ሀቅን ፍለጋ ከቁርዐንና ከሀዲስ አርባ ምንጭ ዪኒቨርስቲ AMU chamo Campus

ከዩሱፍ ታሪክ ከምንማራቸው ቁም ነገሮች ውስጥ አንዱ እነሆ
~
የዩሱፍ ወንድሞች ዩሱፍን ለመገላገል ብዙ በደል አድርሰውባቸዋል። ይሁን እንጂ የአላህ ድንቅ ስራ ሆኖ ከዘመናት በኋላ የደረሰው ደርሶ፣ ያለፈው አልፎ ዩሱፍን አንግሶ እነሱን ደግሞ በችግር ፈተኖ አገናኛቸው። ዩሱፍ ለይተዋቸዋል። እነሱ ግን አላወቁም። የንጉሱ መስፈሪያ ዋንጫ በ"ቢኒያሚን" ጓዝ ውስጥ ሲገኝ ዩሱፍን በነገር የሚወጋ እንዲህ የሚል ቃል ተናገሩ:-
{إِن یَسۡرِقۡ فَقَدۡ سَرَقَ أَخࣱ لَّهُۥ مِن قَبۡلُۚ}
"ቢሰርቅ ከአሁን በፊት የርሱው ወንድም በእርግጥ ሰርቋል።"

ዩሱፍን ማለታቸው ነው። ዩሱፍ ዛሬ ስልጣን ላይ፣ ሃብት ላይ ናቸው። እርምጃ መውሰድ፣ እሱ ቢቀር የሚወስዱት እህል ላይ ማእቀብ መጣል ይችላሉ። ቢሆንም እዚያ ሊደርሱ ቀርቶ ለውንጀላቸው ግልፅ ምላሽ እንኳን አልሰጧቸውም። ዋጥ አደረጉት።

{ فَأَسَرَّهَا یُوسُفُ فِی نَفۡسِهِۦ وَلَمۡ یُبۡدِهَا لَهُمۡۚ قَالَ أَنتُمۡ شَرࣱّ مَّكَانࣰاۖ وَٱللَّهُ أَعۡلَمُ بِمَا تَصِفُونَ }
"ዩሱፍም (ይህችን ንግግር) በነፍሱ ውስጥ ደበቃት፡፡ ለእነሱም አልገለጣትም፡፡ 'እናንተ ሥራችሁ የከፋ ነው፡፡ አላህም የምትሉትን ሁሉ ይበልጥ ዐዋቂ ነው' አለ" በምላስ ሳይሆን በልብ። [ዩሱፍ: 77]

ዩሱፍ ከራሳቸው ለመከላከል አልቸኮሉም። ባይሆን የኋላ ኋላ ምን አሏቸው?
{ قَالَ هَلۡ عَلِمۡتُم مَّا فَعَلۡتُم بِیُوسُفَ وَأَخِیهِ إِذۡ أَنتُمۡ جَـٰهِلُونَ }
"እናንተ የማታውቁ በነበራችሁ ጊዜ በዩሱፍና በወንድሙ ላይ የሰራችሁትን ግፍ ዐወቃችሁን?' አላቸው፡፡'' [ዩሱፍ: 89]

በዚህን ጊዜ ነበር የሚመላለሱት ከዩሱፍ ጋር እንደሆነ የገባቸው።
{ قَالُوۤا۟ أَءِنَّكَ لَأَنتَ یُوسُفُۖ قَالَ أَنَا۠ یُوسُفُ وَهَـٰذَاۤ أَخِیۖ قَدۡ مَنَّ ٱللَّهُ عَلَیۡنَاۤۖ إِنَّهُۥ مَن یَتَّقِ وَیَصۡبِرۡ فَإِنَّ ٱللَّهَ لَا یُضِیعُ أَجۡرَ ٱلۡمُحۡسِنِینَ }
" 'አንተ በእርግጥም ዩሱፍ ነህንዴ?' አሉት። 'እኔ ዩሱፍ ነኝ፡፡ ይህም ወንድሜ ነው። አላህ በኛ ላይ በእርግጥ ለገሰልን። እነሆ! የሚጠነቀቅና የሚታገስ ሰው (አላህ ይክሰዋል)። አላህ የበጎ አድራጊዎችን ዋጋ አያጠፋምና' አለ።" [ዩሱፍ: 90]

እዚህ ላይ የሚያሳቅቅ ነገር እንደገጠማቸው ገባቸው። "በአላህ እንምላለን፡፡ አላህ በኛ ላይ በእርግጥ አበለጠህ፡፡ እኛም በእርግጥ አጥፊዎች ነበርን አሉ።"
ዩሱፍ ግን በበደል ላይ በደል ቢደራረብባቸውም ጥፋታቸውን ባመኑት ወንድሞቻቸው ላይ ሆደ ሰፊ ነበር የሆኑት። እንዲህ ሲሉ ያለፈውን ሁሉ አለፉት:-
{ قَالَ لَا تَثۡرِیبَ عَلَیۡكُمُ ٱلۡیَوۡمَۖ یَغۡفِرُ ٱللَّهُ لَكُمۡۖ وَهُوَ أَرۡحَمُ ٱلرَّ ٰ⁠حِمِینَ }
«ዛሬ በናንተ ላይ ወቀሳ የለባችሁም፡፡ አላህ ለእናንተ ይምራል፡፡ እርሱም ከአዛኞች ሁሉ ይበልጥ አዛኝ ነው» አላቸው፡፤
[ዩሱፍ: 92]

ይህን ትምህርት ያዙና የበደሏችሁን ሰዎች እና ይቅር ለማለት የሚተናነቃችሁን ስሜት አስቡት። የምንማረው ለመለወጥ ነው አይደል? ስሜታችንን ረግጠን፣ እልሃችንን ውጠን ስለ አላህ ሁሉን ይቅር እንበል። ከዩሱፍ ታሪክ እንማር።
~
የቴሌግራም ቻናል:-
https://t.me/IbnuMunewor

ንፅፅር ላይ ለተሰማራችሁ ወገኖች አጭር ጥቆማ
~
1- በቀዳሚነት የማነሳው ስራችሁን አጠናክራችሁ ቀጥሉ የሚል ነው። የግርግር ፈጣሪዎች ዋና አላማ ይህን ማሰናከል ስለሆነ ይበልጥ ትጋታችሁን ጨምሩ።
2- አቅማችሁን ይበልጥ አዳብሩ። በተለይም በቀዳሚነት የራሳችሁን ኢስላማዊ ግንዛቤ ከዐቂዳ ጀምራችሁ አጥሩ። እንደ አጠቃላይ ጥልቅ የሆነ ንባብና ጥናት ይኑራችሁ። ዘርፉ በደከመ አቅም የሚገባበት አይደለም። ወይ ባጭር ታጥቃችሁ ግቡ። ካልሆነ ይቅርባችሁ። ቦታውን ባግባቡ ለሚሰሩት ተውት።
3- የሚቻል ከሆነ የጋራ መድረክ ቢኖራችሁ መልካም ነው። አካሄዱ ላይ የሚታዩ ጠንካራ እና ደካማ ጎኖችን ነቅሳችሁ የምትነጋገሩበት፣ ተግዳሮቶች እና መፍተሄዎቻቸው ላይ የምትወያዩበት፣ ልምድ የምትቀሳሰሙበትና የምትተራረሙበት፣ መረጃዎችን የምትለዋወጡበት፣ ... የጋራ መድረክ ቢኖር መልካም ነው። የሚቻል ከሆነ ማለቴ ነው። በሆነ ምክንያት በተናጠል መስራቱ ከተሻለም እሰየው።
4- በውይይት ጊዜ፣ በአቀራረብ ላይ፣ ... ሊኖራችሁ የሚገባን አደብና አነጋገር ድባቡ የሚወስነው ሳይሆን ቀድሞ የተጠና፣ ጠንካራ መሰረት ላይ የቆመ፣ ትንኮሳ የማይወዘውዘው እንዲሆን አድርጎ መቅረፅና ማነፅ ይገባል። ደግሞም አጀንዳ ተቀባይ አትሁኑ። መስመራችሁን አትልቀቁ፣ አታስለቅቁም። ካልሆነ ፍሬያማነታችሁን ሊቀንሰው ይችላል።
5- በተቻለ መጠን ከደዕዋው መስክ አትጥፉ። ሰዎች ናችሁና ሁሌ አይደላችሁም። የማይመች ሁኔታ ሊገጥም ይቻላል። በተቻለ መጠን ግን ከደዕዋው ዘርፍ አትራቁ። በመሀል እልም ማለት ሞራላችሁንም፣ አቅማችሁንም፣ ተፅእኗችሁንም ያቀዘቅዘዋል። ብዙ ቆይታችሁ ስትመለሱ ነገሮች እንዳሰባችኋቸው ላይሆኑ ይችላሉና በየመሀል ረጃጅም ቆይታዎች እንዳይኖሩ ጣሩ።
አላህ ያበርታችሁ።
=
የቴሌግራም ቻናል :-
https://t.me/IbnuMunewor

የመግሪብ በዕዲያ
~
ተምርና ውሃ አግኝተህ ካፈጠርክ "ጫማ ተራ" ያለው ግርግር እስከሚቀንስ ሁለት ረከዐ ቀለል ያለች ሱና ስገድ፣ የመግሪብ በዕዲያ። በር ላይ ያለውን ግርግር ካስተዋልከው በመቸኮልህና በመረጋጋትህ መካከል ያለው የቆይታ ርዝማኔ ኢምንት ነው። ጊዜው ረመዳን ነው፣ እያንዳንዱ ዒባዳ በተለየ የሚታሰብበት የተከበረ ወቅት። እያንዳንዱ ቀን ዳግም ላይገኝ እያለፈ ነው። ተጠቀምበት።
=
የቴሌግራም ቻናል፦
https://t.me/IbnuMunewor