ምርጥ ጽሑፎች✍️✍️

ቃል አልተገባላችሁም!

ህይወት ቀላል እንደምትሆን፣ የፈለጋችሁትን ነገር በቀላሉ እንደምታገኙ፣ ሁሉም ሰው እንደሚወዳችሁ፣ በአጭር ጊዜ ስኬታማ እንደምትሆኑ፣ ሀሳባችሁን ሁሉ አለም እጁን ዘርግቶ እንደሚቀበላችሁ ማንም ቃል የገባላችሁ አካል የለም። እያንዳንዱን ፍላጎታችሁን የምታገኙት ከጥረታችሁ ማዶ ላይ ነው፣ የትኛውንም ምኞታችሁን በእጃችሁ የምታስገቡት ከማያባራው ስራችሁ ቦሃላ ነው። ነገር ግን አንድ ነገር አስታውሱ ፈተና እንደሌለባችሁ ቃል ባይገባላችሁም በፈተናችሁ መሃል ግን ፈጣሪ አብሯችሁ እንደሚሆን ቃል ተገብቶላችኋል፤ የምታስቡት ነገር በሙሉ በቀላሉ እንደሚሳካላችሁ ባይነገራችሁም እርሱን ለማሳካት በምታደርጉት ጥረት ውስጥ ፈጣሪ እንደሚያግዛችሁ ተነግሯችኋል። ነጋም መሸም፣ ፈጠነም ዘገየም ሁሌም የተሻለ መንገድ አለ። ብዙ የማይቻሉ የሚመስሉ ነገሮችን የቻሉ ሰዎች አሉ፣ ብዙ የማይታለፉ የሚመስሉ ነገሮችን ያለፉ ሰዎች አሉ። ነገር ግን ብቻቸውን አልነበሩም። የፈጣሪያቸው አብሮነት ለሰው ባይታይም ለእነርሱ ግን ይታይ ነበር፣ የአምላካቸውን እግዛ ሰዎች ባያስተውሉትም እነርሱ ግን ያስተውሉት ነበር።

አዎ! ቃል አልተገባላችሁም! ወደ ምድር ስትመጡ፣ ከእናንተ አባታችሁ ስትወለዱ፣ እግዚአብሔር ወደ ዓለም ሲልክላችሁ አልጋ በአልጋና የተመቻቸ ህይወት እንደምትኖሩ ቃል አልገባላችሁም። ነገር ግን በአላማ ለአላማ ፈጥሯችኋል፣ ፈልጎና ፈቅዶ ልጆቹ አድርጓችኋል። ብዙ ምቾት የማይሰጡ ይባሱንም ለምሬትና ለሰቆቃ የሚያጋልጡ ሁነቶች ውስጥ ራሳችሁን ልታገኙ ትቸላላችሁ። ከዛ ውስጥ መውጣት እንደምትችሉ ካመናችሁ ግን ምንም የማይስተካከል ነገር አይኖርም። ብዙዎች ችግር ለእነርሱ ብቻ የተላከ ይመስላቸዋል፣ ብዙዎች የሚፈተኑት እነርሱ ብቻ ይመስላቸዋል፣ ብዙዎች ፈጣሪ በነርሱ ላይ የሚጨክን ይመስላቸዋል። እውነታው ግን እኛ አላየነውም ማለት ሰው ሁሉ ከችግርና ከፈተና የፀዳ ህይወት ይኖራል ማለት አለመሆኑ ነው። ከምታስቡት በላይ ትፈተናላችሁ፣ ብዙ ያልጠበቃችሁት ውርጅብኝ ይወርድባችኋል፣ የምትቋቋሙት የማይመስላችሁ ንፋስ ከየአቅጣጫው ይነፍስባችኋል። መንፈሳችሁን ካጠነከራችሁ፣ መሰረታችሁን አጥብቃችሁ ከያዛችሁ፣ እግዚአብሔርን ተስፋ ካደረጋችሁ ግን ሁሉም ልክ እንደ ክረምቱ መጥቶ መሄዱ አይቀርም፣ ሁሉም ልክ እንደ ጠወለገች አበባ ዳግም መፍካቱ አይቀርም።

አዎ! ጀግናዬ..! ባዶ ፍረሃትና ጭንቀትህ በቀላሉ እንዲጥሉህ አትፍቀድ። በባዶ ተስፋ፣ በማይጨበጥ ምኞት ሳይሆን በሚጨበጥና በጠንካራ መሰረት ተማመን። ፍላጎትህንና ረሃብህን በሚገባ ለይተህ እወቅ፣ ደረጃ አስቀምጥላቸው። ምን ትፈልጋለህ? ምንስ አጥብቀህ ተርበሃል? ምን ቢሆንልህ ደስ ይልሃል? ምንስ ባይሆንልህ ህይወትህን መምራት ይከብድሃል? ለነዛ ፍቅርን ለሚፈልጉት ሳይሆን ለነዛ ፍቅርን ለተራቡት ፍቅር ይሰጣቸዋል፣ እነዛ ስኬትን የሚመኙት ሳይሆን ስኬትን የተራቡት ስኬታማ ይሆናሉ፣ እነዛ ደስታን የሚፈልጉት ሳይሆን እነዛ ደስታን ከልባ የተጠሙት፣ ያለደስታና ሰላም ህይወትን መምራት ለማይችሉት፣ ለእነዛ ልባዊ ሀሴትን ብቸኛ ምርጫቸው ላደረጉት ደስታ ይታደላቸዋል። ሌላ አማራጭ ይዘህ የምትፈልገውን ለማግኘት ብትጥር ልታገኘው አትችልም። በአንድም በሌላም ፈጣሪ እምነትህን ይፈትነዋል፣ ለእርሱ የምትሰጠውን ቦታ ማወቅ ይፈልጋል። በረሃብ እንድትሞት አይፈልግምና አንድን ነገር የተራብክ እለት ያንን ነገር አንስቶ ይሰጥሃል። የእውነት እንደተራብክ የሚያውቀውም እርሱን ለማግኘት በምታደርገው ብርቱ ጥረትና ትግል ነው። ለመራብ አልመጣህም የራበህን ነገር ለማጣጣም ግን የሚጠበቅብህን ነገር ሁሉ የመክፈል ግዴታ እንዳለብህ አስታውስ።
ግሩም ድንቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

በመንፈስህ ተመራ!

የማስተዋል አቅምህን ታጣለህና አብዝተህ አታስብ፣ ከልክ በላይ አትጨነቅ።
የፈጠርካቸው መልካም አጋጣሚዎች ሳታጣጥማቸው ያልፋሉና በጥድፊያ አትጓዝ። አብዝቶ ለማሰብ፣ ለመጨነቅ /over think/ ለማድረግ የምትገደድበት ጊዜ ሊኖር ይችላል። ማሰብ ግሩም ተሰጦ ነው፤ አለማሰብ ግን እጅግ ድንቅና ረቂቅ ነው። አለማሰብ የሚቻለው በመንፈሳዊ ደመነፍስ /spirit/ መንቀሳቀስ ሲቻል ብቻ ነው። ምንም ነገር አስልተህ፣ አገናዝበህ፣ በጥልቅ አስበህ፣ መርምረህ የምታደርገው ነገር አይኖርም፤ መንፈስህ ሲመራህ፣ ነፍስህ ስትረካ፣ ያለጭንቀት ደስታዋን ስታገኝ፣ እርፍ ስትል ትመልከታለህ።

አዎ! ጀግናዬ..! በመንፈስህ ተመራ! ብዙ አትጨነቅ ውስጥህን ብቻ አድምጥ፤ ወደውስጥ ተመልከት። የሃሳብ በዛት ሲፈትንህ ሙሉ በሙሉ ከሃሳቡ ለመገታት፣ ሃሳቡን ለማቆም ሞክር። ውስጥ ህሊናህን፣ መንፈስህን አዳምጠው፤ የሚልህን ስማው። የህይወት ጥድፊያህን ቀንሰው፣ ልታጣጥመው የሚገባውን፣ ልትኖረው የሚገባህን ሁነት አትለፍ። ቀድሞ ያልሞላ ህይወት ባንተ ጥንድፊ፣ ባንተ ችኮላና ሩጫ የሚሞላ አይደለም። የህይወት ሙላት፣ የሀይወት ውበት የቅፅበታት ጠዓሟ ነው። ያለውን ለቀው በሌለው ለመደሰት መጣደፍ የሌለውን ደስታ ናፋቂ ያለውን ደስታ ገፊ ያደርጋል። ከመንፈስ የሚመነጭ፣ ከአምላክ አበርክቶት ጋር የተገናኘ ጥልቅ የደስታና የእርካታ ምንጭ አለ። በማውጣት፣ በማውረድ፣ በመጨነቅ የሚገኝ አይደለም፤ አብዝቶ በማሰብ፣ ከልክ በላይ በማሰላሰልም የሚመጣ አይደለም። መምጫው ቅርብ ነው፤ ከእራስ ጋር በተመስጦ በመነጋገር፣ እራስን በማድመጥ የሚገኝ ነው።

አዎ! የሃሳብ ጥድፊያህን፣ የአካል ችኮላህን ቀንስ፤ በሂደቱ መማረክ ጀምር፤ አለማሰብን፣ በመንፈስ መመራትን ተለማመድ። ለውስጠ ሰላም ቅድሚያ ስጥ፤ በነገ ተስፋ ዛሬን አትጣ፤ በበዛው ፍጥነትህም አስፈላጊ ደረጃዎችን ከመዝለል ተቆጠብ። የደስታህ ምንጭ ውስጥህ ነው፤ እርካታህ ከውስጥ የሚመነጭ ነው፤ እውነተኛ ሰላም ከአምላክ የሚገኝ መንፈሳዊና የውስጥ ሰላም ነው። በእራስህ ላይ አዋጅ አስነገር፤ " እኔ ሰላም ነኝ፤ እኔ ፍቅር ነኝ፤ እኔ በትክክለኛው ሰፍራ እገኛለው፤ እኔ አምላኬን አግኝቼዋለሁ፤ ከመንፈሱ ጋር ተገናኝቼያለሁ፤ ዛሬ ልዩ የደስታ፣ የእርካታ ቀኔ ናት፤ እንዲሁም ትርፋማ ቀኔ ናት" እያልክ መንፈስህን በላይህ አንገስ፤ ውስጥህን በመልካምና ድንቅ እሳቤ ዋጀው።
ውብ ምሽት ይሁንልን!
(Epha A.)
ምክረ-አዕምሮ ለተሻለ ነገ!
#SHARE እንዳይረሳ ቤተሰቦች! 🙏😍

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro

ጥረትህን አስመዝግብ!

ፅድቅን ፍለጋ ብዙ ለፍተናል፣ ፍፁም ለመሆን ረጅም ተጉዘናል፣ በየጊዜው ለማደግ ለመሻሻል ያለማቋረጥ ጥረናል። ነገር ግን አንዳንድ ቀናት አሉ ጥረታችንን መና የሚያስቀሩት፣ አንዳንድ ሀሳቦች አሉ ልፋታችንን ትርጉም የሚያሳጡት፣ አንዳንድ ድርጊቶች አሉ በአንዴ ረጅሙን ጉዟችንን ድካም ብቻ የሚያደርጉት። በህይወታችሁ አንድ ነገር እመኑ። ሰዎች ናችሁ የተፈጠራችሁት ከስተት ጋር ነው፤ የምታዩዋቸው ሰዎችም ልክ እንደ እናንተ ሰዎች ናቸው ስህተት ይሰራሉ፣ ይወድቃሉ፣ ነገሮች ይባላሹባቸዋል። ራሳችሁ ላይ ጨክናችሁ ምንም የምታመጡት ነገር የለም። አውቆም ይሁን ሳያውቅ ስህተት ለሚሰራ ሰው ስህተቱን ላለመድገም እስከጣረ ድረስ ፈጣሪ ጥፋቱን ይቅር ማለቱ አይቀርም። ሁለት አይነት ሀጢአት አለ። የልማድና የአጋጣሚ። ከልማድ ሀጢያት፣ በቋሚነት ከሚፈፀም ስህተት የምታመልጡት በፆም፣ በፀሎትና በልባዊ ቆራጥነት ነው። ከአጋጣሚው ስህተት ደግሞ ማንነትን ሙሉ በሙሉ በመቀየር ነው። ዓለም ሁሌም ላዩን ወርቅ ውስጡን እሳት አድርጋ ብዙ የምታቀብላችሁ ነገሮች አሏት። እነዚም እናንተ ጋር ሲመጡ ስህተቶች ሆነው ይፃፋሉ።

አዎ! አትደናገጡ አትረበሹ። ፍፁም አይደላችሁም፣ ፍፁም ለመሆንም አትሞክሩ። እግዚአብሔር የሚጠላው ሀጢአትን አንጂ ሀጢአተኛን አይደለም። ስህተቱን አምኖ፣ ጥፋቱን ተቀብሎ፣ ተፀፅቶ ለተመለሰ ሁሌም በሩ ክፍት ነው። ስህተታችሁን የህይወት ዘመን ሸክም አድርጋችሁ አትኑሩ። ትናንት ብትሳሳቱ ቀሪው ዘመናችሁ ሁሉ የተሳሳተና የተመሰቃቀለ እንዲሆን አትፍቀዱ። ነገ መስራት ያለባችሁ የግል የቤት ስራ አለባችሁ፣ ዳግም እንዳይፈጠር ሊታረም የሚገባ ምግባር አላችሁ። በመጥፎ ለማድ አዙሪት ውስጥ ወድቆ ህይወቱ የጨለመበትና ተስፋ ያጣ ሰው ቢኖር ሁሌም ጨልሞ እንደሚቀር አያስብ፣ ሁሌም ጀምበር እንዳዘቀዘቀችበት እንደምትቀር አያስብ፣ ሁሌም ብሶተኛና የዓለም ተጠቂ ሆኖ እንደሚቀር አያስብ። በራሳችሁና በፈጣሪያችሁ ላይ ተስፋ ቆርጣችሁ ሰይጣንን ባለ ድል አታድርጉት፣ ራሳችሁ ላይ ጨክናችሁ የሰማይ አባታችሁን አታሳዝኑት። ስህተት አልባ ህይወት ለመኖር ራሳችሁን አታስጨንቁት። ተሳሳቱ ነገር ግን ታረሙ፣ አሁንም ተሳሳቱ ነገር ግን አሁንም ታረሙ። ስህተት መገለጫችሁ ሆኖ ፋታ ቢነሳችሁ ዝቅ ብላችሁ ከፈጣሪ ብርታትን ለምኑ።

አዎ! ጀግናዬ..! በራስ ላይ ተስፋ መቁረጥ ሽልማት የለውም፣ ራስን ችላ ብሎ መናቅ ምንም ዋጋ አያስገኝልህም። ምግባርህ ቢያሳፍርህ፣ ስራህ ስህተት ሆኖ ቢታይህ ምግባሩ አልያም ስራው እንጂ ስህተት አንተ ስህተት አይደለህም። እያወቅክም ይሁን ሳታውቅ ብታጠፋ ዳግም ራስህን የምታርምበት ሁለተኛ እድል እንዳለህ አስተውል። ሰይጣን ክፋቱ ክፉ ስራ አሰርቶ በራስህ እንድታዝን ያደርግሃል፣ ዲያቢሎስ መሰሪነቱ ብዙ ፈተና ፈትኖህ በአንዱ ቢጥልህ በዛው በአንዱ ሲኮንንህ ይኖራል። የመጡብህን ክፉ ሀሳቦች አንድ ለአንድ ታግለህ ያሸነፍክበትን ጊዜ አስታውስ። ጥንካሬህ ዛሬም እንዳለ ነው፣ አይበገሬነትህ አሁንም እንደዛው እንደተቀመጠ ነው። አንዲት ተልካሻ ስህተት በራስመተማመንህን እንድትሸረሽር አትፍቀድ፤ አንዲት ያልታሰበች ውድቀት ባዶነት እንዲሰማህ እንድታደርግህ አትፍቀድ። ከነስህተትህ ቀና በል፣ ከነጥፋትህ ደረትህን ነፍተህ ተራመድ። ነገር ግን ዳግም ያንን ጥፋት ሰርተህ የሚወድህንና የምትወደውን ፈጣሪህን ላለማሳዘን የቻልከውን ሁሉ አድርግ። ሌላው ቢቀር በእሱ ፊት ጥረትህን አስመዝግብ።
የፍቅር ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

በአምላኬ እታመናለሁ!

ከራስ ጋር ንግግር: "በአምላኬ እታመናለሁ፣ በፈጣሪዬ የማይናወፅ፣ የማይሸራረፍ፣ የማይታወክ እምነት አለኝ። እራሴን የምወደው አንድም የእግዚአብሔር አምላኬ የስስት ልጁ በመሆኔ ነው፤ ሁለትም በእርሱ ህያው መንፈስ በመታነፄ ነው። ለሁሉም ነገሬ መሰረቴ እርሱ እንደሆነ አውቃለሁ፣ የትም ብደርስ፣ የትም ብገኝ የሚያደርሰኝ አምላኬ እንደሆነ አውቃለሁ። ጥፋቴ ቢበዛም፣ ሃጢያቴ ማለቂያ ባይኖረውም፣ ብዙ ብበድል ብዙ ብስትም በይቅርታው ብዛት ግን እስካሁን አለው፣ በርህራሔው ጥግ በምህረት መንገድ እመላለሳለሁ። ወዳጅ ባጣ፣ ሰው ቢርቀኝ፣ ዓለም ፊቷን ብታዞርብኝ፣ ከስኬት ጋር ሆድና ጀርባ ብንሆን፣ ብቸኝነት ቢፈትነኝ፣ የውስጤን የምትነፍስለት፣ የሆዴን የማዋየው ሰው እንኳን ባጣ በቸሩ አባቴ በእግዚአብሔር ግን ሁሌም ሙሉ ነኝ፣ ዘወትር ደስ ይለኛል።

አዎ! በአምላኬ እታመናለሁ፣ ፈጣሪዬን አስቀድማለሁ፣ ለእርሱ እራሴን እሰጣለሁ። በእግዚአብሔር የመታመንን ጥቅም፣ ፈጣሪን የማስቀደምን ትርፍ፣ ህይወትን በእርሱ መንገድ የመምራትን፣ እለት እለት ከእርሱ ጋር የማሳለፍን ሽልማት ከማንም በላይ አውቃለሁ። ፈጣሪውን ይዞ ማን ወደቀ? በአምላኩ እቅፍ ሆኖ ማን ይጨነቃል? ማንስ ውስጣዊ ሰላም ያጣል? ዓለም ከንቱ ነች፤ ከሌለኝ ለእኔ ቦታ የላትም፣ ሰው ለእኔ ከመስጠት በላይ ከእኔ መውሰድን ይመርጣል። የእግዚአብሔር አምላኬ ውለታ ግን በምንም መመዘኛ ከፍጥረታቱ ዓለምና የሰው ልጅ ጋር አይነፃፀርም። ምናልባት ደጋግሞ ይፈትነኝ ይሆናል፣ ምናልባት አውቆ አጣብቂኝ ውስጥ ይከተኝ ይሆናል። ነገር ግን መቼም እንደማይተወኝ፣ እኔእንኳን ፊቴን ባዞርበት፣ ከደጁ ብርቅ፣ ዓለም ውስጥ ብደበቅበት ፈለጎ እንደሚያገኘኝ አምናለሁ። ያደረገልኝን ዘርዝሬ ባልጨርስም በእርሱ ስለመታመኔ፣ በምህረቱ እዚ ስመድረሴ፣ በይቅርታው ብዛት ሙሉ ሰው ስለመሆኔ ሁሌም ምስክር ነኝ።"

አዎ! ፈጣሪያችሁ እያለ አትሰበሩ፣ አምላካችሁ አብሯችሁ ሆኖ አንገት አትድፉ፣ ሁሉን ቻይ የሆነ ቸር አባት እያላችሁ ስለምን ሆድ ይብሳችኋል? የዓለምን ክብር፣ የሰውን አንቱታ፣ የምድሩን ዝናና ንብረት ለአፍታ ተወት አድርጉት። ከዓለም ጌጥ በላይ፣ ከስጋዊ ፍቃድ በላይ ስለ ህያዊት ነፍሳችሁ በትንሹ ማሰብ መጨነቅ ጀምሩ። የሰው ልጅ የታመመች ነፍሳችሁን አያድንላችሁም፣ የምትደርሱበት ከፍታና ስኬት በበደል የቆሰለውን ውስጣችሁን አያክምላችሁም። ከእግዚአብሔር የምታገኙትን ፈውስ ከዓለም አትጠብቁ፣ በፈጣሪያችሁ የሚሰጣችሁን ነፃነት ለማግኘት ሰውን ደጅ አትጥኑ። በአምላካችሁ ለመታመን ቅንጣት አታመንቱ፣ በፈጣሪያችሁ ድንቅ ስራ ተስፋ ከማድረግ እንዴትም ወደኋላ አትበሉ። የሚያዋጣችሁን አስቀድማችሁ እወቁ፣ በገባችሁ ልክ በፍፁም ልባችሁ ፈጣሪን ጠብቁት።
የተባረከ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ከአድናቆትህ ተጠቀም!

ሰዎች በመሆናችን የሚመቸን፣ የምንወደው፣ የምናደንቀው ሰው ይኖራል። ከእርሱ ብዙ እንማራለን፣ እናውቃለን፣ እንደርሱ ለመሆንም እንጥራለን። ነገር ግን አኛ ስለወደድነውና አድናቂው ስለሆንን ብቻ ጥፋቱ ትክክል፣ ስህተቱ ተገቢ፣ ውድቀቱም ጥፋት ሊሆን አይገባም። የምታደንቀው ሰውን እንደሆነ እንዳትዘነጋ። ድጋፍህ ሃይልና ብርታት ሊሆነው ይችላል አንተም ከእርሱ ተግባር መጠቀም ካልቻልክ ግን የዘወትር አድናቂነትህ ይቀጥላል። አንተ ስለምትወደው ብቻ የማይሳሳት፣ አንተ ስለምትጠላው ብቻ ትክክል የማያደርግ ሰው የለም። አድናቂው ያደረገህ የግል ፍላጎትህና የእይታ አቅጣጫህ ነው። ማንንም የመደገፍ ምርጫ ቢኖርህም የምትደግፈውን ሰው እያንዳዱን ተግባር ግን የመቀበል ግዴታ የለብህም። ትወደዋለህ ማለት በአጥፊ ሃሳቦቹ ትስማማለህ ማለት አይደለም፤ አይመችህም ማለት መልካም ሃሳቦቹን አትቀበልም ማለት አይደለም። የሚጠቅምህን መውሰድ ላይ ብልህ ሁን፤ ከማንነቱ በላይ ተግባራቱ ላይ አተኩር።

አዎ! ጀግናዬ..! ከአድናቆትህ ተጠቀም! በልክም አድርገው። ስህተት የማይሰራ የለም፤ የማይታረምም እንዲሁ። ተሳስቷል ብለህ ለተቺት አትጣደፍ፤ ታርሟል ብለህም ለማሞካሸት አትቸኩል። ትልቁን ቁብ ነገር አስታውስ፤ የአድናቂና የተደናቂነትን ልዩነት በመሃላችሁ የፈጠረው ነገር የተፈጥሯችሁ ጉዳይ ሳይሆን የድፍረትና የበራስ መተማመናችሁ ጉዳይ ነው። በእራሱ ስለተማመነ፣ ጠንክሮ ስለሰራ፣ ዘወትር በእድገት ውስጥ ስለሚያልፍ፣ በየጊዜው ክህሎቱን ስለሚያዳብር፣ ለአፍታም በጭብጨባ ስለማይዘናጋ፣ በተቃውሞ ስለማይደናገጥ ያለበት ብታ ላይ ቆየ፣ አንተን የመሰሉ ብዙ የልብ ወዳጆችና አድናቂዎችን አፈራ። አንተስ እንደርሱ መሆን የማትችል ይመስልሃልን? በፍፁም! በእርግጥም መሆን ትችላለህ። እዚም እዛም ከማለት በላይ የሚማርክህንና አርዓያ የሚሆንህን አንድ የምትመኘው ሰፍራ ቀድሞህ የደረሰን ሰው በጥሞና ተከታተል፤ ከአድናቂነት ባሻገር ለመማር ተጠጋው፤ እያንዳንዱን እንቅስቃሴውን ከልብህ መርምር።

አዎ! ከአድናቂነትህ አትርፍበት፣ ከደጋፊነትህ ተጠቀም። በውዳሴ ከንቱና ስለሰው ዝና በማጨብጨብ ብቻ ህይወትህ እንዲቀየር አትጠብቅ። እንድትከተለው ያደረገህ በቂ ምክንያት ካለህ ከእርሱ የምትማረው ነገርም እንደሚኖር እሙን ነው። ለመማር የፈጠነ፣ አድናቆቱን ትርጉም የሚሰጠው፣ ብዙ ተከታይ ስላለው ብቻ ለመከተል የማይሽቀዳደም ሰው በእርግጥም የሚፈልገውን የሚያውቅ ሰው ነው። ህይወትህን በሙሉ ስለ አንድ ሰው ብርታትና ጥንካሬ፣ ስለ ጀብዱ እያወራህ ከምታሳልፍ የተጠቀምከውና በህይወትህ ላይ የፈጠረውን ተፅዕኖ ማስተጋባት ብትችል የተሻለ ነው። ለጊዜው ተከታይ ነህ፣ ከጊዜዎች ቦሃላ ግን ተከታዮች ይኖሩሃል። ለአሁን አድናቂ ብቻ ነህ፣ በቅርቡ ግን አድናቂዎች ይኖሩሃል። በየትኛውም ዘርፍ አድናቂና ደጋፊ ማግኘት ላይከብድህ ይችላል ነገር ግን በምታምንበትና በሚያስደስትህ ዘርፍ ላይ የምታፈራቸው እውተኛ ተከታዮችህ ይሆናሉ። ከምታደንቀው ሰው ተማር፣ ፈጠራህን አክልበት፣ በእራስህ መንገድ እርራስህን ለመሆን ጣር፤ አለም ካንተ ብቻ የምትጠብቀው አንድ ውድ አበርክቶት እንዳለ እመን።
ውብ ምሽት ይሁንልን! 🌘🌒✨💫
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ከዛሬ በኋላ!

ሁሉም ነገር ይቀየራል፤ እይታዎችህ ይቀየራሉ፤ አመለካከትህ፣ እሳቤህ ይቀየራል፤ ስራህ ይቀየራል። ምክንያቱም በእራስህ የፀና እምነት ስላለህና ለውጥ የሚጀምረው እራስን ከመመልከት፣ እራስን ከማሻሻል፣ እራስን ከመለወጥ፣ እራስን ከማንሳት፣ እራስ ላይ በመስራት ስለሆነ። ማወቅ የሚገባህን ማወቅ ይኖርብሃል፤ መማር ያለብህን መማር ይጠበቅብሃል፤ መጀመር ያለብህን መጀመር ይኖርብሃል። ከሁሉም በላይ፣ ከየትኛውም ጊዜ በተሻለ መጠንከር፣ መበርታት ይኖርብሃል። አይኖችህን ትገልጣቸዋለህ፤ እውቀትህን ወደ መሬት ታወርደዋለህ፤ እራስህን ወደ መሆን ትጠጋለህ። ሃሳበህን ወደ መተግበር፣ ህልመህን ወደ መኖር፣ እራስህን ወደ ማብቃት ትሸጋገራለህ።

አዎ! ጀግናዬ..! ከዛሬ ቦሃላ! ነገሮች ያበቃሉ፤ ሸክሞችህ ይወርዳሉ፤ ጭንቀትህ ይራገፋል፤ ብሶትህ ይርቃል። ከዛሬ ቦሃላ ነገን ታያለህ፤ ነገ ማለት ትናንት ቃል የገባህለት፣ ትናነት ያቀድክለት፣ ትናንት ያሰብክበት ቀን ነው። ዛሬ ላይ ነገን ስታልም ከርመሃል፤ የቀናቱን ለውጥ በጉጉት ጠብቀሃል፤ የጊዜውን መቀየር፣ የሰዓታትን መክነፍ ከልብህ ተመኝተሃል። ነገር ግን ሁሉም ነገር በጊዜ ውስጥ ቢመስልህም ዋናው ጉዳይ ግን ባንተ እምነትና ተግባር የሚገለፅ ነው። ቀናት ስለተየሩ የምትቀየር ከመሰለህ ዛሬን የመጨረሻ ቀንህ አድርገው። የስብራትህ መጨረሻ፣ የጭንቀትህ መጨረሻ፣ የብሶትህ መደምደሚያ። የትናነት ውሳኔዎችህን አስታውስ፣ የትናነት ህመምህን ከግምት አስገባ፤ በቃኝ ያልክበትን ጊዜ ወደኋላ ተመልከት።

አዎ! ህይወትህን እንዴት እየኖርክ ነው? በምን ደረጃ ላይ ትገኛለህ? ስለ እራስህ ምን ታስባለህ? የሚገባህ ምንደነው? የምትሰራው ምንደነው? ከሁሉም በላይ አምነህ የተቀበልከው ትልቁ ህልምህ ምንድነው? በጥቃቅን ሽልማቶችን ትልቁን ህልምህን እንዳትረሳ፤ ዛሬ በሚሰጥህ ጊዜያዊ ማደንዘዣ ደሞዝ መኖር ከምትችለው ህልም እንዳትሰናከል፤ ታይቶ ከሚጠፋው፣ አጓጉቶ ከሚወርደው ጊዜያዊ ስጦታ ለመጠበቅ ምን እያደረክ ነው? ምላሾችህ ሁሉ ዋጋ የሌላቸው፣ ለውጥ የማያመጡ፣ መንገድ የማይጠቁሙህ እንዳይመስሉህ። ጥያቄህ ውስጥ ሁሉም ነገር እንዳለ አስታውስ፤ ምላሾችህም የህይወትህ ቁልፍ እንደሆኑ እወቅ። ከዛሬ ቦሃል የምትልበት የተሻለ ጊዜ የለህምና ከዛሬ ቦሃላ ሁሉም እንዲያበቃ የማድረግ ድፍረትን ተላበስ፤ ለእራስህ በቃኝ ያልከበትን የመጨረሻ ውሳኔ አክብረህ ተገኝ።
ግሩም ድንቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ!

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪