Ethiopian Electric Utility

የግብዓት አቅርቦት ማሻሻያ ለአገልግሎት ቅልጥፍና

ተቋማችን ፍትሃዊ የኤሌክትሪክ ተደራሽነት ለማረጋገጥ እንዲሁም ጥራት ያለው አገልግሎት ለመስጠት ሰፊ ሥራዎችን እያከናወነ ይገኛል፡፡

በዚህም ለኤሌክትሪክ አገልግሎት ተጠቃሚ ደንበኞች አስተማማኝ የሃይል አቅርቦት ተደራሽ ከማድረግ ጎን ለጎን የኤሌክትሪክ አገልግሎት ተጠቃሚ ያልሆኑ የህብረተሰብ ክፍሎችን ተደራሽ ለማድረግ በያዝነው በጀት ዓመት በሰፊው አቅዶ እየሰራ ነው፡፡

ከዚህ ጋር በተያያዘ የኤሌክትሪክ መሰረተ-ልማት መገንባት ከፍተኛ ኢንቨስትመንት የሚጠይቅ ሲሆን፤ ተቋማችንም ለመሰረተ-ልማት ዝርጋታ የሚውሉ ጥራታቸውን የጠበቁ ግብዓቶችን ለሀገር ውስጥ አቅራቢዎች ቅድሚያ በመስጠት የጎደለውን ከሃገር ውጪ በማቅረብ አገልግሎቱን እየሰጠ ይገኛል፡፡

በተጨማሪም ተቋሙ የአገር ውስጥ አምራቾችን በማበረታታት ጥራት ያለው ግብዓት እንዲያቀርቡ በማድረግ ከውጭ ለሚገቡ እቃዎች የሚያስፈልገውን የውጭ ምንዛሬ ፍላጎት በማቃለል አስተማማኝ አቅርቦትን በማረጋገጥ ደረጃ ጠቀሜታው የላቀ በመሆኑ በትኩረት እየተሰራ ይገኛል፡፡ አምራቾችም ከተቋሙ ጋር ውል በመዋዋል የግብዓቶች ጥራትም እየተረጋገጠ እያቀረቡ ይገኛሉ፤የአቅርቦት መሻሻልም እየታዬ ነው፡፡

ተቋማችን ከደንበኞች ለሚቀርቡለት የኤሌክትሪክ ኃይል ጥያቄ በፍጥነት አገልግሎት እንዳይሰጥ ከሚያደርጉ ምክንያቶች አንዱ አስቀድሞ የግብዓት አቅርቦት አለመኖሩ መሆኑ ተለይቷል፡፡ በመሆኑም አዲስ እየተተገበረ በሚገኘው የተቋም ሪፎርም መሰረት ለደንበኞች ግብዓት ለማቅረብ የሚወስድባቸውን ጊዜ ለመቀነስ ጥረት እያደረገ ይገኛል፡፡

ተቋሙ የግብዓት አቅርቦት እጥረቱን ለመፍታትና የደንበኞችን እንግልት ለመቀነስ ግብዓት በራሳቸው ገዝተው እንዲያቀርቡ ሲደረግ የቆየ ቢሆንም አገልግሎቱን ለማግኘት የሚወስድባቸውን ጊዜ በእጅጉ የሚያጓትት ከመሆኑም በላይ ገዝተው የሚያመጡት ግብዓት ወደ ተቋሙ ኔትወርክ ከመግባቱ በፊት ጥራት ማረጋገጥ አስገዳጅ በመሆኑ በዚህ የሚፈጠረው ሂደት ለደንበኞች አላስፈላጊ ወጪ፣ ቢሮክራሲና ቅሬታ የሚፈጥር ሆኖ ተገኝቷል፡፡

በተጨማሪም አሁን ባለው ነባራዊ ሁኔታ የአገር ውስጥ አምራቾች ለተቋማችን እያቀረቡት ያለው ግብዓት ለደንበኞቻችን ጥያቄ በቂ ምላሽ እንድንሰጥ እያስቻለን በመሆኑ በተቋም ደረጃ አሰራሩን ወጥነት እንዲኖረው በማድረግ በሁሉም የተቋሙ አገልግሎት ማዕከላት ደንበኞች ከተቋማችን ግብዓቶችን እንዲያገኙ እየተደረገ ነው፡፡ይህም ጊዜና ጉልበት እዳይባክን የአገልግሎት ቅልጥፍናና የግብዓት ጥራት አስተማማኝነትን ለማሳደግ እያገዘ ይገኛል፡፡

ከዚህ ጋር በተያያዘ እንደሁልጊዜው ተቋማችን የትራንስፎርመርና ሌሎች ግብዓት ከሚያመርቱ የሃገር ውስጥ አምራቾች ጋር ውል በመያዝ በተቀመጠው የጥራት መስፈርት መሰረት ለሚያቀርቡ ሁሉ በፍትሃዊነት ግዥ በመፈፀም አገልግሎቱን ተደራሽ ለማድረግ የሚሰራ መሆኑን እናሳውቃለን፡፡