طالبات العلم "ጧሊበተል ዒልም"

የሹዐይብ ጥሪ!
~
((وَيَا قَوْمِ أَوْفُوا الْمِكْيَالَ وَالْمِيزَانَ بِالْقِسْطِ ۖ وَلَا تَبْخَسُوا النَّاسَ أَشْيَاءَهُمْ وَلَا تَعْثَوْا فِي الْأَرْضِ مُفْسِدِينَ * بَقِيَّتُ اللَّهِ خَيْرٌ لَكُمْ إِنْ كُنْتُمْ مُؤْمِنِينَ ۚ وَمَا أَنَا عَلَيْكُمْ بِحَفِيظٍ)
«ሕዝቦቼም ሆይ! ስፍርንና ሚዛንን በትክክል ሙሉ፡፡ ሰዎችንም ምንም ነገራቸውን አታጉድሉባቸው፡፡ በምድርም ውስጥ አጥፊዎች ሆናችሁ አታበላሹ፡፡ አላህ ያስቀረላችሁ ለእናንተ የተሻለ ነው፡፡ ምእመናን እንደሆናችሁ (አላህ በሰጣችሁ ውደዱ)፡፡ እኔም (መካሪ እንጅ) በናንተ ላይ ተጠባባቂ አይደለሁም፡፡» [ሁድ: 85–86]

~የጀመራችሁት በጎ ሥራ ካለ ጨርሱ፤
ያቋረጣችሁት ጥሩ ነገር ካለ ቀጥሉ፤
ያልጀመራትሁት መልካም ነገር ካለ ጀምሩ፤
የያዛችሁትን ከዳር አድርሱ እንደገና ጀምሩ ቀጥሉ ጨርሱ ሕይወት መጀመር፣ መቀጠል፣ መጨረስ ናት ዕድሜ ማለት መወለድ፣ መኖር፣ መሞት ነውና።

~አንዳንድ ንግግሮች አሉ ከአላህ ዘንድ አጅር የማናገኝባቸው፤ ለስኬትም የማንበቃባቸው፡፡ አንዳንድ ወሬዎች አሉ ለዱንያችን የማይጠቅሙን ፣ለአኺራችንም የማይፈይዱን፡፡ አንዳንድ ወጎችም አሉ ወደ ጀነት የማይመሩን ከእሣትም የማያድኑን፡፡ ወይ ዚክር ሆነው አላህን አላወሳንባቸው ወይ ደግሞ ሹክር አይደሉ አምላካችንን አላመሰገንባቸው፡፡

የዚህ ዓይነቶቹ ወሬዎችና ንግግሮች«ማላ የዕኒ» ይላቸዋል እስልምና፡፡ የማይመለከቱን ጉዳዮች፣ ዝባዝንኬዎች፣ አሉባልታዎች፣ እንቶፈንቶዎች፣ እርባና ቢስ ጉዳዮች ልትሏቸው ትችላላችሁ፡፡ ወዳጆቼ … በዚህ ዓይነቱ ማዕድ ላይ ድንገት ከገባችሁ እንኳን ብዙ አትቆዩ፤ ቁም-ነገር ካጣችሁና ጥቅሙ ካልታያችሁ ቶሎ ዉጡ፡፡ ጊዜያችሁ ይቃጠላልና፡፡ ትልቁን ሀብታችንን ጊዜን አቃጠልን ማለት ትልቅ ኪሣራ ላይ ወደቅን ማለት ነው፡፡

ወደዚህ ዓለም የመጣነው ለቁምነገር ነውና እኛን የሚመለከቱን ጉዳዮች «ቁምነገሮች» ናቸው፡፡ ነፍሣችንን የምንጠቅምባቸው፣ ሌሎችን የምንፈይድባቸው፣ ዓላማችንን የምናሳካባቸው፣ ኻቲማችንን የምናሳምርባቸው፡፡

የሆነ ጊዜ ላይ ከሆነ ሰው ጋር ረጅም ጊዜ ወሬ ልታወሩ ትችላላችሁ፡፡ ቀኑን ሙሉ ጊዜ ወስዳችሁ ወይም ሙሉ ሌሊቱን እንቅልፍ አጥታችሁ ፌስ ቡክ ላይ አፍጣችሁ ከአንድ ግሩፕም ገብታችሁ ሀሳብ ልትለዋወጡ ወይም እዚያው አካባቢ ፈንጠር ብላችሁ በመቆም ሀሳብ የሚለዋወጡትን ትታዘቡ ይሆናል፡፡ 

አንዳንድ ጊዜ ግን ቆም ብላችሁ የዕለት ቻታችሁንና የግሩፕ ዉሏችሁን ስትገመግሙና ፍሬውን መልቀም ስትሞክሩ ዉጤቱ ባዶ ይሆንባችኋል፡፡ ባዶ፡፡ ምሽት እቤቴ በር ላይ ስደርስ «ወይኔ ዛሬም ወድቄ ገባሁ!» ብዬ ከራሴ ጋር የማወራባቸው አጋጣሚዎች እጅግ ብዙ ናቸው፡፡ በጣም ብዙ!! መውደቅ በኃጢአት ብቻ አይደለም፤ በተጨመረ ዕድሜ ላይ ምንም መልካም ነገር ሳይጨምሩ መዋልም መዉደቅ ነው፡፡ ዕድሜ የተሠጠው ለዓላማ ነውና፡፡

ሳያጣሩ መረጃን ማሠራጨት፣ የሰሙትን ነገር ሁሉ ለማውራት መቸኮል፣ በማያገባ ነገር ገብቶ መፈትፈት፣ እዚህም እዚያም ሄዶ መከራከር፣ አዋቂ መስሎ ለማስረዳት መሞከርና … ሌላው የጊዜው ማላ የዕኒ ነው፡፡ ዛሬ ላይ ማንን መስማት እስኪያቅተን ድረስ ሁሉም ተንታኝ፣ ሁሉም መካሪ፣ ሆኗል፡፡ የሚችለውም የማይችለውም፣ የሚያገባውም፣ የማያገባውም ይናገራል፡፡ የዚህ ዓይነቱ ባህሪ የጥሩ ሙስሊም መገለጫ አይደለም፡፡ የአንድ ሰው እስልምና ማማርን ከሚያመለክቱ ነገሮች መካከል አንዱ የማይመለከተውን ነገር መተዉ ነው፡፡ አንዳንድ ዝምታና ከሰው መገለል ጥሩ ነው፡፡ ትኩረትህን ይሰበስብላህል፡፡ ጊዜህን ሙጥጥ አድርገህ ለዉጤታማ ሥራ እንድትጠቀምበት ያግዝሃል፡፡

እናም ወዳጆቼ … ለጊዜያችን በትልቁ እንጨነቅ፡፡ እያንዳንዷን ሰከንድ በምን ላይ እንዳዋልናት መለስ ብለን እንቃኝ፡፡ ምድር ላይ የምናሳልፋትን ይህችን አጭር የሀምሳ እና ስልሳ ዓመት ዕድሜ ከተራ ብዙ ነገሮች ይልቅ ጥቂት ቋሚና ጠቃሚ ቅርሦችን እንለፍ፡፡ መዝናናት መቀለዳችንም በልክ ይሁን፡፡ መልካም ሥራችን ይብዛ ይክበድም፡፡ የነገ ሥራችን ይመዘናል እንጂ አይቆጠርም፡፡ ከመልካም ሥራ በላይም ምንም ዋስትና የለንም፡፡

አምላኬ ሆይ ! አንተን በማውሳት፣ በማመስገንና አምልኮህን በማሳመሩ ላይ እርዳኝ፡፡

አምሹልኝ!

~አንዳንድ ሰዎች የመጀመሪያ የጁሙዓ አዛን ካለ ብኃላ እየተነሱ ሱና ሶላቶችን ይሰግዳሉ።ይህን ተግባር የሚደግፍ ምንም አይነት ሶሂህ ሐድስ የለም።

ስለዚህ ከጁሙዓ በፊት የሚሰገድ ምንም አይነት ሱና ሶላት የለም!

~አንዳንድ ጊዜ በሥራችን የማናገኛቸው ነገርግን በንያችን የምናገኛቸው ትላልቅ ምንዳዎች ይኖራሉ። ካላማረ ሥራ ያማረ ንያ በእጅጉ ይበልጣልና።
ወዳጆቼ ለረመዷን ምን አሰብን?
 ብንደርስም ባንደርስም ከወዲሁ ለረመዷን የበጎ ሥራ ዕቅዶቻችንን እንንደፍ። ሞት እንኳን ቢቀድመን የሥራውን ምንዳ ብናጣ የንያችንን ምንዳ እናገኛለንና።
ታላቁን እንግዳ ልንቀበለው ከ 80 ቀን ያነስ ጊዜ ቀርቶናል። አላህ ከሚደርሱና ከሚፆሙት ያድርገን።

~በጎ ነገሮችን በሰፊው የምንዘራበት በረከተ- ብዙው ረመዷናችን እየመጣ ከ ሦስት ወር ያነሰ ነው የቀረው። ከወዲሁ ቀልባችንን አለስልሰን እንጠብቀው። ረመዷን ከመግባቱ በፊት ያለሰለሰ ቀልብ ቁርኣን ዘልቆት አይገባውም። ከረመዷንም ተጠቃሚ ሊሆን አይችልምና ከወድሁ ዚክርን፣ቁርኣንን፣ሱና ሶላቶችን፣ሱና ፆሞችን፣የለይል ሶላቶችን… እናለማምደው።

~ ከሁሉም በላይ ለራሴ ችግር የሆንኩት እኔው ራሴ ነኝ፡፡ ትልቁ ትግሌ ከራሴ ጋር ነው፤ ትልቁ ወሬዬም ከኔው ጋር ነው፡፡ አሳምሬ መገንባት የምፈልገው ትልቁ ህንፃ እኔነቴን ነው፤  ራሴን ካስተካከልኩ ሌላዉን ማስተካከል ቀላል ነው፡፡ መጀመርያ እኔ:ሌላው ጉዳይ ቀጥሎ ነው፡፡

ዛሬን ጠፋሁ ወይም አጠፋሁ ብዬ ተደፍቼና ተከፍቼ አልኖርም፡፡ ኃጢአት ብሠራ ከወደቅኩበት ለመነሳት እፍጨረጨራለሁ፤ ዕድሜ ዕድል ነው፡፡ አላህ ካቆየኝ እስከ ዕለተ ሞቴ በርካታ ዕድሎች እንዳለኝ አውቃለሁ፡፡ ማለዳ በመጣ ቁጥር ተስፋዬም ፈገግታዬም ይመለሳል፡፡ በጥፋቴም ከምንም በላይ የአላህን እዝነት እያሰብኩ ከተጓዥ ወንድሞቼ ጋር ወደ አኺራ ወንዝ እፈሳለሁ፡፡

ደስተኛ ነኝ፡፡ ጠዋት ከቤት ይዤ የምወጣዉም ሆነ ስተኛ ተሸክሜ የምተኛው ሀሳብ የለኝም፡፡ ስወጣ አራግፌ ጭንቅላቴን ወጣለሁ፣ ስገባ ሀሳቤን እደጅ አስቀምጬ ገባለሁ፣ ስተኛም ከትራሴ አርቄው እጋደማለሁ፣ ሐዘን በቤቴም በዉስጤም ሥፍራ ያገኝ ዘንድ አልፈቅድለትም፡፡ ሙሉ ቀን ከዋለብኝ ድክመቱ የኔ ነው፡፡ እሱ እንደ ድንገተኛ እንግዳ ሁሉ መጥቶ የሚሄድ ነገር ነው፡፡ በሰው ቤት ከሦስት ቀን በላይ የማደር ሐቅ የለዉም፡፡

ሶሻል ሚዲያ ላይ የምጣደው ለማንበብ ነው፡፡ ለራሴም ለተከታዮችም ደስ የሚል መልዕክት ለመምረጥ ነው፡፡ በመረጥኳቸው ነገሮችም የደከማቸዉን አበረታለሁ፣ ያዘኑትን አጽናናለሁ፣ ከከፋቸው ጋር እስቃለሁ እጫወታለሁ፡፡

ዓላማዬ የኢማን ህመምተኞችን መርዳት ነው፤ ዋናው እና ትልቁ በሽተኛም እኔው ነኝ፡፡

ከሰው ጋር ጨዋታ ይዤ ለተወሰነ ጊዜ እዘናጋ ይሆናል፡፡ ተዘናግቼ እንደማልቀር ግን ዉስጤ ይነግረኛል፡፡ አንድ ቀን ሳጠፋ ብዉል ኪሳራዬን በሌላኛው ቀን ለማካካስ እታገላለሁ፡፡

ሕይወት ትሂድ ትቀጥል፤ ተነጫንጨን አናስቆማትም፡፡ ተደስተንም አናቆያትም፡፡ ዱንያ ዛሬ ይሁን ነገ ጠፊ ናት፡፡የቀደሙን ሁሉ ምርጦች ናቸው ብዬ አስባለሁ፡፡ በመሞታቸው ትልቅ ትምህርት ሠጥተዉናል፡፡ እነርሱ በርግጥ ታድለዋል።

ጌታዬ ሆይ ካንተ ጋር ወሬ እንዳለኝ አውቃለሁ፤ የኔን ነገር አደራ፡፡

~ዝሆን ሁለት ጥርሶቹ ጎልተው ስለሚታዩ ሌሎች ጥርሶች የሉትም ማለት አይደለም። እነዚህ ጎልተው የሚታዩት ጥርሶች ውበቱ ወይም ግርማ ሞገሱ ናቸው። በዛውም ልክ የጥቃት ሰለባ ያደርጉታል። ፈገግታችንን ብቻ ስለሚያዩ የማይከፋን ለሚመስላቸው፣ ስለማንጨናነቅ ቁም ነገር የማናውቅ ለሚመስላቸው፣ መልካም ብለው ባሉት ቦታ ስለማያገኙን እርባና ቢስ ለምንመስላቸው ሰዎች አቅል ይስጥልን። ሁለት ጥርስ ብቻ ሁሌ አትመልከቱ ሌሎች ከ20 በላይ ጥርሶች አሉ። ሳቆቻችን የሚሸሽጉትንን ለመመልከት ሰፋ በሉ። ከምናሳያችሁ የበለጠ የምናሳይበትን ምክንያት ተረዱ።