Ethiopian Press Agency/አማርኛ /

ኢትዮጵያ ከአፍሪካ ቀንድ ኢኒሼቲቭ ለ20 ፕሮጀክቶች ማስፈፀሚያ ከሶስተ ቢሊዮን ዶላር በላይ አግኝታለች
*******
(ኢ ፕ ድ)

ኢትዮጵያ ከአፍሪካ ቀንድ ኢኒሼቲቭ ለ20 ፕሮጀክቶች ማስፈፀሚያ ከሶስተ ቢሊዮን ዶላር በላይ መውሰዷን የገንዘብ ሚኒስትር አቶ አህመድ ሽዴ ገለፁ።

23ኛው የአፍሪካ ቀንድ ኢኒሼቲቭ ጉባዔ የካቲት 11 በአዲስ አበባ እንደሚካሄድ ተገልጿል።

ሚኒሰትሩ የኢኒሼቲቩን የአምስት አመታት አፈፃፀምና የቀጣይ እቅድ አስመልክቶ በሰጡት ጋዜጠዊ መግለጫ፤ እስካሁን ከሃብት አሰባስቡ ጋር በተገኛኘ ለቀጣናው ሀገራት በኢኒሼቲቩ ለቀጣናው ሀገራት 15 ቢሊዮን ዶላር የሚጠጋ ኢንቨስትመንት በመነሻነት ለማሰባሰብ ታቅዶ ወደ ተግባር ተገብቷል።

ከዚህም ውስጥ ወደ 7 ነጥብ 5 ቢሊዮን ዶላሩ ለፕሮጀክት ማስፈጸሚያ ውሏል። ኢትዮጵያም 20 ለሚሆኑ ፕሮጀክቶች ከሦስት ቢሊዮን ዶላር በላይ አግኝታለች ብለዋል።

ለአብነትም ባለፉት ዓመታት በነበረው የድርቅ አደጋ የድርቅ መረጃ ጠቋሚ መድህን መሰረት ያደረገ ሰፊ ሽፋን በቆላማ አካባቢዎች ተግባራዊ ተደርጓል ።በርካታ የውሃ መሰረተልማት ግንባታዎች በአርብቶ አደሩ አካባቢዎች ተገንብተዋል፡፡

ምርታማነትን ከማሳደግ በተጨማሪ 500 ሺህ ሔክታር መሬት ከአንበጣ ወረራ ለማዳን ተችሏል፡፡ ከጎረቤት ሀገራት ጋር በተለያዩ ዘርፎች ያለንን ትብብር አሳድጓል ሲሉ አብራርተዋል፡፡

ኢኒሺዬቲቩ ከአምስት ዓመት በፊት በኢትዮጵያ የመጣውን ሪፎርምና በቀጣናው ሀገራት የተጠናከረ ግኝኙነት ተከትሎ የተመሰረተ፤ ዓላማው በቀጠናው ያሉ ሀገራትን በኢኮኖሚ ትብብር የሚያስተሣሥሩ የልማት ፕሮጀክቶችን መተግበር ነው።

የኢኒሺዬቲቩን መመስረት ተከትሎ የልማት አጋሮች በቀጠናው ለሚከናወኑ ፕሮጀክቶች ድጋፍ በማድረግ ላይ ይገኛሉ ያሉት ሚኒስትሩ ኢኒሼቲቩ ኢትዮጵያን፤ ጅቡቲን ኤርትራን፣ ኬንያን፣ ሶማሊያን፤ ሱዳንንና ደቡብ ሱዳንን ያቀፈ ነው።

በቀጠናው የመሠረተ ልማት ትስስር ማጎልበት፣ የንግድና ኢኮኖሚ ውህደትን ማጠናከር፣ የተፈጥሮና ሰው ስራሽ ችግሮችን የመቋቋም አቅምን መገንባት እና የሰው ሃይል ልማትን የሚያጠነክሩ ቀጠናዊ ፕሮጀክቶች ይደገፉባታል።

የአለም ባንክ፤ አውሮፓ ህብረትና የአፍሪካ ልማት ባንክ እንዲሁም በተባባሪነት የሙሰሩና የኢጋድ ሴክሬታሪያት ከጥንስሱ ጀመሮ ሲደግፉ የነበሩ ናቸው። ኢኒሺዬቲሹ የጀርመንና የእንግሊዝ መንግስትን ተጨማሪ አጋር ሀገራት በማድረግ ተቀበሏል።

የ23ኛው የፋይናንስ ሚኒስትሮች ስብሰባ የካቲት 11 ቀን 2017 ዓም በአዲስ አበባ ለማካሄድ ዝግጅት መጠናቀቁን ገልጸዋል። በጉባኤው የአለም ባንክ፣ የአውሮፓ ህብረት፣ የአፍሪካ ልማት ባንክ፣ የጀርመንና የእንግሊዝ መንግስት ተወካዮች፣ የአረብ ባንክ፣ የአሜሪካ እና የኔዘርላንድስ መንግስት ተወካዮች በታዛቢነት ይገኛሉ ተብሎ ይጠበቃል ብለዋል።

በዳግማዊት አበበ

የካቲት 4 ቀን 2017 ዓም