የስብዕና ልህቀት

"መውደቅን መፍራት የሚመጣው የማይረቡ እሴቶችን ከመምረጥ ነው።"

✍️ ማርክ ማንሶን

መራመድ እየተማረ ስላለ ህፃን ልጅ ስታስብ፣ ያ ልጅ ለመቶዎች ጊዜ እየወደቀ ራሱን ይጎዳ ነበር፡፡ ነገር ግን የትኛውም ነጥብ ያንን ልጅ ቆም ብሎ “አይ ይቅር ሳስበው መራመድ ለእኔ አይሆንም እዚህ ላይ ጥሩ አይደለሁም” ብሎ እንዲያስብ አያደርገውም፡፡

መውደቅን መሸሽ በህይወታችን በኋላ ላይ የምንማረው ነገር ነው፡፡ እርግጠኛ ነኝ አብዛኛው የትምህርት ስርዓታችን ነው፡፡ ሌላው ትልቁ ድርሻ የሚመጣው ደግሞ ሁልጊዜ ለማዘዝ በሚሞክሩ ሀሳብን በሚያናንቁ ልጆቻቸው እየወደቁም በማይፈቅዱ ቢሆን በራሳቸው እንዲማሩ እንዲያውም የትኛውንም ያልታታዙትን ነገሮች በመሞከራቸው ልጆቻቸውን ከሚቀጡ ጥብቅ ወላጆች ነው፡፡ ከዚያ ደግሞ ያለማቋረጥ የከዋክብትን በስኬት ላይ ስኬት ማግኘት የሚነግሩን መገናኛ ብዙሃን አሉ፡፡ እነዚህ መገናኛ ብዙሃን ስኬቱን ሲነግሩን ያንን ስኬት ለማግኘት የሚያስፈልጉ በሺዎች የሚቆጠሩ ከባድና አሰልቺ ልምምዶችን አያሳዩንም፡፡

በሆነ ነጥብ ላይ አብዛኞቻችን መውደቅ የምንፈራበት ቦታ ላይ እንደርሳለን፡፡ የዚያን ጊዜ በደመነፍስ ውድቀትን እንሸሽና ፊት ለፊታችን ባለው ነገር ላይ ወይም በለመድነው ነገር ላይ ብቻ ተጣብቀን እንቀራለን፡፡

ይህ ደግሞ ያስረናል፡፡ አፍኖ ይይዘናል፡፡ በእውነት ስኬታማ የምንሆነው ለመውደቅ በመረጥንበት የሆነ ነገር ላይ ብቻ ነው፡፡ ለመውደቅ ፈቃደኛ ካልሆንን ስኬት ለማግኘት ፈቃደኛ አይደለንም ማለት ነው፡፡

አብዛኛው መውደቅን መፍራት የሚመጣው የማይረቡ እሴቶችን ከመምረጥ ነው፡፡ ለምሳሌ ራሴን የምለካበት ደረጃ “የማገኘው ሰው ሁሉ እንዲወደኝ ማድረግ” በሚል ቢሆን መውደቄ የሚወሰነው በራሴ ድርጊቶች ሳይሆን መቶ በመቶ በሌሎች ድርጊቶች ላይ በመሆኑ ጭንቀታም እሆናለሁ፡፡ እኔ ልቆጣጠረው የምችለው ነገር ባለመሆኑ ለራሴ ያለኝ ዋጋ በሌሎች ፍርድና ምህረት ስር ይወድቃል ማለት ነው፡፡

ነገር ግን በዚያ ፈንታ መለኪያዬን “ማህበራዊ ህይወቴን ማሻሻል” ላይ ባደርገው ሌሎች ሰዎች ምንም አይነት ምላሽ ቢኖራቸው እኔ ግን “ከሌሎች ጋር መልካም ግንኙነት መኖር” በሚለው እሴት መሰረት መኖር እችላለሁ፡፡ ለራሴ ያለኝ ዋጋ የተመሰረተው በራሴ ባህርያትና ደስታ ላይ ይሆናል ማለት ነው፡፡

የማይረቡ እሴቶች ከእኛ ቁጥጥር ውጪ የሆኑ የሚጨበጡ ውጫዊ ግብ የያዙ ናቸው፡፡ እነዚህን ግቦች መከተል ጭንቀት ያመጣል፤ ልናገኛቸው ብንችል እንኳን ባዶነትና ሕይወት አልባነት እንዲሰማን ያደርጉናል፡፡ ምክንያቱም አንድ ጊዜ ካገኘናቸው የምንፈታቸው ሌሎች ችግሮች አይኖሩንም፡፡የተሻሉ እሴቶች እንደተመለከትነው ሂደት ላይ ያተኮሩ ናቸው፡፡

“በአለማዊ ደረጃ ስኬታማ መሆን ለሚለው እሴት መለኪያህ “ቤትና አሪፍ መኪና መግዛት” ቢሆን፣ ያንን ለማግኘት ሀያ አመታት ወጥረህ በመስራት ታሳልፋለህ፡፡ ከዚያ አንድ ጊዜ መለኪያህን ካገኘኸው የሚቀርህ ነገር አይኖርም፡፡ ከዚያ መላውን እድሜህን ሲያሽከረክርህ የኖረው ችግርህ ስለተወገደ የጉልምስና ዘመን ቀውስን መቀበል ትጀምራለህ፡፡ማደግን ለመቀጠልና ለመሻሻል ሌሎች አጋጣሚዎች የሉም፡፡ እናም ደስታን የሚፈጥረው ደግሞ እድገት እንጂ በዘፈቀደ የመጡ ረጅም ዝርዝር ያላቸው ክንውኖች አይደሉም፡፡

ፒካሶ መላውን ህይወቱን ብዙ የሰራ ነው፡፡ እስከ ዘጠናዎቹ እድሜው ድረስ የኖረና እስከ መጨረሻዎቹ ቀናት ድረስ ስዕል ይሰራ ነበር፡፡ መለኪያው “ዝነኛ መሆን” ወይም “በጥበቡ አለም ብዙ ገንዘብ መስራት” ወይም “አንድ ሺ ስእሎች መሳል” ቢሆን ኖሮ ከረጅም ጊዜ በፊት አንድ ቦታ ላይ ቆሞ ይቀር ነበር፡፡ ከዚያ በጭንቀት ወይም ራስን በመጠራጠር ይሸነፍ ነበር፡፡ ስራዎቹን እንዲህ ከአመት ወደ አመት እንዲሻሻሉና እንዲፈጠሩ ማድረግ አይችልም ነበር፡፡ሽማግሌ ሆኖም ካፌ ውስጥ ቁጭ ባለበት ብቻውን በወረቀት ላይ በመሳሉ ደስተኛ ነው፡፡ የተመሰረተበት እሴት ትጉህ እና ፈጣሪ መሆን ነበር፡፡ የእነዚህ እሴት መለኪያ  የማያልቅ ቀጣይነት ያለው የሕይወት ዘመን ሂደት ነው።

#share
የስብዕና ልህቀት
@Human_intelligence

ስቃይ የሂደቱ አካል ነው

አንድ ሰው ጠንካራ አጥንትና ጡንቻ ለማዳበር በአካላዊ ህመም መሰቃየት እንዳለበት ሁሉ፣ ታላቅ ስሜታዊ እርጋታ፣ ጠንካራ ራስን የመሆን፣ ለሰው ያለውን ሀዘኔታ ለመጨመርና በአጠቃላይ ደስተኛ ሕይወት ለመገንባት በስሜታዊ ስቃይ ውስጥ ማለፍ አለበት፡፡

በጣም መሰረታዊ የሆኑ ነገሮች በእይታችን ውስጥ የሚሆኑት በአብዛኛው በጣም በመጥፎ ጊዜያቶቻችን መጨረሻ ላይ ነው፡፡ እሴቶቻችንን ለመመልከትና ለምን እንድንወድቅ ያደረጉን እንደሚመስለን መጠየቅ የምንፈቅደው በጣም ከባድ ስቃይ ሲሰማን ብቻ ነው፡፡ በህይወታችን ውስጥ እንዴት ትርጉም እንደምናመጣ የመመልከት አላማ እንዲኖረን የሆነ አይነት ቀውስ እንፈልጋለን፡፡ ከዚያ ሁኔታውን ለመለወጥ እንሞክራለን፡፡
እና ምናልባት አንተም አሁን እንደዚያ አይነት ቦታ ላይ ትሆን ይሆናል፡፡

ምናልባት በሕይወትህ በጣም ከባድና አስቸጋሪ ነገር እየመጣና ከዚህ በፊት እውን፣ የተለመዱ እንዲሁም መልካም እንደሆኑ የምታስባቸው ነገሮች ሁሉ ተቃራኒውን እየሆኑብህ ይሆናል፡፡

ጥሩ ነው፡፡ ያ የመጀመሪያው ነው፡፡ በበቂ ሁኔታ ላለረጋግጥልህ አልችልም ግን ስቃይ የሂደቱ አንድ ክፍል ነው፡፡ እንዲሰማህ መሆኑ አስፈላጊ ነው፡፡ ይህንን ህመም ለመሸፈን ሌላ ነገር የምታሳድድ ከሆነ፣ ራስህን ከፍ አድርገህ በማየትና በማይረባ አወንታዊ አስተሳሰብ ውስጥ መጥለቅህን ከቀጠልክ፣ በተለያዩ ሱሶች ወይም ድርጊቶች የበለጠ መያዝህን ከቀጠልክ፣ የእውነት ለመለወጥ የሚያስፈልግህን መነሳሳት በጭራሽ ማምጣት አትችልም፡፡

ብዙ ሰዎች የሆነ ህመም ወይም ንዴት ወይም ሀዘን ሲሰማቸው ሁሉንም ነገር  እርግፍ አድርገው በመተው የሚሰማቸውን ስሜት ማደንዘዝ ወይም መካድ ይጀምራሉ፡፡ ግባቸው በተቻለ ፍጥነት እንደገና ወደ “ጥሩ ስሜት መመለስ ነው፡፡ ያ ማለት እፅ መጠቀም ወይም ወደማይረቡ ጊዜ ማሳለፊያዎች መመለስ ቢሆንም ያንን ያደርጋሉ፡፡

የመረጥከውን ስቃይ መቋቋም ተማር፡፡ አዲስ እሴት ስትመርጥ ወደ ሕይወትህ አዲስ አይነት ስቃይ ለማስገባት እየመረጥክ ነው፡፡ ውደደው፡፡ አጣጥመው፡፡ እጆችህን ዘርግተህ ተቀበለው፡፡ ከዚያ ህመም እየተሰማህም ቢሆን ተራመድ፡፡

✍️ማርክ ማንሶን

የስብዕና ልህቀት
@Human_intelligence

#3 ግቦች ደስተኛነትን ይገድባሉ

ከየትኛውም ግብ ጀርባ ያለው ድብቅ ስሌት “አንድ ጊዜ ግቤን ካሳካሁ ደስተኛ እሆናለሁ” የሚል ነው፡፡ ግቦችን የማስቀደም አስተሳሰብ መሰረታዊ ችግር ሌላ ግብ እስክታሳካ ድረስ ደስታን አሽገህ እንድታስቀምጥ የሚያደርግህ መሆኑ ነው፡፡ በዚህ ወጥመድ ብዙ ጊዜ ተደናቅፌያለሁ፡፡ ለዓመታት ደስታ ማለት ለእኔ ወደፊት የማጣጥመው ገና ያልመጣ በረከት ነበር፡፡

ከዚህ ውጪም ግቦች የ “ወይም” (either or) ግጭትን ይፈጥራሉ፡፡ ወይ ግቦችህን ታሳካና ውጤታማ ትሆናለህ ወይ ደግሞ ግቦችህን ማሳካት ያቅትህና በመከፋት ውስጥ ትኖራለህ፡፡ በዚህ መንገድ ደስታ አጥብቦ በሚያይ ጠባብ አረዳድ አዕምሮህን ለሁለት ትከፍላለህ፡፡ ይህ የተሳሳተ አተያይ ነው፡፡ የሕይወትህ ጉዞ የሚጠበቀውን ያህል በትክክለኛው መንገድ የመሄድ እድሉ ዝቅተኛ ነው፡፡ ስለሆነም በእውነታው ብዙ የስኬታማነት መንገዶች እያሉ እርካታን ከአንድ ሁኔታ ጋር ብቻ ማስተሳሰር ተገቢ አይደለም፡፡

ሂደትን የማስቀደም አስተሳሰብ ማርከሻውን ይሰጠናል፡፡ ከውጤቱ ይልቅ በሂደቱ ስትወሰድ ደስተኛ ለመሆን የምትጠብቀው ቀን አይኖርም፡፡ ሂደትህ በአግባቡ እየሄደ እንደሆነ ባየህ በየትኛውም ጊዜ ደስተኛ መሆን ትችላለህ፡፡ ሂደት ደግሞ በአንድ መንገድ ሳይሆን በብዙ አማራጭ መንገዶች ውጤታማ መሆን ይችላል፡፡

#4 ግቦች ከረዥም ጊዜ እድገት ጋር አይጣጣሙም

ግቦችን የማስቀደም አስተሳሰብ “የአሳክቻለሁ” ስሜት (Yo Yo Effect) ይፈጥራል፡፡ ብዙ ሯጮች ለወራት ጠንክረው ይሰራሉ፡፡ ልክ ድል አድርገው ከገቡ በኋላ ግን ልምምድ መስራት ያቆማሉ፡፡ ከዚያ በኋላ ውድድሩ ሊያነሳሳቸው አይችልም፡፡ ድካምህ ሁሉ አንድን ግብ ያማተረ ከሆነ እሱን ካሳካህ በኋላ ሊያነሳሳህ የሚችል ምን ቀሪ ነገር ይኖራል? ለዚህ ነው ብዙ ሰዎች ግባቸውን ካሳኩ በኋላ ወደቀደሙ መጥፎ ልማዶቻቸው ሲመለሱ የምናየው፡፡

ግብን የማስቀመጥ ጥቅሙ ውድድርን ለማሸነፍ ነው፡፡ ሂደትን የመገንባት ጥቅም ግን ጨዋታውን እየተጫወቱ ለመቀጠል ነው። እውነተኛ የረዥም ጊዜ ሀሳብ ግቦች ላይ የተመሰረተ አይደለም፡፡ ሂደት ማቆሚያ ስለሌላቸው መሻሻሎችና ቀጣይነት ስላላቸው ማሻሻያዎች ነው፡፡ እድገትህን የሚወስነው ዋናው ነገርም የአንተ ቁርጠኝነት ነው፡፡


@Human_Intelligence

#1 አሸናፊዎችም ተሸናፊዎችም ተመሳሳይ ግቦች አሏቸው።

ግቦችን ማስቀመጥ ስኬታማዎች በማድላት መድሎ (survivorship bias) በከፍተኛ ሁኔታ የተጠቃ ነው። ትኩረት የምናደርገው አሸናፊ ሆነው በጨረሱት ወገኖች ላይ ነው፡፡ በዚህም የተነሳ ለውጤት ያበቃቸው የተለጠጠው እቅዳቸው እንደሆነ አድርገን እናስባለን። ተመሳሳይ ግቦችን አስቀምጠው ሩጫቸውን በተሸናፊነት የቋጩ ተወዳዳሪዎችን ግን አናይም፡፡

የትኛውም የኦሎምፒክ ተወዳዳሪ የወርቅ ሜዳሊያውን ማሸነፍ ግቡ ነው፡፡ የትኛውም ምሩቅም ስራ ማግኘትን ያልማል። ውጤታማ የሆኑም፤ ውጤታማ ያልሆኑም ሰዎች ተመሳሳይ ግቦችን የሚጋሩ ከሆነ በተሸናፊዎችና በአሸናፊዎች መካከል ለተፈጠረው የስኬታማነት ልዩነት ምክንያት ግቦችን ማስቀመጥ አይደለም ማለት ነው።
ስለሆነም ግቦች ሁልጊዜም ነበሩ። በኋላ ውጤት ያመጣው ለየት ያለው ነገር በቡድኑ ላይ በየቀኑ መሻሻልን ያመጡ የሂደቱ ሁኔታዎች ናቸው፡፡

#2 ግብን ማሳካት ቅጽበታዊ ለውጥ ብቻ ነው

የመኖሪያ ክፍልህ በጣም ስለቆሸሽ ልታፀዳው ግብ አስቀመጥክ እንበል፡፡ ጉልበትህን አሰባስበህ ወደ ሥራ ከገባህ ንፁህ ክፍል ይኖርሀል - በዚያች ቅጽበት፡፡ ይሁን እንጂ አስቀድሞም ቆሻሻ ክፍል እንዲኖርህ ወዳደረገው ባህሪህ የምትመለስ ከሆነ ክፍልህ እንደገና ይቆሽሻል፡፡ እንደገና ለማፅዳትም ሌላ ብርታት መፈለግ ይኖርብሃል፡፡ ሂደቱን ባለመቀየርህ ምክንያት በተለያየ ጊዜ ተመሳሳይ ውጤት ስታባርር ትኖራለህ ማለት ነው፡፡ ምክንያቱን ሳያስወግዱ ምልክቶቹን ብቻ እንደማከም ነውና፡፡

ግብን ማሳካት ሕይወትን የሚቀይረው ለቅጽበታት ብቻ ነው፡፡ ይህ ስለ መሻሻል ያለ የስሜት ግብረ መልስ ነው፡፡ ውጤቶቻችንን ማሻሻል እንደምንፈልግ እናስባለን፡፡ ችግሮቻችን ግን ውጤቶቻችን አይደሉም፡፡ መቀየር ያለብን ሂደቱን እና ስርዓቱን ነው፡፡ ምክንያቱም ችግሩን የሚፈጥሩት እነዚህ ነገሮች ናቸው፡፡ በውጤት ደረጃ ችግሮችን ብትቀርፍ መቅረፍ የምትችለው በጊዜያዊነት ብቻ ነው፡፡ ቀጣይነት ያለው ጥሩ ለውጥ ለማምጣት ከፈለግክ ችግሮቹን በሂደት ደረጃ መፍታት አለብህ፡፡ ግብዓቶችን አስተካክል፤ ውጤቶች ራሳቸውን ያስተካክላሉ፡፡

@Human_Intelligence

ግቦችን እርሳቸውና በሂደቱ ላይ አተኩር

የተለመደው አረዳድ በሕይወታችን ውስጥ የምንፈልጋቸውን ነገሮች ለማሳካት፣ ብዙ ጭንቀት የሌለበት ዘና ያለ ሕይወትን ለመኖር እና ውጤታማ ሕይወትን ለመምራት ቁልፉ ነገር ሊተገበሩ የሚችሉ ግቦችን ማስቀመጥ ነው” የሚለው ነው፡፡

እኔም ለብዙ ዓመታት ልማዶችን የምቃኝበት መንገድ ይህ ነበር። እያንዳንዳቸው ሊደረስባቸው የሚቻሉ ግቦች ናቸው፡፡ ለምሳሌ በትምሀርት ቤት ውስጥ ማምጣት ስላለብኝ ውጤት ግብ አስቀምጣለሁ። በቢዝነሱ ውስጥ ላገኘው ስለምፈልገው ትርፍ፣ በጂም ቤት ላነሳው ስለምፈልገው ክብደት ወዘተም እንደዚያው፡፡ በተወሰኑት ውጤታማ መሆን የቻልኩ ቢሆንም በአብዛኞቹ ግን አልተሳካልኝም፡፡ በሂደት ያገኘሁት ውጤት ካስቀመጥኩት ግብ ጋር ያለው ግንኙነት ውስን መሆኑን ተረዳሁ፡ ከዚያ ይልቅ ያመጣኋቸውን ውጤቶች ጨምሮ ሁሉም ነገሮች ቀጥተኛ ግንኙነት ያላቸው ከሂደቱ (system) ጋር እንደሆነ አወቅሁ፡፡

በስርዓታዊ ሂደት (system) እና በግቦች (goals) መካከል ያለው ልዩነት ምንድን ነው? ይህንን ልዩነት ለመጀመሪያ ጊዜ የተማርኩት ከ “ዲልበርት ኮሚክ” ጀርባ ካለው ካርቶኒስት ከስኮት አዳምስ ነው፡፡ ግቦች ልታሳካቸው የምትፈልጋቸው ውጤቶች ናቸው፡፡ ስርዓታዊ ሂደቱ ግን ወደእነዚህ ውጤቶች የሚመራህ ሂደት ነው፡፡

👉አሰልጣኝ ከሆንክ ምናልባት ግብህ ውድድሩን ማሸነፍ ሊሆን ይችላል። ሂደትህ ደግሞ ተጨዋቾችን የምትመለምልበት መንገድ፣ ልምምድ የምታሰራበት መንገድ፣ ምክትል አሰልጣኞችህን የምትጠቀምበት መንገድ ወዘተ... ናቸው፡፡

👉ሥራ ፈጣሪ ከሆንክ ግብህ ባለ ብዙ ሚሊዮን ዶላር ቢዝነስ መገንባት ሊሆን ይችላል። የምርትን ሀሳቦች የምትፈትንበት መንገድ፣ ሰራተኞችን የምትቀጥርበት ሁኔታ፣ የማርኬቲንግ ስራውን የምትመራበት መንገድ ወዘተ ደግሞ የሂደቱ አካል ይሆናሉ፡፡

👉ሙዚቀኛ ከሆንክ ደግሞ ግብህ አዲስ ሙዚቃ መስራት ሊሆን ይችላል፡፡ የምትሰራቸው _ ልምምዶች ብዛት፣ አስተያየቶችንና ምክሮችን ተቀብለህ የምትተገብርበት ሁኔታ ወዘተ... ግን ሂደቶቹ ናቸው፡፡

አንድ ጥያቄ ደግሞ እናንሳ፡፡ ግቦችህን ሙሉ በሙሉ በመተው ሂደቱ ላይ ብቻ ብታተኩር ውጤታማ መሆን ትችላለህ? ለምሳሌ አንተ የቅርጫት ኳስ አሰልጣኝ ብትሆንና ውድድሩን የማሸነፍ ግብህን ሙሉ በሙሉ ረስተህ ቡድንህ በየቀኑ የሚሰራው ተግባራዊ ሥራ ላይ ብቻ ብታተኩር ውጤት ልታመጣ ትችላለህ?
እኔ ልታመጣ እንደምትችል አስባለሁ።
የተሻለ ውጤት ይዞ ማጠናቀቅ ነው፡፡ የጨዋታ ጊዜዎችን ማሳለፍ ግን የሚያበቃው እውነተኛው መንገድ በየትኛውም ስፖርት ውስጥ ግቡ የውጤት ሰንጠረዥን እያዩ ሙሉ ትርጉም የለሽ ነው፡፡ ለውጤታማነት በየቀኑ ለመሻሻል መጣርና ልዩነት ማሳየት ነው፡፡ የ3 ጊዜ የሱፐር ቦል አሸናፊው ቢል ዋሽ እንዳለው “ውጤት ለራሱ ይጨነቃል፡፡” ለሌሎች የሕይወት ዘርፎችም እውነታው ይሄው ነው፡፡ የተሻለ ውጤት ማምጣት ከፈለግክ ግቦችን መደርደርን ችላ በልና ሂደቱ ላይ አተኩር፡፡

ምን ማለቴ ነው? ግቦች ምንም ጥቅም የላቸውም እያልኩ ነው? በፍፁም! ግቦች አቅጣጫን ለማስቀመጥ በጣም ጠቃሚ ነገሮች ናቸው፡፡

ለውጥ ለማምጣት በጣም የሚጠቅመን ግን ሂደት ነው፡፡ በቂ ስርዓት ሳትቀርዕ ያስቀመጥካቸው ግቦች ላይ ብቻ በማውጠንጠን ጊዜ ማሳለፍ ብዙ ችግሮች ይፈጥራል፡፡
ለምሳሌ...
ይቀጥላል...

Atomic habit
ጄምስ ኬለር

የስብዕና ልህቀት
@Human_Intelligence

ትግልህን ምረጥ!!

“ከሕይወት የምትፈልገው ምንድነው?” ብዬ ብጠይቅህና “ደስተኛ መሆን፣ ታላቅ ቤተሰብ መመስረትና የምወደው ስራ እንዲኖረኝ፡፡” ብለህ ብትመልስልኝ፣ መልስህ የተለመደና የሚጠበቅ ከመሆኑ የተነሳ ምንም ትርጉም የሌለው ይሆናል፡፡

ሁሉም ሰው ጥሩ በሆነው ይደሰታል፡፡ ሁሉም ሰው ጭንቀት የሌለበት፣ ደስተኛና ቀላል ሕይወት መኖር፤ በፍቅር መውደቅ፣ በጣም ደስ የሚል ወሲባዊ ግንኙነትና የፍቅር ጓደኝነት፣ ዘናጭ መሆንና ገንዘብ መስራት፣ ታዋቂና የተከበረ መሆን፣ በጣም የተደነቀ ከመሆን የተነሳ ወደ አንድ ቦታ ሲራመድ ሰዎች እንደ ቀይ ባህር የሚከፈሉለት ቢሆን ይፈልጋል፡፡

ሁሉም ሰው ያንን ይፈልጋል፤ ያንን መፈለግ ቀላል ነው፡፡

በጣም ደስ የሚለውና ብዙ ሰዎች በጭራሽ የማያስተውሉት መጠየቅ ያለበት ጥያቄ ግን “በሕይወትህ ውስጥ ምን አይነት ስቃይ ትፈልጋለህ? ልትታገል የምትፈልገው ምንድነው?” የሚል ነው፡፡ምክንያቱም ህይወታችን እንዴት እንደሚሆን የሚወስነው ትልቁ ነገር ያ ነውና፡፡

ለምሳሌ ብዙ ስዎች አሪፍ ቢሮ እንዲኖራቸውና ብዙ ገንዘብ መስራት እንዲችሉ ይፈልጋሉ፡፡ ነገር ግን በሳምንት ስልሳ ሰዓት በመስራት፣ በረጅም ጉዞዎችና አሰልቺ በሆኑ የወረቀት ስራዎች መሰቃየት የሚፈልጉ ሰዎች ብዙ አይደሉም፡፡

ብዙ ሰዎች አሪፍ ወሲብ፣ ጥሩ የፍቅር ግንኙነት እንዲኖራቸው ይፈልጋሉ፡፡ ነገር ግን ሁሉም ሰው ወደዚያ ለመድረስ አስቸጋሪ የሆኑ ንግግሮችን፣ አሳፋሪ ሁኔታዎችንና የስሜት መጎዳቶችን ለማለፍ ፈቃደኛ አይደለም፡፡ ከዚያ ይረጋጉና፣ ጥያቄው ከ “ቢሆንስ?” ወደ “ከዛስ?” እስኪለወጥ ድረስ ለአመታት ያስባሉ፡፡

ደስታ ትግል የሚጠይቅ በመሆኑ የሚነሳው ከችግር እንጂ ልክ እንደ አበባና ቀስተደመና ከመሬት የሚነሳ አይደለም፡፡ እውነተኛ የእድሜ ልክ እርካታና ትርጉም የሚገኘው ትግሎቻችንን በመምረጥና ማስተዳደር በኩል ነው፡፡

አሪፍ የሰውነት አቋም እንዲኖርህ ትፈልጋለህ እንበል፡፡ ነገር ግን ለብዙ ሰዓታት ጂም ውስጥ በመስራት የሚያጋጥምህን ህመምና አካላዊ ጭንቀት በፅናትና በደስታ ካልተቋቋምክ፣ የምትመገበውን ምግብ መመጠን እና ማስተካከል ካልወደድክ፣ የምትፈልገውን በስፖርት የተገነባ ሰውነት አታገኝም፡፡

ሰዎች የራሳቸውን ስራ መስራት ይፈልጋሉ፡፡ ነገር ግን ያንን ለማድረግ በሚደረግ ሙከራ የሚያጋጥማቸውን አደጋ፣ እርግጠኛ ያለመሆን፣ ተደጋጋሚ ውድቀት ካልተቋቋሙ፣ ምንም ነገር ጠብ ለማይል ነገር ያጠፏቸውን ጊዜያት በደስታ ካልተቀበሉ፣ስኬታማ ስራ ፈጣሪ መሆን አይችሉም፡፡

ሰዎች የትዳር አጋር፣ ወይም የፍቅር ጓደኛ ይፈልጋሉ። ነገር ግን ከሚያጋጥሙህ ተደጋጋሚ አለመፈለጎች የተነሳ የሚመጣብህን የስሜት መዋዠቅ በትዕግስት  ካላለፍክ፣ ማስተንፈስ የማትችለውን ወሲባዊ ውጥረት ካልተቋቋምክና የማይደወል ስልክ ላይ ማፍጠጥን ካልተጋፈጥክ ማራኪ አጋር ማግኘት አትችልም፡፡ ይህ የፍቅር ጨዋታ ክፍል ነው፡፡ ካልተጫወትክ ማሸነፍ አትችልም፡፡

ያንተን ስኬት የሚወስነው “በምን መደሰት ትፈልጋለህ?” በሚለው ጥያቄ አይደለም፡፡ ወደ ደስታ የሚወስደው መንገድ በሚያንሸራትቱ ነገሮችና በእፍረት የተሞላ በመሆኑ ተገቢ የሚሆነው ጥያቄ “ምን አይነት ስቃይን መቋቋም ትፈልጋለህ? የሚል ነው፡፡
ሕይወት ሁልጊዜ በፅጌረዳ ያሸበረቀ ሊሆን አይችልም፡፡ ስቃይ አልባ ሕይወት ሊኖርህ የማይችል ከሆነ ደግሞ የሆነ ነገር መምረጥ አለብህ፡፡

በጣም አስፈላጊውና ከባዱ ጥያቄ፣ “መቋቋም የምትፈልገው ምን አይነት ስቃይ ነው?” የሚለው ነው፡፡ የሆነ ቦታ የሚያደርስህና ለሕይወት ያለህን እይታ ሊለውጥ የሚችለውም ጥያቄ ይህ ነው፡፡ እኔን እኔ፣ አንተን አንተ ያደረገን እንዲሁም እኛን የሚገልፀንና የሚለያየን በመጨረሻም አንድ ላይ የሚያደርገን ጥያቄ ይህ ነው፡፡

በአብዛኛው በጉርምስናና በወጣትነት ዘመኔ ሙዚቀኛ በተለይም የሮክ ሙዚቃ ኮከብ ስለመሆን አልም ነበር።የትኛውንም በጊታር የታጀበ ሙዚቃ ስሰማ አይኖቼን ጨፍኜ በምናቤ ራሴን መድረክ ላይ በአድናቆት
ለሚጮኹ ብዙ ሰዎች ጊታር ስጫወት፣ ሰዎች በእኔ ጊታር አጨዋወት ተማርከው ራሳቸውን ሲስቱ እመለከት ነበር፡፡ ሀሳቡ ለእኔ ቢሆንስ? የሚል ጥያቄ ስላልነበረ ይህ ህልም ለሰአታት ይዞኝ ይቆይ ነበር፡፡ በአድናቆት በሚጮኹ ተመልካቾች ፊት እንደምጫወት እርግጠኛ ነበርኩ፤ ግን መቼ? ሁሉንም ማቀድ ነበረብኝ፡፡ እዚያ ደርሼ አሻራዬን ለማሳረፍ፣ እንዲሁም አስፈላጊውን ኃይልና ጥረት መስጠት ከመቻሌ በፊት ጊዜዬን መጠበቅ ነበረብኝ፡፡ በመጀመሪያ ትምህርቴን መጨረስ፣ ከዚያ ጊታር ለመግዛት ተጨማሪ ገንዘብ መስራት፣ ከዚያ ደግሞ ለመለማመድ በቂ ነፃ ጊዜ ማግኘት፣ ቀጥሎ የመጀመሪያ ፕሮጀክቴን ማቀድ ያስፈልገኝ ነበር፡፡ ከዚያ... ከዚያ. . . በቃ፡፡

ይህንን ነገር የእድሜዬን ግማሽ ያህል ሳልመው የኖርኩ ቢሆንም ምኞቴ ግን ለፍሬ አልበቃም፡፡ በመጨረሻ ለምን ለፍሬ እንዳልበቃ እስክረዳ ድረስ ረጅም ጊዜና ረጅም ትግል ወስዶብኛል፡፡ ለካ ለፍሬ ያልበቃው ከልቤ ስላልፈለግኩት ነበር፡፡

በምናቤ ራሴን መድረክ ላይ ሆኖ ሳየው፣ ሰዎች በአድናቆት ሲጮሁ፣ እኔ ፍፁም ከልቤ ሆኜ ጊታር ስጫወት ሳልም ፍቅር የወደቅኩት ከውጤቱ ጋር እንጂ ከሂደቱ ጋር አልነበረም፡፡

ያልተሳካልኝም በዚያ ምክንያት ነበር፡፡ በተደጋጋሚ ወድቄያለሁ፡፡ በበቂ ሁኔታ አለመሞከር ብቻ ሳይሆን እንዲያውም አልሞከርኩም ማለት ይቻላል፡፡ የየእለቱ አሰልቺ ልምምድ፣ የሙዚቃ ቡድን መፈለጉና አብሮ መለማመዱ፣ ሰዎችን የመጠበቁ ስቃይ፣ የጊታሬ ክሮች መበጠስ፣ እቃዎቼን ከቦታ ቦታ ለማንቀሳቀስ የመኪና አለመኖር ህልሜን ተራራ የሚያክል አድርጎብኝ ነበር፡፡ እዚያ ላይ ለመድረስ ደግሞ ተራራውን መውጣት ያስፈልግ ነበር፡፡ እኔ ደግሞ የወደድኩት ውጤቱን በምናቤ ማየት ብቻ ስለነበር፣ ብዙም ተራራ መውጣት እንደማልወድ ለመረዳት ብዙ ጊዜ ወስዶብኝ ነበር፡፡

የተለመደው ባህላዊ ትረካ ያቋረጥኩ ወይም ተሸናፊ መሆኔ፣ “ያላገኘሁ” መሆኔ፣ ህልሜን በመተው እና ምናልባትም በህብረተሰቡ ጫናዎች እንድሸነፍ በማድረግ በሆነ መንገድ ራሴን እንድወድቅ ያደረግኩ እንደሆንኩ ይነግረኛል፡፡

እውነቱ ግን ከእነዚህ ገለፃዎች በተሻለ ደስ የሚል አለመሆኑ ነው፡፡ እውነቱ የሆነ ነገር እንደምፈልግ አስቤ ነበር፡፡ ግን አልፈለግኩም ነበር፡፡ አለቀ፡፡ የፈለግኩት ሽልማቱን እንጂ ትግሉን አልነበረም፤ የፈለግኩት ውጤቱን እንጂ ሂደቱን አልነበረም፡፡ ፍቅር የያዘኝ ከድሉ እንጂ ከትግሉ አልነበረም፡፡

ሕይወት ደግሞ በዚያ መንገድ አይመራም፡፡ማንነትህ የሚታወቀው ልትታገልለት ፈቃደኛ በሆንከው ነገር ነው፡፡ ስፖርት የመስራትን ትግል በደስታ የሚቀበሉ ሰዎች የሚፈልጉትን ስፖርታዊ አቋም ያገኛሉ፡፡ ረጅም የስራ ሳምንትንና ቢሮክራሲ መቋቋም የሚችሉ ሰዎች የአመራር መሰላል ጫፍ ላይ መድረስ የሚችሉ ሰዎች ናቸው፡፡

ይህ ስለ ቆራጥነት ወይም ጥርስን ስለመንከስ አይደለም፡፡ ይህ “ህመም ከሌለ ማግኘት የለም” የሚለው አይነት ሌላ ግሳፄ አይደለም፡፡ ይህ ትግላችን ስኬታችንን ይወስናል፡፡  ችግሮቻችን የደስታዎቻችን መፈጠሪያ ናቸው የሚል የሕይወት በጣም ቀላሉና መሰረታዊ አካል ነው፡፡

አየህ ይህ መጨረሻ የሌለው ቀጥ ብሎ የቆመ ጠመዝማዛ ብረት ነው፡፡ የሆነ ነጥብ ላይ መውጣት ማቆም እንደሚፈቅድልህ ካሰብክ፣ ነጥቡን ስተሃል ብዬ እፈራለሁ፡፡ ምክንያቱም ደስታው ያለው በራሱ በመውጣቱ ላይ ነውና!!

📚The subtle art of not giving a fuck
✍️Mark Manson

የስብዕና ልህቀት
@Human_Intelligence

መሰልቸትን ማፍቀር አለብህ
(መሰልቸትን ተቋቁሞ በትኩረት ስለመቀጠል)

“አንድ ስኬታማና ስመጥር አሰልጣኝ አገኘሁና በምርጥ አትሌቶችና በሌሎች ተራ ሰዎች መካከል ያለው ልዩነት ምንድን ነው?” ብዬ ጠየቅኩት፡፡

“ብዙዎች የማያደርጉትና ውጤታማ ሰዎች የሚያደርጓቸው ነገሮች ምንድን ናቸው?” አይነት ጥያቄ፡፡

በመጀመሪያ አንተም ልትገምታቸው የምትችላቸውን ነገሮች ዘረዘረልኝ፡፡ ዘረመል፣ እድል፣ ተሰጥዖ፣ ወዘተ፡፡ ከዚያ ግን አንድ ያልጠበቅኩት ነገር ነገረኝ፡፡ “ከሆነ ሂደት በኋላ ግን ወሳኙ ነገር በየቀኑ አንድ አይነት ሊፍት የማንሳትን እና ተመሳሳይ ልምምድ የመስራትን አሰልቺነት የሚቋቋመው ማነው የሚለው ይሆናል።”

መልሱ በጣም አስደነቀኝ፡፡ ምክንያቱም ይህ የሥራ ምግባርን በሌላ አተያይ የሚያይ አመለካከት ነው። ሰዎች በግባቸው ላይ ለመስራት ስለ መበርታት ሲያወሩ እንሰማለን፡፡ በስፓርቱም ይሁን በአርቱ ወይም በንግድ ዘርፍ “አጥብቀህ መፈለግ አለብህ” ወይም “ሁሉም ነገር የጥረት ውጤት ነው” አይነት አባባሎችን ሲናገሩ እንሰማለን፡፡ በዚህም የተነሳ ተነሳሽነትንና ትኩረትን ስናጣ ይደብረናል፡፡ ምክንያቱም ስኬታማ ሰዎች ጥልቀቱ የማያልቅ የጥረትና የፍላጎት ፀጋ ያላቸው እንደሆኑ እናስባለንና፡፡

ይህ አሰልጣኝ እያለኝ ያለው ነገር ግን ውጤታማ ሰዎችም ማንኛውም ሰው የሚሰማውን ያህል ተነሳሽነት የማጣት ስሜት ሊሰማቸው ይችላል ነው። ልዩነቱ እውነተኛ ውጤታማ ሰዎች ከድብርታቸው ተመንጭቀው የሚነሱባቸውን መንገዶች አጥብቀው ፈልገው የሚያገኙ መሆናቸው ነው፡፡

አንድን ነገር በደንብ ማወቅ ልምምድን ይጠይቃል። አንድን ነገር እየደጋገምክ በሄድክ ቁጥር ግን አሰልቺ ይሆንብሃል፡፡ አንድ ጊዜ የጀማሪነትን ጥቅም ከተቀበልንና ምን መጠበቅ እንዳለብን ካወቅን በኋላ ፍላጎታችን እየጠፋ መሄድ ይጀምራል።

ሁላችንም ልናሳካቸው የምንፈልጋቸው ግቦችና ልንተገብራቸው የምንፈልጋቸው ህልሞች አሉን፡ የትኛውንም ለውጥ ለማምጣት ይሁን የምትሰራው ሥራህን የምትፈፅመው ሲመችህ ብቻ ከሆነ ወደ ውጤት የሚያደርስህ በቂ ወጥነት መቼም አይኖርህም፡፡

አንድን ልማድ ለማዳበር አስበህ ብትጀምረውና የሙጥኝ ብለህ እያስኬድከው ያለኸው ቢሆን እንኳን “ተወው” የሚልህ ቀን መምጣቱ እንደማይቀር እርግጠኛ አደርግሃለሁ፡፡ ስትፅፍ መጻፍ የሚሰለችህ ጊዜ አለ፡፡ ስፖርት ስትሰራ መጨረስ የሚሳንህ ጊዜ አለ... ወዘተ። በፕሮፌሽናሎችና በአማተሮች መካከል ያለው ልዩነት እንደዚህ አይነት ስሜት ውስጥ ሆነህና መስራት አስጠሊና አናዳጅ ነገር ሆኖብህም ስራህን መቀጠል ስትችል ነው።

ፕሮፌሽናሎች በጊዜ ሰሌዳቸው መሰረት ሳያዛንፉ ይሰራሉ፤ አማተሮች ግን ከደበራቸው ተወት ያደርጉታል። ፕሮፌሽናሎች  የሚጠቅማቸውን ነገር ያውቁታልና በዓላማቸው ይገፉበታል። አማተሮች ግን በትናንሽ እንቅፋቶች እየተገፉ ከመንገዳቸው ይወጣሉ።

አንድ ልማድ በጣም አስፈላጊህ ከሆነ በየትኛውም ሙድ ውስጥ ሆነህ ልትተገብረው ቆራጥነቱ ሊኖርህ ይገባል። ፕሮፌሽናሎች በመጥፎ ስሜት ውስጥ ሆነውም እንኳን መስራት ያለባቸውን ይሰራሉ፡፡ ደስ ላይላቸው ይችላል፤ ድግግሞሹን ላለማቋረጥ ግን መንገዱን አያቋርጡም፡፡

በአንድ ነገር ላይ እጅግ በጣም ጎበዝ የመሆናቸው ብቸኛ መንገድ አንድ ነገር ማለቂያ በሌለው ሁኔታ እየደጋገሙ በመስራት ደስ መሰኘት ነው። መሰልቸትን ማፍቀር አለብህ፡፡

Atomic habit
ጄምስ ኪለር

የስብዕና ልህቀት
@Human_Intelligence

ግብህን ካላወክ የትኛውም መንገድ ይወስድሃል

“ቁም ነገሩ ከየት እንደመጣህ አይደለም፣ ዋናው ቁም ነገር ወደ የት እንደምትሄድ ማወቅህ ነው” – Brian Tracy

አንድ መንገደኛ ሰው ረጅምና አድካሚ የሆነ ጎዳናን ካለፈ በኋላ መንትያ መንገዶች ላይ ደረሰ፡፡ በዚያ የቆመን አንድ ሌላ የሀሃገሩን ሰው አየና፣ “ከእነዚህ ሁለት መንገዶች ትክክለኛው መንገድ የቱ ነው?” ብሎ ጠየቀው፡፡ ይህ የሃገሩ ሰው፣ “መሄድ የምትፈልገው ወደ የት ነው?” ብሎ ለመንገደኛው ጥያቄውን በጥያቄ መለሰለት፡፡ መንገደኛውም፣ “ወደ የት መሄድ እንደፈለኩ ገና አላወኩም” አለው፡፡ የቆመውም ሰው፣ “እንግዲያውስ፣ ሁለቱም ትክክለኛ መንገዶች ናቸው” በማለት ለአንዴና ለመጨረሻ ጊዜ መለሰለት፡፡ መንገደኛው፣ “የምትሄድበትን ካላወቅህ የትኛውም መንገድ ይወስድሃል” የሚልን መልእክት ተቀብሎ፣ “መልእክቱ ገብቶኛል” በሚል ዝምታ ተዋጠ፡፡

ብዙ ሰዎች በደመ-ነፍስ ነው የሚኖሩት፡፡ ከየት ተነስተው ወደ የት መሄድ እንዳለባቸው በቅጡ አያውቁትም፡፡ ወደ የት እንደሚሄዱ ማወቅ በሕይወት ላይ ያለውን ተጽእኖ በፍጹም አስበውት አያውቁም፡፡

የግብ ጉዞ የምርጫ ጉዞ ነው - “የትኛውን ጎዳና ብመርጥ ወደ ዋናው የሕይወቴ አላማና ራእይ ያደርሰኛል” የሚል ምርጫ! ግቡን በቅጡ ያላወቀ ሰው የመጣውን ያስተናግዳል፣ ወደተከፈተለት ይገባል፣ ጊዜአዊ ደስታን በሰጠው ነገር ላይ ጊዜውን ያባክናል፡፡

ሕይወት በምርጫ የተሞላች ነች፡፡ ጠዋት በስንት ሰአት ከመኝታዬ መነሳት እንዳለብኝ ከምወስነው ውሳኔ አንስቶ ማታ በስንት ሰአት ወደመኝታዬ መሄድ አለብኝ እስከሚለው ድረስ የምንመርጠው ምርጫና የምንወስነው ውሳኔ በአላማችን ላይ ጣልቃ ይገባል፡፡

“ብዙ ሰዎች የሚያስፈልጋቸው አሳ እንዳልሆነ ሳይገባቸው እድሜ ልካቸውን አሳ ሲያጠምዱ ይኖራሉ” –Henry David Thoreau

“የምትፈልገውን ነገር ካልተከታተልከው አትጨብጠውም፡፡ ካልጠየክ መልሱ ሁልጊዜ የእምቢታ ነው፡፡ ወደፊት ካልተራመድክ ዘወትር ራስህን ባለህበት ታገኘዋለህ” – Nora Roberts

“ግቡ አልደረስ ያለ ሲመስልህ መቀየር ያለብህ ግቡን አይደለም አካሄድህን እንጂ” - Unknown Source


የስብዕና ልህቀት
@Human_Intelligence

💬ለራስህ ያለህን አመለካከት የሚለውጡ አራት ነጥቦች
How to change your Self -image.

✍ሚስጥረ አደራው

🔘ኸርል ናይቲንጌይል በሰው ልጆች ባህሪ እና አስተሳሰብ ላይ ትልቅ አስተዋጽዎ አበርክተው ካለፉ ተናጋሪ እና ጸሃፊያን መካከል ቅድሚያ የሚሰጠው አሜሪካዊ ነው። በብዙ ስዎች ዘንድ “The Strangest Secret” በተሰኘው ስራው ዛሬም ድረስ ይታወሳል። የናይቲንጌይል ስራዎች ሁሉም መሰረታቸው አንድ ነው “ሰው የራሱ ህይወት ፈጣሪ ነው” የሚል። በተለያየ ስራዎቹ ላይም፤ የሰው ልጅ አስተሳስበ በህይወቱ ላይ ያለውን እጅግ ትልቅ አስተዋጽዎ ሳይጠቅስ አያልፍም። ለዛሬም ከስራዎቹ መካከል የተወሰነውን  እንዲህ አቀነባብሬ አቅርቤያለው

⚪️በምናብ እራስህን በትያትር መድረክ ፊት እንደተቀመጠ ተመልካች ቁጥረው። በመድረኩ ላይ የሚተወነው ቲያትር ስለ አንድ ጠቃሚ ሰው ነው። የዚህ ቲያትር ደራሲና አዘጋጅ አንተ ነህ። እንደ ተመልካች ቲያትሩን ስትመለከተው ፤ሊያስቅህ፤ ሊያሳዝንህ፤ ሊያስጠላህ አልያም ሊያሳፍር ህ ችላል። ጥሩ ነገሩ የቲያትሩ ደራሲ እና አዘጋጅ አንተ ስለሆንክ፤ ፍጻሜው እንዲያምርም ሆነ እንዲያስጠላ የማድረግ ጥበቡ እና ችሎታው አለህ። በቲያትር ምሳሌ የተመሰለው አንተ ለራስህ ያለህ አመለካከት ወይም ምስል ነው (self Image).

⚫️ስዎች ለራሳቸው ያላቸው አመለካከት፤ ካሳለፉት የህይወት ልምድ፤ ከውድቀታቸው፤ ከስኬታችው እንዲሁም ሌሎች ሰዎች ከሚያሳርፉባቸው ተጽዕኖዎች በመነሳት የሚሳል ምስል ነው። ይህ ስለራሳችን ያለን ምስል የኑሮዋችን ሁሉ ቁልፍ ነው። ሁላችንም  ኑሮዋችንን የምንመራው ስለራሳችን ከያዝነው ምስል በመነሳት ነው። ስለራሳችን መልካም ምስል ካለን፤ ህይወታችንን ቀላል ያድርገዋል። ብዙዎቻችን ግን የተሳሳተ የራስ ምስል ስላለን፤ በኑሮዋችን መኖር ከሚገባን ደረጃ በታች እንድንኖር ተገደናል። መልካሙ ነገር ግን፤ ስለራሳችን ያለንን አመለካከት በማንኛውም ጊዜ መለወጥ መቻላችን ነው።

⚪️ምናልባት ለራሳችን ያለንን ምስል እስከዛሬ አስበንበት የማናውቅ ከሆነ፤ ዛሬ ማሰቡ መልካም ነው። ልክ ቅድም እንዳነሳሁት፤ የራሳችንን ህይወት በምናብ በትያትር መድረክ ላይ መተወን ብንችል እራሳችንን እንዴት አድርገን መሳል እንችላለን? በራሱ የሚተማመን፤ አይናፋር፤ ፈሪ፤ ተናጋሪ ወይስ ምን? ስለራሳችን ሌሎች ያስባሉ ብለን የምንገምተው ግምትም ፤እኛ ለራሳችን ካለን ምስል ጋር ጥልቅ ቁርኝት አለው።

⚫️ታዲያ ሰዎች ስለራሳቸው ትክክለኛ እና ጤናማ ምስል እንዲኖራቸው እንዴት ማድረግ ይችላሉ?

⚪️ሰዎች ለራሳቸው መልካም አመለካከት እና ምስል እንዲኖራቸው የሚረዱ አራት ዋና ነጥቦች እኒህ ናቸው። የሚከተሉትን አራት ነጥቦች በእለት ተዕለት ኑሮዋችን ማከናወን ከቻልን፤ ለራሳችን መልካም ምስል ከመያዛችን አልፎ፤ ከውጣችን ጋር ሰላማዊ ግንኙነት እንዲኖረን እንዲሁም ከሌሎች ስዎች ጋር ጤናማ ግንኙነት እንድንፈጥር ይረዱናል። እኒህ አራት ነጥቦች የሚከተሉት ናቸው።

    ፩)  ያስቀየሙህን ሁሉ ይቅር በል

ያለምንም ቂም ሰዎችን ይቅር በል። ያስቀየሙህን ሰዎች በሙሉ ከልብህ ይቅር በላቸው፤ ይህንን የምታድረገው ለሌሎች ሰዎች ብለህ ሳይሆን፤ ለራስህ የአይምሮ ሰላም ስትል ነው። ቂም ለተያዘበት ሳይሆን ጉዳቱ ቂም ለያዘው ነው። ይህንን የመጀመሪያውን ትዕዛዝ ማክበር ከተሳነህ፤ ቀሪዎቹን ሶስት ነጥቦች ተዋቸው፤ ምክንያቱም ገና አልበሰልክም ማለት ነውና።

        ፪) እራስህን ይቅር በል-

  እውነት ነው ሌሎችን ይቅር ከማለት በላይ እራስን ይቅር ማለት ይከብዳል። ነገር ግን ከራስህ ጋርም ሆነ ከሌሎች ጋር ጤናማ ግንኙንት ለመፍጥር በመጀመሪያ እራስህን ይቅር ማለት አለብህ። ለሰራሃቸው ስህተቶች፤ ላጠፋሃቸው ጥፋቶች፤ ሌሎች ሰዎች ላይ ላደረግካቸው በደሎች ሁሉ እራስህን ያለምንም ቅራኔ ይቅር በለው። እራስህን በርህራሄ አይን ተመልከተው። ካንተ የሚወጣ ወቀሳ ከምንም በላይ በራስ መተማመንህን ዝቅ ያደርገዋል።

    (፫) እራስህን በመልካም መነጸር ተመልከተው-

ቀንህን ስትጀምር ሁለት ምርጫዎች አሉህ፤ አንደኛ ቀንህን በጭንቀት መጀመሩ ሁለተኛው ደግሞ ቀንህን በራስ በመተማመን መጀመር። ሁሌም ሁለተኛውን ለመምረጥ ሞክር። በተቻለህ መጠን ቀንህን በብሩህ አይምሮ ለመጀመር ጣር።

፬) ከራስህ ጋር ብቻ ተፎካከር-

ያንተ የኑሮ አካሄድ ከአንዳንዶች ይፈጥናል፤ ከአንዳንዶች ይዘገያል። በምንም ተዓምር ያንተ ኑሮ ከሌላው ሰው ጋር ሊመሳሰል አይችልም። ስለዚህ ሌሎች ሰዎች ህይወታቸውን እንዴት እንደሚመሩ አያሳስብህ። የራስህን ኑሮ ኑር፤ ስለሌሎች ሰዎች ኑሮ ብዙም አትጨነቅ። በራስህ እርምጃ ተራመድ፤ ሌሎች ቀስ አሉ ብለህ አትዘግይ፤ ሌሎች ፈጠኑ ብለህ አትፍጠን። ጎዳናችሁም መድረሻችሁም ይለያያልና።

🔘እኒህን አራት ነጥቦች በእለት ተእለት ኑሮህ መተግበር ከቻልክ፤ በመጨረሻ ለራስህ መልካም ምስል ይኖርሃል፤ ያ ማለት ደግሞ በራስህ መተማመንህም አብሮ ይጨምራል ማለት ነው።

         መልካም ጊዜ!!🙏

#ሼር ይደረግ

የስብዕና ልህቀት
@Human_Intelligence

"ጽናት!!!...በዓለም ላይ የጽናትን ቦታ የሚተካ ምንም ነገር የለም። ብቃትም  አይደለም።  እንደውም ብቃት ያላቸው ስኬታማ እንዳልሆኑ ብዙ ቁጥር ያለው የለም።  የረቀቀ ዕውቀትም አይደለም እንደውም ሰዎች እንደማወቃቸው ስኬታማ አለመሆናቸው ቢታይ አስገራሚ   ትዕይንት ነው። መማርም አይደለም። ዓለማችን በተማሩና በማይሰሩ ሰዎች የተሞለች ናት። ጽናትና ቁርጠኝነት ግን ሁሉንም ነገሮች ናቸው።የአላማ ፅናት ያለቸው ሰዎች ከየትኛውም ቦታ ተነስተው  ያሰቡት ቦታ ለመድረስ ሊያቆማቸው የሚችል ነገር የለም።"

                         - ካልቬን ኮሌጅ

"እያንዳንዱ ታላላቅ  የስኬት ታሪክ የትልልቅ ውድቀቶች ውጤት ነው ። ልዩነቱ ተሸናፊዎች በወደቁበት ተኝተው ሲቀሩ አሸናፊዎች ግን ከያንዳንዱ ውድቀታቸው በኀላ ዳግመኛ በታላቅ ብርታት መነሳተቸው ነው"

                         -ፊዮዶር ዶስቶቭስኪ

የስብዕና ልህቀት
@human_intelligence

`` በክረምት ጥልቀት ውስጥ የማይጠፋ በጋ በራሴ ላይ አገኘሁ። አእምሮ በውጥረት ልባችንን በህመም የሚሞላ መከራ እስካልገጠመን ድረስ ምን ያህል ጠንካራ እና ኃያል እንደሆንን አናስተውልም። በሁላችንም ውስጥ ታላቁን ተራራ የመቋቋም ድፍረት እና ችሎታ እንዳለን ስንገነዘብ፤ በመንገዳችን ላይ ያለው ከባድ ጊዜ ለጥንካሬ የተዘጋጀ ግብዣ አድርገን እንወስደዋለን። ያለደም ስርየት የለም!፤ የምንነጻው ስንጨማለቅ ነው.. ``

  አልበርት ካሙስ

የስብዕና ልህቀት
@human_intelligence