የአውሮፓ ሕብረት በኢትዮጵያውያን ላይ ያሳለፈውን የቪዛ እገዳ ለማንሳት የተግባር እንቅስቃሴ እንዲያደርግ ተጠየቀ

4ኛው የኢትዮጵያ እና የአውሮፓ ሕብረት የጋራ የሥራ ቡድን ስብሰባ ትላንት ህዳር 11 ቀን 2017 ዓ.ም በውጭ ጉዳይ ሚኒስቴር ተካሂዷል።

የውጭ ጉዳይ ሚኒስትር ዴኤታ አምባሳደር ምስጋኑ አርጋ በስብሰባ ላይ “የአውሮፓ ሕብረት ከአሁን በፊት በኢትዮጵያውያን ላይ ያሳለፈውን የቪዛ እገዳ ለማንሳት የተግባር እንቅስቃሴ ማድረግ ይገባዋል” ሲሉ ማሳሰባቸውን ከሚኒስቴሩ ያገኘነው መረጃ ያሳያል።

ከስድስት ወራት በፊት የአውሮፓ ህብረት ምክር ቤት ለኢትዮጵያውያን በጊዜያዊነት ወደ አውሮፓ የመግቢያ ቪዛ ፈቃድ መስጠት የሚከልክል ውሳኔ ሚያዚያ 21 ቀን 2016 ዓ.ም ማሳለፉን መዘገባችን ይታወሳል፤ ለክልከላው የሰጠው ምክንያት ከኢትዮጵያ መንግስት በቂ ትብብር እያገኘሁ ባለመሆኑ ነው የሚል ነበር።

በተጨማሪም የአውሮፓ ህብረት እዚህ ውሳኔ ላይ ያደረሰው በህብረቱ ሀገራት በህገወጥነት በሚቆዩ ኢትዮጵያውያን ዜጎች ዙሪያ “ከሀገሪቱ መንግስት በቂ ትብብር እያገኘሁ ባለመሆኑ ነው” የሚል ነበር።

ህብረቱ ካሳለፋቸው ውሳኔዎች መካከል የቪዛ እገዳው አንዱ ሲሆን ኢትዮጵያውያን ቪዛ ለማግኘት የሚጠብቁት ጊዜ ከ15 የሥራ ቀናት ወደ 45 የሥራ ቀናት ከፍ እንዲል የሚለው ይገኝበታል።

አምባሳደር ምስጋኑ አርጋ ትላንት በተካሄደው የጋራ የሥራ ቡድን ስብሰባ ወቅት ሕብረት በኢትዮጵያውያን ላይ ያሳለፈውን የቪዛ እገዳ ለማንሳት የተግባር እንቅስቃሴ እንዲያደርግ ጠይቀዋል ተብሏል።