽከረክሩ በመከልከላቸው የገዙትን ቴስላ ራሳቸው እንደማይነዱት የጠቆሙት ትራምፕ፤ ሠራተኞቻቸው እንዲጠቀሙበት በኋይት ሃውስ ውስጥ እንደሚተዉት ጠቁመዋል፡፡

እርሳቸው የቴስላን ምርት መግዛታቸው፣ የቴስላ መኪናን ሽያጭና የአክስዮን ዋጋውን እንደሚያሳድገውም ትራምፕ ተስፋቸውን ገልጸዋል፡፡

አሜሪካውያን ደጋፊዎቻቸውም፣ ዘመናዊ የኤሌክትሪክ መኪና የሆነውን ቴስላን በመግዛት ለቢሊየነሩ ኤለን መስክ ድጋፋቸውን እንዲያሳዩ ፕሬዚዳንቱ ጥሪ አቅርበዋል፡፡

ትራምፕ አዲስ ቴስላ እንደሚገዙ ቃል መግባታቸውን ተከትሎ፣ ወደ ሥልጣን ከመጡ ለመጀመሪያ ጊዜ የቴስላ የአክስዮን ዋጋ ትላንት ማክሰኞ፣ በ4 በመቶ ገደማ መጨመሩን አሶሼትድ ፕሬስ ዘግቧል፡፡

"መስክ አሜሪካን ዳግም ታላቅ ለማድረግ የተጀመረውን ጥረት በዕውቀቱና ክህሎቱ በማገዙ ምክንያት ለምንድን ነው የሚቀጣው?" ሲሉ የሞገቱት ትራምፕ፤ "መስክ ለሀገሪቱ ድንቅ ሥራ እየሰራ ነው" ሲሉ አሞግሰውታል፡፡

የኢትዮጵያ የሃይማኖት ተቋማት ጉባኤ ዛሬ የሰጠው መግለጫ

" ... አንዳንድ የኦርቶዶክስ ክርስትና አማኝ ነን የሚሉ ግለሰቦች፣ የእስልምና ሃይማኖት ነቢይ በሆኑት በነቢዩ መሐመድ (የአላህ እዝነትና ሰላም በእሳቸው ላይ ይሁንና) ላይ ድፍረት የተሞላበት ክብረ ነክና ጸያፍ ንግግር ሲያደርጉ ታይተዋል፡፡ ይህም ሙስሊሙን ወገን ብቻ ሳይሆን ሰላም ወዳዱን ወገን ሁሉ አሳዝኗል፡፡

ጉባኤችንም ይህ ዓይነቱ ኢ-ሥነምግባራዊና ሕገ ወጥ ተግባር የትኛውንም የሃይማኖት ተቋም የማይወክል፣ ይልቁንም የሚወገዝ ተግባር መሆኑን ለመግለጽ ይወዳል፡፡

ከዚሁ ጋር በተያያዘም አንዳንድ የኦርቶዶክስ አማኝ ነን የሚሉ ወንድሞችና እህቶች፤ የግለሰቡን ሕገ-ወጥ ተግባር ተቋማዊ ለማድረግ የሚያደርጉትን እንቅስቃሴ እንዲያጤኑና ግለሰብንና ተቋምን እንዲለዩ እንመክራለን፡፡

በአንፃሩ አንዳንድ ሙስሊም ነን የሚሉ ግለሰቦች፣ ተደፈርን በሚል ስሜት የክርስትና አስተምህሮንና የኢየሱስ ክርስቶስን ክብር የሚነቅፍና የሚያጠለሽ፣ መላውን ክርስቲያን በሚያዋርድ መልኩ ምላሽ ሲሰጡና ድርጊቱን በፈፀመው ግለሰብ ላይ የደቦ ፍርድ ሲያስተላልፉ ይታያሉ፡፡

ይህም ሕገ-ወጥነትን ከማስፋፋት ባለፈ ጥፋትን በሌላ ጥፋት ማረም ፈጽሞ የማይቻል መሆኑን ተገንዝበው፣ ከድርጊታቸው በመታረም፣ የሕግ የበላይነትን እንዲያስቀድሙ ጉባኤያችን በአጽንኦት ይመክራል፡፡

በየትኛውም አካል የተፈፀሙትና የሚፈፀሙት ይህን መሠል ሕገ-ወጥ ተግባራት በሁሉም ሃይማኖቶች አስተምህሮ ተቀባይነት የሌላቸው ብቻ ሳይሆን፣ የሚወገዙ ተግባራት መሆናቸውን ጉባኤያችን እያስገነዘበ፣ ድርጊቱ በወንጀል የሚስጠይቅ ስለመሆኑም ለማስታወስ ይወዳል፡፡

ሀገራችን ኢትዮጵያ የብዝኃ ሀይማኖት መገኛና መኖሪያ ከመሆኗ አንፃር የኢትዮጵያ የሃይማኖት ተቋማት ጉባኤ የትኛውንም ዓይነት የሃይማኖት ተቋማትን፣ አስተምህሯቸውንና መገለጫዎቻቸውን የሚያንቋሽሹና የሚያዋርዱ ንግግሮችንም ሆነ ተግባራትን በጽኑ ያወግዛል። "⬇️⬇️

ሻል ሲል በታተመበት ቀን 4 ኪሎ ጆሊ ባር ለተወሰነ ደቂቃ ተከራይቼ ማንበብ ጀመርኩ። አከራዬ ሰውዬ ቦቸራ ይባል ነበር፣ ባለውለታዬ ነው፤ አንዳንዴ ሌላ ጊዜ ትከፍላለህ ይለኝና ያልፈኝ ነበር።

በጣም ሻል ሲል አዲስ አድማስን እየገዛሁ ማንበብ ጀመርኩ። አዲስ አድማስን ማንበብ ሌሎች የህይወት ድርጊቶቼን ደማቅ አድርጎልኛል።

ለምሳሌ፡- አንድ ቦታ፣ ቤት ወይም ከቤት ውጪ ለረጅም ሰዓት መቆየት አሰልቺ ነው። የሳምንቱን አዲስ አድማስ ይዤ በነበርኩበት ሁሉ ግን አስደሳች ጊዜ አሳልፍ ነበር።

የሳምንቱን መረጃ ይዤ ከሰዎች ጋር አፌን ሞልቼም እከራከር ነበር። ማሳረጊያ ማጣቀሻዬ "አዲስ አድማስ ላይ ተፅፏል" የሚል ነበር። አዲስ አድማስ፤ መፎከሪያችን ነበረች።

በጣም በጣም ሻል ሲል፣ የአዲስ አድማስ ጋዜጣ ሰብሳቢ (Collector) ለመሆንም ታድዬ ነበር።

በኋላም ፅሁፍ መላክ ጀምሬ ተለማማጅ ዓምደኛ ለመሆንም ችዬአለሁ። እስከ 2000 ዓ.ም. ድረስ 3 ፅሁፎቼ በአዲስ አድማስ ታትመዋል። የበለጠ ፍቅር ያሳድራል።

ዛሬ ጊዜው ተቀይሮ ስልካችን ውስጥ ብንደበቅም፣ አዲስ አድማስ ጋዜጣ የሁልጊዜ የልብ ወዳጃችን ናት።
እናመሰግናለን። መልካም 25ኛ ዓመት!

ብርሃኑ /Abt/