በትረማርያም አበባው Betremariam Abebaw

💝የጥያቄዎች መልስ ክፍል 50💝

▶️፩. "ቀኝ ዓይናችሁን ብታወጡ ከእናንተ ጋር ቃል ኪዳን አደርጋለሁ" ይላልና ቀኝ ዓይናችሁን ሲል ትርጓሜው ምንድን ነው?

✔️መልስ፦ ትርጉሙ ቀጥታ ነው። ናኦስ ቀኝ ዓይናቸውን በቀኝ እጃቸው አውጥተው እንዲገብሩለት ነው የፈለገው። በዚህ ሊያገኝ ያሰበው ትርፍ በእስራኤላውያን ላይ ለትውልድ የሚቀጥል ስድብና እርሱ ደግሞ ቀኝ ዓይን ያስገበረ ተብሎ በዝና እንዲነገርለት ነበረ።

▶️፪. "የእያንዳንዱ ሰው ሰይፍ በባልንጀራው ላይ ነበር" ሲል ትርጓሜው ምንድን ነው?

✔️መልስ፦ የእያንዳንዱ ሰው ሰይፍ በባልንጀራው ላይ ነበረ ማለት ከጠላቶቻቸው ጋር በተፈጥሮ አንድ ስለሆኑ ባልንጀራ አላቸው እንጂ የአንዱ ሰይፍ ከአንዱ ላይ እያረፈ ጽኑዕ ውጊያ ተደረገ ለማለት ነው።

▶️፫. 1ኛ ሳሙ.15፥1 ላይ ሳሙኤል እንደሚቀባው ይናገራል። በፊት ምዕራፍ 10 ላይ እንደተገለጸው በሕዝቡ ፊት ቀብቶት የለምን ስንት ጊዜ ነው የሚቀባው?

✔️መልስ፦ 1ኛ ሳሙ.15፥1 ላይ እንደ አዲስ ሳሙኤል ሳኦልን ቀብቶ ሊሾመው እንደመጣ የሚናገር ሳይሆን ቀድሞ የሆነውን ታሪክ ደግሞ እያስታወሰው ነው። ከዚህ ቀብቼ ስላነገሥኩህ ጠላቶችህን አጥፋ ብሎ ትእዛዝ ለመስጠት ነው የጠቀሰው እንጂ እየቀባው እንደሆነ አልተገለጸም። ይህንንም በተጠቀሰው ምዕራፍ ከቁጥር ሁለት ጀምሮ ስናነበው እናስተውላለን።

▶️፬. 1ኛ ሳሙ.15፥33 "ሳሙኤልም ሰይፍህ ሴቶችን ልጆች አልባ እንዳደረገቻቸው እንዲሁ እናትህ በሴቶች መካከል ልጅ አልባ ትሆናለች አለ። ሳሙኤልም አጋግን በእግዚአብሔር ፊት በጌልገላ ቈራረጠው" ይላል። ካህን ይገድላልን?

✔️መልስ፦ በሐዲስ ኪዳን ካህን ከገደለ ክህነቱ ይሻራል። በብሉይ ኪዳን ግን እንዲህ ዓይነት ሕግ አልነበረም። መሞት የሚገባውን መግደል ሕገ ርትዕ ነበረ። ከሳሙኤል በፊት ፊንሐስ እነክስቢንና ዘንበሪን በመግደሉ የክህነት ዘመኑ እንደበዛና እግዚአብሔር በፊንሐስ ደስ እንደተሰኘ ተገልጿል። ከዚህም ሳሙኤል አጋግን መግደሉ የጠመመን እንደማቅናት ተቆጥሯል እንጂ ኃጢአት ተደርጎ አልተቆጠረበትም።

▶️፭. "ሳኦልም ሳሙኤል እንደ ቀጠረው ጊዜ ሰባት ቀን ቈየ። ሳሙኤል ግን ወደ ገልገላ አልመጣም። ሕዝቡም ከእርሱ ተለይተው ተበታተኑ" ይላል። ሳሙኤል ለምን ነበር የዘገየው?

✔️መልስ፦ ሳሙኤል ለምን እንደዘገየ የተጻፈ ነገር ስላላገኘሁ አላውቀውም። መጽሐፍ ቅዱሱም መዘግየቱን ብቻ ነገረን እንጂ የዘገየበትን ምክንያት አልጻፈውምና።

▶️፮. "ሳሙኤልም ሰይፍኽ ሴቶችን ልጆች አልባ እንዳደረገቻቸው እንዲሁ እናትኽ በሴቶች መካከል ልጅ አልባ ትኾናለች አለ። ሳሙኤልም አጋግን በእግዚአብሔር ፊት በገልገላ ቈራረጠው" ይላል። ለምን ቈራረጠው?

✔️መልስ፦ የእስራኤል ሴቶች አጋግ መጣ ሲባሉ የጸነሱት ሴቶችን ሳይቀር ያስወርዳቸው እንደነበረ ተገልጿል። በአጋግ ምክንያት ብዙ ሴቶች ያለ ልጅ ቀርተዋል። እና ሳሙኤል የዚህን ፍዳ አጋግን በመግደል የአጋግን እናት ያለ ልጅ አስቀርቷታል። ቆራረጠው መባሉ ግን ገደለው ማለት ነው እንጂ የተለየ ትርጉም የለውም።

▶️፯. "ዮናታን ግን አባቱ ሕዝቡን ባማለ ጊዜ አልሰማም ነበር። እርሱም በእጁ ያለችውን በትር ጫፏን ወደ ወለላው ነከረ። እጁንም ወደ አፉ አደረገ ዐይኑም በራ" ይላል። ዐይኑም በራ ማለት ምን ማለት ነው? ሳይሰማ ማሩን መብላቱ በደል ይሆንበታል?

✔️መልስ፦ ዮናታን በረኃብ ምክንያት ስልት ይዞት ስለነበረ ዓይኖቹም በረኃብ ስልት ፈዝዘው ነበረ። በኋላ ማር ሲበላና ረኃቡ ሲለቀው የፈዘዘ ዓይኑ ብሩህ ሆነ ለማለት ነው። ሳይሰማ መብላቱ በደል አልሆነበትም። ስላልሆነበትም ነው እግዚአብሔር በሞት እንዳይቀጣ ያደረገውና ከሞት ያዳነው። ቢያድነውም ዕጣ በእርሱ ላይ እንዲደርስ ማድረጉ ደግሞ የመሐላን ጽናት ለሕዝቡ ለማስታወቅ ነው።

▶️፰. "ሳኦልም ፍልስጥኤማውያንን ልከተልን? በእስራኤልስ እጅ አሳልፈህ ትሰጣቸዋለህን? ብሎ እግዚአብሔርን ጠየቀው በዚያ ቀን ግን አልመለሰለትም" ይላል (1ኛ ሳሙ.14፥37)። እግዚአብሔር ያልመለሰለት ልጁ ዮናታን ስለበላ ነው? ሳኦል ሕዝቡን አትብሉ ያለ እግዚአብሔር አዝዞት ነው? ሲጀመር ሳሙኤል እያለ ሳኦል እግዚአብሔርን መጠየቅ ሥልጣኑ ነበር?

✔️መልስ፦ ሳኦል በዚህኛው መሥዋዕት አልተነቀፈበትም። ነገሥታት መሳፍንት በመሠዊያ መሥዋዕት ይሠዉ እንደነበረ ተገልጿል። በዚያ ልማድ ሳኦል ሠውቷል። ሳኦል የተነቀፈበት መሥዋዕት ተለይቶ ሳሙኤል ሳልመጣ እንዳትሠዋ ባለው ልዩ መሥዋዕት ነበረ። ሳኦል ጠይቆ እግዚአብሔር አልመለሰለትም። ለምን እንዳልመለሰለት መጽሐፉ ላይ አልተገለጸም። ይህን ራሱ እግዚአብሔር ነው የሚያውቀው። ሳኦል ሕዝቡን አትብሉ ያለው ከእግዚአብሔር ተገልጦለት ይሁን አይሁንም የተገለጸ ነገር ስላላገኘሁ አላውቀውም። ብቻ ጠላቶቼን እስክበቀል ድረስ አትብሉ ማለቱ ተገልጿል።


© በትረ ማርያም አበባው


🌹የዩቲዩብ ቻናሌ:- ንሕነ ዘክርስቶስ https://youtube.com/@edenawizechristos?si=6V4y-73OM3LTzhAf ነው።

🌻የፌስቡክ ገጼ Betremariam Abebaw https://www.facebook.com/profile.php?id=100075547015721 ነው።

🧡 ፩ኛ ሳሙኤል ክፍል ፫ 🧡

🧡ምዕራፍ 11፦
-አሞናዊው ናዖስ እስራኤላውያንን ቀኝ ዓይናችሁን ገብሩልኝና ቃል ኪዳን እናድርግ ብሎ መሳደቡ
-ሳኦል ሕዝቡን በሦስት ወገን አሰልፎ አሞናውያንን እንደመታ

🧡ምዕራፍ 12፦
-ሳሙኤል ለሕዝቡ የመሰናበቻ ንግግር ማድረጉ እግዚአብሔርን ፍሩ ማለቱ፣ እግዚአብሔርን ባትፈሩ ትጠፋላችሁ ማለቱ

🧡ምዕራፍ 13፦
-ሳኦል ከእግዚአብሔር ትእዛዝ ውጪ ቢሄድ ሳሙኤል እንደገሠጸው

🧡ምዕራፍ 14፦
-ዮናታን ወደ ፍልስጥኤማውያን ሰፈር ገብቶ እንደበታተናቸው

🧡ምዕራፍ 15፦
-ሳኦል አማሌቃውያንን ፈጽሞ እንዲያጠፋ መታዘዙ፣ ሳኦል ግን አጥፋ የተባለውን ባለማጥፋቱ ንግሥናው እንደተናቀ
-ሳሙኤል ሳኦልን መታዘዝ ከመሥዋዕት ይበልጣል እንዳለው


✝️የዕለቱ ጥያቄዎች✝️
፩. እስራኤላውያንን ከእናንተ ጋር ቃልኪዳን የምገባ ቀኝ ዓይናችሁን ከገበራችሁልኝ ነው ያለ ማን ነው?
ሀ. ሞዓባዊው ሢሳራ
ለ. አሞናዊው ናዖስ
ሐ. ኢያቢስ
መ. ዮናታን
፪. ሳኦል አማሌቃውያንን ሁሉ እንዲያጠፋ የታዘዘ ቢሆንም ትእዛዝ አፍርሶ የአማሌቅን ንጉሥ ማርኮ ይዞት መጥቷል። ሳሙኤል ግን በኋላ ይህንን የአማሌቅ ንጉሥ ገድሎታል። ይህ የአማሌቅ ንጉሥ ስሙ ማን ነው?
ሀ. ቂስ
ለ. አጋግ
ሐ. አብኤል
መ. ያሚን
፫. ሳሙኤል ሳኦልን "መታዘዝ ከመሥዋዕት፣ ማዳመጥም የአውራ በግ ስብ ከማቅረብ ይበልጣል" ብሎታል። ይህ ኃይለ ቃል የት ይገኛል?
ሀ. 1ኛ ሳሙ.17፥11
ለ. 1ኛ ሳሙ.15፥22
ሐ. 1ኛ ሳሙ.14፥3
መ. 1ኛ ሳሙ.11፥8

https://youtu.be/NtnBvyBUe0I?si=C43LUkqH0tbD3AEg

🌻 መዝሙረ ዳዊት ክፍል 8 🌻
🌻መዝሙር ፯
ንጉሥ ዳዊት በእርሱ ላይ ክፉ ምክር ይመክር ነበረውን የአኪጦፌልን ምክር ለውጣት እያለ ይጸልይ ስለነበር መልካሙ የኵሲ ምክር ደረሰው፡፡ ይህ መዝሙር 7 ዳዊት ልጁ አቤሴሎም ባሳደደው ጊዜ ከወይራ ስር ሆኖ የጸለየው መዝሙር ነው፡፡ እግዚአብሔር በአሕዛብ ይፈርድባቸዋል፡፡ እግዚአብሔር ልብ ያሰበውን ኵላሊት ያጤሰውን መርምሮ ያውቃል፡፡ ቅን ልቡና ያላቸውን ሰዎች የሚያድናቸው እግዚአብሔር በእውነት ይረዳኛል፡፡ እግዚአብሔር ፈታሒ በጽድቅ ኰናኒ በርትዕ ነው፡፡ ኃያል ነው ታጋሽም ነው፡፡ አኪጦፌል ራሱ በመከረው ክፉ ምክር ጠፋ፡፡ ልዑል ለሚሆን ለእግዚአብሔር ምስጋና አቀርባለሁ፡፡
🌻መዝሙር ፰
ዳዊት ኢየሱስ ክርስቶስን ሕፃናት በሆሣዕና ሲያመሰግኑት ጊዜው ሳይደርስ ተገልጾለት እግዚኦ እግዚእነ ጥቀ ተሰብሐ ስምከ በኵሉ ምድር አለ፡፡ አቤቱ ከሕፃናት አንደበት ምስጋናን ተቀበልክ፡፡ ዲያብሎስ ለ5500 ዘመን የሰውን ልቡና እንደ ዙፋን ሰውነቱን እንደ ድንኳን ፍትወታት እኩያት ኃጣውእን እንደ አጥር እንደ ቅጥር አድርጎ ይገዛ ነበር፡፡ ጌታ ሰው ከሆነ በኋላ ግን እየወጣ ሄዷል፡፡

© በትረ ማርያም አበባው


🌹የዩቲዩብ ቻናሌ:- ንሕነ ዘክርስቶስ https://youtube.com/@edenawizechristos?si=6V4y-73OM3LTzhAf ነው።

🌻የፌስቡክ ገጼ Betremariam Abebaw https://www.facebook.com/profile.php?id=100075547015721 ነው።

💝የጥያቄዎች መልስ ክፍል 49💝

▶️፩. የእግዚአብሔር ታቦት ወደ እስራኤል ስትመለስ በባዶ እንዳይሰዱ የመከሯቸው ጠንቋዮች ናቸው እና እግዚአብሔር በጠንቋይ ሰው ልቦና ያድራል?

✔️መልስ፦ እግዚአብሔር በጠንቋይ ሰው ልቡና አያድርም። ነገር ግን ልክ እንደ ጠንቋዩ በለዓም ሁሉ አፋቸውን ከፍቶ ፊታቸውን ጸፍቶ ለታቦተ ጽዮን መገበር እንደሚገባቸው አናግሯቸዋል።

▶️፪. "አምስት የወርቅ እባጮች" ይላልና ትርጓሜው ምንድነው?

✔️መልስ፦ አምስት የወርቅ እባጮች የሚለው ታቦተ ጽዮን በሀገራቸው ሳለች መቅሠፍት ወርዶባቸዋል። አንዱ መቅሠፍት ብልታቸው አብጦ መጨጊያ መጨጊያ አህሎ ነበር። እና ያንን ለማስታዎስና በኃጢአታችን ምክንያት ይህ ደረሰብን ሲሉ የወርቅ የአካላቸውን እባጭ የመሰለ ሠርተው ለታቦተ ጽዮን ገብረዋል።

▶️፫. "ውሃ ቀድተው በእግዚአብሔር ፊት በምድር ላይ አፈሰሱ በዚያም ቀን ጾሙ" ይላልና ውሃ በምድር ላይ ማፍሰስ ትርጓሜው ምንድን ነው?

✔️መልስ፦ ውሃ የማፍሰሱ ትርጉም ውሃ ከፈሰሰ በኋላ እንደማይመለስ ሁሉ እኛም ከአምልኮ ጣዖት ወደ አምልኮ እግዚአብሔር ከገቢረ ኃጢአት ወደ ገቢረ ጽድቅ ከተመለስን በኋላ ወደ አምልኮ ጣዖት ወደ ገቢረ ኃጢአት አንመለስም ሲሉ በእግዚአብሔር ፊት ውሃውን ወደ ምድር አፍስሰውታል።

▶️፬. "በእነርሱ ላይ እንዳልነግሥ እኔን ናቁ" ይላልና የእስራኤል ንቀት ምንድን ነው? እና እስራኤል ንጉሥ መፈለጋቸውን ነው?

✔️መልስ፦ በመሳፍንት ዘመን በመስፍኑ አድሮ ይገዛቸው የነበረ እግዚአብሔር ነው። መስፍኑ ሳሙኤል፣ ከሳሙኤል በላይ ያለው ንጉሥ ግን እግዚአብሔር ነበረ። እና እስራኤል ንጉሥ አንግሥልን ሲሉ እግዚአብሔር በመስፍኑ አድሮ አይንገሥብን ማለታቸው ስለነበረ ነው እኔን ናቁ ያለ እግዚአብሔር።

▶️፭. "ሳኦልም አጎቱን አህያዎች እንደ ተገኙ ገለጠልን አለው። ነገር ግን ሳሙኤል የነገረውን የመንግሥትን ነገር አላወራለትም" ይላል። ለምን ነበር ያልነገረው?

✔️መልስ፦ የአህዮችን መጥፋት አጎቱም ያውቅ ስለነበረ መጥፋታቸውን ነገረው ተብሏል። የመንግሥትን ነገር ግን አጎቱም ስላልጠየቀው እርሱም አልመለሰለትም።

▶️፮. "ከሳሙኤልም ዘንድ ለመኼድ ፊቱን በመለሰ ጊዜ እግዚአብሔር ሌላ ልብ ለወጠለት። በዚያም ቀን እነዚህ ምልክቶች ዅሉ ደረሱለት" ይላል። እግዚአብሔር ሌላ ልብ ለወጠለት ሲል ምን ማለት ነው?

✔️መልስ፦ ሌላ ልብ ለወጠለት ማለት አላዋቂ የነበረውን ሳኦል እግዚአብሔር ዕውቀት ጨመረለት፣ ባለአእምሮ አደረገው ማለት ነው።

▶️፯. "ሳኦልም ብላቴናውን እነሆ እንኼዳለን። ነገር ግን ለእግዚአብሔር ሰው ምን እናመጣለታለን እንጀራ ከከረጢታችን አልቋልና እጅ መንሻም የለንምና ለእግዚአብሔር ሰው የምናመጣለት ምን አለን አለው" ይላህ። ለነቢይ መባ እጅ መንሻ ማምጣት ግዴታ ነበር?

✔️መልስ፦ ኦሪት በእግዚአብሔር ነቢይ ፊት ያለእጅ መንሻ አትቁም ስለምትል በሕጉ መሠረት እንዴት ያለእጅ መንሻ ወደነቢይ እንቀርባለን ብለዋል። በነቢይ ፊት እጅ መንሻ ይዞ መቅረብ ግዴታ ይሆን አይሆን ግን የተጻፈ ነገር አላገኘሁም አላውቀውም።

▶️፰. "የሚፈርድልንም ንጉሥ ስጠን ባሉት ጊዜ ነገሩ ሳሙኤልን አስከፋው። ሳሙኤልም ወደ እግዚአብሔር ጸለየ" ይላል። ለምን ነበረ ሳሙኤል የተከፋው?

✔️መልስ፦ ሳሙኤል የተከፋው ምስፍና ከእኔ ቀረ ብሎ አልነበረም። ከዚህ ቀደም እግዚአብሔር እስራኤላውያንን በነቢይ፣ በካህን፣ በመስፍን አድሮ ይረዳቸው ነበር። እንደ ንጉሥ እግዚአብሔር ሲሆን ከእግዚአብሔር በታች ደግሞ መስፍኑ ይገዛቸው ነበረ። የእግዚአብሔርን ንጉሥነት አምነው መቀጠል ሲገባቸው ሌላ ንጉሥ አንግሥልን ሲሉ ከእንግዲህ እግዚአብሔር ላይረዳቸው ይችላል ብሎ ስላሰበ ነው ሳሙኤል የተከፋው።

▶️፱. "ወደ እግዚአብሔርም ታቦት ውስጥ ተመልክተዋልና የቤት ሳሚስን ሰዎች መታ" ይላል (1ኛ ሳሙ.6፥19)። መምህር እዚህ ላይ ግልፅ ያልሆነልኝ ነገር አለ ቁ.15 ላይ ሌዋውያን ታቦቱን እንዳወረዱትና በድንጋይ ላይ እንዳስቀመጡት ይናገራል። ምናልባት ያኔ ሌዋውያን ሲከፍቱት አይተው ይሆን የቤትሳሚስ ሰዎች የተመቱት ወይስ  "የቤትሳሚስ ሰዎችም በሸለቆው ውስጥ ስንዴ ያጭዱ ነበር፤ ዓይናቸውንም ከፍ አድርገው ታቦቱን አዩ፥ በማየታቸውም ደስ አላቸው" ባለው ነው የተመቱት?

✔️መልስ፦ 1ኛ ሳሙ.6፥19 ላይ ተጎዱ የተባሉት ታቦተ እግዚአብሔርን እያዩዋት ተመልክተዋት ያልተቀበሉ ሰዎች (የኢያኮንዩ ልጆች) ናቸው። በሳሚስ ቤት የነበሩ ልጆች ግን ደስ ብሏቸው ስለተቀበሏት መቅሠፍት አልደረሰባቸውም። (የግእዙን መጽሐፍ ቅዱስ ወይም የአንድምታውን መጽሐፍ ቅዱስ ተመልከት)

▶️፲. "እግዚአብሔርም ሳሙኤልን አለው። በእነርሱ ላይ እንዳልነግሥ እኔን እንጂ አንተን አልናቁምና በሚሉህ ነገር ሁሉ የሕዝቡን ቃል ስማ" ይላል (1ኛ ሳሙ.8፥7)። እዚህ ላይ የሳሙኤል ልጆች ፍርድን ስላጣመሙ ሕዝቡ ሳሙኤልን ሌላ የሚፈርድልን ንጉሥ ስጠን አሉት እንጂ የሕዝቡ ጥፋት ምን ስለሆነ ነው "እኔን እንጂ አንተን አልናቁምና" የተባለው?

✔️መልስ፦ እውነት ነው የሳሙኤል ልጆች በድለው ነበረ። መፍትሔው ደግሞ እነርሱን ቀጥቶ ሌላ መስፍን መሾም እንጂ እንደአሕዛብ ልማድ ንጉሥ አንግሥልን ማለት አልነበረም። እግዚአብሔርም እኔን ናቁ ማለቱ በመስፍኑ አድሬ ነግሼባቸው የምኖረውን እኔን የባሕርይ ንጉሥን ትተው ፍጡር ንጉሥ ፈለጉ ብሎ ነው። እግዚአብሔርም ናቁኝ ማለቱ ኅሊናቸውን አውቆ ነው። በሳሙኤል አንጻር ሌላ ንጉሥ ይንገሥልን ይበሉ እንጂ በኅሊናቸው የናቁት እግዚአብሔርን ነበረ።

▶️፲፩. "የብንያምንም ነገድ በየወገናቸው አቀረበ፥ ዕጣውም በማጥሪ ወገን ላይ ወደቀ። የማጥሪንም ወገን በየሰዉ አቀረበ፥ ዕጣውም በቂስ ልጅ በሳኦል ላይ ወደቀ፤ ፈለጉትም፥ አላገኙትምም" ይላል (1ኛ ሳሙ.10፥21)። አስቀድሞ ቁ.1 ላይ ሳሙኤል ቀብቶ አንግሦት እያለ ከነገሠ በኋላ ዕጣ ማውጣቱ ለምንድን ነው?

✔️መልስ፦ እውነት ነው ሳሙኤል ሳኦልን አስቀድሞ ሹሞታል። ነገር ግን ሕዝቡ ልሹምብህ ከሚባል የመረጥከውን ሹም ቢባል ይመርጣል። ስለዚህ በሳኦል መመረጥ እንዳያጉረመርሙና የእግዚአብሔርም ፈቃድ መሆኑን ለማሳየት እንደገና በዕጣ ለሳኦል ሲደርሰው ሁሉም ተመልክተዋል።


© በትረ ማርያም አበባው


🌹የዩቲዩብ ቻናሌ:- ንሕነ ዘክርስቶስ https://youtube.com/@edenawizechristos?si=6V4y-73OM3LTzhAf ነው።

🌻የፌስቡክ ገጼ Betremariam Abebaw https://www.facebook.com/profile.php?id=100075547015721 ነው።

💛 ፩ኛ ሳሙኤል ክፍል ፪ 💛

💛ምዕራፍ 6፦
-የእግዚአብሔር ታቦት በፍልስጥኤማውያን ሀገር ሰባት ወር እንደተቀመጠችና በዚህ ምክንያት በሀገሩ አይጦች መብዛታቸው
-ለታቦተ ጽዮን የበደል ካሣ ሰጥተው በሠረገላ አድርገው ወደሌላ ሀገር መላካቸው
-ታቦተ ጽዮን በሠረገላ በሁለት ላሞች እየተሳበች ስትመጣ በአጨዳ የነበሩት የቤትሳሚስ ልጆች ደስ ብሏቸው እንደተቀበሏት፥ የኢያኮንዩ ልጆች ግን የእግዚአብሔርን የቃል ኪዳን ታቦት ተመልክተው ከቤትሳሚስ ሰዎች ጋር አለመቀበላቸው

💛ምዕራፍ 7፦
-ሳሙኤል እስራኤላውያንን ከጣዖት አምልኮ እንዲርቁ መናገሩ እግዚአብሔርን ብቻ እንዲያመልኩ መንገሩ
-እስራኤላውያን ሳሙኤልን ወደእግዚአብሔር ጸልይልን ማለታቸው፣ ሳሙኤልም መሥዋዕትን መሠዋቱ
-ፍልስጥኤማውያን ከእስራኤል ጋር ገጥመው መሸነፋቸው

💛ምዕራፍ 8፦
- የሳሙኤል ልጆች ፍርድ ማድላታቸው፣ መማለጃ መብላታቸው
-እስራኤላውያን ሳሙኤልን ንጉሥ አንግሥልን ማለታቸው

💛ምዕራፍ 9፦
-ሳኦል የአባቱ አህዮች ጠፍተው ሊፈልግ መሄዱ
-ሳኦል አህዮች ያሉበትን ይጠቁመው ዘንድ ወደሳሙኤል መሄዱ
-እግዚአብሔር ለሳሙኤል ሳዖልን እንዲያገግሠው መንገሩ

💛ምዕራፍ 10፦
- ሳሙኤል ሳኦልን ቀብቶ እንዳነገሠው


✝️የዕለቱ ጥያቄዎች✝️
፩. ፍልስጥኤማውያን ለታቦተ ጽዮን የበደል ካሣ ምን ሠጡ?
ሀ. የአካላቸውን እባጭ የመሰለ ወርቅ
ለ. የወርቅ አይጦች
ሐ. ሀ እና ለ
መ. መልስ የለም
፪. ታቦተ ጽዮን በሠረገላ በሁለት ላሞች እየተሳበች ስትመጣ በአጨዳ ላይ እያሉ አይተዋት ደስ ብሏቸው የተቀበሏት እነማን ናቸው?
ሀ. የቤትሳሚስ ሰዎች
ለ. የኢያኮንዩ ልጆች
ሐ. ሀ እና ለ
መ. ሁሉም
፫. ሳሙኤል ፍልስጥኤማውያንን ከአሸነፈ በኋላ አንድ ድንጋይ ወስዶ በመሴፋና በአሮጌው ከተማ መካከል አኖረው ይላል። ይህን ድንጋይ ምን ተብሎ ተጠራ?
ሀ. አቤንኤዜር
ለ. ዕብነ ረድኤት
ሐ. ሀ እና ለ
መ. ሁሉም

https://youtu.be/UDFMrAeXA38?si=1gheWK2NuolFwbZy

✝️መዝሙረ ዳዊት ክፍል 7✝️
✝️መዝሙር ፭
መዝሙር 5 ስለትሩፋን የተጻፈ ነው፡፡ ትሩፋን የሚላቸው አሥሩ ነገድ ተማርከው በኢየሩሳሌም የቀሩ ሁለቱ ነገድ ናቸው፡፡ አንድም ሁሉም ተማርከው አበው አልቀው የቀሩ ውሉድ ናቸው፡፡ አቤቱ ልመናዬን ስማኝ፡፡ ጌታ ሆይ የእኔ ንጉሤም ፈጣሪዬም አንተ ነህ፡፡ እግዚኦ ምርሐኒ በጽድቅከ፡፡ ሰውን መበደል እግዚአብሔርን ማሳዘን ነው፡፡
✝️መዝሙር ፮
ዳዊት በቤርሳቤህ ምክንያት ያስገደለው ኦርዮ የጌታ ምሳሌ ነው፡፡ ኦርዮ ጦማረ ሞቱን ይዞ ከኢየሩሳሌም ወደ አራቦት እንደሄደ ጌታም ከሊቶስጥራ ወደ ቀራንዮ መስቀሉን ተሸክሞ ሄዷልና፡፡ በቀድሞው ዘመን ነቢያት ዘመነ ሣህል ወርኀ ሰላም ነው ሲሉ ኩፋር ለብሰው ኩፋር ጠምጥመው በአምባላይ ፈረስ ተቀምጠው መነሳንስ ይዘው ይታያሉ፡፡ ዘመነ ፀብዕ ወርኀ ኀዘን ነው ሲሉ ከል ለብሰው ከል ጠምጥመው ዘገር ይዘው ይታያሉ፡፡ ዳዊት ኦርዮን በማስገደሉ ተጸጽቶ ጉድጓድ ምሶ አመድ ነስንሶ ማቅ ለብሶ ንስሓ ገባ፡፡ በእንባው የበቀለ ሰርዶ ሰውነቱን ተብትቦ ይዞት ብላቴኖቹ በመቀስ እያረፉ አውጥተውታል፡፡ ዳዊት በነፍሱ ይቅር ሲባል በሥጋው ግን ኃጢአት ያለፍዳ አይነፃምና ልጁ እንዲያሳድደው ሆኗል፡፡

© በትረ ማርያም አበባው


🌹የዩቲዩብ ቻናሌ:- ንሕነ ዘክርስቶስ https://youtube.com/@edenawizechristos?si=6V4y-73OM3LTzhAf ነው።

🌻የፌስቡክ ገጼ Betremariam Abebaw https://www.facebook.com/profile.php?id=100075547015721 ነው።

💝የጥያቄዎች መልስ ክፍል 48💝

▶️፩. "ቀንዴ በእግዚአብሔር ከፍ ከፍ አለ" ይላል። በዚህ አገባብ ቀንድ የተባለ ምንድን ነው?

✔️መልስ፦ የሳሙኤል እናት የሐና እንደ በሬ እንደ ላም ቀንድ ነበራት ለማለት አይደለም። በመጽሐፍ ቅዱስ ብዙ ጊዜ ቀንድ እየተባለ የሚጠራ ሥልጣን ነው። ስለዚህ ቀንዴ በእግዚአብሔር ከፍ ከፍ አለ ማለቷ ሥልጣኔ ከፍ ከፍ አለ ለማለት ነው።

▶️፪. "ስለዚህም የዔሊ ቤት ኃጢአት በመሥዋዕትና በቍርባን ለዘላለም እንዳይሠረይለት ለዔሊ ቤት ምያለሁ" ይላል (1ኛ ሳሙ.3፥14)። ይህ ነገር ከእግዚአብሔር መሓሪነትና ይቅር ባይነትጋ አብሮ ይሄዳል ወይ ምን ለማለት ነው?

✔️መልስ፦ የእግዚአብሔር መሓሪነት አያጠያይቅም። በባሕርይው ቸር መሓሪ እግዚአብሔር ብቻ ነው። የዔሊ ወገኖች ከበደላቸው ቢመለሱ እግዚአብሔር ይቅር ይላቸዋል። ነገር ግን እንደማይመለሱ አውቆ አይሠረይላቸውም አለ።

▶️፫. "የእግዚአብሔርም ታቦት ተማረከች፥ ሁለቱም የዔሊ ልጆች አፍኒንና ፊንሐስ ሞቱ" ይላል (1ኛ ሳሙ.4፥11)። በዚህ ዘመን ብዙ አብያተ ክርስቲያናት በአክራሪ ኃይሎች ይቃጠላሉ፤ ታቦታትና ንዋየ ቅድሳት ይዘረፋሉ፤ አገልጋይ ካህናት ይገደላሉ። አንዳንድ ሰዎች እንዴት ታቦት ካህን ባልሆነ ያውም በማያምን ሰው እጅ ይያዛል? እውነት የምትሰግዱለት ታቦት የሆነ ኃይል ካለው ለምን አይቀሥፍም? ወይስ  ለምን ሌላ ተአምር ሠርቶ አያጠፋቸውም? ይላሉና ከዚህ ጥቅስ ተነሥተው ቢያብራሩልኝ።

✔️መልስ፦ እግዚአብሔር ፈታሒ (ፈራጅ) ብቻ ሳይሆን መሓሪም ነው። አንድ ሰው አጥፍቶ ሳለ እንኳ ወዲያው አያጠፋውም በንስሓ ይመለስ ዘንድ በድሎም ዝም ይለዋል። የእርሱ ማደሪያ የሆነው ታቦት ብቻ ሳይሆን እርሱን ራሱን ኢየሱስ ክርስቶስን ይሁዳ ስሞ ሲሸጠው ሲሰቅሉት እንደሚታረድ በግ ዝም እንዳለ ተገልጿል። ይህ ሁሉ የእግዚአብሔርን መሓሪነት ሰው እንዲረዳ ነው። ታቦተ ጽዮን መማረኳ ስለሁለት ነገር ነው። አንደኛ እስራኤላውያን ስለበደሉ በእርሷ መማረክ አዝነው ንስሓ እንዲገቡ ነው። ሁለተኛ ተማርካ የአሕዛብን አማልክት እነዳጎንን እንድትሰባብርና አሕዛብ የሚያመልኳቸው አማልክት የእጅ ሥራዎች መሆናቸውን አሕዛብ እንዲረዱ ነው። ስለዚህ ታቦት የሚሰርቅ ሰው ያልተቀሠፈ እግዚአብሔር መሓሪ ስለሆነ የንስሓ እድሜ እየሰጠው እንጂ ወዲያው ማጥፋት አቅቶት እንዳልሆነ ሊረዳው ይገባል።

▶️፬. "የእግዚአብሔርም ሰው ወደ ዔሊ መጥቶ አለው። እግዚአብሔር እንዲህ ይላል። በግብጽ በፈርዖን ቤት ባሪያ ሳለ ለአባትህ ቤት ተገለጥሁ" ይላል (1ኛ ሳሙ.2፥27)። የእግዚአብሔር ሰው የተባለው ነቢይ ነው ወይስ ማነው?

✔️መልስ፦ ስሙ ከዚህ ያልተጻፈ ነቢይ ነው። መተርጉማን በሰው አምሳል ስለታየ ነው እንጂ መልአክ ነው ብለዋል።

▶️፭. "እነሆ፥ ለቤትህ ሽማግሌ እንዳይገኝ፥ ክንድህን የአባትህንም ቤት ክንድ የምሰብርበት ዘመን ይመጣል። በእስራኤል በረከት ሁሉ፥ በማደሪያዬ ጠላትህን ታያለህ በቤትህም ለዘላለም ሽማግሌ አይገኝም። ከመሠዊያዬ ያልተቈረጠ ልጅህ ቢገኝ ዓይንህን ያፈዝዘዋል፥ ነፍስህንም ያሳዝናል ከቤትህም የሚወለዱ ሰዎች ሁሉ በጎልማስነት ይሞታሉ" ይላል (1ኛ ሳሙ.2፥31-33)። ክንድ የተባለ ምንድን ነው?

✔️መልስ፦ ክንድ የተባሉ ወገኖች ናቸው። ክንድህን ማለት ወገንህን ማለት ነው፣ የአባትህንም ቤት ክንድ ማለት ደግሞ የአባትህን ወገኖች ማለት ነው። ዘርህን ወገንህን የማጠፋበት ቀን ይመጣል ለማለት የተነገረ ቃል ነው።

▶️፮. "ዔሊም በስፍራው ተኝቶ ሳለ፥ የእግዚአብሔር መብራት ገና ሳይጠፋ፥ ሳሙኤልም የእግዚአብሔር ታቦት ባለበት በእግዚአብሔር መቅደስ ተኝቶ ሳለ" ይላል
(1ኛ ሳሙ.3፥3)። ታቦት ባለበት መቅደስ ውስጥ መተኛት በዛን ዘመን ሥርዓት ነበር? አሁን በዚህ ዘመን ላለን ሰዎችስ በሕንፃ ቤተ ክርስቲያን (በቅኔ ማኅሌት፣ በቅድስት) ውስጥ መተኛት ይፈቀዳል ወይ? አንዳንድ ካህናት ታቦቱ ባለበት መቅደስ ወስጥ ሳይቀር ገብተው የሚተኙ (የሚያንቀላፉ) አሉና ከዚህ ጥቅሰ አንፃር ሥርዓቱን ቢነግሩኝ።

✔️መልስ፦ ሳሙኤል የእግዚአብሔር ታቦት ባለበት በእግዚአብሔር መቅደስ ተኝቶ ነበር መባሉ ከቅጽሩ ውስጥ ሆኖ በዙሪያው ተኝቶ ነበር ለማለት ነው እንጂ በደብተራ ኦሪት ውስጥ ተኝቶ እንደነበረ የሚገልጽ አይደለም። በሕንፃ ቤተክርስቲያን ውስጥ መተኛት ፈጽሞ አይገባም። በፍትሐ ነገሥት አንቀጽ 1 ላይ እንደተገለጸው ቤተክርስቲያን የጸሎት ቤት ናት እንጂ የመኝታ ቤት አይደለችም። በቤተክርስቲያን ውስጥ ሁሉም ንቁሕ ሆኖ ቃለ እግዚአብሔርን በንቃት መከታተል፣ በንቃት መጸለይ ይገባዋል እንጂ መተኛት ፈጽሞ አልተፈቀደም። መቅደስ ውስጥ ገብተው የሚተኙ ካሉም ስሕተት ነው መታረም አለበት።

▶️፯. "የውስጥ አካላቸውን በእባጭ መታ"
ይላልና ትርጓሜው ምንድን ነው?

✔️መልስ፦ የውስጥ አካላቸውን በእባጭ መታ ማለት ብልታቸውን (መሽኛቸውን) በእባጭ መታ ማለት ነው።

▶️፰. "በዚያንም ዘመን የእግዚአብሔር ቃል ክቡር ነበር፤ ራእይም አይገለጥም ነበር" ይላል። ራእይ አይገለጥም ሲል ምን ማለቱ ነው እግዚአብሔር ስዎችን እንዴት ነበር የሚያናግራቸው?

✔️መልስ፦ በዚያን ዘመን እግዚአብሔር ማንንም እንዳላናገረ የሚገልጽ ቃል ነው። በራእይም በሌላም መንገድ ለሕዝቡ አልተገለጠም አልተናገረም ነበር። ስለዚህ በዚያን ወቅት ያናገረው ሰው አልነበረም ማለት ነው።

▶️፱. "ከተሸከሙትም በኋላ የእግዚአብሔር እጅ በታላቅ ድንጋጤ በከተማዪቱ ላይ ኾነች። ከታናሹም እስከ ታላቁ ድረስ የከተማዪቱን ሰዎች መታ ዕባጭም መጣባቸው" ይላል። ማን ነበር ታቦቱን የሚሸከመው?

✔️መልስ፦ ታቦቷን በሠረገላ ስለነበር የሚያደርጓት በሠረገላ አድርገው በላሞች ነበር የሚያስጎትቷት እንጂ በተለየ ታቦተ እግዚአብሔርን የሚሸከም አልነበረም። ወደእስራኤል ስትመጣ ግን ሌዋውያን ይሸከሟት ነበር።

▶️፲. "እግዚአብሔርም ማሕፀኗን ዘግቶ ነበርና ጣውንቷ ታስቈጣት ታበሳጫትም ነበር" ይላል። ጣውንቷ ምን ማለት ነው?

✔️መልስ፦ ጣውንት ማለት ጎባን ማለት ነው። ለምሳሌ አንዲት ሴት ያገባችውን ባል ሌላ ሴት ብታገባው አንዷ ለአንዷ ጎባን ናቸው ይባላል። የወንድም እንዲሁ ነው። አንዱ ያገባት የነበረችን ሴት ሌላ ሲያገባት ጎባን ሆኑ ይባላል።

▶️፲፩. ወራት የባሰባት ሴት ማለት ምን ለማለት ነው? እንዲሁም መካኗ ሰባት ወልዳለች ይላልና ሐና የወለደቻቸው ስንት ናቸው?

✔️መልስ፦ ወራት የባሰባት ሴት ማለት መከራ የተደራረበባትና በዚህም ምክንያት ያዘነች ሴት ማለት ነው። ሐና ከሳሙኤል በኋላ ሦስት ወንዶች ልጆችንና ሁለት ሴቶች ልጆችን ወልዳለች። ሳሙኤል ምስፍናን ከክህነት አንድ አድርጎ ይኖር ስለነበር ስለሁለት ተቆጥሮ ነው መካኗ ሐና ሰባት ወልዳለች የተባለው። በሌላ አገላለጽ ሰባት በዕብራውያን ፍጹም ተብሎ ይተረጎማል። ስለዚህ ፍጹም ደግ ልጅ ሳሙኤልን ወለድኩ ስትል ሐና መካኗ ሰባት ወልዳለች ብላ ስለራሷ ተናግራለች።


© በትረ ማርያም አበባው


🌹የዩቲዩብ ቻናሌ:- ንሕነ ዘክርስቶስ https://youtube.com/@edenawizechristos?si=6V4y-73OM3LTzhAf ነው።

🌻የፌስቡክ ገጼ Betremariam Abebaw https://www.facebook.com/profile.php?id=100075547015721 ነው።

💟 ፩ኛ ሳሙኤል ክፍል ፩ 💟

💟ምዕራፍ 1፦
-ሕልቃና ለሠራዊት ጌታ ለእግዚአብሔር ይሠዋ ዘንድ ከከተማው ከአርማቴም በየዓመቱ ይወጣ እንደነበረ
-ሐና ልጅ ስላልነበራት ወደ እግዚአብሔር እንደጸለየችና ልጅ ከወለደች ለእግዚአብሔር እንደምትሰጠው መሳሏ
-ዔሊ ሐናን በሰላም ሂጂ የእስራኤል አምላክ ከአንቺ ጋር ይሁን ብሎ እንደመረቃት
-ሐና ወንድ ልጅ እንደወለደችና ስሙንም ሳሙኤል እንዳለችው

💟ምዕራፍ 2፦
-ሐና በጸሎቷ የእግዚአብሔርን ቅዱስነት፣ ጻድቅነት፣ ዐዋቂነት፣ ጸሎትን የሚሰማ መሆኑን፣ የጻድቃንን ዘመን እንደሚባርክ መግለጿ
-ሐና ኃይለኛ በኃይሉ፣ ሀብታም በሀብቱ፣ ጥበበኛ በጥበቡ መመካት እንደሌለበት በጸሎቷ መግለጿ
-የካህኑ የኤሊ ልጆች ክፉዎች እንደነበሩ መገለጹ
-ካህኑ ኤሊ ልጆቹ መበደላቸውን ሰምቶ አለመገሠጹ

💟ምዕራፍ 3፦
-ሳሙኤል እግዚአብሔርን ያገለግል እንደነበር
-እግዚአብሔር ሳሙኤልን እንደጠራው
-ኤሊ ልጆቹን ባለመገሠጹ በእርሱና በልጆቹ መቅሠፍት እንደሚመጣ እግዚአብሔር ለሳሙኤል መግለጡ

💟ምዕራፍ 4፦
-ፍልስጥኤማውያን እስራኤላውያንን መግጠማቸውና ማሸነፋቸው
-ፍልስጥኤማውያን ታቦተ ጽዮንን መማረካቸው፣ አፍኒንና ፊንሐስን መግደላቸው
-ኤሊ የታቦተ ጽዮንን መማረክ ሲሰማ ከወንበሩ ወድቆ እንደሞተ

💟ምዕራፍ 5፦
-ፍልስጥኤማውያን ታቦተ ጽዮንን ማርከው ወደዳጎን ቤት ማስገባታቸውና በዳጎን አጠገብ ማስቀመጣቸው
-ዳጎንን በእግዚአብሔር ታቦት ፊት በምድር ላይ በግንባሩ ወድቆ ማግኘታቸው፣ የዳጎን ራስ ሁለቱ እጆቹም ተቆርጠው እየራሳቸው ወድቀው እንደነበር
-በታቦተ ጽዮን ምክንያት የማረኳት ሀገር ሰዎች መታመማቸው


✝️የዕለቱ ጥያቄዎች✝️
፩. የኤሊ ልጆች አፍኒንና ፊንሐስ በደላቸው ምን ነበር?
ሀ. የእግዚአብሔርን ቍርባን ይንቁ ነበር
ለ. በደብተራ ኦሪት ከሚያገለግሉ ሴቶች ጋር ይተኙ ነበር
ሐ. ሀ እና ለ
መ. መልስ የለም
፪. ታቦተ ጽዮንን ዳጎን ከተባለው ጣዖት ጎን ባስቀመጧት ጊዜ ምን ሆነ?
ሀ. ዳጎን በግንባሩ ወድቆ ተገኘ
ለ. የዳጎን እጆች ተቆርጠው ወድቀው ተገኙ
ሐ. የዳጎን ራስ ተቆርጦ ወድቆ ተገኘ
መ. ሁሉም
፫. የነቢዩ ሳሙኤል እናት ማን ትባላለች?
ሀ. ፍናና
ለ. ሐና
ሐ. ሕልቃና
መ. ኢካቦድ

https://youtu.be/agl5uXy6Tpc?si=zjp5zt5pNE2Gsp4G

🌹መዝሙረ ዳዊት ክፍል 6🌹
🌹ምዕራፍ ፫
ሰይጣን ያስጀመረውን አያስፈጽምም፡፡ እግዚአብሔር ሆይ ዘውዴ አንተ ነህ፡፡ ዘውድ እንዲያስከብር የምታስከብረኝ አንተ ነህ፡፡ ልመናዬን ወደ እግዚአብሔር አቀረብኩ፡፡ (እርሱም) በሰማያዊት መቅደሱ ሆኖ ልመናዬን ሰማኝ፡፡
🌹ምዕራፍ ፬
ሳዶቅ የሚባል አንድ ሰው ነበረ፡፡ ሰው ሙቶ መቃብር ከገባ በኋላ ፈርሶ በስብሶ ይቀራል ነፍሱም እንደ ጉም ሽንት በንና ትቀራለች የሚል ነው፡፡ የእርሱን ባህል የያዙ ሁሉ ሰዱቃውያን ተብለዋል፡፡ ማኒ ገንዘብ ጠፋበት ገንዘቡም አህያ ነው፡፡ በጾም በጸሎት በቀኖና ስኖር እንዴት የእኔ ገንዘብ ይጥፋ ብሎ በጸሎቱ ተመክቶ የሐሰት መሥዋዕት ሠውቶ ቀኖና ገባ፡፡ ገንዘቤ አህያዬ ቢገኝ ሠራዒ መጋቢ አለ እላለሁ ባይገኝ ግን የለም እላለሁ አለ፡፡ ጌታም በትሕትና ቢለምኑት ነው እንጂ በሐሰት ቢለምኑት አይሰማምና ይገኝ የነበረውን አጠፋበት ይቀርብ የነበረውን አራቀበት፡፡ ሱባኤው ሲፈጸም አልባቲ ሠራዒ ወመጋቢ ለዛቲ ዓለም፡፡ ለዚህች ዓለም ሠራዒ መጋቢ የላትም ብርሃናት በልማድ ይመላለሳሉ፣ አፍላጋት በልማድ ይፈሳሉ፣ ክረምትና በጋ ቀንና ሌሊት በልማድ ይፈራረቃሉ፣ ሰውም በልማድ ይወለዳል በልማድ ይሞታል ብሎ ተነሣ፡፡ መዝሙር 4ን ዳዊት የጻፈው ለማኒ ምላሽ ነው፡፡ የሚገባ ቁጣ ሕፃናት የተማሩትን እንዳይገድፉ፣ ከሓድያን ሃይማኖትን እንዳይነቅፉ መቆጣት ነው፡፡ የክርስቶስን ሥጋውን ደሙን ከመቀበላችን የተነሣ ሃይማኖት ፀናልን፣ ጸጋ ክብር ጸናልን፡፡

© በትረ ማርያም አበባው


🌹የዩቲዩብ ቻናሌ:- ንሕነ ዘክርስቶስ https://youtube.com/@edenawizechristos?si=6V4y-73OM3LTzhAf ነው።

🌻የፌስቡክ ገጼ Betremariam Abebaw https://www.facebook.com/profile.php?id=100075547015721 ነው።

💖የጥያቄዎች መልስ ክፍል 47💖

▶️፩. "ወደዚህ ቅረቢ ምሳም ብዪ፥ እንጀራሽንም በሆምጣጤው አጥቅሺ" ይላል (ሩት 2፥14)። በሆምጣጤው ጥቀሽ ሲል ትርጓሜው ምንድን ነው?

✔️መልስ፦ ሆምጣጤ የሚባለው መራራነት ያለው የከረመ ወይን ወይም የሚያሰክር መጠጥ ነው። በዚህ እያጣቀስሽ ብዪ ማለት ነው።

▶️፪. "ዋርሳ መሆኔ እውነት ነው፤ ነገር ግን ከኔ የሚቀርብ ዋርሳ አለ" ይላል (ሩት 3፥12)። ከእኔ የሚቀርብ ዋርሳ አለ ሲል ትርጓሜው ምንድን ነው?

✔️መልስ፦ ዋርሳ በእስራኤል ባህል መሠረት አንድ ሰው ሚስት አግብቶ ልጅ ሳይወልድ ቢሞት የሟቹ ወንድሙ ወይንም የቅርብ ዘመዱ የሟቹን ሚስት አግብቶ በሕግ ለሟቹ ዘር የሚተካበት መንገድ ነው።

▶️፫. ሩት ፩፥፲፭ "ኑኃሚንም እነሆ ባልንጀራሽ ወደ ሕዝቧና ወደ አማልክቷ ተመለሰች አንችም ደግሞ ከባልንጀራሽ ጋራ ተመለሽ አለቻት" ይላል። ሩትና ዖርፋ ቀድሞ በእግዚአብሔር አያምኑም ነበር ማለት ነው? ዝቅ ብሎም ሩት ለኑኃሚን አምላክሽ አምላኬ ይሆናል ብላለች እንዲህስ ከሆነ ለምን ከማያምኑጋ ተጋቡ በመጀመርያ።

✔️መልስ፦ የአቤሜሌክ ልጆች ሩትንና ዖርፋን ሲያገቡ ወደአይሁዳዊ እምነት ቀይረዋቸው ይሁን አይሁን የተገለጸ ነገር አላገኘሁም። ባሎቻቸው ሲሞቱ ዖርፋ ከወገኖቿ ጋር ወደጣዖት አምልኮዋ እንደተመለሰች ተገልጿል። ሩት ግን አምላክሽ አምላኬ ይሆናል ብላ ኑኃሚንን ተከትላታለች። መጀመሪያውንም ሳያምኑ አግብተዋቸው ከሆነ ሕገ ኦሪትን ሽረው አግብተዋቸው ነበረ ማለት ነው። አሳምነው አግብተዋቸው ከሆነም መልካም አድርገው ነበረ ማለት ነው። ነገር ግን በዚህ ዙሪያ እንዴት እንደነበረ ተጨማሪ የተጻፈ ስላላገኘሁ አላውቀውም።

▶️፬. ሁሉን የሚችል አምላክ አስመርሮኛልና መራራ በሉኝ እንጅ ኑኃሚን አትበሉኝ ስትል። እግዚአብሔር ሰዎችን ያስመርራል?

✔️መልስ፦ እግዚአብሔር ሰውን አያስመርርም። ነገር ግን ረድኤቱን ባይሰጥ ስለሆነ ይህ ሁሉ የደረሰባት ረድኤት መንሣቱን ከማስመረር ቆጥራ ኑኃሚን እንዲህ አለች። መራራ ሕይወትን ስለኖረች የራሷን መመረር ለመግለጽ የተናገረችው ነው።

▶️፭. "ኑኃሚንም ምራቶቿን ኺዱ ወደእናቶቻችኹም ቤት ተመለሱ በእኔና በሞቱት እንዳደረጋችኹ እግዚአብሔር ቸርነት ያድርግላችኹ" ይላል። ምንድን ነበር በእርሷ እና በሞቱት ያደረጉት?

✔️መልስ፦ ዖርፋና ሩት ኑኃሚን ቀሪ ልጆች እንደሌሏት እያወቁ ተከትለንሽ እንሄዳለን ማለታቸው ይህ ትልቅ የቸርነት ሥራ ነው። እናታቸውን መንከባከብ ለሞቱት ልጆቿም እንደማሰብ ስለተቆጠረላቸው ነው እንዲህ መባሉ።

▶️፮. "እነርሱም ተቀመጡ። ቦዔዝም የቅርብ ዘመዱን ከሞዐብ ምድር የተመለሰችው ኑኃሚን የወንድማችንን የአቢሜሌክን ጢንጦ ትሸጣለች" ይላል (ሩት 4፥3)። ጢንጦ ምንድን ነው?

✔️መልስ፦ ጢንጦ የሚባለው የመሬት ርስት ድርሻ ነው።

▶️፯. “ቦዔዝም፦ እርሻውን ከኑኃሚን እጅ በምትገዛበት ቀን፥ ለሞተው በርስቱ ስሙን እንድታስነሣለት ከሟቹ ሚስት ከሞዓባዊቱ ከሩት ደግሞ ትገዛለህ አለ” ይላል (ሩት 4፥5)። ለሞተ ሰው በርስቱ ስሙን እንድታስነሣለት የሚለው ምን ለማለት ነው?

✔️መልስ፦ በዋርሳ ሕግ የቅርብ ዘመድ የሟቹን ሚስት ካገባ በኋላ የሚወለደው ልጅ በሕግ በሞተው ሰው ይጠራል። ልጁን የወለደው ሌላ ሰው ቢሆንም ነገር ግን ወልዶ ስሙ እንዲነሣለት (እንዲታወስለት) አደረገ ማለት ነው።

▶️፰. "መቤዠት ብትወድድ ተቤዠው፤ መቤዠት ባትወድድ ግን ከአንተ በቀር ሌላ ወራሽ የለምና፥ እኔም ከአንተ በኋላ ነኝና እንዳውቀው ንገረኝ አለው። እርሱም። እቤዠዋለሁ አለው" ይላል (ሩት 4፥4)። በዚህ ዐውድ "መቤዠት" ሲል ምን ለማለት ነው?

✔️መልስ፦ መቤዠት ማለት በዚህ አግባብ ሚስቱን አግብተህ ስለእርሱ ለእርሱ በእርሱ ስም የሚጠራ ልጅ ውለድለት ማለት ነው።

▶️፱. ሩት 4፥6 ላይ የራሴን ርስት እንዳላበላሽ ሲል ምን ማለቱ ነው?

✔️መልስ፦ ሁለት ሚስት አግብቼ ማስተዳደር እንዳያቅተኝ ለማለት የተናገረው ነው። ርስቴ ሲበዛ እንዳይጠፋብኝ ማለቱ ነው። ርስት ሲበዛ ይጠፋልና።

▶️፲. "እንግዲህ ታጠቢ፥ ተቀቢ፥ ልብስሽን ተላበሺ፥ ወደ አውድማውም ውረጂ፤ ነገር ግን መብሉንና መጠጡን እስኪጨርስ ድረስ ለሰውዮው አትታዪው" ይላል (ሩት 3፥3)። የዘመኑ የአለባበስና የቅባት አጠቃቀም ሁኔታ (አጠቃላይ ለማጌጥ የሚደረጉ ነገሮች) ከዚህ ጥቅስ አንፃር ተቀባይነት የለውም ወይ? ለማጌጥ መሆን ያለበትስ (የሚፈቀደው) እስከምን ድረስ ነው?

✔️መልስ፦ አለባበስ፣ መታጠብ፣ ሽቱ መቀባትና ሌሎችም ኃጢአት የሚሆኑት ለዝሙትና ለትዕቢት የሚጋብዙ፣ ሌላውን የሚያሰናክሉ ሆነው ከተገኙ ነው። ከዚህ መሠረታዊ ሐሳብ ሳናፈነግጥ ብንታጠብ፣ ብንለብስ ምንም ችግር የለውም። የዘመኑ አለባበስም መለካት ያለበት በዚህ ሂደት ነው። ለፍትወት የሚዳርግ ከሆነ መተው ይገባል።


© በትረ ማርያም አበባው


🌹የዩቲዩብ ቻናሌ:- ንሕነ ዘክርስቶስ https://youtube.com/@edenawizechristos?si=6V4y-73OM3LTzhAf ነው።

🌻የፌስቡክ ገጼ Betremariam Abebaw https://www.facebook.com/profile.php?id=100075547015721 ነው።

💙💙💙 የዕለቱ ጥያቄዎች 💙💙💙
፩. እስራኤላውያን እግዚአብሔርን ቢበድሉ የሞዓብ ንጉሥ ዔግሎም መታቸው። በኋላ እንደገና ወደእግዚአብሔር ሲጸልዩ እግዚአብሔር መስፍን አስነሥቶ የሞዓብን ንጉሥ ዔግሎምን መስፍኑ ገደለላቸው። ይህ መስፍን ማን ነው?
ሀ. ጎቶንያል
ለ. አዶኒቤዜቅ
ሐ. ናዖድ💙
መ. አቢኒሔም
፪. ሲሣራን በካስማ (በመዶሻ) መትቶ የገደለው ማን ነው?
ሀ. ዲቦራ
ለ. ባርቅ
ሐ. ኢያዔል💙
መ. ሔቤር
፫. ከሚከተሉት ውስጥ ትክክል የሆነው የቱ ነው?
ሀ. ዲቦራ ሕዝበ እስራኤልን ትገዛ ነበረ
ለ. ዲቦራ ነቢይት ነበረች
ሐ. የእስራኤል ልጆች ለፍርድ ወደ ዲቦራ ይመጡ ነበረ
መ. ሁሉም💙
፬. ጌዴዎን ምድያማውያንን ገጥሞ ድል ከማድረጉ በፊት ምን አደረገ?
ሀ. ለእግዚአብሔር መሥዋዕት አቀረበ
ለ. የጣዖት መሠዊያዎችን አፈራረሰ
ሐ. በተባዘተ የበግ ጸጉር ላይ ምልክትን ያደርግለት ዘንድ እግዚአብሔርን ጠየቀ
መ. ሁሉም💙
፭. ጌዴዎን ምድያማውያንን ያሸነፈ ከእርሱ ጋር ስንት ተዋጊዎችን ይዞ ሄዶ ነው?
ሀ. 22,000
ለ. 300💙
ሐ. 10,000
መ. 32,000
፮. እስራኤላውያን ጌዴዎን ከምድያማውያን ስላዳናቸው አንተም ልጅህም የልጅ ልጅህም ደግሞ ግዙን ሲሉት ምን ብሎ መለሰላቸው?
ሀ. እኔ እገዛችኋለሁ
ለ. እግዚአብሔር ይገዛችኋል💙
ሐ. ልጄ ይገዛችኋል
መ. የልጅ ልጄ ይገዛችኋል
፯. በጌዴዎን ልጅ በኢዮአታም ምሳሌ ዛፎች ተሰብስበው ንገሽልን ሲሏት እሺ ያለችው ማን ናት?
ሀ. ወይራ
ለ. በለስ
ሐ. ዶግ💙
መ. ዝግባ
፰. ሰባ ወንድሞቹን ገድሎ በእስራኤል ላይ ገዢ የሆነና በኋላ ሴት በወፍጮ መጅ አናቱን መትታው ቆስሎ ሳለ ጋሻ ዣግሬውን ሴት ገደለችው እንዳልባል ግደለኝ ያለ ማን ነው?
ሀ. ገዓል
ለ. አቤድ
ሐ. አቤሜሌክ💙
መ. ኢዮአታም
፱. ዮፍታሔ የአሞን ልጆችን ጦርነት ሊገጥም ሲሄድ በደህና ከተመለስኩ ከቤቴ ደጅ ወጥቶ የሚቀበለኝን ለእግዚአብሔር መሥዋዕት አደርገዋለሁ ብሎ ተስሎ ነበረ። በደህና ሲመለስ ከቤቱ ደጅ ወጥቶ የተቀበለውና ለእግዚአብሔር መሥዋዕት ያደረገው ማንን ነው?
ሀ. የሚወዳትን አንዲት ልጁን💙
ለ. ያሳደገውን በግ
ሐ. ወይፈኖችን
መ. የልጁን በጎች
፲. መልአከ እግዚአብሔር ለማኑሄ ሚስት ምን አላት?
ሀ. ሶምሶንን በጸነሰሽበት ወቅት የወይን ጠጅን አትጠጪ
ለ. ሶምሶን ሲወለድ በራሱ ላይ ምላጭ አይድረስ
ሐ. ሶምሶን ከማኅፀን ጀምሮ ለእግዚአብሔር የተለየ ናዝራዊ እንደሚሆን ነገራት
መ. ሁሉም💙
፲፩. ስለሶምሶን ትክክል የሆነው የቱ ነው?
ሀ. የአንበሳ ደቦል ገድሎ በሌላ ጊዜ ከሞተው አንበሳ አፍ ማር አግኝቶ በልቷል
ለ. 300 ቀበሮዎችን ሰብስቦ በየመካከላቸው ችቦ አስሮ የፍልስጥኤማውያንን እህል አቃጥሏል
ሐ. በአህያ መንጋጋ 1000 ሰው ገድሎ በተጠማ ጊዜ ከአህያው መንጋጋ ውሃ ወጥቶለት ጠጥቶ ከጥሙ አረፏል
መ. ሁሉም💙
፲፪. የሶምሶን ኃይሉ የደከመና በፍልስጥኤማውያን እጅ የተያዘው መቼ ነው?
ሀ. በሰባት ባልደረቀ ርጥብ ጠፍር በታሰረ ጊዜ
ለ. በሰባት አዳዲስ ገመዶች በታሰረ ጊዜ
ሐ. ጸጉሩን በተላጨ ጊዜ💙
መ. የራሱን ጸጉር ከድር ጋር ጎንጉነው በችካል በተከሉት ጊዜ
፲፫. ፍልስጥኤማውያን ሶምሶንን ከያዙት በኋላ ምን አደረጉት
ሀ. ዓይኖቹን አወጡበት
ለ. ወደጋዛ አውርደው በእግር ብረት አሰሩት
ሐ. በግዞት አድርገው እህል ያስፈጩት ነበረ
መ. ሁሉም ዠ💙
፲፬. ሶምሶን ስለገደላቸው ሰዎች ትክክል የሆነው የቱ ነው?
ሀ. በሕይወቱ ከገደላቸው በሞቱ የገደላቸው ይበዛሉ💙
ለ. በሞቱ ከገደላቸው በሕይወቱ የገደላቸው ይበዛሉ
ሐ. በሞቱ የገደላቸውና በሕይወቱ የገደላቸው ብዛታቸው እኩል ነው
መ. በሕይወቱ የገደላቸው በሞቱ ከገደላቸው ይበዛሉ

፲፭. አቤሜሌክ ሚስቱን ኑኃሚንንና ልጆቹን ይዞ ወደ ሞዓብ የተሰደደ በምን ምክንያት ነበር?
ሀ. በሀገሩ ጦርነት ስለነበረ
ለ. በሀገሩ ረኀብ ስለሆነ💙
ሐ. በሀገሩ በሽታ ስለሆነ
መ. ሁሉም
፲፮. ኑኃሚን ወደሀገሯ ወደቤተልሔም ስትመለስ ሕዝብሽ ሕዝቤ አምላክሽ አምላኬ ይሆናል ብላ የተከተለቻት የልጇ ሚስት ማን ናት?
ሀ. ሩት💙
ለ. ዖርፋ
ሐ. ራኬብ
መ. ራሔል
፲፯. ሩትን አግብቶ ኢዮቤድን የወለደ ማን ነው?
ሀ. አሚናዳብ
ለ. ቦዔዝ💙
ሐ. ዕሤይ
መ. ነአሶን

© በትረ ማርያም አበባው

🌹የዩቲዩብ ቻናሌ:- ንሕነ ዘክርስቶስ https://youtube.com/@edenawizechristos?si=6V4y-73OM3LTzhAf ነው።

🌻የፌስቡክ ገጼ Betremariam Abebaw https://www.facebook.com/profile.php?id=100075547015721 ነው።

💛መጽሐፈ ሩት💛

💛ምዕራፍ 1፦
-መሳፍንት ይገዙ በነበረ ጊዜ በሀገሩ ላይ ረኀብ መሆኑ፣ አቤሜሌክም ከሚስቱና ከሁለት ልጆቹ ጋር ከይሁዳ ቤተልሔም ተነሥቶ ወደሞዓብ ምድር መሄዱ፣ የሚስቱ ስም ኑኃሚን እንደሆነ
-አቤሜሌክ በተሰደደበት ሀገር መሞቱ፣ ልጆቹ ከሞዓብ ሴቶችን አግብተው እንደኖሩና ትንሽ ቆይተው እንደሞቱ
-ኑኃሚን ከሁለት ምራቶቿ ጋር ብቻዋን መቅረቷ፣ በሞዓብ ምድር ሳለች እግዚአብሔር ሕዝቧን እንደጎበኘ መስማቷና ወደሀገሯ ለመመለስ መወሰኗ፣ ምራቶቿን ግን መርቃ ወደወገኖቻችሁ ተመለሱ ማለቷ፣ የአንዱ ልጇ ሚስት ዖርፋ ወደወገኖቿ መመለሷ
-ሩት ኑኃሚንን ወደምትሄጂበት እሄዳለሁ ሕዝብሽ ሕዝቤ አምላክሽም አምላኬ ይሆናል በምትሞችበትም እሞታለሁ ብላ ተከትላት መሄዷ

💛ምዕራፍ 2፦
-ሩት ከቦዔዝ እርሻ አጫጆች ኋላ ኋላ እየሄደች በእርሻ ውስጥ መቃረሟ፣ ቦዔዝም ቃርሚያ ለመቃረም ወደሌላ እርሻ አትሂጂ ከዚሁ ቃርሚ እንዳላት፣ ለኑኃሚን ያደረገችላትን መልካም ነገር ሰምቶ እንደመረቃት፣ የተጠበሰ እሸት እንደሰጣት፣ የቃረመችውን ወቅታ ወደኑኃሚን እንደወሰደችው

💛ምዕራፍ 3፦
-ኑኃሚን ሩትን ታጥበሽ፣ ተቀብተሽ ወደ ቦዔዝ አውድማ ውረጂ እንዳለቻት፣ ሩት አማቷ ያዘዘቻትን ሁሉ እንዳደረገች፣ ቦዔዝ ስድስት መሥፈሪያ ገብስ ሠፈሮ ለሩት እንደሰጣት

💛ምዕራፍ 4፦
-ቦዔዝ ሩትን እንዳገባት፣ ሩትም ከእርሱ ወንድ ልጅን እንደወለደችና ስሙንም ኢዮቤድ እንዳለችው፣ ኢዮቤድ የዳዊትን አባት እሴይን እንደወለደ


💙የዕለቱ ጥያቄዎች💙
፩. አቤሜሌክ ሚስቱን ኑኃሚንንና ልጆቹን ይዞ ወደ ሞዓብ የተሰደደ በምን ምክንያት ነበር?
ሀ. በሀገሩ ጦርነት ስለነበረ
ለ. በሀገሩ ረኀብ ስለሆነ
ሐ. በሀገሩ በሽታ ስለሆነ
መ. ሁሉም
፪. ኑኃሚን ወደሀገሯ ወደቤተልሔም ስትመለስ ሕዝብሽ ሕዝቤ አምላክሽ አምላኬ ይሆናል ብላ የተከተለቻት የልጇ ሚስት ማን ናት?
ሀ. ሩት
ለ. ዖርፋ
ሐ. ራኬብ
መ. ራሔል
፫. ሩትን አግብቶ ኢዮቤድን የወለደ ማን ነው?
ሀ. አሚናዳብ
ለ. ቦዔዝ
ሐ. እሴይ
መ. ነአሶን

https://youtu.be/T5X6QaQfO6k?si=Hvj6l_FtldcL3DuB

💙መዝሙረ ዳዊት ክፍል 5💙
💙መዝሙር ፪
ለምንት አንገለጉ አሕዛብ የሚለው ዓይነት ደረቅ ሐዲስ ይባላል፡፡ ለዳዊት የክርስቶስ ስቅለት ተገልጾለት የጻፈው ነው፡፡ ከንቱ ማለት አስበውት ሳይሠሩት የቀረ ነው፡፡ አብ ዝንቱ ውእቱ ወልድየ ብሎ የመሰከረለት ወልድን ዕሩቅ ብእሲ ማለት አብን ዕሩቅ ብእሲ ማለት ነው፡፡ መንፈስ ቅዱስ በአምሳለ ርግብ ወርዶ ለወልድ ከመሰከረለት በኋላ ዕሩቅ ብእሲ ማለት መንፈስ ቅዱስንም የዕሩቅ ብእሲ ሕይወት ማለት ነው፡፡ እመቤታችን ቅድስት ድንግል ማርያም ፀወነ ሥጋ ፀወነ ነፍስ ፀወነ ጻድቃን ወኃጥኣን ናትና ጽዮን ትባላለች፡፡ ክርስቶስን የባሕርይ አምላክ ወንጌልን ፍጽምት ሕግ በሉ፡፡ ክርስቶስን ዕሩቅ ብእሲ ወንጌልን ዲቃላ ሕግ አትበሉ፡፡ ለእግዚአብሔር በመፍራት በመንቀጥቀጥ ተገዙ፡፡

© በትረ ማርያም አበባው


🌹የዩቲዩብ ቻናሌ:- ንሕነ ዘክርስቶስ https://youtube.com/@edenawizechristos?si=6V4y-73OM3LTzhAf ነው።

🌻የፌስቡክ ገጼ Betremariam Abebaw https://www.facebook.com/profile.php?id=100075547015721 ነው።