ኖኅ Book Delivery

አባቴ መጠጥ ወዳጅ ነው... ግን ሰክሮ የረበሸበትን አንድም ቀን አላስታውስም። ሲጠጣ ትንሽ ፈነሽነሽ ያለ ፊት ያሳየናል፣ በየመሃሉ ስማችንን እየጠራ...

'አጠፋሁ? ' ይላል ...

'ተመስገን!' ይላል ....

አደጉልኝ እያለ፥ ይወዱኛል እያለ፥ ጠጅ መጠጫ አላጣሁም፥ ሚስቴ ትወደኛለች፥ እያለ ነው መሰለኝ...!

አምሽቶ ከገባ ዘው አይልም፤ እናቴን "ዓለም ሆዴ ልግባ ?" ብሎ ነው። እናቴን ያከብራታል። ይወዳታል። ለኹለት አመት ከስድስት ወር የአልጋ ቁራኛ ሁናበት ታውቃለች። ጨቅላ ነበርኩ፤ ሌሎቹም ከኔ ብዙ አይበልጡም ነበር ...

እናቴ "እኔ ከታመምኩት በላይ ተጎሳቁሎ፤ ልብሱ ላዩ ላይ አልቆ ነው ያስታመመኝ" ትላለች።

እንደሚወዳት አሳይቷታል ፣እንደምትወደው ሲገባ ሲወጣ እየተንከባከበች አሳይተዋለች ።

"መርቀኝ እለዋለሁ..."

'እንደኔ የምትወድህ እኔ እንደምወዳት ዓይነት ሚስት ይስጥህ፤ ፍቅር ካለ ኑሮ ብዙ አይከብድህም። ስታጠፋ ከታረምክ ህይወት አታሸንፍህም።' ይላል።

መርቀኝ እንጂ ስለው።

'ደስ ብሎህ ኑር' ይላል ። ጌታዬ ለኔ እንደራራው ይራራልህ ይለኛል ።

"ትወደኛልህ እንዴ" ስለው።

ዝም ብሎ በስስት እያየኝ 'ጅል ነህ እንዴ?' ይላል።

ከዚህ ቤተሰብ ተወልደን እንዴት ፍቅር አያንበረክከንም ታድያ!?
    ©Adhanom Mitiku
🎄🎄🎄
"ማንበብ ፋሽን ነው።"
Join us @noahbookdelivery

  የyoakin Bekele Pachiን ጹሁፍ
          ጀባ እንበላችሁ........

💫ዕድሜያቸው 30+ የሆኑ ሴቶች ይፀዱኛል:: በቃ ይመቹኛል:: እንደ ሰው በጥልቅ ማውራት የሚቻለው ከእነሱ ጋር ነው:: የምታወራው  ይገባታል ፣ የምታወራህ ይገባሃል ደርባባ ናቸው ፣ ሞገስ አላቸው ፣ አንደበታቸው ቁጥብ ነው የሚፈልጉትን ያውቃሉ:: ወዝጋባና ጢባራም አይደሉም:: ለጓደኝነት እና ለቁምነገር ምርጥዬ ናቸው::

💡አንባቢ እና አድማጭ ከሆኑ ደግሞ ክትት ያለ የበሰለ አቋም አላቸው:: ስለፈለከው አጀንዳ ቀለል ብሎህ ታወራታለህ ስለ ባይደን ፣ ስለራሺያ ፣ ስለ ሶሪያ ፣ ስለ ያ ትውልድ ፣ ስለ ጀብሃ ስለ ሻቢያ ፣ ስለ አድዋ ፣ ስለ ማይጨው ፣ ስለ ካራማራ:: ስለ Netflix ፣ ስለ አባ ገብረ ኪዳን ስብከት ፣ ስለ ሄኖክ ኃይሌ ትምህርት ፣ ስለ ምህረተአብ ቴቄል ፣ ስለ ተቀዳሚ ሙፍቲ መጅሊስ ፣

🔆ስለ ዮናታን መልካም ወጣት ፣ ስለ እመቤቴ ማርያም መራር ሃዘን ፣ ስለ ኢየሱስ ክርስቶስ ወንጌል ፣ ስለ አምኖን ቅንዝራምነት ፣ ስለ ዮናታን እና ዳዊት ወዳጅነት ፣ ስለ ቶማስ ስኬፕቲካልነት ፣ ስለ ቮልቴር ቡና ሱስ ፣ ስለ ቫንጎህ ስዕልና ቺስታነት ፣ ስለ ካህሊል ጂብራን ብዕር ፣ ስለ አዳም ረታ ፣ ስለ ስብአት ገብረ እግዚአብሔር ጠሊቅነት ፣ ስለ ፌሚኒዝም ፣ ስለ ካቲታሊዝም ስለ ሙላቱ አስታጥቄ ጃዝ ፣ ስለ ግርማ በየነ ፣ ስለ Nina Simon ፣ ስለ ኤልያስ መልካ ቅንብር ታወራሃለች ፣ ታወራታለህ!

ፊቷን ጥላው ካገኘሃት ደግሞ ምነው ውሃ ጠፋ ፣ አብሲት ተበላሸ ፣ የቂቤ ዋጋ ጨመረ?  ፣ ጎረቤት ለቅሶ አለ? ፣ በርበሬ አልተፈጨም? ምናምን ምናምን ትላታለህ!

⚡️መሸት ብሎ እንደ ኡመር ኻያም ወይን ከቀማመሰች ደግሞ ስለ አንገት ስር Cuddle ፣ ስለ For Play ታወራታለህ ፤ አፏን ሸፍና ወፍራም ሳቅ እየሳቀችና (አታሳፍረኝ አይነት) ጎንህን ጉሽም እያደረገች እሷም ታወራሃለች::  ሃሳብ ትለዋወጣለህ ፣ ትስቃለህ ፣ ትዝታ ትፈጥራለህ።

💡ፍቅራቸው የሚቆየው እንደ ወሲብ ለአምስት ደቂቃ ሳይሆን ለዘለአለም ነው:: ምክንያቱም ፍቅራቸውን የሚተክሉት በእግሮቻቸው መሀል ሳይሆን ከዛ ከፍ ብለው በልቦቻቸው ውስጥ ብሎም በአዕምሯቸው ውስጥ ነው:: ፍቅር የሚይዝህ ከአካላዊ አቋሟ ሳይሆን ከአስተሳሰቧ ፣ ከስብዕናዋ ፣ ከነፍሷ ነው::

        ፍቅር ሞልቶ የሚፈስበት ምሽት ይሁንላቹ።
ኢትዮሂማኒቲ ✍
🎄🎄🎄
"ማንበብ ፋሽን ነው።"
Join us @noahbookdelivery

🟡ሲያነቃቁን ለምን አንነቃም? ሙተን ይሆን እንዴ?

(አሌክስ አብርሃም)

💡ለመጀመሪያ ጊዜ self-help book የሚሏቸውን ሳነብ በጣም ነቅቸ ነበር!  አስታውሳለሁ የ Rhonda Byrne ን The secret  ሳነብ በጣም ከመንቃቴ የተነሳ ለስራ እጀን ከመጠቀም ይልቅ አዕምሮየን ለመጠቀም ወስኘ ነበር። ለምሳሌ መብራት አጥፍቸ ከመተኛት ተኝቸ መብራቱ ልክ እንቅልፍ ሲወስደኝ ይጠፋል ብየ ለራሴ እነግረዋለሁ፤ጧት ስነሳ እንደበራ ባገኘው አልደነቅም፣ ከእንቅልፌ ከመንቃቴ አንድ ደይቃ በፊት በራሱ ጊዜ እንደበራ አምናለሁ። የወሩ የመብራት ሂሳብ ግን የነገረኝ ሌላ ሆነ፤ ተው ወንድሜ በጣም አትንቃ አለኝ። እናም እያጠፋሁ መተኛት ጀመርኩ። ከ1890 ዓ/ም ጀምሮ መብራት ሀይል መብራት ያላጠፋበት ብቸኛ ወር ነበር። ስንነቃ አይወዱ😀

🕯ኦሾን ያነበቡ የኔ ዘመን ወጣቶች ደግሞ "ሐይማኖት ባህል ገለመሌ ከጫነብን ፍዘት ወጣን" አሉና በየመንገዱ ፀጉራቸውን በመፍተል መቆዘም ጀመሩ፤ ይህንንም "ውስጣዊ ንቃት" አሉት። ከአመታት በኋላ ሁሉም ጠበል ገብተው  እየጮሁ ከንቃታቸው በጣም ነቁ። በቀን አምስቴ ኡዱ የሚያደርጉ፣ ለጁመዓ የሽቷቸው  መዓዛ ከሞያሌ  የሚጣራ ፣ እንዴት ያሉ ንፁህ ሙስሊም ወዳጆቸ ሳይቀሩ ጀዝበው ገላቸውን መታጠብ አቁመው  ነበርኮ!  ስንት ተቀርቶባቸው ተመለሱ። የዛን ሰሞን ወጣቱ ሁሉ ውስጣችን በራልን እያለ ስንት ጨለማ ተከናነበ። ራሳቸውን ያጠፉም ነበሩ። ኦሾና አለቃ ገብርሃና ተረታቸው እንጅ ኑሯቸው አያምርም።

🔦ይሄው በዚህኛው ዘመን ደግሞ አነቃቂወች እንደአሸን ፈሉና "ያሰብከውን ትሆናለህ፣ ነኝ በል፣ አለኝ በል፣ ደርሻለሁ በል፣ እችላለሁ በል፣ በሀሳብህ መኪና አስነሳ፣ አሉ፤ ወጣቱ የሀሳብ መኪና አስነሳ፤ በሀሳብ ሲጋልብ ራሱ ጋር ተጋጨ፣ ቤተሰቡ ጋር ተጋጨ፣ አገሩ ጋር ተጋጨ፣ፈጣሪው ጋር ተጋጨ ።  ከሆነስ ሆነና  ለምንድነው  በዚህ ዘመን ይሄ ሀሁሉ አነቃቂ ንግግር ያላነቃን? የእውነት የሆነ ጊዜ ያነቃን ነበርኮ፣ እየቆየ ግን እንኳን ሊያነቃን ያስተኛን ጀመረ፤ እኮ ለምን?

📍የህክምና ባለሙያወች ከተሳሳትኩ አፉ ብለው ያርሙኝና  በእነሱ ሙያ  Drug tolerance የሚሉት ነገር አለ አሉ፤ በትክክል ከተረዳሁት ለሆነ ህመም የተሰጣችሁ መድሀኒት ከሆነ ጊዜ በኋላ በሽታችሁ ጋር ይግባቡና ፍሬንድ ይሆናሉ። በሽታው መድሃኒቱን ይላመደዋል።ጉቦ እንደበላ ደንብ አስከባሪ በሽታችሁ መንገድ ዳር ሲያሰጣችሁ መድሀኒቱ እንዳላየ ያልፈዋል። ለምሳሌ የእንቅልፍ ችግር ገጠማችሁና በሐኪማችሁ የእንቅልፍ ኪኒን ታዘዘላችሁ እንበል ፤ የመጀመሪያ ሰሞን ድብን ያለ እንቅልፍ ያስወስዳችኋል፤ እየቆየ ሰውነታችሁ ሲላመደው መድሀኒቱን ውጣችሁም ቁልጭ ቁልጭ ስትሉ ታነጋላችሁ። ወይ አይነቱን ወይ መጠኑን ባለሙያ ካልቀየረው በቃ ለውጥ የለም። አይ መጠኑን ራሴ እቀይረዋለሁ ብላችሁ ጨመር አድርጋችሁ ከወሰዳችሁ ደግሞ ትተኙ ይሆናል ግን እንደገና ላትነሱ ትችላላችሁ።

🔑ወደህይወት ስናመጣው እኛ ኢትዮጵያዊያን በአሁኑ ሰዓት ማንኛውንም ማነቃቂያ ከመላመድ አልፈን እንደዘፈን ሸምድደነው አብረን እየደገምነው ነው። ገና ፊቱን ስታዮት አብራችሁ  "ብሮሮሮሮሮ" አትሉም?!  ለዛ ነው ከነዋሪ መካሪና ዘማሪ የበዛው። የፈለገ ብንመከር ብንዘከር ብንሰበክ ብንወገዝ ወይ ፍንክች። አሁን ሞራል፣ ሐይማኖት፣ የአገርም ይሁን የሰው ፍቅር፣ ይሉኝታ ፣መማር ፣ የራስ ክብር ወዘተ አእምሯችን ተላምዷቸው ተራ ነገር ሁነውብናል።

✨የሞራል ተቋሞቻችን  በሞራል ድሽቀት ከተራው ህዝብ ቀድመው ባፍጢማቸው ተተክለዋል፤ የትዳር ሰባኪወቹ  ማግባትና መፍታት መድረክ ላይ እንደመውጣትና መውረድ ቀሏቸዋል፤እንደውም የጓዳቸውን ውድቀት እንደባንዲራ በአደባባይ እየሰቀሉ እዮልን ባይ ሆኑ።  አሁን እንደህዝብ ሁለት ነገሮች ብቻ ናቸው የሚያነቁን ወይ (((ብር ማጣት))) አልያም (((ብር ማግኘት))) ይሄ የመጨረሻው ዶዝ(መጠን) ነው! 

💎ሰው ክብሬ፣ ገመናየ ፣ማንነቴ የሚለውን ነገር ሁሉ ይዞ ገበያ ከወረደ ምን ይመልሰዋል?! ከዚህ በኋላስ? ምን ያነቃን ይሆን?  ምክንያቱም በብር የሚመጣ ንቃት በአንዴ አይረካም፤ እንደአደንዛዢ ዕፅ  በየቀኑ መጠኑን እየጨመሩ ካልወሰዱት መጨረሻ የለውም። መመለስም መቀጠልም የማንችልበት አውላላ ሜዳ ላይ የሚያስቀር መርገምት ነው!! ምን ላድርግ ቸገረኝ፣ የማደርገው አጣሁ ልሙት እንዴ ታዲያ  በሚል ሰበብ ከሰውነት ድንበር ከምንርቅ በየግላችን "ይሄንኛው ነገሬ ለገበያ ከሚቀርብ ሞቴን እመርጣለሁ" የምንልለት የሆነ መስመር ልናሰምር ግድ ነው። ሰው ራሱ ወስኖ ያሰመረውን መስመር ከሞት በስተቀር ምን ያሻግረዋል?!

                          ✍አሌክስ አብርሃም
⛵️⛵️⛵️
 "ማንበብ ፋሽን ነው።"
Join us @noahbookdelivery

መክሊቱን በአጋጣሚ ያገኘው ቦክሰኛው መሀመድ አሊ የተሰረቀችበት ብስክሌት የሞያ መነሻው እንደሆነች ያውቃሉ?
**** 

ወቅቱ በአውሮፓውያኑ 1954 ነው። መሀመድ አሊ እድሜው ገና የ12 ዓመት ታዳጊ ነው። የቦክስ ሻምፒዮናው መሀመድ አሊ ተጋጣሚዎችን በመዘረር ዓለምን ያስደነቀ፣ የወርቅ ሜዳሊያንም ለሀገሩ በማስገኘት የምንጊዜም አይረሴ ጀግና አሜርካዊ ቦክሰኛ ነው። 

ለዚህ ክብር እና መደነቅ የበቃው መሀምድ አሊ ብዙዎች የዛሬ ማንነቱን እና የዓለም የቦክስ ሻምፒዮና መሆኑን እንጂ እንዴት ለዚህ ክብር እንደበቃ የሚያውቁ መኖራቸው ያጠራጥራል። ለዚህም ይመስላል ሰዎች አንዳንድ አጋጣሚዎችን አለመግፋት የእድላቸው በር እንደመክፈት ይቆጠራል የሚሉት።

መሀመድ አሊ ገና የ12 ዓመት ታዳጊ እያለ የአጎቱ ልጅ የሚያደርገውን የቦክስ ግጥሚያ ውድድር ለማየት ወደ ኮሎሚቢያ ትእይንት በ60 ዶላር የተገዛች ሳይክሉን እየነዳ የሄደው። በዚህ ውድድር ላይ የአጎቱ ልጅ ውጤታማ ሳይሆን መቅረቱን መሀመድ አሊ በአንድ ወቅት ባደረገው ቃለ ምልልስ ላይ አስታውሶ ተናግሯል። 

ይህ የውድድር እለት ለመሀመድ አሊ ጥሩ የሚባል አጋጣሚ አልነበረም። ምክንያቱም የአጎቱ ልጅ በውድድሩ አላሸነፈም እና ደግሞ መሀመድ ከውድድሩ ሲወጣ በ60 ዶላር የገዛት ሳይክሉ በሌቦች ተሰርቃበት ነበር። እና በወቅቱ መሀመድ አሊ በንዴት ሁኔታውን ጆ ማርቲን ለተባለ ፖሊስ ሪፖርት ያደርጋል። ሳይክሉን የሰረቀው ሌባ ቢያገኘው በቦክስ ዋጋውን እንደሚሰጠውም መሀመድ ለፖሊሱ ይነግረዋል። የፖሊስ አባሉም የቦክስ አሰልጣኝ ስለነበረ “ቦክስ ዝምብሎ መሰንዘርና ማሸነፍ ማለት አይደለም ይልቁንም የቦክስ ስልጠና መውሰድ ብትችል ብዙ ትማርበታለህ” በማለት ለመሀመድ አሊ ምክር ይለግሰዋል። መሀመድም በዚህች አጋጣሚ የጠፋች ሳይክሉን ለመፈለግ ብሎ ጊዜውን ሳያባክን የፖሊሱን ምክር ተቀብሎ የቦክስ ስልጠናውን ጀመረ። በዚህች ቅጽበትም መሀመድ አሊ የህይወት እጣ ፈንታው የሆነውን የቦክስ ስፖረት ሀ ብሎ ጀመረ። 

ስለመሆነም ዝነኛውና ዓለም አቀፍ ቦክሰኛው መሀመድ ዓሊ የጠፋችበትን ሳይክሉን የማስታወስ እድል አላገኘም ። ይልቁንም የወደፊት ህይወቱን ለማቅናትና ህልሙን ለመኖር የሚረዳውን የጆ ማርቲንን ምክር ተከትሎ በጠንካራ መንፈስ የቦክስ ልምምድ ስራውን ጀመረ። 

መሀመድ ዓሊ ከ6 ሳምንታት ስልጠና በኋላ ለውድድር ብቁ ሆኖ በመገኘቱ የ12 ዓመት ቦክሰኛ ጋር የቦክስ ግጥሚያውን አደረገ። በዚህ ውድድርም መሀመድ ተጋጣሚውን 5 ዙር በማሸነፍ ዘርሮ በመጣል የመጀመሪያ ድሉን አስመዘገበ።

ከዚህ በኋላ መሀመድ የሚወስደውን የቦክስ ስልጠና በተከታታይነት ስራዬ ብሎ ያዘው። መሀመድ ዓሊ የከባድ ሚዛን ቦክሰኞች የሆኑትን እነ ጆ ፍሬዘር፣ ሳኒሊስተር፣ ጆርጅ ፍርማን የተባሉ ተዋቂ ቦክሰኛ ተጋጣሚዎቹን በመፋለም ድንቅ ብቃቱን አስመስክሯል። 

በ18 ዓመቱ በጠንካራ ውድድሮች ላይ በመሳተፍ ተጋጣሚዎቹን በከፍተኛ ልዩነት በመርታት ለሀገሩ የወርቅ ሜዳሊያ ማስገኘት ችሏል። ይህ ክስተት ደግሞ የመሀመድ ሌላ አስደናቂ አጋጣሚ ሆነ።  የዓለም ሻምፒዮናው መሀመድ አሊ ውድድሩን አሸንፎ የወርቅ ሜዳሊያ ባገኘ ጊዜ ሜዳሊያውን በአንገቱ አንጠልጥሎ ነጮች ከሚዝናኑበት አንድ ሬስቶራንት ጎራ ይላል። መሀመድ አሊ ወርቁን በአንገቱ ላይ አንጠልጥሎ ሬስቶራቱ ውስጥ አንደኛው ወንበር ለይ ቁጭ ብሎ አስተናገጇን አንድ ሲኒ ቡና እንድታመጣለት ያዛታል። አስተናጋጇም ጥቁሮች በዚህ ሬስቶራንት መስተናገድ እንደማይችሉ ለመሀመድ ትነግረዋለች። በዚህ ጊዜ መሀመድ ተናደደ። 

በዚህም ምክንያት እንደውም 2 ሲኒ ቡና ካልሰጠሽኝ አልጠጣም ማለቱን አሊ አስታውሶ ተናግሯል። ለሀገሬ የወርቅ ሜዳሊያ አምጥቼ እንዴት በዜጎች አልከበርም የሚለው ጥያቄ የተፈጠረበት መሀመድ ይህ ሁኔታ ስሜቱን እንደጎዳውና በወቅቱ እንደተበሳጨም ገልጿል። እናም ብስጭቱ ለውሳኔ ያደረሰው መሀመድ ኦሀዮ ወንዞ በመውረድ ያገኘውን የወርቅ ሜዳሊያ ከወንዙ ላይ መጣሉን በግለ ታሪኩ ላይ ተጽፏል። 

ይህ ሁኔታ ከተፈጸመ ከ36 ዓመታት በኋላ በአትላንታ በተካሄደ የኦሎምፒክ ውድድር ላይ መሀመድ አሊ ለሀገሬ ያመጣሁት የወርቅ ሜዳሊያ እንዴት አያስከብረኝም ብሎ ወንዝ ውስጥ የጣለውን ምትክ ሜዳሊያ ተሰጥቶታል። መሀመድ አሊ የዓለም ከባድ ሚዛን የቦክስ ውድድሮችን በማሸነፍ የ3 ጊዜ ሸምፒዮና በመሆን ሪከርዱን ማስጠበቅ የቻለ ጀግና ነው። 

በ2024 ዓለም አቀፉ የቦክስ ፌዴሬሽን ማህበር ጉባዔ በዱባይ ሲካሄድ ለመሀመድ አሊ ቤተሰቦች ክብር እና እውቅና ተሰጥቷል። በዚሁ ጊዜም ልጁ ረሺዳ አሊ የአባቷ ስራዎች ከትውልድ ትውልድ እንዲተላለፉ ለማድረግ መሰራት እንዳለበት ተናግራለች።

በርግጥ መሀመድ አሊ ከፕሮፌሽናል ቦክሰኛነቱ ባሻገር ለሰው ልጅ እኩልነት የታገለ እና የሚታገል የሰብዓዊ መብት ተሟጋች እንደሆነ የሚመሰክሩለት ብዙዎች ናቸው። መሀመድ አሊ የነበረበት ወቅት የጥቁሮች እና ነጮች እኩልነት ያልተረጋገጥበት ጊዜ በመሆኑ ይህን በብዙ መንገድ ታግሏል።

የዓለም የምን ጊዜም ታላቅ ሰው የሚባለው መሀመድ ከዘመናት የስኬት ጉዞ በኋላ በ74 ዓመቱ ከዚህ ዓለም በሞት ተለይቷል። በአጋጣሚ የብስክሌቱ መጥፋት የፈጠረበትን ብስጭት ለማስታገስ እሰነዝረዋለሁ ያለው ቦክስ በህይወቱ ትልቅ ለውጥ ያመጣበት እሱም እንደኮኮብ የሚያበራበት አጋጣሚ የሆነለት ታላቅ ሰው ከዝናው ባለፈ ህይወቱም ለብዙዎች አስተማሪ ሆኖ ተመዝግቧል። 

በመሀመድ ፊጣሞ
⛵️⛵️⛵️
"ማንበብ ፋሽን ነው።"
Join us @noahbookdelivery