Leta Kenei Aga

Umurii xiqqoo
Haga dabarre
Jiga hin fakkaanneen
Jigee agarre…
Hurrii ganamaa
Waca iddoo gabaa
Hundinuu yeroo
Murtoofte qaba!
Hin abdatiinaa barcuma keessan
Hoffaafi dhoqqicha
Kan bakkatti hafu
Gooftaa Tokkicha!

@Waloo_Leta

Aayyoo koo
--
Akkamittan deemaree
Ani aarsaakee dagachaa
Dubbadheen si dubbisa
Harmanii harma dachaa!
Hin dhibamiin - hin du'in
kanum kan koo feeti
Barcumni Kabaja Koo
Waaqaa gadiin kan keeti!
Ragaa hittisaan si waama
Gaafan dubbiif shakkame
Gartokkee keeti ani
Dhiiga keerraan argame!
--
otuu dafqi kee cobuu
Jirbii rakkinaa footee
Ana bixxillee xiqqoo
Guddistee nama goote
Cuucee - dhala koo jettee
Afaan nafhii dubbatta
Furrii xurii koo wajjin
Arraabdee na dhungatta
Hidhata narraa hin citne
Hiddaafi Hundee Kaayyoo Koo
Kan biraa jecha hin qabu
Sin Jaaladha #Aayyoo Koo!
--
✍Leta Kenei Aga
@Waloo_Leta

"Dhuufuun waliin mari'atanii dhuufan hin ajaa'u"

@Waloo_Leta

Irree kee hin gitu
Irreen kumootaa
Sagalee tokkoon
Addunyaa moota!
‘Darba hin fakkaannee’
Kan dabarsitu
‘Marga hin fakkaannee’
Kan magarsitu…

Warqee kan gootu
Moofaa caccabduu
Gaafa murtoo kee
Homaa hin dadhabdu!
Yaa Waaqa dhugaa
Mee maal dadhabda?
Imimmaan cobuuf
Safara qabda…
Dacheen bal’oon kun
Si’iif fal’aana
Madaa dhalootaa
Situ wal’aana!

@Waloo_Lataa

Ji’oota muraasaaf miidiyaa hawaasaa kanarraa fagaadhee, waa dubbachuus dhiiseen ture.
Barri bara itti dubbatanii kan dabe sirreessan, kan dheedhate bilcheessan ta’uu didnaan; Kan dubbatu malee kan dhaggeeffatu dhibnaan… callisuu wayya jedheen callise.

Ajjeechaa #Battee_Urgeessaa yommuun dhaga’u obsan dhabe, qaama kootu na hollate! Amanuuf nan rakkadhe! Nama dubbatellee nama hin quuqne, nama tasgabbaa’aa, nama kabajamaa, nama yaadatti amanu, nama nagaa… akka sareetti gadi baasanii ajjeesanii gatan!

Wayyoo Battee! Wayyoo dhiira gaafa xiiqii! Dhiira gaafa rakkoo! Korma sodaa hin beekne, goota dhugaarraa hin dheessine!
Ajjeechaa #Haacee booda gaafa nutti dukkanaa’u; waan dubbannuufi akka itti dubbannu yommuu wallaalu situ dhugaa Oromoo dubbate! Situ abdii nutti hore! Ati nama tokko miti, sagalee Oromoo hundaa turte!
“Yaadatti amanna, karaa nagaatti amanna” jetti! Sobaafi fakkeessaa! Mootummaan yaadatti amanu nama akka kee kunuunsee kabaja kennaaf malee akka sareetti ajjeesee hin gatu!

Yaa qulqulluu namaa; dhiigni kee gatii qaba! Waaqayyo gumaa kee ni baasa!

Nuti silaa dhaloota ganama hidhii xuuxee, waaree booda dhiichisudha! Nu hin abdatiin Battee koo!

Nagaan boqodhu!

Lapheen Inni Durii
Inni Hin Qabne Xurii...
Dhiigarraa Hojjatame
Dhiiga Kennaa Waaqaa
Nama Kan Ta'e Hundaaf
Balbala Isaa Saaqa!
--
Lapheen inni ammaa
Gagaan irri dammaa...
Birrii irraa hojjetame
Birrii abbaa dhibbaa
kanaaf sooreessa jaallatee
Hiyyeessammoo Jibba!
--
@Waloo_Leta
#share #share

Harmee koo
Si haa barbaadan dhufanii
Gaafan dubbiif shakkame
Gartokkee keeti ani
Dhiiga keerraan argame!
Hiika onnee namummaa
Harmee kiyya yaa deessee
Maqaa koo dha'iin namni
Maqaa kee achi fageessee!
Safara lapheefi ribuu
Gaarummaa kee sanaafi
Si cinaatti waamamuun
Ulfinadha anaafi!
- -
Otuu dafqi kee cobuu
Jirbii rakkinaa footee
Ana bixxillee xiqqoo
Guddistee nama goote
Dhala koo - cuucee koo jettee
Afaan nadhii dubbatta
Furrii fi xurii koo wajjin
Arraabdee na dhungatta!
Sin jaalladha yoon jedhe
Kan kee hin baasu gatii
Naaf jiraadhu harmee koo
Eenyummaa koodha ati!

#Share
@Waloo_Leta

Barri ni sokka - barri ni dhufa
Aangoon lafarraa hunduu ni kufa
Aangoo bor darbuuf dhugaa kan haaltu
Madaa uummataa gubaa kan faaltu
Dhiiga qulqulluun dachee kan gooltu
Dabaree eegda atis hin ooltu!

@Waloo_Leta

Yoom akka deemnu hin beeknu.
Haga lubbuun jirrutti gaarii haa hojjennu!

Abdii kuti,
Eyyee abdii kuti!

Muka guddaa hin taatu
Xaxamtuun coqorsaa
Abdii hin kutiin jedhee
Maalittan si gorsaa?
Ol joortee - gad joortee
Of hin dhorkiin fayyaa
Abdii kutii dhiisi
Abdii kutuu wayyaa!

Waan bu’aa sii hin taanetti
Maal gochuuf dadhabdaa?
Jibbaafi inaaffaarraa
Abdii kutuu qabda!
Abdii kuti maaloo
Of hin cabsiin ceekuu
Jaalala lagatee namni jibba abdate
Galma ga’ee hin beeku!

Lataa Qana'ii
@Waloo_Leta

Galatoomi goomattuu!

Akkanni na waraanuuf
Gobaan ati naaf keesse
Riqicha gaarii ta'ee
Gara kaayyoo na geesse!

Yommuu ati bitaan cuftu
An karaa mirgaan ba'e
Yommuu ati handaaqqoo taatu
Animmoo risaan ta'e

Gaafa hojii na waamtee
Gaafa bu'aa na footee
Gubdee, gubdee guggubdee
Booddee warqee na goote!

Utuma gad na qabuuf
Dhoksaatti funyoo martuu
Ol qabdee na guddifte
Galatoomi goomattuu!
Tuu..

#Share
@Waloo_Leta

Ilkee qoraattii - qara gobaa
Waraanamtee dhiiga cobaa
Inuma deemta ga'uuf galma
Bakka xiiqii - bakka qalmaa…
Dhiiga keetiin karaa dhiqxa
Galma kaayyootti achi siqxa!

Mixiin bokoktee akka arbaa
Si dhoowwitus karaa darbaa
Yoom gad jettee lafaa kaasta
Irra ijjattee badduu baasta!

Yoo inaaftun moorrattellee
Biyyoo hartee boorrattellee
Utuu hokkoltuu - utuu cabduu
Ati deemsaaf karaan dhabdu
Baataa waadaa abboofi aayyoo
Miila xiiqii - miila kaayyoo!

@Waloo_Leta