ምርጥ ጽሑፎች✍️✍️

እመን ታሸንፋለህ!

ውስጥህን አዘጋጅ፣ ለምታምነው አምላክ የልብህን በር ክፈት፣ እራስህን አረጋጋ፣ ምንም እንዳልተፈረም እያሰብክ የእምነት ደረጃህን መዝነው። በእርግጥ አማኝ ነኝ ብለህ ታስባለህ? አማኝ በእምነቱ አሸናፊ ነው። እናም አንድ ጥያቄ እራስህን ጠይቅ፦ የምርም ማሸነፍ የምፈልገው ነገር አለን? ተሻግረሀው ማለፍ የምትፈልገው፣ ጥለሀው መሔድ የምትፈልገው፣ ሸክሙን ማራገፍ፣ ከጭንቀቱም መገላገል የምትፈልገው ነገር አለህን? ከማንም ሰው የተለየህ አይደለህምና እንደ ማንኛውም ሰው የግል ጦርነት ይኖርብሃል፤ እለት እለት የሚያታግልህ፣ በነጋ ቁጥር ከፊቱ የምትቆመው፣ እንደ አዲስ የምትገዳደረው የህይወት ፈተና አለበህ። እንደምታሸንፈውም እርግጠኛ አይደለህም፤ ነገር ግን መጋፈጥ ስላለብህ ብቻ ትጋፈጠዋለህ፣ መታገል ስላለብህ ብቻ ትታገለዋለህ።

አዎ! ጀግናዬ..! እመን ታሸንፈለህ! በእግዚአብሔር አምላክህ ተማመን ጥለሀው ትሔዳለህ፤ ፈጣሪህን አስቀድመህ ተዋጋው ትማርከዋለህ። ሰውነትህ ደካማ ነው አብሮት ያለው ፈጣሪህ ግን ሃያል ነው፤ ሰውነትህ ተስፋ ይቆርጣል አብሮህ የሚሰራው አምላክህ ግን በእራሱ ተስፋ ነው፤ ፀጋ ነው፤ በረከት ነው፤ አሸናፊ ነው፣ ድል አድራጊ ነው። ለአማኝ ማሸነፍ ብርቁ አይደለም፤ እውነታን ለሚይዝ፣ ከእውነት ለሚጠጋ መሰናክልም ብርቁ አይደለም። ምክንያቱም የሚያምነው ሞትን ባሸነፈ አምላኩ ነውና ነው፤ ምክንያቱም እውነት በእራሱ ፈጣሪው ስለሆነ ነው። በህይወት እስካለን ድረስ የምድር ፈተና ማብቂያ የላትም። በተለይ በተንሹም በትልቁም የምንጨነቅና የምንሰበር ከሆንን ፈተናችን በእጥፍ ይጨምራል። እውቀታችን ውሱን ብትሆን እንኳን አምላክ በሚያድለን በረከትና ፀጋ ግን ለአሸናፊነት የሚያበቃንን፣ ከመዳረሻችን የሚያደርሰንን፣ ህልማችንን እውን የሚያደርግልንን ጥበብና ማስተዋልን እንወርሳለን፣ መንፈሳዊ ብለሃትንም እንላበሳለን።

አዎ! እምነት የጦር ጋሻችን ነው። ቃሉም እንደሚለው "ለሚያምን ሁሉ ይቻለዋል።" ማንን ማመን እንዳለብን ካወቅን ከልባችን የማመኑ ጉዳይ የእራሳችን ነው። እመን ታሸንፋለህ። የምታምነው በነፍስህ ነው፤ የምታምነው በጥልቁ ማንነትህ ነው። እምነትህን ሆነህ ማሳየት ይጠበቅብሃል፤ እምነትህን በየቀኑ እየኖርከው ልትገልፀው ይገባል። እምነታችን ስለጎደለ ብቻ የምንፈልገውን ብዙ ነገር አጥተናል፤ መድረስ ከሚገባን ደረጃ ቀርተናል። ያለችው ትንሿዋ እምነትህ በምንም በማንም እንድትሸረሸር አትፍቀድ፤ ማንም ተስፋህን እንዲቀማህ፣ በደስታህ እንዲቀልድና ሰውነትህን እንዲያሳንስ እድል አትስጠው። ከቃል በላይ በተግባር ስታምን ሁሉም የሚበጅህ ነገር እንደሚከናወንልህ አትጠራጠር።

ራሳችሁን ከልሉ!

ጤንነታችሁ ክፉኛ የሚያሳስባችሁ ከሆነ፣ የምርም የተረጋጋና ሰላማዊ ህይወትን መምራት የምትፈልጉ ከሆነ፣ የእውነት ንፁህና ነፃ ህይወትን መኖር የምትፈልጉ ከሆነ ለራሳችሁ አንድ ውለታ ዋሉ። እነርሱ ችግር እየፈጠሩባችሁ እናንተን እንደ ችግር ፈጣሪ፣ እየጎዷችሁ እነርሱ እንደተጎዱ፣ እያሳመሟችሁ እንዳሳመሟቻቸው ከሚያስቡ ሰዎች በፍጥነት ራቁ። ላለፈ የጋራ ታሪክ ብቻ ብላችሁ የዛሬና የወደፊት ህይወታችሁን አታበላሹ። ከሰው ጋር ስንኖር የሚሆነንና የሚበጀንን ሰው የመምረጥ ግዴታ አለብን። ካልሆነ ግን ራሳችንን ለብዙ ጥፋትና ቁስል አሳልፈን የምንሰጥ እንሆናለን። ችግር በማንም መቼም ሊፈጠር ይችላል፣ የሰው ልጅ አቅዶም ይሁን በአጋጣሚ ሊጎዳችሁ ይችላል ዋናው ቁብ ነገር ግን ለችግሩ ወይም ለጉዳቱ የምትሰጡት ምላሽ ነው። አንድ ወንዝ መፍሰሱን የሚያቆመው የተገደበ እንደሆነ ወይም የደረቀ እለት ብቻ ነው። እናንተም ችግሩን መፍታት የምትችሉት አንድም ከችግር ፈጣሪው ስትርቁ ወይም ዳግም ችግር እንዳይፈጥርባችሁ ስታሳስቡት ብቻ ነው።

አዎ! በፍቃዱ የሚጠቃ፣ ወዶ የሚጎዳ፣ አማራጭ አጥቶ ተጠቂ የሆነ ሰው አትሁኑ። ከጉዳት፣ ከበደል፣ ከጥፋት፣ ከከፋው ውድቀት ራሳችሁን ከልሉ፣ ራሳችሁን ጠብቁ። ህብረታችሁን በጥንቃቄ መርምሩ፣ ከማን ጋር ህይወታችሁን ለመምራት እንዳሰባችሁ በሚገባ እወቁት። ከማንም በላይ የሰውን ልጅ ሊያጠፋ የሚችለው ብቻኛ ፍጡር ራሱ የሰው ልጅ ነው። አብዛኛዎቹ የዓለም አሁናዊ ችግሮች  የተፈጠሩት በሰው ልጆች ነው፤ ብዙ ሰው ለህመም፣ ለስቃይ፣ በቀላሉ ለማይሽር የልጅነት ጠባሳ የሚዳረገው፣ ገና እድሜው ሳይደርስ ብዙ ፈተናን ብዙ ውጣውረድን የሚያየው፣ ደጋግሞ ወድቆ የሚነሳው በሰው ምክንያት ነው። ስኬታችሁ እንደ እሾህ ከሚወጋው ሰው ጋር ሆናችሁ መቼም ስኬታማ ልትሆኑ አትችሉም፤ አላማችሁን ለመኖር መጣራችሁ ምቾት ከሚነሳው ሰው ጋር እየኖራችሁ መቼም ህልማችሁን ልትኖሩ አትችሉም። ከየትኛውም እርምጃችሁ ፊት የሚቀድመው አካባቢያችሁን ማፅዳትና ማስተካከል ነው። ወደ የትኛውም ከፍታ ለመውጣት የግድ ሸክም የሆኑ ክብደቶችን የመቀነስ ግዴታ ይኖርባችኋል።

አዎ! ጀግናዬ..! ራስህን መጠበቅህ፣ ዙሪያህን ማጠርህ፣ ራስህን መከለልህ ኩራት ወይም ንቀት አይደለም። ይልቅ እርሱ ራስን መውደድ፣ ራስን ማክበርና ራስን መግዛት ነው። የቅርብ ዘመዶችህ፣ ጓደኞችህ፣ የስራ ባልደረቦችሁ፣ ቤተሰቦችሁ ሊሆኑ ይችላሉ ነገር ግን ለእያንዳንዳቸው የራሳቸው ገደብና ልኬት ያስፈልጋቸዋል። ሰው ጎድቶህ እንደጎዳሀው የሚያስመስለው በፈቀድክለት ልክ ነው፣ ሰው አሰናክሎ ጥሎህ በራስህ ጥፋት እንደወደቅክ የሚነግርህ ማንነትህን ያወቀ እለት ነው። ከሰው ጋር በሰላምና በመከባበር መኖር ከፈለክ ሰውን አክብር አንተም የሚከበር ማንነትን ፍጠር። ሁሌም እየተጠቁና እየተጎዱ መኖር ትልቅ ረፍት አልባ ስቃይ ነው። አዳኝ ፈጣሪ ነው፣ ከአጣብቂኝ የሚያወጣ አምላክ ነው። ነገር ግን አንተም የራስህን ድርሻ መወጣት ካልቻልክ እርሱ ሊረዳህ አይችልም። የትኛውም ነፃነት ትግል አለው ይፈትናል፣ እንዲሁ ሰላማዊና የተረጋጋ ህይወት መኖር ዋጋ ያስከፍላል። እርሱን ለማድረግ አታመንታ፣ በፍቃድህ ለገዛ ሰላምህ ዘብ ቁም።

መርጣችሁታል!

"እንደዚህ ነው እንደዛ ነው ለዚህ ነው ለዛ ነው" እያላችሁ ለስንፍናችሁ ሰበብ አትደርድሩ። የትኛውም ያልቀየራችሁት ወይም ለመቀየር የማትጥሩለት ነገር ምርጫችሁ ነው። ምናልባትም እያማረራችሁበት ይሆናል፣ ምናልባትም ሰውን ወይም ፈጣሪን እየወቀሳችሁበት ይሆናል ነገር ግን ዛሬም ልክ እንደ ትናነቱ ልትቀይሩት ካልሞከራችሁ ወይም ካልቀየራችሁት መርጣችሁታል ማለት ነው። አሁን ያላችሁበት ግንኙነት ሊሆን ይችላል፣ የምትሰሩት ስራ ሊሆን ይችላል፣ ገቢያችሁ፣ ጤናችሁ፣ የሰውነት አቋማችሁ፣ ውሏችሁ ሊሆን ይችላል እንደማትወዱትና እንደማትፈልጉት ከማውራት በላይ የማትቀይሩት ከሆነ ወደዳችሁም ጠላችሁም መርጣችሁታል፣ አመናችሁም አላመናችሁም ያንን ሁኔታችሁን ትፈልጉታላችሁ። አንድ ፈሪ ሰው ወስጡ ያለው የለውጥና የእድገት ፍላጎት ፍረሃቱን አሸንፎ እስካልወጣ ድረስ ፍላጎቱ የእውነት ሊሆን አይችልም። በእያንዳንዳችን ላይ ያለው የትኛውም ስሜት ያለእኛ ፍቃድ ሊገዛንና ሊመራን አይችልም። ፈጣሪ ስሜታችን ላይ መንገስ እንድንችል ሙሉ ስልጣን ሰጥቶናል።

አዎ! ካልቀየራችሁት መርጣችሁታል፣ ካልወሰናችሁበት ፈልጋችሁታል፣ ደፍራችሁ እርምጃ ካልወሰዳችሁበት ተመችቷችኋል። ምንም የሚሸፋፈን ነገር የለም። ድህነት "ድህነት አልፈልግም" ስላልን አይተወንም፣ ስኬት "ስኬታማ መሆን እፈልጋለሁ" ስላልን አይመጣም። ሁሉም ስራ አለው፣ ሁሉም ጥረት ይፈልጋል፣ ሁሉም በተግባር የሚገለጥ ምኞትና ህልም ይፈልጋል። ሰነፍ ሰው በስንፍናው እየተኩራራ እንዲህ ይላል፦ "እርሱ ያለልኝን አላጣም።" እርሱ ሊልለህ የሚችለው ባንተ ፍላጎትና ጥረት ልክ ነው። ዝግጁ ያልሆንክለት ነገር በምንም መንገድ ወደ ህይወትህ ሊመጣ አይችልም። ብዙ ሰው እውነት እንዲነገረው አይፈልግም። ከእውነታው ይልቅ መስማት የሚፈልገው ያለበትን ሁኔታና ሳያስበው የመረጠውን ምርጫ የሚደግፍለትን ውሸት ነው። እውነት እንጂ ውሸት ማንንም ነፃ ሲያወጣ አላየንም፤ በግልፅ መጋፈጥ እንጂ ሰበብ መደርደር የማንንም ህይወት ሲቀይር አልተመለከትንም።

አዎ! ጀግናዬ..! ምርጫህን አስተካክል፣ እያንዳንዱን ውሳኔህን መርምር፣ የፈለከውን ለማድረግ ሰበብ አታብዛ። ከገዛ ውስጣዊ ምኞትህ ጋር ህብረት ይኑርህ፣ አሁን መርጠህ ለምትኖረው ህይወትም ሃላፊነት ውሰድ። በአንተ አቅም መቀየር የሚችሉ ብዙ ነገሮች እያሉ ላለመቀየር ምክንያት አትደርድር። ምን ማድረግ እንደምትችል አንተ ታውቃለህ፣ የምታውቀውን ያህልም ማድረግ ካልቻልክ ከማያባራው ሀሳብና ጭንቀት ነፃ ልትሆን አትችልም። ማማረርህ ካልቀረ የምታማርርበትን ነገር ለመቀየር ሞክር። በአቋሙ የሚለይ፣ ከብዙ ሰው የተሻለ፣ አማካኝ ከሚባል ህይወት ለመውጣት የሚጥር ሰው ለመሆን ትልቅ ዋጋ መክፈል አይጠበቅብህም፣ ተዓምር መስራትም አይኖርብህም። ምርጫና ፍላጎትህን ብቻ አጣጥም፣ ምኞትህን በተግባር ደግፈው፣ ሀሳብህን በየቀኑ ኑረው። ያልተመቸህን ነገር እየተንከባከብክ አትኑር፣ ካልወደድከው ቀይረው፣ ካልፈለከው ተወው። በፍፁም ያለምንም ልፋትና ድካም ሜዳልያውን ለማጥቅ እንዳታስብ።

አትነካካ!

ለምን ከብዙዎች መሐል ተመራጭ እንዳልሆንክ ታውቃለህ? ለምን በብዙዎች ዘንድ ተፈላጊ እንዳልሆንክ ታውቃለህ? ለምን ስምህ በጉልህ እንዳልተጠራ፣ ስኬት እንደራቀህ፣ ዋጋህ እንዳነሰ ታውቃለህ? ሰነፍ ስለሆንክ አይደለም፤ ስለማትሞክር አይደለም፤ አላዋቂ ስለሆንክ አይደለም፤ የመሆን አቅሙ ስለሌለህም አይደለም። ምክንያቱ ብዙ ስለምታውቅ ነው፤ ምክንያቱ ብዙ ነገር ስለምትሞክር ነው፤ ምክንያቱ ብዙ ጅምሮች፣ ብዙ ያላለቁ የቤት ስራዎች ስላሉብህ ነው። ብዙ ነገር ታውቃለህ ነገር ግን በአንደኛውም እውቀትህ ጠለቅ ያለ ማብራሪያ መስጠት አትችልም፤ ብዙ ትሞክራለህ ነገር ግን በአንደኛውም ረጅም ርቀት ተጉዘህ አታውቅም፤ ብዙ ትጀምራለህ ነገር ግን ምንም የጨረስከው ነገር የለም። ጀምረህ የተውካቸው የቤት ስራዎችህ ከመብዛታቸው የተነሳ መጀመርህንም ልትረሳቸው ትችላለህ።

አዎ! ጀግናዬ..! አትነካካ፤ እዚም እዛም አትበል፤ እራስህን አትበትን፤ እራስህን አታባክን። አንዱ ላይ እስከመጨረሻው አድፍጥ። የያዝከውን የመጨረስ ልማድ ይኑርህ። በመረጥከው ምርጫ፣ በወሰንከው ውሳኔ ላይ ፅናት ይኑርህ። ያማረህን ሁሉ እየሰራህ፣ የተባልከውን ሁሉ እያመንክ፣ ያየሀውን ሁሉ ለመጀመር እየተንደረደርክ በፍፁም ተመራጭና ስኬታማ ልትሆን አትችልም። ለጊዜው ያንተ የሆነው አንድና አንድ ነገር ብቻ ነው። አውቃለሁ ብለህ ያገኘሀውን አትቀላቅል፤ ገብቶኛል ብለህ በየቦታው በተንታኝነት አትሰየም፤ በምሁርነት ስም ሀገርን አታፍርስ። ሁሉም ዘርፍ የእራሱ ምሁር አለው፤ የእራሱ መምህር፣ የእራሱ ተንታኝ አለው። ተመራጭነት በሰው ሙያ ሳይሆን በእራስ ሙያ ነው፤ አንቱታ የሚገኘው፣ ተቀባይነቱ የሚመጣው፣ ስምና ዝናውም የሚገነባው በጥራትና በጥልቀት በሚሰራ ስራ ነው። ነካክቶ በማለፍ ከመካከለኝነት አይወጣም፤ በየቦታው እጅን በማስገባት ተፅዕኖ ፈጣሪነት አይመጣም። 

አዎ! ነገሮችን በእራስህ ላይ አታክብድ። በቅድሚያ የዘራሀው ዘር ፍሬ እስኪያፈራ፣ የተከልከው ተክልም ለጥላነት እስኪበቃ ጠብቅ። በአንዴ አስር ተክል ተክለህ አትሰቃይ፤ በአንዴ በየዘርፉ ስኬታማ ካልሆንኩ እያልክ እራስህን አታባክን። የጀማሪ አቅሙ ለጊዜው አንድ ነገር ብቻ ነውና ስትጀምር አንድ ይበቃሃል፤ በሂደት ግን በየዘርፉ ማደግ ትችላለህ። ሁሉም ነገር ላይ ተሳታፊ የመሆን፣ ሁሉንም ነገር የማወቅ፣ ሁሉንም ነገር የመሞከር ግዴታ እንዳለብህ አታስብ። ሁላችንም የምንችለውና የሚገባን ዘርፍ ይኖረናል። በእርሱ ላይ ሃላፊነታችን በመወጣት የቀረውን ለባለቤቱ የመተው ልማድ ያስፈልገናል። እራስህን ከዚህም ከዛም ጋር አታነካካ፤ ስትጠየቅ "እኔም ጀምሬው ትቼው ነው።" የማለትን ልማድ አስወግድ። ጅማሬህ ካልጀመሩት የተሻልክ ያደርግህ ይሆናል እንጂ በፍፁም ለሚገባህ የከፍታ ደረጃ እንደማያበቃህ እውቅ።

ማንም አይሰጣችሁም!

ያሳዝናል ነገር ግን እውነታው ይሔ ነው፣ ያበሳጫል ነገር ግን መሬት ላይ ያለው ሃቅ ይሔው ነው። ለምን የቅርብ ዘመዳችሁ አይሆንም፣ ለምን አባት እናታችሁ አይሆኑም፣ ለምን ከማንም በላይ የሚወዳችሁ ሰው አይሆንም ማንም ሽራፊ ሳንቲም አይሰጣችሁም፤ ማንም በምትፈልጉትና በምትጠብቁት ልክ ሊረዳችሁና ሊተባበራችሁ አይመጣም። የናንተ ህይወት የእናንተና የእናንተ ሃላፊነት ብቻ ነው አለቀ። ሞኝ አትሁኑ፣ በልክ አልባ የዋህነት ጣሪያ አትንኩ። አስቡት እሱ ምናችሁም ሊሆን ይችላል ለዓመታት ለፍቶ፣ ደክሞ፣ ወጥቶ ወርዶ፣ ተጋግጦ ብዙ ዋጋ ከፍሎ ካፈራው ንብረት ቆርሶ ለምን ይሰጣችኋል? ለምን በምላሹ ምንም ሳያገኝ አንስቶ ይሰጣችኋል? ስለሚወዳችሁ ወይስ ስለማይፈልገው? ውለታችሁ ስላለበት ወይስ ስለተበደራችሁ? አትሸወዱ እንኳን በቅርብ ጊዜ ያወቃችሁት ሰው ይቅርና እድሜ ልካችሁን የምታውቁት የቅርብ ዘመዳችሁ እንኳን ምንም ነገር አንስቶ ያለምክንያት አይሰጣችሁም። ምናልባት ዛሬ ላይ "እኔ በእርሱ ቦታ ብሆን እሰጣለሁ" ትሉ ይሆናል። ነገር ግን ስሜቱን የእርሱ ቦታ እስካልሆናችሁ ድረስ ልታውቁት አትችሉም።

አዎ! ራሳችሁን ቻሉ፣ በራሳችሁ ተመፅዋችነት የምታዝኑ ሰው አትሁኑ። በሙሉ ጤንነት ሆኖ መለመን እውቀትም ጥበብም አይደለም። መስራት ያለባችሁን ሰርታችሁ ህይወታችሁን ቀይሩ። ጓደኛ ከድህነት አያወጣችሁም፣ ሀብታሙ አጎታችሁ ህይወታችሁን አይቀይረውም፣ ቤተሰብ የምትፈልጉትን ሁሉ አይሰጣችሁም። የማታገኙትን ነገር ከሰው አትጠብቁ፣ በሰው እጅ ያለን ወርቅ አትናፍቁ። ምንም ነገር የእናንተ የሚሆነው ራሳችሁ ሰርታችሁ ያገኛችሁት እለት ብቻ ነው። በበዛው የዋህነታችሁ አስቂኝ ሰው አትሁኑ። አትልፋ ማንም አይሰጣችሁም፣ እንዲሁ በባዶ አትድከሙ ማንም ለእናንተ ብሎ ዋጋ የሚከፍል የለም። አንዳንድ ሰው ሌላው ሰው "ለምን አላሰበልኝም? ለምን የምፈልገውን ነገር አስቦ አይሰጠኝም? ለምን የጠየኩትን ሁሉ ነገር አያሟላልኝም?" ብሎ በሰውዬው ይበሳጫል። መስጠት ቢኖርበት እንኳን ስንት ሊሰጠው የሚገባ ምስኪን ህዝብ እያለ፣ ስንተ የፅቅን በር ሊያስከፍት የሚችል በጎ ስራ እያለ ለምን ላንተ ይሰጥሃል? ምን ለማግኘት ሰርተህ መቀር የምትችልን ሰነፍ ሰው ሊደጉም ይችላል?

አዎ! ጀግናዬ..! ራስህን አትግደል፣ በሀሳብ አንሰህ ራስህን አታሳንስ፣ የመስራት አቅሙ እየለህ፣ ከራስህ በላይ ለሰው መትረፍ እየቻልክ ዕድሜህን በሙሉ ፍርፋሪ እየለቃቀምክ አትኑር። ከሰው መጠብቅ ቀስ በቀስ ይገልሃል፣ ሰውን ደጅ መጥናት እያደር ዋጋህን እያሳነሰ የተናቅክ ሰው ያደርግሃል፣ ሰውን መለማመጥ በሂደት ፈሪና በራስ መተማመን የሌለው ልፍስፍስ ያደርግሃል። በጊዜ መረዳት ካለብህ ተረዳ ወደፊት ከሚገፋህና ከሚረዳህ በላይ ወደኋላ የሚጎትትህና ከጉዞህ የሚያደናቅፍህ ሰው ይበዛል። በድህነቱ ከሚመፃደቅ ምስኪን ሰው ጋር ህብረት አትፍጠር፣ በሀብቱም ከልክ በላይ ከሚመካ ሰው ጋር የጠለቀ ግንኙነት አይኑርህ። ሁለቱም ባላሰብከው መንገድ አስተሳሰብህን እየሸረሸሩት ዋንኛ ተከታያቸው ያድርጉሃል። የደሃ ቅንጡ በድህነትህ እንድትኩራራ ያደርግሃል፣ የሀብታም ኩሩም ሁሌም አገልጋዩ እንድትሆን ያደርግሃል። ዛፍ በእድሜው እንደሚያጎበድድ ሁሉ አንተም በጊዜህ ሳታጎበድድ በፍጥነት ራስህን ቻል፣ የራስህን የተለየ ማንነት ፍጠር፣ እውቀትና አቅምህ የሚታይበትን ተግባር ፈፅመህ ተገኝ።

ይቅርታን ውደዱ!
፨፨፨/////////፨፨፨
ልብ በአንድም በሌላም፣ ከአንዴም ሁለቴ ሶስቴ ይሰበራል። የሚሰበረው ታምኖ በሚከዳ፣ ተጠብቆ በሚቀር፣ ተከብሮ በሚያስ፣ ትልቅ ቦታ ተሰጥቶት ወርዶ  በሚገኝ ሰው ነው። ይቅርታም ይህን ስብራት የሚጠግን፣ ክፍተትን የሚሞላና ጠባሳን የሚሽር ከእግዚአብሔር ዘንድ የተሰጠ ፍቱን መድሃኒት ነው። ሰዎች ናችሁ አንድ ቀን ምድር ትከፋለች፣ ፊቷን ታዞርባችኋለች፣ በሰው ሚዛን ይቅርታ የማያሰጥ ጥፋትም ታጠፋላችሁ። በዚህም ወቅት ከእናንተ በላይ ይቅርታን አብዝቶ የሚፈልግ፣ የጥፋቱን መታረም፣ የበደሉን መሻር አብዝቶ የሚመኝ ሰው አይኖርም። በዚህ ሰው ቦታ ሆናችሁ የይቅርታን ልብ ይኖራችሁ ዘንድ ፀልዩ፤ ከፍርጃ የሚያርቅ፣ በደልን ሳይሆን ፅድቅን የሚኖር ማንነት ይሰጣችሁ ዘንድ አምላካችሁን ተማፀኑ።

አዎ! ጀግናዬ..! ይቅርታ ውስጥ ሰላም አለ፣ ይቅርታ ውስጥ ፍቅር፣ አንድነትና መተሳሰብ አለ። ለይቅርታ እጁን የዘረጋን ሰው አንተ ይቅር ባትለው ፈጣሪ ይቅር ይለዋል፤ አንተ መመፀፀቱን ባትቆጥርለት አምላኩ የልቡን ያውቃልና በቸርነቱ ይምረዋል፣ በርህራሔውም በደሉን ይሽርለታል። ማንም ባጠፋው ልክ፣ በበደሉ መጠን መክፈሉ አይቀርም። ነገር ግን ክፍያውን ባንተ መንገድ እንዲያደርግ፣ ጥፋቱም ባንተ በኩል በጥፋት እንዲመለስ አትፈልግ። ሁሉንም ነገር በፍርዱ ለሚያስተምረው፣ በጊዜው ምላሽን ለሚሰጠው፣ እየወደደም ቢሆን ዝም ለማይል፣ መሃሪም ቢሆን ለሚቀጣ አምላክ አሳልፈህ ስጥ። ይቅርባይነትህ ሞኝነት ሳይሆን ብስለት ነው፤ ይቅርባይነትህ ዋጋቢስነት ሳይሆን ለእራስህ የምትሰጠውን ክብርና ቦታ የሚያሳይ ነው። ይቅር ስትል ለእራስህ ውለታ እየዋልክ ነው፤ ሰላም የነሳህን ተጎጂነት ከውስጥህ እያወጣህ ነው፤ እራስህን ከህመምና ከስቃይ እየጠበክ ነው።

አዎ! ይቅርታን ውደዱ! ሰላማችሁን አስቀድሙ፣ የእረፍታችሁ ምክንያት፣ የእርጋታችሁ መንስኤ እራሳችሁ ሁኑ። ማለፍ ያለበት ነገር ልክ እንደ ወራጅ ውሃ እናንተንም ይዟችሁ እንዲያልፍ አትፍቀዱ። ለሚያልፍና ለሚረሳ ጉዳይ የማይገባውን ዋጋ አትክፈሉ። የይቅርታ አምላክ አላችሁ፣ የምህረት ጌታ፣ በደልን የሚተው፣ ኀጢአተኛን የሚፈልግ፣ ፅድቁንም በትዕግስት የሚጠብቅ ፈጣሪ አላችሁ። በምድራዊ ህይወታችን ከሰማያዊ አባታችን ስራ በቀር በገቢር የሚያስተምረን፣ በተግባርም ዋጋችን በተለየ ሁኔታ የሚጨምርልን ነገር የለም። የውድቀታችሁ ምክንያት ሰዎች ቢሆኑ፣ የህመማችሁና የስብራታችሁ መንስኤ ሰዎች ቢሆኑ ዳግም የመነሳት፣ እራሳችሁን የመጠገንና ዋጋችሁን የመጨመር ምክንያታችሁ ደግሞ አንድም ፈጣሪያችሁ ነው፤ ሌላም እራሳችሁ ናችሁ። ስለይቅርታ በምታውቁት ልክ በህይወታችሁ ተግብሩት፣ በእርሱም ሃይል ሰላማችሁን መልሱ።

ተነሱና ስሩ!

አጭር ነው፣ ግልፅ ነው፣ አሁን መደረግ የሚችል ነው፣ በትንሹ የሚጀመር ነው። አሁን ምንም ስራ ከሌላችሁ፣ ምንምአይነት የገቢ ምንጭ ከሌላችሁ ስራ መናቅ አቁሙና ምንም ይሁን ምን ተነሱና ስሩ፣ ተነሱና ወደ ተግባር ግቡ። ገቢ አስጋስገኘ ድረስ ከባህል ከእሴታችን፣ ከሀይማኖት ከትውፊታችን እስካልወጣ ድረስ ምንም የወረደ ስራ የለም። ስራ እየናቀ ህይወቱን የቀየረ ሰው የለም፣ ስራ እየመረጠ የከበረ ሰው የለም። በቀኝም ዞራችሁ በግራ ስራ የማትሰሩ ከሆነ ማንም የሚሰራው ላይ የመፍረድና ጣት የመቀሰር መብቱ የላችሁም። ቁጭ ብላችሁ ብዙ ገንዘብ ታገኙ ይሆናል፣ ከቤተሰብ ከወዳጅ ከዘመድ የወጪ ታገኙ ይሆናል ነገር ግን ከሰው የሚመጣ ነገር ሁሌም የእናንተ ሊሆን እንደማይችል እወቁ። እድሜያችሁ ለስራ ደርሶ፣ አቅማችሁ ጎልብቶ፣ ገንዘብ አስፈልጓችሁ ቁጭ ብላችሁ ሰውን መለመን ልማዳችሁ ካደረጋችሁ አሁኑኑ ብትነቁ ይሻላችኋል። ምንም ስራ ሳይኖራቸው ስራን የሚንቁ፣ ምንም የሚያስገቡት ገቢ ሳይኖር ትንሽ ገንዘብ የሚንቁ ሰዎች በገዛ እጃቸው ለውድቀት ራሳቸውን የሚያመቻቹ ሰዎች ናቸው። የሚሰራን እየናቃችሁ ህይወታችሁ እንዲቀየር አትፈልጉ።

አዎ! ተነሱና ስሩ! ወስኑና እርምጃ ጀምሩ። ሳይሰሩ፣ አንዳች የወደቀ ነገር ሳያነሱ፣ ምንም እንቅስቃሴ ሳያደርጉ እንዲሁ ራስን ጠብቆ ፅድት ንፅት ብሎ መውጣት እውቀትም ጥበብም አይደለም። መስራት እየቻለ ሳይሰራ የሚበላ፣ ህይወቱን የመቀየር አቅም እያለው ከሰው የሚጠብቅ፣ ራሱን መቻል ሲኖርበት ለዓመታት ሰውን የሚያስቸግር እርሱ የመጨረሻ ሰነፍና የወደቀ ሰው ነው። የማይገባችሁን ቦታ ለራሳችሁ አትስጡ፣ ከአቅማችሁ በላይ ለመኖር አትሞክሩ፣ ሰው እንዲያዝንላችሁ ራሳችሁን አቅመቢስ ደካማ አታድርጉት። ሁሌም ቢሆን ባለው ያምርበታል፣ የሰራ፣ የለፋ፣ የሞከረ ህይወቱን ያሸንፋል። ጥሮ፣ ግሮ፣ ለፍቶ ሞክሮ ያልተሳካለትና እንዲሁ ቁጭ ብሎ የሰው እጅ የሚጠብቅ መሃል ያለው ልዩነት እጅግ ሰፊ ነው። ስለሰራችሁ ብቻ በአንዴ ያልፍላችኋል ማለት አይደለም፣ ምንም ካልሰራችሁ ግን መቼም አያልፍላችሁም። ያ ሞክሮ የተሳሳተው፣ የሚችለውን አድርጎ ያልተሳካለት ሰው የጊዜ ጉዳይ እንጂ ሙከራውን እስካላቆመና ጥረቱን እስከቀጠለ ድረስ አንድ ቀን የፈለገበት መድረሱ አይቀርም። ነገር ግን ምንም የማይሞክረው፣ ምንም ጥረት የማያደርገው ሰው መቼም ስኬታማ እንደማይሆን እርግጠኛ መሆን ይችላል።

አዎ! ጀግናዬ..! አራዳ ሁን። ባለው አየር ተንቀሳቅሰህ ህይወትህን ወደፊት ፈቀቅ አድርገው፣ ያገኘሀውን እየሰራህ ቀስ ብለህ እደግ። ድህነት ቤት እስኪሰራብህ አትጠብቅ። ትንሽም ብትሆን ሰርተህ የምታገኛት ጥሪት ነፃነትን ትሰጥሃለች፣ በራስመተማመንን ታጎናፅፍሃለች፣ በራስህ እንድትኮራ ታደርጋለች። ስራም ሆነ ገንዘብ፣ ሰራተኛም ሆነ ለፍቶ አዳሪ አትናቅ። የወጣት ተጧሪ ከመሆን ምንም ስራ ሳይመርጡ መስራት እጅጉን ያስከብራል። ዘመኑ እንኳን ሳይሰራ ተሰርቶም ከባድ ሆኗል፣ ጊዜው እንኳን እጅ አጣጥፎ ተቀመጦ ቀን ከሌሊት ተለፍቶም አልሸነፍ ብሏል። በፍፁም ማንም የሚበጅህን እንዲነግርህ አትፈልግ፣ በፍፁም ማንም እስኪጎተጉትህ አትጠብቅ። ራስህን ግፋው፣ ራስህን ስቃይ ውስጥ ክተተው፣ ራስህን ከመቾት ውስጥ አስወጣው። ጥረህ ግረህ፣ ለፍተህ ደክመህ በላብህ የራስህንም በዙሪያህ ያሉ ወዳጆችህንም ህይወት ቀይር። ጊዜው ጥሎህ እየሔደ አንተ ወደኋላ አታፈግፍግ። ከጊዜ እኩል ተራመድ፣ ለነፃነትህ የሚጠበቅብህን መሱዓትነት ሁሉ ክፈል።

ፍቅር አለ!

ትዋደዳላችሁ፣ ትፋቀራላችሁ፣ ትተሳሰባላችሁ፣ አንዳችሁ ያለአንዳችሁ የምትኖሩ አይመስላችሁም፣ ግንኙነታችሁ የጠበቀ፣ ቅርበታችሁ ከፍ ያለ ነው። ነገር ግን በመሃከላችሁ መከባበርና መተማመን የለም፣ ነገር ግን አንዳችሁም ለእራሳችሁ መብት ገደብ አታስቀምጡም፣ አንዳችሁም ለአጋራችሁ ነፃነት ለመስጠት አትሞክሩም፣ ነገሮችን ቀለል አድርጎ ማለፍ አትፈልጉም፣ ታካብዳላችሁ፣ እናንተ ያላችሁት ብቻ እንዲሆን ትፈልጋላችሁ፣ ለግንኙነታችሁ ግብ አላስቀመጣችሁም። ከእነዚህ ሁኔታዎች ውስጥ ግማሾቹም ቢሆኑ የእናንተን ግንኙነት የሚመለከቱ ከሆነ የሚጎዳችሁ ግንኙነት (toxic relationship) ውስጥ እንደሆናችሁ አስተውሉ። ፍቅራችሁ ብቻ ለዘላቂውና ለተረጋጋው ግንኙነታችሁ ዋስትና ሊሆናችሁ አይችልም።

አዎ! ጀግናዬ..! ፍቅር አለ፣ ነገር ግን ብቻውን በቂ አይደለም። መዋደድ ይኖራል፣ ነገር ግን ጠንካራ መሰረት ላይ ካልተገነባ የትም አያደርስም። ያላችሁበት ግንኙነት ጤነኛ እንዳልሆነ ከተረዳችሁ በጊዜ ለማስተካከል ሞክሩ። ማንም ለእናንተ ግንኙነት አስደሳችነትና ስኬታማነት ከእናንተ በላይ ሊሰራ እንደማይችል እወቁ። ምናልባት አንዳንድ ግንኙነቶች የተወሳሰቡ ይሆናሉ፣ አንዳንዶችም ምንም የወደፊት አላማ የሌላቸው ይሆናሉ። ነገር ግን ግንኙነት እስከሆኑና በፍቅር ስም እስከተመሰረቱ ድረስ ስሜትን መጉዳታቸው፣ የህይወት ጉዞን ማዛባታቸውና በትርጉም አልባ እስራት ለከፋው ስቃይ መዳረጋቸው አይቀርም። ዋጋ የማትከፍሉለት ግንኙነት የትም እንደማይደርስ እናንተም ታውቁታላችሁ፤ በምትኩ ትዕግስትን የምትኖሩበት፣ ለንግግር ቅድሚያ የምትሰጡበት፣ ግልፅነትን የምትመርጡበት፣ ክብርና እምነት ላይ የምትመሰርቱት ፍቅር ደግሞ ውጤታማ እንደሚሆን ታውቃላችሁ።

አዎ! ላቁመው ብትል የሚይዝህ ነገር አለ፣ ለመለያየት ከወሰንሽ ቦሃላ በውሳኔሽ መፅናት ይከብድሻል። አንዳንዴ እንደማይዘልቅ ታውቃላችሁ ነገር ግን ሁለታችሁም ለጊዜያዊ ስሜታችሁ በመገዛት ተመሳሳይ የሚጎዳችሁ ጉንኙነት ውስጥ ለረጅም ጊዜ ትቆያላችሁ። የማያተርፍላችሁ ግንኙነት ምናችሁ ነው? ሰላም የማይሰጣችሁ፣ ውስጣችሁን የማያረጋጋ፣ ባላችሁ ጥራት ላይ ጥራትን፣ ባላችሁ እውቀት ላይ  እውቀትን የማያክልላችሁ የፍቅር ግንኙነት ምናችሁ ነው? ጥቅሙስ ምንድነው? መቅረፍ ያለባችሁን ጉዳይ በጊዜ ቅረፉ መለያየትን እየፈራችሁ የስቃይ ዘመናችሀን አታርዝሙ፣ በፍቃዳችሁም በፍቅር ስም እራሳችሁን አትቅጡ። በቻላችሁት መጠን ለፍቅራችሁ ታመኑ፣ የሚገባውን ክብርም ከልባችሁ ስጡት።

እንድ ሰካራም ታክሲ አስቁሞ ጋቢና ከገባ በኋላ ሹፌሩን አወከኝ ይለዋል

#ሹፌሩ.. ይቅርታ አላወኩህም ሲለው
#ሰካራሙ... አሁን አስቁሜህ የገባውት ነኝ እኮ!
😂😂😂😂😂

#መልካም ሰንበት!

ጊዜ ይፈርዳል!

ዛሬ ከፍታ ላይ ያላችሁ፣ ዛሬ ዓለምን በመዳፋችሁ የጨበጣችሁ የመሰላችሁ፣ ዛሬ ምቾት ያንገላታችሁ፣ ህይወት የመረጠቻችሁ፣ ኑሮ የፈካላችሁ፣ በላይ በላይ ስኬት የተደረበላችሁ፣ ወዳጅ ዘመድ ፈላጊ አጨብጫቢ የበዛላችሁ አስተውሉ አንድ ቀን ዝቅ ትሉ ይሆናል፣ አስተውሉ የሆነ ጊዜ ያገኛችሁትን ሁሉ ታጡ ይሆናል፣ አስተውሉ የሆነ ሰዓት ብቻችሁን ትቀሩ ይሆናል። ዛሬ ዝቅታ ላይ የተገኛችሁ፣ ዛሬ ዓለም የናቀቻችሁ፣ ዛሬ እድል የጠመመችባችሁ፣ ወዳጅ ዘመድ የራቃችሁ፣ ግፊት ጥላቻን የተቸራችሁ፣ ሳትፈልጉ ብቻችሁን የቀራችሁ፣ ህይወት ፊቷን ያዞረችባችሁ፣ ስኬት እንደ ሰማይ ደስታም እንደ ጨረቃ የራቀቻችሁ አስተውሉ ዝቅታ መጨረሻችሁ አይደለም፣ አስተውሉ በዓለም እንደተናቃችሁ አትቀሩም፣ አስተውሉ ብቸኝነት የዘላለም እጣፋንታችሁ አይደለም። ጊዜ በጊዜው ይፈርዳል፣ ትክክለኛው ሰዓት ሁሉን ነገር ያስተካክላል። ገዢ የነበሩ ተገዢ ይሆናሉ፣ መሪ የነበሩ ተመሪ ይሆናሉ፤ በተቃራኒውም ተገዢ የነበሩ ይገዛሉ፣ ሲመሩ የነበሩ የመሪነትን ዙፋን ይረከባሉ። ስታገኙም ስታጡም፣ ስትሔዱም ስትመለሱም፣ ሲያልፍላችሁም ሲያልፍባችሁም ስሜታችሁን በልክ አድርጉት።

አዎ! ጊዜ ይፈርዳል! ጊዜ ሁሉን በግልፅ ያሳያል፣ ጊዜ ስንዴውን ከእንክርዳዱ፣ ደጉን ከክፉን፣ መልካሙን ከጎጂው ይለያል። አለኝ ብላቹ አትመፃደቁ፣ አጣው ብላችሁም አንገት አትድፉ። ሰጪም ነሺም ፈጣሪ መሆኑን አስታውሱ። ማግኘታችሁ አጥፊያችሁ ከሆነ አይሰጣችሁም፤ ማጣችሁም የሚጎዳችሁ ከሆነ ይሰጣችኋል። ችግር በዝቶባችኋል ማለት እግዚአብሔር ከሰው ሁሉ ለይቶ ይጠላችኋል ማለት አይደለም፤ ምቾት በምቸት ሆናችኋል ማለትም ፈጣሪ ከሰው ሁሉ ለይቶ ይወዳችኋል ማለት አይደለም። እያንዳንዱ ነገር የሚሆነው በምክንያት ነው። ቻዩን ፈጣሪ ያውቃል፣ ደካማውንም እርሱ ያውቃል። እርሱ የሰጣችሁን የሰጠበትን ምክንያት የሚያውቀው እራሱ ብቻ ነው። የእናንተ ድርሻ መቀበልና መቀበል ብቻ ነው። ባለስልጣኑ ባለበት ስልጣን ፈላጊ አትሁኑ፤ ፈላጭ ቆራጩ እያለ በእርሱ ስራ ጣልቃ አትግቡ። ህይወት ምርጫ ነች አንዳንድ ወሳኝ ሁነቶች ግን የፈጣሪ ገፀበረከቶች ናቸው። ሮጣችሁ ማምለጥ ከማትችሉት ነገር ስር አትሩጡ፤ መጨነቅ፣ መጠበብ፣ መዋከብ ለማያስተካክለው ነገር ራሳችሁን አታስጨንቁ፣ ራሳችሁን አታዋክቡ።

አዎ! ጀግናዬ..! ከቀረበልህ የመምረጥ ምርጫ አለህ፣ የተመረጠልህን ግን ከመምረጥ በላይ የመኖር ግዴታ አለብህ።  የትናንት ድካምህ፣ የዛሬ ጥረትህ፣ የአሁን ልፋትህ ፍሬ የሚያፈራበት ጊዜ አለ። የተሻለ ነገን ቁጭ ብለህ አትመኝ፣ ያለስራ መልካም ነገር እንዲገጥመህ አትፈልግ። ጊዜ ሁላችንም ላይ ፈጣሪ የሾመብን ፈራጃችን ነው። ማንም ያልሰራውን ያገኝ ዘንድ አልታዘዘለትም፣ ማንም ያልደከመበት እንዲሰጠው አልተፈረደለትም። ዛሬ የትም ሁን፣ አሁን ምንም ስራ ነገር ግን በስራህ የምታምን፣ ነገህን መቀየር የምትችል፣ ሰው ከሚያስብልህ በላይ ፈጣሪ እንደሚያስብልህ ካመንክ በእርግጥም ምንም ነገር ሊቀየር ይችላል፣ የትኛውንም ከባድ ጊዜ ማለፍ ትችላለህ። ድህነት የህይወት ዘመን እጣፋንታህ አይደለም፣ ማጣት፣ መቸገር፣ መገፋት የተፈረዱብህ ፍርጃዎችህ አይደሉም። ላንተም ቀን እንደሚመጣ፣ ላንተም ፀሃይ እንደሚወጣ፣ ህይወትህ በአምላክ ፀጋና በረከት እንደሚታነፅ ከልብህ እመን። እየተገፋህ፣ እየተጠላህም ቢሆን ጊዜ ከፍ ያደርግሃል፤ ዛሬ ብትረሳም በሞገስ በግርማ አበይት የምትሆንበት ጊዜ ይመጣል። በራስህንም ሆነ በፈጣሪህ መቼም ተስፋ እንዳትቆርጥ።

ነፍሳችሁን አትርፉ!

ወጣን ውረድን፣ ስራን አረፍን፣ ሞከርን ሳንሞክር ቀረን፣ ደከምን ሳንደክም ቀረን፣ ዓለምን ዞርን ምድርን አሰስን በስተመጨረሻ አንድ መዳረሻ አለን። እርሱም ወደ አንድ አምላክ ወደ ቅዱስ ፈጣሪ መሔድ ነው። ያኔ እርሱ ፊት የቆምን እለት ምን እናሳየው ይሆን? የትኛው መልካም ስራችን ይመሰክርልን ይሆን? ከየትኛው ትርፋችን ቀድተን እናሳየው ይሆን? ማንም ሆንን ማንም ዳኛችንና ገዢያችን ፈጣሪ ብቻ ነው። በዓለም ሳላችሁ ምን ገዝቷችኋል? በምድር ስትመላለሱ ምን ነፍሳችሁን ወስዷታል? አሁን በዚህች ቅፅበት የሚያሳስባችሁና ቀልባችሁን የሰረቀው ነገር ምንድነው? በውሸት ዓለም እየኖራችሁ ራሳችሁን አትካዱ፣ ነገ ዞር ብሎ ለማያያችሁ ሰው ብላችሁ ራሳችሁን አትጡ፣ በአንድ ጀምበር አመድ በሚሆን ንብረት ፈጣሪያችሁን አትካዱ። የሰው ልጅ ስጋው ብቻ የስጋ ፍቃዱን ስለፈፀመ አይኖርም። ነፍሱም የራሷ ፍቃድ አላትና ፍቃዷ ሊፈፀም ይገባል። ነፍስ እለት እለት የአምላኳን መንፈስ ትጠማለች፣ ነፍስ በየጊዜው ሰማያዊ ሀሴትን ትናፍቃለች።

አዎ! ነፍሳችሁን አትርፉ! የማትሞላዋን ዓለም ለመሙላት አስር ቦታ አትበጣጠሱ፣ የሌለውን ፍፁም ህይወት ለመኖር ብኩን አትሁኑ። ዞሮ ዞሮ ማንም ሰው የሚበላው ያንኑ የዘራውን ነው፤ በስተመጨረሻ ማንም ሰው በእጁ የሚያስገባው ያንኑ የደከመለትን ነገር ነው። ያለ ምንም እረፍት ስጋውን ብቻ ሲመግብ የነበረ ሰው የስጋ ፍቃዱ ሲያይል፣ ለዓለም ብልጭልጭ ሲገዛ፣ ነፍሱ ተጨንቃ ስታስጨንቀው፣ በቁስ ተከቦ ባዶነት ሲያሰቃየው፣ ብዙ ወዳጅ እያለው አንዱም መፍትሔ ሳይሰጠው ሲቀር ራሱን ይመለከታል። ስጋና ዓለም የአንድ ሳንቲም ሁለት ገፅታዎች ናቸው። ዓለምን የሚወድ የስጋው ባሪያ ነው፣ መንፈሱን የሚሰማ ግን የነፍሱ ተገዢ ነው። ነፍሳችሁን ጥላችሁ ሁለንተናዊ ብልፅግናን እንዳታስቡ፣ የነፍሳችሁን ፍቃድ ችላ እያላችሁ ደስተኛ እሆናለሁ ብላችሁ እንዳታስቡ። ስጋ የሚበላውን የሚጠጣውን ያህል ነፍስም እንዲሁ የምትበላውና የምትጠጣው ነገር ያስፈልጋታል፣ ስጋ መሳቅ መጫወት እንደሚወድ ሁሉ ነፍስም እንዲሁ የአምላኳን ፍቅር አብዝታ ትናፍቃለች፣ ከእርሱ የሚገኘውን ሀሴት ትጠብቃለች።

አዎ! ጀግናዬ..! በስጋ ፍቃድ ተታለህ ነፍስህን አትበድላት፣ በዓለም ፍቅር ታውረህ የፈጣሪህን በረከት አትጣ። ምንም ያህል ዓምት ምድር ላይ ብትመላለስ፣ ምንም አይነት የተንደላቀቀ ህይወት ብትኖር፣ ከማንም በላይ ትልቅ ስልጣን ቢኖርህ፣ ምንምያህል ታዋቂና ዝነኛ ብትሆን አንድ ቀን እንደ ማንኛውም ሰው ለዓለም ባዳ ለምድርም ወዳጅ መሆንህ አይቀርም። ሁሉን ትተህ ወደ አምላክህ መሔድህ ግልፅ ነው። መሔድህ ካልቀረ ግን ባዶ እጅህን አትሔድ ዘንድ ነፍስህን የሚያስደስት፣ አምላክህንም የሚስመሰግን በጎ ስራን ስራ፤ ከሰው ፊት በላይ ፈጣሪህ ፊት ሞገስን የሚያሰጥህን መልካሙን ምግባር ፈፅም። ጠፍተህ እንደሆነ ራስህን በጥልቀት መርምር፣ ራስህን አጥተህም እንደሆነ ማንነትህን ለመረዳት ሞክር። ፀሃይ በአንዴ አታቃጥልም የዓለም ግለትም እንዲሁ ቀስበቀስ እያሞቀ አለማምዶ በዛው አቅልጦ ያስቀራል። በዓለም እስታ ተቃጥሎ ከመጥፋት ራስህን ጠብቅ፣ በስጋ ፍቃድ ከመገዛት ተቆጠብ፣ ነፍስህን ዋጋ አታሳጣት። መንፈስህን ታደግ፣ ራስህን ግዛ፣ ዓለምንም በፍቃድህ ስር አድርግ።

ከፍጥረታት ተማር!

የእድገት ነፃነት አለውና በተቻለው አቅም እስከመጨረሻው ያድጋል። ዛፍን ተመልከት እስክ ጫፍ ያድጋል፤ አንበሳን ተመልከት እስከመጨረሻው ታግሎ አድኖ ይበላል፤ ንስርን ተመልከት ከየትኛውም አዕዋፍ በላይ በከፍታ ላይ ይበራል። እያንዳንዳቸው ፍጥረታት የመጨረሻውን አቅማቸውን ይጠቀማሉ። የሰው ልጅ ግን በምርጫው ይታለላል፤ ድክመቱን ይንከባከባል፤ አለመቻሉን ደጋግሞ ያወራል፤ አደጋን በመፍራት ይታሰራል። ማሰብ መቻሉ ብዙ መስራት እንዲችል እንደሚያደርገው ረስቶታል። አንድ ቦታ ታስሮ ከእፅዋት ባነሰ የእድገት ደረጃ ውስጥ እራሱን ያገኘዋል። ፍጥረታት ምርጫ የላቸውም፤ እድገታቸው ግዴታ ነው፤ አድኖ መብላታቸው ምርጫ ውስጥ አይገባም። ወድቀው ተነስተው፣ ተሰብረው ተጋግጠውም ቢሆን የፈለጉትን ያሳካሉ፤ በእጃቸውም ያስገባሉ። በእንስሳት አለም ሰዶ ማሳደድ፣ ማደን መታደን ህይወታቸው ነውና አንዱ አንዱን አድኖ ለመብላት እስከመጨረሻው መፋለም ይኖርበታል፤ ሌላኛውም ነፍሱን ለማትረፍ ሙሉ አቅሙን ይጠቀማል።

አዎ! ጀግናዬ..! ከፍጥረታት ተማር! ከእድገት፣ ከለውጥና ከስኬት ውጪ ምርጫ እንደሌለህ አስብ። ብዙ አማራጮች ባስቀመጥክ ቁጥር የምትወድቀው አንተ ነህ። አንድ የምትተማመንበት ነገር የለምና ሁሉን ለመያዝ ስትሞክር አንዱንም ሳትይዝ ባዶ እጅህን ትቀራለህ። የያዝከው ብቻ እንደሚያዋጣህ እመን፤ የሚያስከፍልህን ለመክፈል እራስህን አዘጋጅ፤ እንዳታደርገው የሚያደርጉህ ብዙ እንቅፋቶች ቢኖሩም ከማድረግ በቀር ሌላ አማራጭ እንደሌለህ አስተውል። ከውሃ የወጣች አሳ በደቂቃዎች ትሞታለች፤ አንተም ህልምህን መኖር እንዳቆምክ የህይወትን ትርጉም ታጣለህ፤ አላማህ ይጠፋብሃል፤ በመኖርህ ውስጥ ስሜት ታጣለህ፤ የሚገባህን ባለማግኘትህ ስብራት ይሰማሃል። ብዙ ምርጫ ቢኖርህም ምርጫህን እርሳው፤ ብዙ የገቢ ምንጭ ቢኖርህም አንዱን አጥብቀህ ያዝ፤ በብዙ ሰዎች ብትከበብም ጥቂቶቹን ብቻ አቅርብ።

አዎ! የበዛው ምርጫህ እንዳይሸውድህ ተጠንቀቅ፤ የምታገኘው ገቢ እንዳያሰንፍህ፣ የከበቡህ እንቅፋቶች፣ የሚወሩብህ ወሬዎች ከሚገባህ ህይወት እንዳይነጥሉህ እራስህን ጠብቅ። ዛሬን ብቻ ብኖር፣ ህይወቴ ባይስተካከል፣ እራሴን ባላስተምር፣ በሒደት ባላድግ የሚጠብቀኝ ጥፋት ነው ብለህ ማሰብ ጀምር። ምርጫ የሌለው ሰው ተኝቶ አያድርም፤ ቀን ከሌሊት ሲለፋና ሲተጋ ይውላል፤ ያድራል። እድገት ምርጫው ሳይሆን ግዴታው ነው፤ ለውጥ አይቀሬ ቢሆንም በአዎንታዊውና ጠቃሚው ለውጥ ግን አይደራደርም። እድገትን የማይፈልግ፣ ስኬትን የማይመኝ ሰው አይኖርም፤ ፍላጎቱ ግን በሃሳብ ወይም በምኞት ብቻ ስለሆን ምንም ሊያመጣ አይችልም። እድገትን በተግባር፣ ስኬትን በጥረት፣ ደስታን በስራ፣ ህይወትንም በመኖርን ፈልግ። በምንም ሁኔታ ውስጥ ብትሆን ለውጥና እድገት ምርጫ የሌለው አማራጭህ እንደሆነ አስተውል።