[ኢብን ሽፋ - Ibn Shifa]

ታላቅ ዓሊም ሸይኽ ሙሀመድ ቢን አማን አል-ጃሚ (ረሂመሁላህ) እንዲህ አሉ:-
“በሰዎች ላይ መለሳለስ ማለት ትርጉሙ ሐቅን ግልፅ አለማድረግና መደበቅ ማለት አይደለም! ፣ ለሰዎች እዚህጋ ትክክለኛ ዐቂዳ አለ፣ በዚህ ደግሞ በሽተኛ የሆነ እምነት አለ፣ ጠማማ ፊርቃዎችና ጤነኛ መንገድም አለ ተብሎ ሳይገለፅ በስመ ኢስለም መሰብሰብ ብቻ አይደለም!፣ ይህን ግልፅ አድርጎ መናገር ግዴታ ነው!!።” [ሸርህ ፈታዋ አል-ሀመዊየህ…]
#join ⤵️ ቴሌግራም
https://telegram.me/IbnShifa
https://telegram.me/IbnShifa

ትንሹ ዒድ ባህላዊ በዓል ወይስ እንደ አምልኮ ዘርፍ የተያዘ ቢድዐ?!

—————
ከዒደል ፊጥር ማግስት ጀምሮ የሚፆመውን 6ቀን የሸዋል ፆምን ተከትሎ ዒደል ፊጥር በወጣ በሳምንቱ የተወሰኑ ሙስሊሞች ዘንድ የሚከበር የሸዋል ፍቺ ወይም ትንሹ ዒድ በመባል የሚታወቅ በዓል አለ። ይህ በዓል እንደ ሸሪዓ ምንም አይነት ማስረጃ የሌለው በዋናነት ወደ ደቡብ ያሉ የተወሰኑ ብሔረሰቦች ዘንድ የሚከበር መሰረተ ቢስ የሆነ በዓል ነው። በተለይ አላህ ምንም አይነት ማስረጃን ያላወረደበት ይህ በዓል ስልጤ፣ ጉራጌና ሀረሪ ብሔረሰብ ዘንድ በልዩ ሁኔታ የሚከበር በዓል ነው። ዲናችን ሙሉ ነው። ከሁለቱ ዒድና ከሳምንታዊ ጁምዓ ውጪ ምንም ይሁን ምን አዲስ ፈጠራ (ቢድዐ) ነው። በዲናችን ላይ አዲስ ፈጠራ ሁሉ ደግሞ ጥመት ነው። የአላህ መልእክተኛ (ሶለላሁ ዐለይሂ ወሰለም) በየ ሳምንት ጁምዓ ኹጥባቸው ላይ እንዲህ ይሉ ነበር:-
«…የነገሮች ሁሉ ሸር ማለት (በዲን ላይ) አዲስ ፈጠራ ነው፣ አዲስ ፈጠራ (ቢድዐ) ሁሉ ጥመት ነው» ሙስሊምና ነሳኢይ የዘገቡት ሲሆን፣ ነሳኢይ «ጥመት ሁሉ የእሳት ነው» የሚል ዘገባ ጨምሯል፣ ሰነዱም ሶሂህ ነው።

ይህ በዓል ከላይ የጠቀስኩላችሁ ብሔረሰቦች ዘንድ የሚከበር መሰረቱ ገጠር የነበረ ቢሆንም ከጊዜ ወዲህ ግን በየ ከተማውም በተለየ መልኩ ሌሎች ብሔረሰቦችም ተሳትፈውበት መከበር ጀምሯል። ለበዓሉም ልክ እንደሌሎች በሸሪዓ እንደተጠቀሱ በዓሎች (እንዲያውም በበለጠ መልኩ) የተለያዩ ዝግጅቶች ሲደረጉ ይስተዋላል። ታዲያ ማስረጃ የሌለው በዓል እስከሆነ ድረስ ምንም ይሁን ምን፣ መውሊድን ጨምሮ መላው የአለማችን ህዝብ ቢያከብረው እንኳን ቢድዐ ከመሆን አይወገድም!!። ቢድዐ ደግሞ ጥመት ነው፣ ጥመት ሁሉ የእሳት ነው።

በትንሹ ዒድ ላይ አንዳንድ ስለ ዲናቸው ግንዛቤ አላቸው የሚባሉ፣ ሸሪዓው ከሚያግራራው ውጭ እያግራሩ ህዝብ ዘንድ ተደማጭነት ለማግኘት የሚዳክሩ ሰዎች የሚያነሱት ብዥታ አለ። እሱም "ምን ችግር አለው? ቢከበር ባህል ነው እንጂ ሃይማኖታዊ ይዘት የለውም" ይላሉ።

መልስ:-
1ኛ, ባህላዊ በዓል ቢሆንስ በዚህ መልኩ በየ አመቱ እየጠበቁ በድምቀጥ ማክበሩን ማን ፈቀደው?

የሙስሊሞች ሸይኽ በመባል የሚታወቁት ታላቁ ሊቅ ሸይኹል ኢስላም ኢብኑ ተይሚየህ (ረሂመሁላህ) የሸዋልን ስምንተኛውን ቀን እንደ በዓል አድርገው የሚይዙና (የደጋጎች ዒድ) ብለው የሰየሙ ሰዎችን አስመልክተው እንዲህ ይላሉ:-

(وأما ثامن شوال : فليس عيداً لا للأبرار ولا للفجار , ولا يجوز لأحد أن يعتقده عيداً, ولا يحدث فيه شيئاً من شعائر الأعياد ) ا. هـ. الاختيارات الفقهية ص/199

“የሸዋል ስምንተኛው ቀንማ ለደጋጎችም ሆነ ለጠማሞች ዒድ አይደለም!። ለአንድም ሰው እለቱን ልዩ የመደሰቻ ዒድ ቀን አድርጎና አምኖ መያዝ አይፈቀድለትም!። በእለቱም ምንም አይነት ለዒድ ከሚንፀባረቁ ነገሮች ማንፀባረቅ አይፈቀድለትም!።” [አል-ኢኽትያራት አል-ፊቅሂየህ 199]

ታላቁ የኢስላም ሊቅ ኢምሙ ዐብዲልዐዚዝ ቢን ባዝ (ረሂመሁላህ) በውስጣቸው ሸሪዓን የሚፃረር ነገር ባይኖርባቸው እንኳን እንደ ባህል (ልማድ) ተደርገው የሚከበሩ በዓላትን በተመለከተ ተጠይቀው ሲመልሱ እንዲህ ይላሉ:- “ከሁለቱ ዒዶች ውጪ ማንኛውንም ዒድ አድርጎ መያዝ አይፈቀድም!። የእርዱ ቀን ዒድ (ዒደል አድሃ) እና ዒደል ፊጥር፣ እነዚህ ናቸው የሙስሊሞች ዒድ ማለት። እንዲሁም በየ ሳምንቱ የሚመጣው የሚሰገድበት እለተ ጁም ነው። በተረፈ በየ አመቱ የሚሽከረከር የሚሰባሰቡበት የሆነን ዒድ መያዝ መሰረት የሌለው ተግባር ነው። ከነቢዩ  (ሶለላሁ ዐለይሂ ወሰለም) በኋላ ሶሃቦችም ይሁኑ ታቢዒዮች 3ቱ ክፍለ ዘመናት ውስጥ የነበሩ ትውልዶችም እንዲህ ያሉ በዓላትን አላከበሩም!። በኛ ላይ ግዴታው እነሱ የተጓዙበትን መከተልና በመንገዳቸው መጓዝ ብቻ ነው… ሰዎች መልካም ነው ብለው የሚያስቡት የሚደጋገም ባህል ካላቸው ሀቁን ካወቁና ከተረዱ በኋላ ያንን ባህል መተው ግዴታ ይሆንባቸዋል…” [የሸይኹ ዌብሳይት ላይ በድምፅም በፅሁፍም አለ።]

2ኛ, እንደ አምልኮ ዘርፍ ነው የሚይዙት።
2.1, ለዒደል ፊጥ ከሚያደርጉት ዝግጅት የበለጥ ለዚህ ቀን ነው  የሚዘጋጁት።
2.2, በዋናናት አባቶችና እናቶች የሸዋልን 6ቀን አከታትለው የሚፆሙት የዚህን ቀን ፍቺ ለማክበር ነው።
2.3, በተጋነነ መልኩ ለዒደል ፊጥር ሀይላቸውን ቆጠብ አድርገው ለዚህ ቀን ግን ሀይላቸውን አሟጠው ይጨርሱና ከፊታችን ለሚመጣው ዒደል አድሃ እንኳን በቂ ዝግጅት አያደርጉም። ለዚህም ነው ታላላቅ የኢስላም ሊቃውንቶች "አንድ ቢድዐ በተተካ ቁጥር ሌላ አንድ ሱንና ይሰርዛል" የሚሉት።
2.4, ዝግጅቱን በዋናነት የሚያከብሩ ሰዎች ሲጠየቁ የሸዋል 6ቀን ፆም ፍቺ (ዒድ) ነው ብለው ነው የሚናገሩት እንጂ ባህል ነው የሚል አመለካከት የላቸውም። ይህ (ባህል ነው) የሚለው አመለካከት ጠንካራ አቋም ያላቸው የሱና ሰዎች "ትንሹ ዒድ ቢድዐ ነው" ብለው ሲያስጠነቅቁ እነ ሸህ ገራገር ህዝቡ ዘንድ ተወዳጅነት ለማግኘት ሲጠየቁ የፈበረኩት አመለካከት ነው። ይህን አመለካከት ሲፈበርኩ ግን ይህን ሁሉ እውነታ ያውቁታል። እያወቁ ሀቁን ይደብቁታል፣ ያምታቱታል። ይህ ደግሞ አላህ እንዲህ በማለት አይሁዶችን የወቀሰበት አደገኛ ተግባር ነው:-

وَلَا تَلْبِسُوا الْحَقَّ بِالْبَاطِلِ وَتَكْتُمُوا الْحَقَّ وَأَنتُمْ تَعْلَمُونَ

«እውነቱንም በውሸት አትቀላቅሉ፡፡ እናንተም የምታውቁ ስትሆኑ እውነትን አትደብቁ፡፡» አል-በቀረህ 42

3ኛ, እንዲህ ያሉ በዓላት ላይ ሌላው ከባድ አደጋ!! የተለያዩ የኢስላምና የሙስሊሙ ጠላቶች እንዲህ ያሉ አዳዲስ በዓላትን ቀንና መስለው በተለየ መልኩ በየ ሚዲያዎቻቸው እያስተዋወቁ ሙስሊሙ በሀይማኖቱ ከተደነገጉ ብርቅዬ በዓላት እንዲዘናጋና ከሀይማኖቱ ተቃራኒ መንገድ እንዲጓዝ ይሰራሉ።
ወላሁ አዕለም!!
✍🏻 ኢብን ሽፋ: (t.me/ibnshifa)

የተለያዩ ት/ቶችን ለማግኘት የቴሌግራም 👇👇 ቻናላችን #join በማድረግ ይቀላቀሉ
https://telegram.me/IbnShifa
https://telegram.me/IbnShifa

ሶላት የማትሰግዱ ሰዎች ምን ምክንያት አላችሁ?!
…     …     …
በጠና የታመሙ ሰዎች እንኳን ሳይቀሩ ሶላት ለመተው ምንም ምክንያት የላቸውም!።

ታላቁ ዓሊም ሸይኽ ሷሊህ ቢን ፈውዛን አል-ፈውዛን (ሀፊዘሁላህ) እንዲህ አሉ:-
“አንዳንድ አላዋቂያን ሃኪም ቤት በህክምና አልጋ ላይ ሆነው መውረድ በማይችሉበት ደረጃ ላይ ይሆናሉ፣ አልያም ነጃሳ የነካባቸውን ልብስ መቀየር የማይችሉ ይሆናሉ፣ ወይም ደግሞ ተይሙም የሚያደርጉበት አፈር አይኖራቸውም፣ አልያም (ተይሙም የሚያደርጉበትን አፈር) የሚያቀብላቸው አይኖርም ይሆናል።

በነዚህ ምክንያቶች ሶላቷን ከጊዜዋ ያዘገዩዋታል። እንዲህ ያሉ ምክንያቶች ከተወገዱልኝ በኋላ እሰግዳለሁ ይላሉ።

ይህ እጅግ በጣም ትልቅ የሆነ ስህተት ነው!!። ሶላትንም ማበላሸት ነው። ለዚህ ክስተት የዳረገው አላዋቂነትና (የእውቀት ባለቤቶችን) ጠይቆ አለመረዳት ነው።

በእንዲህ ያለ ደረጃ ላይ ታሞ ያለ ሰው ግዴታ የሚሆንበት፣ በሚችለው ደረጃ ሆኖ ሶላቱን በጊዜው መስገድ ነው። በእንዲህ ያለ አስቸጋሪና ከባድ ህመም ላይ ያለ ሰው ባለበት ደረጃ መስገድ ነው ያለበት። ያለ ተይሙምና ልብሱ ነጃሳ ሆኖ ቢሰግድም እንኳ ሶላቱ ተቀባይነት አለው።
አምላካችን አላህ እንዲህ ብሏል:-

فَاتَّقُوا اللَّهَ مَا اسْتَطَعْتُمْ

«አላህንም የቻላችሁትን የክል ፍሩት!።» አት-ተጋቡን 16

ወደ ቂብላ መዞር እንኳ ሳይችል ቀርቶ ያለ ቂብላ ቢሰግድ ሶላቱ ትክክለኛና ተቀባይነት አለው።”
[አል ሙለኸስ አል-ፊቅሂያ 1/75]

ብዙ ሰዎች ባለማወቅ በእንዲህ ያለ ከፍተኛ ህመም ላይ ሲሆኑ ሶላታቸውን ይዘናጋሉ፣ በእንዲህ ያለ ጊዜ ይበልጥ ሶላታቸውን በጥንቃቄ ጊዜውን ተጠባብቀው ሊሰግዱ ይገባል።

ጭራሹኑ አላህ ሙሉ ጤና ሰጥቷችሁ ሶላታችሁን የማትሰግዱ ሰዎች ሆይ! እስኪ አንድ ኣፍታ ቆም ብላችሁ አስተውሉ!! ሶላት ማለት እንዲህ ያለ የጠና ህመም ላይ የሆኑ ሰዎች ላይ እንኳ ሳይቀር ግዴታ ናት!!።

ሶላት በእንዲህ ያለ ሁኔታ ላይ እንኳ ሳይቀር ግዴታ ከሆነ፣ ምክንያታችሁ ምንድነው?!፣ ነገ አላህ ፊት መልሳችሁ ምን ይሆናል?!። ሶላት ላለ መስገድ ለሴት ልጅ በሸሪዓው ከተጠቀሰው ምክንያት ውጪ ለሴትም ሆነ ለወንድ ምንም አይነት ምክንያት የለም!!።
✍🏻ኢብን ሽፋ (t.me/ibnshifa)

የተለያዩ ት/ቶችን ለማግኘት የቴሌግራም ቻናላችን ⤵️ #join በማድረግ ይቀላቀሉ
https://telegram.me/IbnShifa
https://telegram.me/IbnShifa

ነቢዩ ﷺ አደራ ያሉትን ዊትር ሶላት በህይወት እስካለን በረመዷን ውስጥም ከረመዷን ውጭም አደራ!!
—————
ዊትር ማለት:- በቋንቋ ደረጃ ነጠላ ቁጥር ማለት ነው። ለምሳሌ:- 1:3:5:7… እንደማለት ነው። ነቢዩ (ﷺ) "አላህ ነጠላ (ብቸኛ) ነው፣ ነጠላ የሆነን ነገር ይወዳል" እንዳሉት ማለት ነው፣ [ነሳኢይና ትርሚዚይ ዘግበውታል።]

ዊትር ሸሪዓዊ ትርጉሙ:- ከዒሻ ሶላት በኋላ የሱብሂ ሶላት ወቅት እስኪገባ ድረስ ባለው ጊዜ ውስጥ የምትሰገድ  እጅግ በጣም ጠንካራ ሱንና የሆነች ነጠላ ቁጥር (1፣3፣5፣7፣9 ረከዓ) የሆነች ሶላት ናት።

ነቢዩን ﷺ እንወዳለን ስንል በምላስ ብቻ ሳይሆን፣ ዲኑን ለማሰራጨት በነበራቸው ጉግት፣ ህዝባቸውን ከሺርክ ወደ ተውሒድ ለመጥራት በነበራቸው የማይነቃነቅ ወኔ፣ ዘውትር ከቢድዐ በማስጠንቀቅ ላይ በነበራቸው ፅኑ አቋም፣ በስነ-ምግባራቸው፣ በቸርነታቸው፣ በአዛኝነታቸው፣  በቅንነታቸው፣ ቤታቸው ሲገቡ ሲወጡ ከቤተሰባቸው በሚያደርጉት እንቅስቃሴ፣ ለሶላት በነበራቸው ልዩ ውዴታ፣ በሚያበዟዋቸው በነበሩ ጠንካራ የሱና ሶላቶች… ወዘተ፣ በሁለመናቸው ወደን ልንከተላቸው ይገባል!!።

አንዱን ጥሎ ሌላውን ማንጠልጠል ከአንድ ትክክለኛ የነቢዩ ﷺ ወዳጅ ነኝ ከሚል ሰው አይጠበቅም!!። አንድ ሰው ምን ቢያቅተው  ነቢዩን ﷺ ከልቡ የሚወዳቸው ከሆነ ጠንካራ ሱናዎቻቸውን ለመከተል መጣጣር አለበት።
ጠንካራ ከሆኑ የነቢዩ ﷺ ሱናዎች ውስጥ ይህችን ከዒሻ ሶላት በኋላ ጀምሮ የሱብሂ ሶላት እስኪገባ ባለው ጊዜ ውስጥ የምትሰገደዋ ዊትር ሶላት ጠንካራ ሱናቸው ናት። ይህቺ ጠንካራ የሆነችው ሱንና ሶላታቸው በረመዷን ወር ብቻ የምትሰገድ ሳትሆን በህይወት እስካለን ልንሰግዳት የምትገባ ነቢዩ ﷺ ይህቺን ዱኒያን ለቀዋት እስኪሄዱ አቋርጠዋት የማያውቁ ጠንካራ ሱናቸው ናት።

ይህችን ጠንካራ የሆነችዋን ሱናቸውን ነቢዩ ﷺ ለአቢሁረይራ (ረዲየላሁ ዐንሁ) አደራ ብለውታል። ሶሃቦችን አደራ ያሉበት ነገር ደግሞ ለኡማው ሁሉ አደራ ነው።
①, ከአቢሁረይራ (ረዲየላሁ ዐንሁ) ተይዞ እንዲህ አለ:- «ወዳጄ (ሶለላሁ ዐለይሂ ወሰለም) በሶስት ነገሮች መክረውኛል:- (ከረመዷን ውጪ ካሉ) ሁሉም ወራቶች ሶስት፣ሶስት ቀን እንድፆም፣ ከአዶሃ ሶላት ሁለት ረከዓ (ቢሆን እንኳን) እንድሰግድ፣ ሶላተል ዊትርንም ከመተኛቴ በፊት (ቢሆን እንኳ) እንድሰግድ።» [ቡኻሪና ሙስሊም ዘግበውታል።] የአዶሃ ሶላት ሁለት ረከዓ ብቻ አይደለም፣ 2፣2 እያደረጉ እስከ 8ና 4 ረከዓ መስገድ ነው፣ ነገር ግን ምን ቢያቅትህ 2,ረከዓ ቢሆን እንኳን ስገድ ማለታቸው ነው።

የሶላተል ዊትርም የተሻለና በላጩ ጊዜ ከሌሊቱ የመጨረሻው ክ/ጊዜ የለይል ሶላት መስገጃ ማብቂያ ሰዓት አካባቢ ነው። አንድ ሰው ከተኛው በኋላ ላልነሳ እችላለሁ ብሎ ከፈራ ግን የዒሻ ሶላት ከተሰገድ በኋላ ባለው ጊዜ ከመተኛቱ በፊት ሰግዶ መተኛት ይችላል።
②, ከጃቢር (ረዲየላሁ ዐንሁ) ተይዞ የአላህ መልእክተኛ (ሶለላሁ ዐለይሂ ወሰለም) እንዲህ ብለዋል:- «ከሌሊት በመጨረሻው ክፍለ ጊዜ ላልነሳ እችላለሁ ብሎ የፈራ ሰው በመጀመሪያው ክ/ጊዜ ዊትሩን ይስገድ፣ ከሌሊቱ በመጨረሻው ክ/ጊዜ መነሳትን የከጀለ ሰው በመጨረሻው ክ/ጊዜ ይስገድ፣ የሌሊቱ የመጨረሻው ክ/ጊዜ ሶላት መላኢካዎች የሚሳተፉበት ነው። (በመሆኑም) ይህ የተሻለ (በላጭ) ነው።» [ሙስሊም ዘግበውታል።]

ዊትር ሶላት ምንም እንኳን ግዴታ ባይሆንም፣ ነቢዩ ﷺ ልዩ ትኩረት ሰጥተውት የቁርኣን ባለቤት የሆነውን ሙስሊም ያዘዙበት የጠነከረ ሱና ነው።

③, ከዐሊይ ኢብን አቢ ጧሊብ (ረዲየላሁ ዐንሁ) ተይዞ፣ የአላህ መልእክተኛ (ሶለላሁ ዐለይሂ ወሰለም) እንዲህ ብለዋል:- «እናንተ የቁርኣን ባለቤቶች ሆይ! ዊትር ሶላትን ስገዱ፣ አላህ ነጠላ (ብቸኛ) የሆነ ጌታ ነውና ነጠላ የሆነን ነገር ይወዳል።» [አቡዳውድ፣ ነሳኢይና ትርሚዚይ የዘገቡት ሲሆን ትርሚዚይ ሀዲሱን ሀሰን ነው ብለውታል።]

ነቢዩ ﷺ ለዊትር ሶላት ሚስቶቻቸውን (ቤተሰቦቻቸውን) ይቀሰቅሱ ነበር።
④, እውነተኛዋ የእውነተኛው ልጅ የሆነችው እናታችን ዓኢሻ (ረዲየላሁ ዐንሃ) እንዲህ አለች:- «የአላህ መልእክተኛ (ሶለላሁ ዐለይሂ ወሰለም) ከለይል ሶላት ይሰግዱ ነበር፣ ዊትርን በሰገዱ ጊዜ “ዓኢሻ ሆይ! ተነሺ ቁሚ ዊትርን ስገጂ ይሉኝ” ነበር።» [ሙስሊም ዘግበውታል።]

ለይል ሶላትን የሚሰግድ ሰው ዊትርን የሚሰግደው የለይሉን 8,ረከዓ ከሰገደ በኋላ ነው።
⑤, ከኢብኑ ዑመር (ረዲየላሁ ዐንሁ) ተይዞ፣ ነቢዩ (ሶለላሁ ዐለይሂ ወሰለም) እንዲህ ይሉ ነበር:- «በሌሊት የሶላታችሁን መጨረሻ ዊትር አድርጉት።» [ቡኻሪና ሙስሊም ዘግበውታል።]

በዊትር ሶላት ውስጥ ከፋቲሃ ቀጥሎ ሶስቱን ሱራዎች መቅራት የተወደደ (ሱንና) ነው።
⑥, ኡበይ ኢብን ከዕብ (ረዲየላሁ ዐንሁ) እንዲህ አለ:- «ነቢዩ (ሶለላሁ ዐለይሂ ወሰለም) በሰቢህ ኢስሚ ረቢከል አዕላ፣ በቁል ያ-አዩሃል ካፊሩን፣ በቁል ሁወ አላሁ አሀድ ዊትር ያደርጉ ነበር።» [ኢማሙ አህመድ፣ አቡዳውድና ነሳኢይ ዘግበውታል።]
የቁርኣን ሱራዎች ቅደም-ተከተሉን በጠበቀ መልኩ ይቀራቸዋል።

ዊትር ሶላትን ከሶስት ረከዓ በለይም መስገድ ይፈቀዳል። ዋናው ግን ከላይ በመግቢያው እንደጠቀስኩላችሁ ነጠላ የሆነ ቁጥር መሆን አለበት።
⑦, እናታችን ዓኢሻ (ረዲየላሁ ዐንሃ) እንዲህ አለች:- «ነቢዩ (ሶለላሁ ዐለይሂ ወሰለም) በዘጠኝም በአምስትም ረከዓ ዊትር ያደርጉ ነበር።» [ሙስሊም ዘግበውታል።]
✍🏻 ኢብን ሽፋ (t.me/ibnshifa)

የተለያዩ ት/ቶችን ለማግኘት የቴሌግራም 👇👇 ቻናላችን #join በማድረግ ይቀላቀሉ
https://telegram.me/IbnShifa
https://telegram.me/IbnShifa