Condominuim Market in Addis Ababa

ብቁና ንቁ የነበሩ የ1997 የጋራ መኖሪያ ቤት ተመዝጋቢዎች በ14ኛው ዙር ዕጣ ሙሉ በሙሉ ተስተናግደዋል፡፡

➢ በ1997 ዓ.ም የቤት ባለቤት ለመሆን ተመዝግበው የነበሩ የከተማችን ነዋሪዎች በ2005 ዓ.ም በተካሄደው ዳግም ምዝገባ ወቅት ነባር የሚል መለያ ተሰጥቷቸው የነበረ ሲሆን ዳግም ከተመዘገቡና ውላቸውን ካደሱ ጊዜ ጀምሮ ሳያቋርጡ ሲቆጥቡ የነበሩ ናቸው፡፡   

➢ እነዚህ ተመዝጋቢዎች ቀደም ብለው የተመዘገቡ እንደመሆናቸው መጠን በ20/80 የቤት ልማት መርሃ ግብር ተገንብተው ለእጣ ከሚተላለፉት ቤቶች ውስጥ የጋራ መኖሪያና ንግድ ቤቶች ለተጠቃሚዎች ለማስተላለፍ በወጣው መመርያ ቁጥር 3/2011 መሰረት በነበሩት ዙሮች ቅድሚያ እየተሰጣቸው ሙሉ በሙሉ ተስተናግደዋል፡፡

➢ በዚሁ አግባብ በ2005 ዳግም ምዝገባ ያደረጉ ከ140 ሺህ በላይ ተመዝጋቢዎች ሳያቆራርጡ እስከ እጣ ማውጫ ቀን ድረስ እየቆጠቡ ለነበሩት እስከ 13ኛ ዙር በነበረው የጋራ መኖርያ ቤቶች እጣ ሲሰተናገዱ ቆይተዋል፡፡

➢ ህዳር 6 ቀን 2015 ዓ.ም ለ14ኛ ዙር በተላለፉት የ20/80 የጋራ መኖርያ ቤቶች ላይም የ1997 ተመዝጋቢዎች ቅድሚያ ተሰጥቷቸው ተስተናግደዋል፡፡

➢ በዚህም በ14ኛ ዙር እጣ ዝግጅት በሚደረግበት ወቅት ንቁና ብቁ የነበሩ ከ43ሺህ ያልበለጡ ቆጣቢዎች ቅድሚያ በመስጠት ሙሉ በሙሉ እንዲሰተናገዱ ተደርጓል፡፡

➢ በእጣ ማውጫ ጊዜ በመረጃ ቋት ውስጥ የቀሩት የ1997 ተመዝጋቢዎች በጊዜው ንቁና ብቁ ያልነበሩ ናቸው፡፡
➢ እነዚህና ሌሎች ቤት ፈላጊዎች በከተማ አስተዳደሩ እየተተገበሩ በሚገኙ የተለያዩ የቤት የልማት አማራጮች ተጠቃሚ እየሆኑ ይገኛሉ፡፡

➢ ከዚህ በተጨማሪም በአሁኑ ወቅት በከተማዋ እየተካሄዱ በሚገኙ የልማት ስራዎች ምክንያት ከመኖርያ አካባቢያቸው ለሚነሱ የልማት ተነሽዎች በአዲስ አበባ ቤቶች ልማትና አስተዳደር ቢሮ የወጣው በጋራ መኖሪያና ንግድ ቤቶች ማስተላለፍ መመርያ ቁጥር 3/2011 አንቀጽ 23 በተገለጸው መሰረት በከተማ መልሶ ማልማት ምክንያት ለሚነሱ ነዋሪዎች ምትክ ቤት ለመመደብ በተቀመጠው አሰራር መሰረት እየተስተናገዱ ይገኛሉ፡፡

➢ እነዚህ በልማት ምክንያት የሚነሱ ነዋሪዎች ምትክ ቤት የሚሰጣቸው ከላይ በተጠቀሰው መመርያ ላይ በሰፈረው መሰረት በከተማ አስተዳደሩ ከሚገነቡ የጋራ መኖርያ ቤቶች ውስጥ ለልማት ተነሺ በሚል በመጠባበቂያ ከተያዙት ቤቶች እንጂ በመደበኛነት ለተመዝጋቢዎች ከሚተላለፉ ቤቶች አይደለም፡፡

➢ የልማት ተነሺ ሆነው የጋራ መኖርያ ቤት ምትክ የወሰዱና በ20/80 ወይም በ40/60 የቤት ልማት ፕሮግራሞች ተመዝጋቢ የሆኑ ነዋሪዎች ከምዝገባ ቋት ውስጥ የሚቀነሱ ይሆናል፡፡

Condoaddis.com

ለመረጃ ያህል ስለጋራ መኖሪያ ቤቶች

በአዲስ አበባ ቤቶች ልማት እና አስተዳደር ቢሮ በየጊዜው እየጨመረ የመጣውን የነዋሪዎች የመኖሪያ ቤት ጥያቄ እና ፍላጎት ለመመለስ የተለያዩ የቤት ልማት ፕሮግራሞችን በመዘርጋት የተለያየ የገቢ መጠን ያላቸውን የህብረተሰብ ክፍሎች የመክፈል አቅም ያገናዘበ  የመኖሪያ ቤት በመገንባት ዜጎችን ተጠቃሚ እያደረገ ይገኛል፡፡
በዚህም መሰረት፡-

👉  በመንግስት አስተባባሪነት በ10/90፣በ20/80 እና በ40/60 የጋራ መኖርያ ቤቶችን ተገንብተው  በ14 ዙሮች ከ300 ሺህ በላይ ቤቶች ለተጠቃሚዎች ተላልፈዋል፤

👉 ቤቶች የሚገነቡት ከባንክ በተገኘ የቦንድ ብድር ሲሆን ተቋሙ ቀደም ሲል የነበረበትን 56 ቢሊዮን ብር እዳ ለማቃለል በተደረገ ጥረት ከ36 ቢሊየን ብር በላይ ተመላሽ ተደርጓል፤   

👉 ተመዝጋቢዎች የሚቆጥቡት ብር ቤቱ ሲደርሳቸው የሚከፍሉት እንዳይቸገሩ እንጂ ቤቶችን ለመገንባት የሚውል አይደለም፤

👉 እያደገ የመጣውን የመኖርያ ቤት ችግር ለመፍታት ሌሎች ተጨማሪ አማራጮች ተቀይሰው መተግበር ጀምረዋል፤

👉  ከ5ሺህ ቤቶች በላይ በተገጣጣሚ ቴክኖሎጂ እየተገነቡ ይገኛሉ፤

👉  የቤት አቅርቦቱን ለማስፋት በተደረገ ጥረት 60ሺ ቤቶች በግሉ ባለሀብት እንዲለሙ ተደርጓል፤

👉  በመንግስት እና በግል ዘርፍ አጋርነት ከ120 ሺ በላይ ቤቶች ግንባታ ስራ  ተጀምሯል፤ 

👉  በበጎ ፈቃድ ባለሀብቶችንና የህብረተሰብ ክፍሎችን በማሳተፍ ከ35ሺ በላይ ቤቶችን በመንግስት እና የግል ባለሀብቱን በማስተባበር ተገንብቶ በዝቅተኛ ኑሮ ላሉ የከተማዋ ነዋሪዎች ተላልፈዋል፤

👉 ፍላጎት እና አቅም ያላቸውን በ20/80 እና በ40/60 ተመዝግበው ሲጠባበቁ የነበሩ 4,318 ነዋሪዎችን በ54 ማህበራት በማደራጀት ወደ ግንባታ እንዲገቡ ተደርጓል፤  

👉  በተመጣጣኝ ዋጋ ለኪራይ የሚቀርቡ ቤቶችንም ለመገንባት የሚደረገው ጥረት ተጠናክሮ ቀጥሏል፡፡ 

👉 ተመዝግበው የቤት ባለቤት ለመሆን የሚጠባበቁ ነዋሪዎችን በአጭር ጊዜ የቤት ባለቤት ለማድረግ የቤት ልማት አማራጮች በማስፋትና በመተግበር ከምን ጊዜውም በላይ እየተጋ ይገኛል፡፡
 
የአዲስ አበባ ቤቶች ልማት እና አስተዳደር ቢሮ
 @Etstocks