Ethiopian Press Agency/አማርኛ /

በጅማ ከተማ በ1 ነጥብ 7 ቢሊየን ብር የተገነባው ኃይሌ ሪዞርት ተመረቀ
************
(ኢፕድ)
ኃይሌና ዓለም ኢንተርናሽናል ኃ/የተ/የግ/ማህበር 10ኛውን ባለ አራት ኮኮብ ሪዞርት በጅማ ከተማ ዛሬ አስመርቋል።

ሻለቃ አትሌት ኃይሌ ገብረ ስላሴ ለጋዜጠኞች በሰጡት መግለጫ እንደገለጹት፣ ሪዞርቱ በ1 ነጥብ 7 ቢሊየን ብር ወጪ የተሰራ ሲሆን ሁለት አመት ባልሞላ ጊዜ ውስጥ የተጠናቀቀ ነው።

የከተማ አስተዳደሩ ለሪዞርቱ ግንባታ አስፈላጊውን ድጋፍ ማድረጉን ጠቅሰው ሪዞርቱ በጅማና በአካባቢዉ የቱሪዝም እንቅስቃሴዎች ላይ ከፍተኛ አስተዋጽኦ እንደሚኖረው ገልጸዋል።

ሪዞርቱ የእንግዶች ማረፊያ ክፍሎች፣ የምግብ አዳራሾች፣ የተለያዩ ባሮች፣ የመዋኛ ገንዳ፣ ስፓ፣ ጂምናዚየም እንዳለው ገልጸዋል።

ሆቴሉ ኦዲዮ ቪዥዋል መሳሪያዎች የተሟሉላቸው 5 የስብሰባ አዳራሾች ያሉት ሲሆን አራት ዘመናዊና ባህላዊ ምግቦችን የሚያቀርቡ ሬስቶራንቶች እንዳሉት ተነግሯል።

ሆቴሉ ከ210 በላይ ቋሚ የሥራ እድል የፈጠረ መሆኑን ጠቅሰው በቀጣይ በሙሉ አቅም ሥራ ሲጀምር 400 ለሚሆኑ ዜጎች ቋሚ የሥራ እድል እንደሚፈጥርም ተገልጿል።

የጅማ ከተማ ከንቲባ አቶ ጣሃ ቀመር በመድረኩ ላይ እንደገለጹት፣ ጅማ ከተማ የቱሪዝም መዳረሻና የስብሰባ ማዕከል እንድትሆንና የሆቴል አገልግሎት ዘርፉ ወሳኝ ነው።

ከንቲባው አክለውም ከተማ አስተዳደሩ ኃይሌ ሪዞርት ግንባታውን ሰርቶ ለአገልግሎት ክፍት እንዲያደርግ ድጋፍ ሲያደርግ መቆየቱን ተናግረዋል።

በህዝብ ንቅናቄ የተጀመረውን ልማት በማጠናከር ከተማዋን ወደ ቀድሞ ከፍታዋ ለመመለስ እየተሰራ መሆኑን ነው የገለጹት።

ከተማ አስተዳደሩ በከተማዋ ልማት ውስጥ ለሚሳተፉ ባለሀብቶች አስፈላጊውን ድጋፍ እንደሚያደር ተናግረዋል።

በአጠቃላይ ሀይሌ ሆቴሎችና ሪዞርቶች ባሉት ሁሉም መዳረሻዎች ላይ ከ2 ሺህ 500 ሰራተኞች የሥራ እድል በመፍጠር እያሰራ ይገኛል ተብሏል።

በማርቆስ በላይ (ጅማ)

የወልዲያ ጠቅላላ ስፔሻላይዝድ ሆስፒታል ኦክስጅን ማምረት ጀመረ
*******
(ኢ ፕ ድ)
ወልዲያ ጠቅላላ ስፔሻላይዝድ ሆስፒታል ለህክምና አገልግሎት የሚውል ኦክስጅን ማምረት መጀመሩን አስታወቀ።

የኦክስጅን ማምረቻ ማሽኑ 70 ሚሊዮን ብር ወጪ እንደተደረገበት ተመልክቷል።

በሆስፒታሉ የሚታየውን የኦክስጅን ምርት እጥረት ለመፍታት የሚያስችል ኦክስጅን የሙከራ ማምረት የጀመረው ዛሬ መሆኑን በሆስፒታሉ የባዮ ሜዲካል ባለሙያ አቶ ዮሴፍ ምህረቴ ለኢዜአ ገልጸዋል።

ቀደም ሲል ሆስፒታሉ ለህክምና የሚያስፈልገውን ኦክስጅን ከደሴና የግል ሆስፒታሎች በማስመጣት ሲጠቀም መቆየቱን አስታውሰዋል።

ይህም በተፈለገው መጠንና ጊዜ ለማግኘት አስቸጋሪ ሆኖ በህክምና አገልግሎት ዘርፉ ላይ ተፅዕኖ እንዳሳደረ ጠቅሰዋል።

ችግሩን ለመፍታት የሚያስችል የኦክስጅን ማምረቻ ማሽን በመትከል ዛሬ ማምረት መጀመሩን ጠቅሰው፥ ማሽኑ በቀን እስከ 200 ሲሊንደር የማምረት አቅም አለው ብለዋል።

ኦክስጅኑን አምርቶ መጠቀም መጀመሩ የተሟላ ህክምና ለመስጠት የሚያግዝ ከመሆኑም በላይ በሰሜን ወሎና በወልዲያ ከተማ ለሚገኙ ጤና ተቋማት በተመጣጣኝ ዋጋ ምርቱን እንዲያገኙ እንደሚያደርግ ተናግረዋል።

በወልዲያ ከተማ የቀበሌ 01 ነዋሪ አቶ አለባቸው አዳሙ በሰጡት አስተያየት፤ ከ6 ወር በፊት በተሽከርካሪ አደጋ የተጎዳ ልጃቸው በኦክስጅን እጥረት ምክንያት ወደ ደሴ "ሪፈር" መባላቸውን አስታውሰዋል።

በዚህም ለአላስፈላጊ ወጪና መጉላላት መዳረጋቸውን አንስተው፥ አሁን ላይ ሆስፒታሉ በራሱ አቅም ኦክስጅን ማምረት መቻሉ የህብረተሰቡን ችግር እንደሚያቃልል ገልጸዋል።

የኦክስጅን ማምረቻ ማሽኑ 70 ሚሊዮን ብር ወጪ የተደረገበት ሲሆን፤ መንግስታዊና መንግስታዊ ባልሆኑ ድርጅቶች ትብብር እንደተከናወነ ተመልክቷል።

ታህሳስ 22 ቀን 2017 ዓም