ኢትዮ ኘላስ + Ethio Plus

የፌዴራል ቤቶች ኮርፖሬሽ በግማሽ ዓመቱ ከእቅድ በላይ 2.6 ቢሊየን ብር ገቢ ማገኘቱን አስታወቀ
----------------

ኮርፖሬሽኑ በ2017 በጀት ዓመት የመጀመሪያ ግማሽ ዓመት የተቋሙን ስኬት ቀጣይነት ያረጋገጡ ስኬታማ ሥራዎች መሰራታቸውን ባካሄደው የአፈጻጸም ግምገማ አረጋግጧል፡፡

በግማሽ ዓመቱ 2 ነጥብ 2 ቢሊየን ብር ገቢ ለማግኘት የታቀደ ቢሆንም ከ2 ነጥብ 6 ቢሊየን ብር በላይ ገቢ ተገኝቷል፡፡

ገቢውም ከኮሪደር ልማት ጋር ተያይዞ ኮርፖሬሽኑ ከፍተኛ ገቢ የሚያገኝባቸው ቤቶች በመልሶ ማልማት አካል በመሆናቸው የተቋሙ ገቢ ያሽቆለቁላል የሚለውን ስጋት የቀረፈ የገቢ እድገት ነው፡፡

ኮርፖሬሽኑ በመልሶ ማልማት ያጣውን ገቢ ለማካካስ በፍጥነት ተጨማሪ ሱቆችን በመስራት እና ሌሎች የገቢ ማስገኛ አማራጮችን በማከናወን በግማሽ ዓመቱ ከፍተኛ የገቢ እድገትና ተጨማሪ ከ 1 በሊየን ብር በላይ አሴት እንዲፈጠር ያስቻለ ውጤታማ ሥራ መሰራቱም ተጠቁሟል፡፡

በገቢ እድገትና ጤናማ የፋይናንስ ሥርዓት ከመፍጠር አኳያ የተሰራው ሥራ የኮርፖሬሽኑን የለውጥ ጉዞ አስተማማኝ እንዲሆን እያደረገ መሆኑን ነው የተገመገመው፡፡

ኮርፖሬሽኑ በራሱ አቅም ግዙፍ የቤት ግንባታ ፕሮጀክቶችን ለመገንባት የሚያስችል አቅም መፍጠር መቻሉም በጥንካሬ ተግምግሟል፡፡

ተቋሙ በታሪኩ ለመጀመሪያ ጊዜ ንጹህ የኦዲት አስተያያት ማግኘት መቻሉም በግምገማው ተነሰቷል፡፡ ይህም ዘመናዊ የፋይናንስ ሥርዓት ዝርጋታው የደረሰበትን ደረጃ የሚያሳይ ነው፡፡

ወጪ ቆጣቢ አካሄድን ተግባራዊ በማደረግ ረገድና የገቢ አማራጮችን ከማስፋት አንጻርም ውጤታማ ስራዎች መሰራታቸው ነው በግምገማው የተመለካተው፡፡

በግማሽ ዓመቱ የምስራቅ አጠቃላይ፣ ኮከበ ጽብሃና ግዙፍ የግብዓት ማምረቻ ማዕከል ተመርቆ ለአገልግሎት መብቃት መቻሉ የኮርፖሬሽኑ በላቀ አፈጻጸም ላይ እንዳለ የሚያሳይ መሆኑን ተገምግሟል።

በዚህ ስኬትን ለማጽትና ለማስቀጠል በተሰሩ አንኳር ሥራዎች ላይ ትኩረት ያደረገውን ግምገማ የመሩት የኮርፖሬሽኑ ዋና ሥራ አስፈጻሚ ክቡር ረሻድ ከማል ተጨማሪ የአፈጻጸም አቅጣጫም ሰጥተዋል፡፡

አገራዊ ፋይዳው የላቀ ትእምርት ባለው የኮሪደር ልማት፣ ኮርፖሬሽኑ እያደረገ ያለውን ተሳትፎ በተጠናከረ ሁኔታ ለማስቀጠል የሚያስችል አቅጣጫም ተቀምጧል፡፡

የኮሪደር ልማቱ ይዞት የመጣውን እድል በአግባቡ በመጠቀም በሚቻልበት ሁኔታ ውይይትና የአፈጻጸም አቅጣጫ ተሰጥቷል፡፡

ኮርፖሬሽኑ ገንብቶ ለማስረከብ ውል የገባበቸውን ግዙፍ አገራዊ ፕሮጀክቶችን ግንባታቸውን በጊዜ ገንብቶ ለማጠናቀቅ በልዩ ሁኔታ ክትትልና ድጋፍ እንደሚያደርግ ተገልጿል፡፡

የበርካታ ተቋማትን የአብረን እንስራ ጥያቄ ለመመለስ የሚያስችል ያልተቋረጠ የአቅም ግንባታ ሥራ መሰራት እንደለበት በግምገማው አጽንኦት ተሰጥቶበታል፡፡

ፍልስጥኤማዉያን ጋዛን እንዲለቁ የሚያስችል ዕቅድ እንዲነድፍ ታዘዘ
-----------
ትዕዛዙ የተላለፈው በእስራኤል መከላከያ ሚኒስትር እስራኤል ካትዝ ነው።

የሚንስትሩ ትዕዛዝ የተሰማው የአሜሪካው ፕሬዚዳንት ዶናልድ ትራምፕ የጋዛ ሰርጥን ለመቆጣጠር እንደሚፈልጉ ካስታወቁ በኋላ ዓለማቀፍ ተቃዉሞ እየተሰማ ባለበት ወቅት ነው።

የመከላከያ ሚንስትሩ እስራኤል ካትዝ፣ ትራምፕ ከ2 ሚሊዮን በላይ ፍልስጥኤማዉያን የሚኖሩባትን ጋዛን ለመቆጣጠር ማቀዳቸውን አድንቀዋል።

"የፕሬዚደንቱን በድፍረት የተሞላ ዕቅድ በደስታ እንቀበላለን ፤ በየትኛውም ዓለም እንደሚሆነው የጋዛ ነዋሪዎች ከመኖሪያቸዉ በነጻነት መውጣት እና መሰደድ ሊፈቀድላቸው ይገባል » ብለዋል።

ሚንስትሩ ፍልስጥኤማዉያኑ በየብስ ፣ በባህር አለያም በአየር እንደምርጫቸው ከጋዛ መውጣት እንዲችሉ አማራጮች ማዘጋጀታቸውን አስታውቀዋል።

የአረብ እና የአውሮጳ ህብረት አባል ሃገራትን ጨምሮ በርካታ ሃገራት የፍልስጥኤማዉያኑን ከሃገራቸው እንዲሰደዱ በፕሬዚዳንት ዶናልድ ትራምፕ የቀረበውን ሃሳብ ተቃዉመዋል።

የፍልስጥኤም አስተዳደር ፕሬዚዳንት መሐሙድ አባስ በበኩላቸው የአሜሪካውን ፕሬዚዳንት ዕቅድ በይፋ ውድቅ ባደረጉበት መግለጫቸው ።

" ህጋዊ የፍልስጥኤማዉያን መብቶች ለድርድር አይቀርቡም" … ሃሳቡም " ከባድ የመብት ጥሰት ነው " ብለውታል።

የመንግስታቱ ድርጅት ዋና ጸሐፊ አንቶኒዮ ጉተሬሽ በበኩላቸው“የፍልስጤም ሕዝብ በገዛ ምድራቸው እንደሰው የመኖር የማይገሰስ መብቶች» እንዳላቸው አጽንዖት ሰጥተዋል።

በሶማሊያ በሚገኘው የአይሲስ ክንፍ ላይ የሚካሄደው ዘመቻ ተጠናክሮ ቀጥሏል
------------

ለአንድ ወር ያህል የፑንትላንድ የፀጥታ ኅይሎች በእስላማዊ መንግሥት ተዋጊዎች መደበቂያ ምሽጎች ላይ እርምጃቸውን አጠናክረው የቀጠሉ ሲሆን፣ በቅርቡ ቱርማሳሌ በተሰኘው ቁልፍ ሥፍራ የተደረገው ከባድ ግጭት ተጠቃሽ ነው።

በሁለቱም ወገኖች ላይ ጉዳት ቢደርስም፣ የፑንትላንድ ኅይሎች በርካታ ሥፍራዎችን በመቆጣጠር የበላይነት አግኝተዋል ተብሏል።

የአሜሪካው ፕሬዝደንት ዶናልድ ትረምፕ ባለፈው ቅዳሜ በሶማሊያ በሚገኙ አንድ ከፍተኛ የእስላማዊ መንግሥት ጥቃት አቀናባሪና በሌሎቹም የቡድኑ ዓባላት ላይ ወታደራዊ የአየር ጥቃት እንዲፈፀም አዘዋል።

የአየር ጥቃቶቹ በጎሊስ ተራራማ ቦታዎች ላይ መደረጋቸውንና በሲቪሎች ላይ ጉዳት እንዳልደረሰም የአሜሪካው የመከላከያ ምኒስትር ፒት ሄግሴት አስታውቀዋል።

የሮይተርስ ዜና ወኪል ዝርዝር ጉዳዮችን በተመለከተ ከገለልተኛ ወገኖች ማረጋገጥ እንዳልቻለ አስታውቋል።

ስማቸው እንዲጠቀስ ያልፈለጉና በሶማሊያ ፕሬዝደንታዊ ጽ/ቤት የሚገኙ አንድ ባለሥልጣን የአየር ጥቃቶቹ መፈፀማቸውን አረጋግጠው፣ የሶማሊያ መንግሥት እርምጃውን በመልካም እንደሚቀበለው አስታውቀዋል።

አሜሪካ ለበርካታ ዓመታት በሪፐብሊካኑም ሆነ በዲሞክራቶቹ የአስተዳደር ዘመኖች ሶማሊያ ውስጥ የአየር ጥቃት ስትፈፅም ቆይታለች፡፡

ትረምፕ የካናዳን እና የሜክሲኮን መሪዎችን ሊነጋገሩ ነው
-----------

የዩናይትድ ስቴትሱ ፕሬዝዳንት ዶናልድ ትረምፕ ከሁለቱ ጎረቤቶቻቸው ካናዳ እና ሜክሲኮ፣ እንዲሁም ከቻይና በሚገቡ ምርቶች ላይ አዲስ ቀረጥ ከጣሉ እና በምላሹ ሁለቱ አገሮች በዩናይትድ ስቴትስ ላይ የአጻፋ ቀረጥ መጣላቸውን ይፋ ካደረጉ በኋላ ከመሪዎቹ ጋር ለመነጋገር ማቀዳቸውን አመለከቱ።

ትረምፕ በመጀመሪያው የሥልጣን ዘመናቸው ከካናዳ እና ሜክሲኮ ጋር ተደራድረው ‘ነጻ-የንግግድ ስምምነት’ ተግባራዊ ቢያደርጉም፤ ከነገ ማክሰኞ አንስቶ ተፈጻሚ የሚሆን አዲስ የሃያ አምስት በመቶ ቀረጥ ሲጥሉባቸው፤ በቻይና ላይ ደግሞ ቀደም ሲል ከተደነገገው በተጨማሪ የአሥር በመቶ ቀረጥ ጥለዋል።

ትረምፕ ሕገ-ወጥ ፍልሰትን ለማስቆም እና ዩናይትድ ስቴትስ ውስጥ ለብዙዎች ህልፈት ምክኒያት የሆነው ‘ፌንቲኔል’ የተባለ አደገኛ መድሃኒት ወደ አሜሪካ እንዳይገባ ለመከላከል በቂ ጥረት አላደረጉም’ ሲሉ ሦስቱን ሃገራት ከሰዋል።