Grace Commission

ይህ፣ ከግምቴም ከዕቅዴም ውጪ የኾነ የእግዚአብሔር ጒብኝት ነው። በርግጥ እግዚአብሔር የእኔን መጽሐፍ ሳይኾን የራሱን ወንጌል ርእስ ማድረግ እንደ ፈለገ ተረድቻለሁ። ሕንጸትም ለእኔ መጽሐፍ ሳይኾን ለወንጌል ተልእኮ ልዩ ትኲረት እንደ ሰጠ መቁጠር እፈልጋለሁ።

በነገራችን ላይ @ሕንጸት በቀጥታም ሆነ በተዘዋዋሪ በእኔ የሥነ ጽሑፍ ሙያ (መጻፍ፣ ማርታት እና ማሔስ) ላይ ትልቅ ኢንቨስትመንት አለው። በዩቲዩብ ቪዲዮዎቹ አልቆኛል (Mentoring) አድርጎኛል። በጋሽ ፍትሐ አምላክ አቅራቢነት ያማርኛ ሥርዐተ ጽሕፈት ላይ አሰልጥኖኛል። ስለዚህ @ሕንጸት ከልብ አመሰግናለኹ።

በዚህ አጋጣሚ ስለ መጽሐፌ ወንጌል ይዘቱና አቀራረቡ ጥቂት ልበል፦ ዐሳቡ ለዓመታት ያስተማርኹትና በማኅበራዊ ሚዲያ የጮኽኹት ቢኾንም፣ ወደ መጽሐፍ የተቀየረው በዐጭር ጊዜ ነበረ። ይህም የኮነው በመንፈስ ቅዱስ ምሪት እና ድጋፍ ነበረ። የኅትመት ወጪውም ሙሉ በሙሉ የተሸፈነው በራሱ በእግዚአብሔር አቅርቦት ነበረ። አኹንም @በሕንጸት አማካይነት መልእክቱን ማጉላት የፈለገው ራሱ እግዚአብሔር እንደ ኾነ አምናለኹ።

ስለዚህ የወንጌልን ተልእኮ በማፈጠን ይህን የእግዚአብሔር ፍላጎት እንፈጽም ዘንድ በዚህ ታሪካዊ አጋጣሚ ጥሪዬን አቀርባለሁ። ይህ ወንጌል ወደ ውጪ ብቻ ሳይሆን ወደ ውስጥም መነገር አለበት። አቀራረቡ ደግሞ ሥነ መለኮታዊ ተፈጥሮውን የጠበቀ፣ ይዘቱን ያላሳሳ (የወንጌል ንጽሕናን የማያሳድፍ)፣ ዘመኑን ያስተዋለ (ዐውዳዊ)፣ ተገቢ ስልቶችን የሚጠቀም (ስልታዊ)፣ በቂ ዝግጅት የተደረገበት (ስንዱ የኾነ)፣ ወንጌል ተኰር ማኅበረ ሰብ መፍጠር እና እግዚአብሔርን ማክበርን ያለመ መኾን ይጠበቅበታል።

ከልብ አመሰግናለኹ!

በርናባስ ዘመነ
የወንጌል ይዘቱና አቀራረቡ ጸሓፊ
ነሐሴ 30፣ 2018 ዓ.ም.