Amhara Police Commission

ለሰላም ግንባታ የኅብረተሰቡ ሚና” በሚል መሪ ሃሳብ በደሴ ከተማ በክ/ከተማ ደረጃ የመንግሥት ሰራተኞች የሰላም ዉይይት ተካሄደ።

በደሴ ከተማ አስተዳደር በክ/ከተማ ደረጃ የሚገኙ የመንግሥት ሰራተኞች “ለሰላም ግንባታ የኅብረተሰቡ ሚና” በሚል ሃሳብ የሰላም ዉይይት አካሂደዋል።

ሰላምን ለማፅናት በተለይም የመንግሥት ሰራተኛዉ ማኅብረሰብ ስለ ሰላም ማወቅና የሰላም ግንባታን ባህል ማድረግ መቻል እንዳለበት የተገለፀ ሲሆን የሰላም ባህል በውጫዊ ብዝኃነት ላይ የተመሰረተ ሰብዓዊነትና የአዲስ ሥልጣኔ ፍሬ ተደርጐ ሊታይ የሚገባው ተግባር መሆኑ ተወስቷል።

ደሴ ከተማ የሰላም ተምሳሌትነቷን ለማስጠበቅ፣ ለኑሮ ምቹና ተስማሚ እንድትሆን በማድረግና ከሰላም ሥራዉ ጎን ለጎን መንግሥት ሰራተኛዉ በመደበኛ የሥራ ገበታዉ ላይ በመገኘትና የአገልጋይነት መንፈስን በመላበስ ለኅብረተሰቡ የተቀላጠፈና የላቀ አገልግሎት መሥጠት እንዳለበት ተመላክቷል።

ሰላም የህልውና ጉዳይና የሀገር ዕድገት መሰረት በመሆኑ የመንግሥት ሰራተኞች እውነተኛ ሰላም ወዳድነታቸውን አጠናክረው እንደሚቀጥሉ ተናግረዋል።
መረጃ፦የደሴ ከተማ ፖሊስ ህዝብ ግንኙነት ነው።

በእስቴ ወረዳ ሕዝባዊ የሰላም ውይይት ተካሄደ።

በደቡብ ጎንደር ዞን እስቴ ወረዳ በዝጎራ፣ ደንጎልትና መካነ ኢየሱስ ቀበሌ ሕዝባዊ የሰላም ውይይት ተካሂዷል።

በሕዝባዊ ውይይቱ ስለ ሰላም፣ ልማትና መልካም አሥተዳደር በስፋት ተነስቷል። እየገጠመ ያለውን የሰላም ችግር ለመፍታት በሚያስችሉ ጉዳዮች ዙሪያ ውይይት ተደርጓል።

የእስቴ ወረዳ አሥተዳዳሪ ማንተፋርዶ ሞላ ሰላምን ማምጣት የሚችለው ራሱ ሕዝቡ ነው ብለዋል። ከደቡብ ጎንደር ዞን ኮሙዩኒኬሽን መምሪያ የተገኘው መረጃ እንደሚያመላክተው ለሰላም ሁላችንም የየድርሻችን እንወጣ ነው ያሉት። ሰላምን እንስበክ ለሰላምም እንሥራ ብለዋል ዋና አሥተዳደሪው በመልዕክታቸው።

የጸጥታ ተቋማት የውይይት መድረክ በደብረ ብርሃን ከተማ እየተካሄደ ነው።

የሰሜን ሸዋ ዞን እና የደብረ ብርሃን ከተማ አሥተዳደር የጸጥታ ተቋማት የ2017 በጀት ዓመት የስድስት ወራት ዕቅድ አፈጻጸም ግምገማ እና የቀጣይ የሥራ አቅጣጫዎች ላይ ትኩረቱን ያደረገ መድረክ በደብረ ብርሃን ከተማ እየተካሄደ ነው።

በመድረኩ ላይ የተገኙት በቢሮ ኀላፊ ደረጃ የአማራ ክልል ሰላም እና ጸጥታ ቢሮ አማካሪ ኮሎኔል ባምላኩ ዓባይ የጸጥታ ኃይሉ የክልሉን ሰላም ለማስፈን በርካታ ተግባራት መከናወናቸውን እና አመርቂ ውጤቶች መመዝገባቸውን ገልጸዋል። ችግሮችን በሰላም ለመፍታት መንግሥት ቁርጠኛ መኾኑንም ተናግረዋል።

ባለፉት የተግባር ሥራዎች ላይ የነበሩ ጥንካሬዎችን እና ክፍተቶችን የመለየት አና የማስተካከል ተግባር ይከወናል ነው ያሉት።

በመድረኩ የሰሜን ሸዋ ዞን ሁሉም የወረዳ፣ የከተማ አሥተዳደሮች እና ከደብረ ብርሃን ከተማ አሥተዳደር ሁሉም ክፍለ ከተሞች የተውጣጡ የጸጥታ መዋቅር ኀላፊዎች እና ባለሙያዎች እየተሳተፍ ነው።

የምስራቅ ጎጃም ዞን ሰላምና ፀጥታ መምሪያ የ6 ወር የሰላም ማስከበር ስራን በደጀን ወረዳ መገምገም ጀመረ።

መምሪያው ባለፉት 6 ወራት የፀጥታ ተቋማትን በማደራጀትና በማጠናከር በዞኑ በሚገኙ አካባቢዎች አጋጥሞ የነበረውን የፀጥታ ችግር በመቆጣጠር የህብረተሰቡን ሰላም ለማረጋገጥ በርካታ ተግባራትን ማከናወን መቻሉ ተገልጿል።

የምስራቅ ጎጃም ዞን ሰላምና ፀጥታ መምሪያ ኃላፊ አቶ አበባው በለጠ በውይይት መድረኩ መግቢያ ላይ እንደተናገሩት በዞኑ በሚገኙ ወረዳዎችና ከተማ አስተዳደሮች የሚገኘው የፀጥታ ኃይል በሙሉ ፍላጎትና ወኔ ራሱን አደራጅቶ በመንቀሳቀስ ከቁጥጥር ውጭ ሆነው የነበሩ አካባቢዎችን መልሶ በመቆጣጠርና አስተዳደር በመመስረት የህዝቡን ሰላም በማረጋገጥ የልማት ተጠቃሚ ለማድረግ የሰራው ስራ ለሌሎች አካባቢዎች አርዕያ ነበር ብለዋል።

የፀጥታ ኃይሉ ባለፉት 6 ወራት የነበሩ ጥንካሬዎችን የበለጠ በማጠናከርና የነበሩ ክፍተቶችን ለይቶ በመስራት ዞኑን የተረጋጋ ሰላም የሰፈነበት ለማድረግ በትኩረት ሊሰራ ይገባል ሲሉም አቶ አበባው አጽንኦት ሰጥተዋል ሲል የምስራቅ ጎጃም ዞን መንግስት ኮሙኒኬሽን ዘግቧል።

በወንጀል መከላከል ተግባር በርካታ ተግባራት መከናዎናቸውን ፖሊስ ገለፀ።

በክልሉ ከተፈጠረው የፀጥታ ችግር በኋላ ይፈፀሙ የነበሩ በርካታ የወንጀል ተግባራት አሁን ላይ መሻሻል ማሳየታቸውን በባህርዳር ከተማ አስተዳደር የ1ኛ ዋና ፖሊስ ጣቢያ የወንጀል መከላከል ክፍል ኀላፊ ረዳት ኢንስፔክተር መኮንን እንየው ተናግረዋል።

የፀጥታ ችግሩን ተንተርሶ ይፈፀሙ የነበሩ የእገታ፣ስርቆት፣ተኩስና ፍንዳታዎች፣ዝርፊያና ንጥቂያ፣የመንገድ መዝጋት፣የስራ መዝጋትና መሰል ድርጊቶች ማህበረሰባችንን እረፍት የነሱ ድርጊቶች ነበሩ ያሉት ረዳት ኢንስፔክተር መኮንን አሁን ላይ ከማህበረሰቡ ጋር በተደረገ ግልፅና ንቁ ተግባቦት ችግሮቹን በከፍተኛ ደረጃ ለመቀነስ ችለናል ብለዋል።

ፖሊስ የማህበረሰቡን ሰላም ለማስጠበቅ ከማህበረሰቡ ጋር በመነጋገር የተለያዩ የብሎክ አደረጃጀቶችን በመፍጠር አካባቢን የመጠበቅ ስራ እየተሰራ ነው።

ኃላፊው አክለውም ወንጀሎች የሚፈፀሙት ማህበረሰቡ ውስጥ በሚኖሩ አካላት የሚጎዱትም ማህበረሰቡን መሆኑ የተረዳው የከተማችን ነዋሪ ወንጀለኛን በማጋለጥም ሆነ በመከላከል ለፀጥታ ኀይሉ ድጋፍ እያደረገ ነው።በዚህም ወንጀልና ወንጀለኛን የቀነስንበት ጊዜ ላይ ነን ብለዋል።

የእገታና ንጥቂያ ወንጀሎች እንዲቀንሱም ከፀጥታ ኀይሉ ጥረት በተጨማሪ የአካባቢ ጥበቃ፣የሰፈር የውስጥ ለውስጥ አጥርና የማህበረሰቡ ንቁ ተሳትፎ ትልቁን ድርሻ ይይዛል ነው ያሉት ረዳት ኢንስፔክተር መኮንን እንየው።

የማህበረሰብ አቀፍ ወንጀል መከላከል ተግባር ወደስራ ገብቶ ወንጀልን ከዚህ የበለጠ ለመቆጣጠር ሁሉም የማህበረሰብ ከድጋፍ ለፀጥታ ኀይሉ ጋር ንቁና ጤናማ የሆነ ግንኙነት ሊኖው ይገባልም ሲሉ ኀላፊው መልዕክት አስተላልፈዋል።

የግለሰቦችን የቴሌግራም አድራሻ በተለያዬ ዘዴ በመጥለፍ በስማቸው ሲያጭበረብር የነበረው ግለሰብ በቁጥጥር ስር ውሏል።

በኮምቦልቻ ከተማ አስተዳደር በተደጋጋሚ ከተለያዩ ግለሰቦች ገንዘብ የሚያጭበረብሩ ተጠርጣሪዎችን በቁጥጥር ስር እያዋለ ለህግ እያቀረበ የሚገኘው የከተማው ፖሊስ ከሰሞኑ የግለሰቦችን የቴሌግራም አካውንትን በመጥለፍ የተቸገረ በማስመሰል ገንዘብ ጠይቆ በማስላክ ለግል ጥቅሙ ሊያውል የነበረው ተጠርጣሪ ሰፎኒያስ አደም ጥላሁ የተባለ ወጣትን በከተማ አስተዳደሩ የቢራሮ ክፍለ ከተማ ፖሊስ በቁጥጥር ስር አውሏል።

የቢራሮ ክፍለ ከተማ ፖሊስ አዛዥ ምክትል ኢንስፔክተር መሀመድ ይማም እንዳሉት ከሰሞኑ አንድ የግል ተበዳይ የቅርብ ቤተሰቡ የሆነች ልጅ በአስቸጋሪ ሁኔታ ውስጥ እንዳለችና ገንዘብ እንደሚያስፈልጋት በቴሌግራም አድራሻዋ 340 ሽህ ጠየቀችው ያለውን180 ሺህ ብር ከላከ በኋላ ሲያጣራ አድራሻዋ መጠለፍ ተረጋገጠ ብለዋል። በዚህ መነሻነት ፖሊስ ተከታትሎ ተጠርጣሪውን በቁጥጥር ስር አውሎ ምርመራ እያጣራ መሆኑን ገልፀው አሁን አሁን በቴክኖሎጂ የተደገፈ የማጭበርበር ስራዎች እየጨመሩ መሆናቸውን አንስተዋል።

ወንጀል ፈፃሚዎችን በቁጥጥር ስር በማዋል ሂደት ማህበረሰቡ ላደረገላቸው ጥቆማ ያመሰገኑት ም/ኢንስፔክር መሀመድ ይማም ወደ ፊትም ከፖሊስ ጎን እንዲቆም ጥሪ አቅርበዋል።

የአማራ ክልል ሰላምና ፀጥታ ቢሮ ምክትል ቢሮ ኃላፈ እሸቱ የሱፍ(ዶ/ር) በክልሉ የፀጥታ ኀይል የ6 ወር የስራ አፈፃፀምና የሪፎርም ስራዎች ዙሪያ የማጠቃለያ ሀሳብ በሰጡበት ወቅት ያነሷቸው አንኳር ነጥቦች፦

👉 የክልሉ የፀጥታ ኀይል ከመከላከያ ሰራዊትና ከፌደራል የፀጥታ ኀይሎች ጋር በመሆን በግማሽ ዓመቱ ውስጥ ጥቃቅን ክፍተቶች የነበሩ ቢሆንም በአመዛኙ ጥሩ ውጤቶችን አስመዝግቧል።

👉ለፀጥታ ኀይላችን አስፈላጊውን እና ተገቢውን የሎጀስቲክ አቅርቦትና የጥቅማጥቅም ጉዳይ ከግምት ውስጥ በማስገባት ለማሟላት ጥረቶች ተደርገዋል እየተደረጉም ይገኛሉ።

👉በየደረጃው ላሉ የፀጥታ አካላት በሰራዊቱ ውስጥ ያሉ ድክመቶችን እንዲያርሙ እና ጥንካሬዎችን እንዲያጠናክሩ ውይይቱ የሚቀጥል ይሆናል።

👉የተሳካ የህግ ማስከበር እንዲኖር በትብብር መስራት ይጠበቅብናል።

👉በሰላማዊ መንገድ እጂ የሰጡ ታጣቂዎችን ወደ ተሀድሶ ማሰልጠኛ ለማስገባት ልዩ ትኩረት ማድረግ አለብን።

👉በኦፕሬሽን ወቅት የሚያዙ ግለሰቦችን ሰብዓዊ መብት ባከበረ መልኩ ተገቢው ምርመራ ሊደረግ ይገባል።

"በውስጣችን ያለን ችግር ነቅሶ በማውጣት የተጠናከረ ሰራዊት መገንባት ለነገ የህግ ማስከበር ተልዕኳችን መሰረት ነው።"የአብክመ ፖሊስ ኮሚሽን ኮሚሽነር ደስየ ደጀን

ሰራዊቱ በሎጀስቲክም ሆነ በአቅም የተጠናከረ እንዲሆን አስፈላጊው ተግባር እየተከናወነ ነው ያሉት ኮሚሽነር ደስየ ደጀን በመካከላችን የሚስተዋሉ ትንንሽ ችግሮችን በመፍታት ለዘላቂ ግዳጅ መዘጋጀት ይገባል ብለዋል።

በግማሽ ዓመቱ ውስጥ በተለያዩ አካባቢዎች የተከናወኑ የህግ ማስከበር ስራዎች ጥሩ ውጤት የተመዘገበባቸው ናቸው፤ይሁን እንጂ የሚቀሩ ተግባራት ስላሉ በጠላት ስር የሚገኙ አካባቢዎችን ሙሉ ለሙሉ ነፃ ለማድረግ የእርስ በርስ ከቅንጂትን ከቆራጥነት ጋር አጣምሮ በመርህ ተግባራዊ በማድረግ መስራት ይጠበቅብናል ሲሉ አሳስበዋል።

ኮሚሽነር ደስየ አክለውም ሙያና ኃላፊነታችንን የሚመጥን ተግባር በመፈጸም ህዝባችን የሰላምና ልማት ተጠቃሚ ይሆን ዘንድ የህግ ማስከበር ተግባራችንን በተገቢው መንገድ መወጣት በየደረጃው የሚገኙ አመራርና አባላት ድርሻ ነው ብለዋል።

የሎጀስቲክ፣የስነ ምግባርና መሰል ችግሮች በአባላቱ ውስጥ የሚስተዋሉ ዋና ዋና ችግሮች መሆናቸው ከተወያዮቹ የተነሱ ሲሆን እነዚህንና የመሳሰሉ ችግሮችን ለመቅረፍ የታቻላቸውን እያደረጉ እንደሚገኙም ነው ኮሚሽነር ደስየ በምላሻቸው የገለፁት።

ወደ ሠረግ ሲሄዱ በተፈጠረ የትራፊክ አደጋ ጉዳት ደርሷል።

በአማራ ክልል በሰሜን ሸዋ ዞን ምንጃር ሸንኮራ ወረዳ ድሬ ቀበሌ ከተባለ ቦታ በጥር 18/2017 ዓ.ሞ አ/አ ታርጋ-03 -75745 የሆነ የጭነት መኪና ለሰርግ የሚሄዱ ሰወችን ጭኖ ከምንጃር ወደ ድሬ ቀበሌ እየሄደ እያለ ከቀኑ 8:00 ላይ ተሽከርካሪው በመገልበጡ አንድ ሰው ሲሞት 05 ሠው ላይ ከባድ ጉዳት 11 ሠው ላይ ቀላል ጉዳት በትራፊክ አደጋ በመድረሱ ከባድ ጉዳት የደረሠባቸው በአረርቲ ሆስፒታል አየታከሙ መሆናቸውን የወረዳው ፖሊስ መረጃውን አድርሶናል።
ጥር ወር የሠረግና የበዓል ወቅት ከመሆኑ በተጨማሪ አርሶ አደሩ ምርት ሠብስቦ የሚሸጥበት ወደ ተለያዩ ቦታ የሚንቀሳቀስበት ዘመድና ወዳጅ የሚጠይቅበት በመሆኑ የትራፊክ ፍሠቱም የሚባዛበት የጭነትም የህዝብ ተሽከርካሪዎች ላይ አላግባብ ሠው የሚጫንበት ነው።
በዚህ ምክንያት አደጋወች ከመቼውም ጊዜ በቁጥር ጨምረዋል ተበራክቷል በሠውና በንብረት ላይ ከወትሮው በተለየ አሠቃቂና አሰከፊ አደጋዎች ደረሰዋል። በአደጋዎቹ ምክንያት የብዙ ሠው ህይወት መጥፍት የሠው አካል መጉደል የንብረት ወድመት ደርሷል።

የአደጋወቹ መንስኤ የአሽከርካሪዎች የጥንቃቄ ጉድለትና ሀላፊነትን በአግባቡ አለመወጣት መዘናጋት በመሆኑ ሌሎች አሽከርካሪዎች ከተፈፀሙ አደጋወች ትምህርት በመውሠድ አስከፊ አደጋ እንዳይደረስ በመጠንቅና በማሽከርከር አደጋን በመከላከል የሠው ህይወትና ንብረትን ልንታደግና ልንጠብቅ ይገባል።

መረጃው፦ከሠሜን ሸዋ ዞን ፖሊስ መምሪያ የኮሚኒኬሽንና ሚዲያ ኀላፊ ነው።

ኮሩ የሰላም አማራጭ ባልተቀበሉ ፅንፈኞች ላይ እርምጃ ወስዷል።

አማራ ፖሊስ፦ጥር 18/2017 ዓ.ም

በሰሜን ጎጃም ዞን የምስራቅ ዕዝ ኮር ሰሞኑን ባደረገው ስምሪት የሰላም አማራጭ አልቀበልም ባሉ የፅንፈኛው ታጣቂዎች ላይ እርምጃ በመውሰድ በርካቶችን ሙት በማድረግ ትጥቆችንና ሎጅስቲክሳዊ ማቴሪያሎችን መማረክ ችሏል።

የፅንፈኛው አባላት በጎጅ ቆለላ ወረዳ በዋሽራ ቀበሌ አካባቢ በአራት አቅጣጫ የመሪያቸውን ደም ለመመለስ አስበው ትንኮሳ ቢሞክሩም ሰራዊታችን ባደረገው ፀረ-ማጥቃት እርምጃ በአራቱም አቅጣጫ የመጣውን ፅንፈኛ ሃይል መደምሰስ መቻሉን የምስራቅ ዕዝ ክፍለ ጦር አዛዥ ኮሎኔል አለሜ ታደለ ገልፀዋል፡፡

ኮሩ በሰሜን ጎጃም ዞንና ባህር ዳር ዙሪያ ግንደሎሚ፣ ጎንጂ ቆለላ ወረዳ ዋሽራ ቀበሌ ባደረጉት ስምሪት 41 የፅንፈኛው አባላትን በመደምሰስ፣ 30 ክላሽ፣ 21 ኋላ ቀር መሳሪያ፣ 02 የእጅ ቦምብ፣ 05 ትጥቅና የተለያዩ ወታደራዊ አልባሳት መማረክ ተችሏል።

ዘገባው-የኢፌዴሪ መከላከያ ሠራዊት ነው።

የ 85 ኛው የአገው ፈረሰኞች ማህበር ክብረ በዓል በሰላም እንዲከበር በቂ የቅድመ ዝግጅት ስራ መደረጉን የአዊ ብሄረሰብ አሰተዳደር ፖሊስ መምሪያ ኮማንደር እሱባለው መኮነን አስታወቁ።

ጥር 23/2017 ዓ.ም ከበዓል ጋር በተያያዘ ሊፈጠሩ የሚችሉ ወንጀሎችን ለመከላከልና ለመቆጣጠር ተገቢ የሆነ ቅድመ ዝግጅት መደረጉን የብሄረሰብ አስተዳደር ዞኑ ፖሊስ መምሪያ ኀላፊ ተናግረዋል።
የአገው ህዝብ ለሰላም ተባባሪ ነው የሚሉት ሀላፊው አሁንም በዓልን ምክንያት በማድረግ የሚከሰቱ ጥቃቅን ወንጀሎችን ህብረተሰቡ ከፀጥታ ሀይሉ ጋር ተቀናጅቶ በመስራት እንዲከላከል ጥሪ አቅርበዋል።
በበዓላት ወቅት፣የስርቆት፣የማጭበርበርና ሌሎችም ወንጀሎች እንዳይፈፀሙ ስራዎች እየተሰሩ ሲሆን ይህንን ክልከላ በመተላለፍ ወንጀል ከተፈፀመ ምርመራውን በተገቢው መንገድ የሚያጣራ የምርመራ ቡድን የተቋቋመ መሆኑን ገልፀዋል ።
ወንጀልን ለመከላከል ከፍተኛውን ድርሻ የሚወስደው የማህበረሰቡ ተሳትፎ እንደሆነ የጠቆሙት ሀላፊው በማነኛውም ቦታ ፀጉረ ልውጦችን ሲያገኝ ለፀጥታ መዋቅሩ መረጃ በመስጠትና በመጠቆም የህግ የበላይነት መከበር የዘወትር ትብብርዎን ተጠናክሮ እንዲቀጥል አሳስበዋል።

በየትኛውም አካባቢ 85ኛው የአገው ፈረሰኞች በዓል ወጉንና ባህሉን ጠብቆ በሰላማዊ መንገድ ማህበረሰቡ እንዲያከናውን ያነሱት ሀላፊው ማህበረሰቡ ፍፁም ሰላማዊ ሆኖ 85ኛው የአገው ፈረሰኞች በዓል እንዲያሳልፍ መልዕክት አስተላልፈዋል።
መረጃ፦የአዊ ብሄረሰብ አስተዳደር ዞን ፖሊስ ሚዲያና ኮሚኒኬሽን ዋና ክፍል ነው።