የሀ
የሀ ከተማ ስትታይ ከጭቃ ቤቶች በቀር ለዓይን የሚገባ ቤት
እንደሌለባት ስትታይ "ፊተኞች ኋለኞች ይሆናሉ" የሚለው
ብሂል ትዝ ይለናል "ከሀገር የሀ ከፊደል ሀ ይቀድማሉ"
ሚለውም ይታወሰናል አቧራ ያጠለቃትን ይህች ጥንታዊ
ከተማ አቋርጠን ስንጓዝ ከክርስቶስ ልደት በፊት ያለው ዘመን
ላይ ምንገኝ ይመስለናል።
እንደ አርኪዮሎጂስቶችና ታሪክ ፀሀፊዎች ምስክርነት የሀ
የተቆረቆረችው ከክርስቶስ ልደት በፊት ስምንት ምዕት
አመታት ቀደም ብላ ነው። የፑንት ከተማ - የዳእማት ማማ።
ከባቢሎን ውድመት በኋላ የኩሽና የሴም ዘሮች እንደገና
በዘርና በቋንቋ ተቀላቅለው ፣ ዘራቸውን አግአዝያን ፣
ቋንቋቸውን ግዕዝ ያደረጉባት የኢትዮጲስ የተቀበረባት
የኢትዮጵያ ሀሁ መሠረት የሀ። የመጀመርያዋ የኢትዮጵያ ዋና
ከተማ። ዙርያዋ የከበቧት ተራሮች ላይ የዋልያ አርማ
የነበረው የዳእማት ባንዲራ ሲርገበገብ በምናባችን እንየው
ኩሽና ሴም ያሁኗን ኢትዮጵያ ተነስተው ቢመለከቱ ምን ይሉ
ይሆን? 'ተቀላቅለን ሳለ እንደገና ለምን ተለያያችሁ?
ማንኛችሁ ናችሁ ንፁህ ሴም? ማንኛችሁ ናችሁ ንፁህ ኩሽ?'
የሚሉን አይመስላችሁም ማን ይሆን ታሪካችንን አዳፍኖ ሙጃ
የተከለበት? አንዳቸው ተነስተው ታሪኩ ተቀብሮበት ኮምፓሱ
እንደጠፋበት መርከብ ያለ አቅጣጫ ለሚንሳፈፈው ትውልድ
ሁሉንም ቢነግሩት እንዴት ጥሩ ነበር። ከተማውን ሰንጥቆ
የሚያልፈውን ማይ መኾለ ሚባለውን ወንዝ እንሻገረውና ወደ
ኮረብታው እንውጣና ከተማዋን ቁልቁል ተኮፍሶ የሚያየውን
የየሀን ህንፃ እንመልከት በአሥራ ስድስተኛውና በአሥራ
ሰባተኛው ክፍለ ዘመን እነ ጀምስ ብሩስና ፍራንሲስኮ አልቫሬዝ
የመሳሳሉ አሳሾች አይተው የተገረሙበት ይህ ጥንታዊ ህንፃ
ከአክሱም በፊት ከመታነፁም በተጨማሪ ህንፃው
የተገነባባቸው ግዙፍ ጥርብ ድንጋዮች ያለ አርማታ ተያይዘው
ከሦስት ሺህ አመታት በላይ መቆየታቸው ማንንም
የሚያስደንቅ ነው።
ምንጭ google