መጋቢት 27/2015 ዓ.ም
==================
የ9 ዓመት ሴት ልጁን የደፈረው አባት በ15 ዓመት ፅኑ እስራት ተቀጣ!!

ነዋሪነቱ በቡታጅራ ከተማ እሪንዛፍ ክ/ከተማ ቀበሌ 04 ልዩ ስሙ ገበያ ሰፈር ተብሎ በሚጠራው አካባቢ የሚኖረው አቶ አክሊሉ ግዛው የ9 ዓመት ዕድሜ ያላትን ታዳጊ ህፃን ልጁ ወላጅ እናቷ አዳሯን ዘመድ ጥየቃ በሄደችበት አጋጣሚ ተጠቅሞ የካቲት 19 ቀን 2015 ዓ.ም በዕለተ ቅዳሜ ለሊት በመድፈሩ በጎረቤት ጥቆማ መሰረት ፖሊስ ባደረገው ክትትልና ምርመራ በመረጃና ማስረጃ በመረጋገጡ ወንጀለኛው እጁ ከተያዘበት ቀን ጀምሮ የሚታሰብ በ15 ዓመት ፅኑ እስራት እንዲቀጣ የቡታጅራ ከተማ የመጀመርያ ደረጃ ፍርድ ቤት ዛሬ በዋለው ችሎት ወስኗል።

ፍርድ ቤቱ ልዩ ትኩረት ከሚሰጣቸው አገልግሎት፤ የህፃናት ጥቃትና አስገድዶ መድፈር ወንጀል በመሆኑ በዚህ ረገድ ከቡታጅራ ከተማ አስተዳደር ሴቶችና ህፃናት ጽ/ቤት እና ከቡታጅራ ከተማ አቃቤ ህግ ጽ/ቤት ጋር በቅንጅት መስራታቸው ህግንና ማስረጃን ተንተርሶ በአጭር ጊዜ ለውሳኔ እንዲበቃ ማስቻሉን የቡታጅራ ከተማ የመጀመርያ ደረጃ ፍርድ ቤት ፕሬዝዳንትና ዳኛ አቶ አወቀ ሰይፉ ገልፀዋል።

ፕሬዝዳንቱ እንደገለፁት የቅጣት ዋንኛ አላማው ማስተማር ፣ ማረምና ሌሎችን እንዲማሩ ማድረግ እንደሆነ በመግለፅ ሁላችንም የሰው ፍጥረት ነንና ህብረተሰቡ ነቅቶ ልጆቹን መጠበቅ እንዳለበትና ድርጊቱ ከተከሰተም ፈጥኖ ለህግና ለፍትህ አካላት መጠቆም እንዳለበት ገልፀዋል።

ከከተማው ሴቶችና ህፃናት ጽ/ቤት ጉዳዩን ሲከታተሉ የቆዩት ወ/ሮ ሀና አላምረው እንደተናገሩት ድርጊቱ በተፈፀመ በ4ኛው ቀን ላይ ጎረቤት የልጅቷን ምግብ አለመውስድና አለመጫወት ከሁኔታዋ በመረዳትና በመጠርጠር ጥቆማውን እንዳደረሷቸው ፈጥነው በመድረስና ህፃኗም የምስክርነት ቃልዋን በመስጠቷ ጉዳዩን የከተማው ሴቶችና ህፃናት ጽ/ቤት ከከተማው ፖሊስ ጋር ተቀናጅተው በመስራታቸው በአንድ ወር ጊዜ ውስጥ ፍርዱን ሊያገኝ መቻሉን ገልፀዋል።

መረጃው የቡታጅራ ከተማ መንግስት ኮሙኒኬሽን ጉዳዮች ጽ/ቤት ነው!!