Amhara Police Commission

"ምስራቅ ዕዝ በጎጃምና በደቡብ ጎንደር የፅንፈኛውን ሃይል አከርካሪ በመስበር አስተማማኝ ሰላም አሥፍኗል!" ሌተናል ጄኔራል መሃመድ ተሰማ

ምስራቅ ዕዝ አገራዊ ተልዕኮውን አንግቦ በአማራ ክልል ፅንፈኛውን ሽባ በማድረግ ሰላም እያስፈነ ያለና በኢትዮጵያ ምስራቅ ቀጠናም የሸኔን እና የአልሸባብን ሴራ በማክሸፍ ግዳጁን በውጤት እየፈፀመ እንደሚገኝ የምስራቅ ዕዝ ዋና አዛዥ ሌተናል ጄኔራል መሐመድ ተሠማ አረጋግጠዋል።

የምስራቅ ዕዝ ዋና አዛዥ ፣ሰሞኑን በባህርዳር ከተማ ከዕዝ ኮማንድ ፣ ከኮር አዛዦች ፣ከክፍለጦር አመራሮች እና ስታፍ ከፍተኛ መኮንኖች ጋር በነበረ መድረክ ላይ እንደተናገሩት ፣ ዕዙ የፅንፈኛውን አከርካሪ በመስበር በክልሉ ተደቅኖ የነበረውን አገር የማፍረስ ተግባር ቀልብሶታል።

ዕዙ በአሁኑ ሰዓት በፅንፈኛው ላይ ከፍተኛ ምት በማሳረፍ ሰብዓዊና ማቴሪያላዊ ኪሳራ በማድረስ በክልሉ ህግን የማስከበር ተልዕኮውን በውጤት እየተወጣ ይገኛልም ሲሉ ገልፀዋል።

ዕዙ በፈፀማቸው ገድሎች የፅንፈኛውን ሴልና ሃብት በመያዝ ፣ የመስተዳድር አካላት እግር አንዲተክሉ በማድረግ የፀጥታ ሃይሉን በማሰልጠንና በማደረጀት ጥሩ ውጤት አስመዝግበናል ብለዋል።

ጄኔራል መኮንኑ የፀረ-ሽምቅ የውጊያ ስልቶችን በመጠቀም ፅንፈኛውን ሃይል አሰላለፍ በማዛባት ቆሞ የመዋጋት አቅሙን አሳጥተነዋል ነው ያሉት።

ምስራቅ ዕዝ በአገሪቱ ምስራቃዊ አካባቢዎች ላይም ተሰማርቶ የሸኔን ድርጊት በንቃት እየተከታተለና በቦርደር አካባቢዎችም አልሸባብ ሾልኮ ወደ ዉስጥ እንዳይገባ በማድረግ ግዳጁን እየተወጣ መሆኑን ጠቁመው በቀጠናው ህገ-ወጥ የሰዎችና የጦር መሳሪያ ዝውውርን በመቆጣጠር አመርቂ ተግባራትን ፈፅሟል።

አመራሩ ሠራዊቱን በሰላም ጊዜ በማዘጋጀት፣ የዕለት ከዕለት ግዳጁን ለሠራዊት ስነ-ልቦና ግንባታ በመጠቀም ለቀጣይ ግዳጅ ሠራዊቱን የበለጠ በማዘጋጀት ሃላፊነቱን መወጣት እንደሚገባውም አሳስበዋል።

አመራሩ ያልተቋረጠ የሠራዊት ስነ-ልቦና ግንባታ በማድረግ ሰራዊቱ አካላዊ፣ ቴክኒካዊና ሙያዊ ብቃቶችን በማጎልበት ከሁኔታዎች ጋር ተጣጣፊ በመሆን ድልን የበለጠ ማጎልበት እንደሚገባ ማስገንዘባቸውን መከላከያ ሰራዊት በማህበራዊ ትስስር ገጹ አስነብቧል።