Qonnaan bultoonni Oromoo Harargee Jimaa Oomishuun jiruufi jireenya isaanii geggeeffatan nama nurraa bitu dhabuun rakkoo keessa jirra jedhu.
Sababa gatiin gabaa baduun immoo ofii keenyaafi maatii keenya waan nyaannuufi nyaachisnu dhabuun beelaaf saaxilameerra jedhu.
Qaamota mootummaa dhimmi kun ilaallatutti iyyannu illee iyyanni keenya hin dhaga’amu jechuun komatu.
Ooyiruu Jimaa bal'aa osoo qabnuu guurree magaalaa geessinee nama bitu dhabuun magaalumatti gannee galaa jirra jedhu qonnaan bultoonni oomisha Jimaan jireenya ofii fi maatiisaanii geggeeffatan.
Jimaan muka isaarraa yeroo guuramutti maallaqni itti ba’ee guurama kan jedhan, yeroo amma nama bitu dhabuun muka irratti dhiisaa jirra jedhu.
Oomisha Jimaa hojjennee jireenya keenya sadarkaa fooyya’aa irraan ga’annu illee amma jireenya gadi aanaa kaleessa keessaa baane sanatti deebinee jirra jechuun dubbatu.
Ooyiruu Jimaa ala jiru ilaaluun isin abbaa qabeenyaatii nuun jedha mootummaan kan jedhan, dhuguma osoo ooyiruu Jimaa bal'aa qabnuu waan nyaannu dhabuun beelaaf saaxilamnee jirra jedhu.
Qaama mootummaatti himannus himanni keenya hin dhaga'amu; mootummaa birayyuu hin ga'u jechuun furmaata dhabanii rakkoo ulfaataa keessa jiraachuu dubbatu.
Gama biraan immoo rakkoon kanaa maali jennee yoo gaafannu daldaaltotatu akkas isin gochuutti jira nuun jedhama jedhu.
Awwadaay irratti qaraxa kaffallee waraqaa ittiin kaffalle qabannee yoo deemnu bakka biraatti immoo waraqaa sana nurraa fuudhuun dachaa isaan qaraxa nu kaffalchiisu jedhan.
Rakkoon gama Jimaan nu mudate waan armaan dura takkaa nu mudatee hin beeknedha kan jedhan, uummanni kun madda jireenya biraa waan hin beekneef amma madda jireenya biraa barbaaduuf ooyiruu qonnaa isaa dhiisee deemuuf dirqamaa jiraachuu himu.
Daldaltoonnis qaraxa humnaa olii kaffalamu balaaleffachuun dubbatu.
Rakkoon gabaa Jimaa mudate kun saffisa barbaachisuun yoo hin furamne gaaga’ama ulfaataa uummatichaafi biyyattiif qabaata jedhu.
MIIDIYAA
t.me/ABDII_SABA_MEDIA📡Odeeffannoo
@MEDIA_OMN