ማይክሮሶፍት ቲክቶክን ሊገዛ እየተደራደረ ነው ተባለ


• ሌሎች የአሜሪካ ኩባንያዎችም ፍላጎት አሳይተዋል


የአሜሪካው ፕሬዚዳንት ዶናልድ ትራምፕ፣ ማይክሮሶፍት ኩባንያ፣ ቲክቶክን ለመግዛት በውይይት ላይ መሆኑንና በማህበራዊ ሚዲያው ሽያጭ ላይ የሚደረጉ ፉክክሮችን ማየት እንደሚፈልጉ ገልጸዋል፡፡

ግዙፉ የአሜሪካ የቴክኖሎጂ ኩባንያ ማይክሮሶፍት፣ ለጨረታ ዝግጁ ስለመሆኑ የተጠየቁት ፕሬዚዳንቱ፤ “አዎን” በሚል ምላሽ የሰጡ ሲሆን፣ በርካታ ኩባንያዎችም ቲክቶክን ለመግዛት ከፍተኛ ፍላጎት ማሳየታቸውን ተናግረዋል፡፡

ትራምፕም ሆኑ የቀድሞው ፕሬዚዳንት ጆ ባይደን፣ ከብሔራዊ ደህንነት ስጋት ጋር በተያያዘ የቻይናው ኩባንያ ቲክቶክ እንዲሸጥ ለዓመታት ግፊት ሲያደርጉ መቆየታቸው አይዘነጋም፡፡

በአሜሪካ 170 ሚሊየን ተጠቃሚዎች ያሉት ቲክቶክ መተግበሪያ እንዲታገድ ባለፈው ሳምንት የባይደን አስተዳደር ያሳለፈውን ውሳኔ ፕሬዚዳንት ትራምፕ ለ75 ቀናት እንዲራዘም ማዘዛቸው ይታወቃል፡፡