Joyfull Gifts

"ጎባጣው ትዳሬ" 👉 በበዕውቀቱ ስዩም

በየሳምንቱ ቅዳሜ አንድ መርህ አለኝ ፤ ያገርቤትም ሆነ የውጭ አገር ፖለቲካ ዜና እጦማለሁ፤ ኪነጥበብና ማህበራዊ ጉዳይ ላይ እጣድና ነፍሴን አለመልማታለሁ፤ በዚህ መሰረት ፥ ቅድም ዩቲዩብ ላይ ስርመሰመስ ቆየሁ።

በቀደም አንድ የሞሮኮ ዜጋ የሆነ ዘፋኝ “ ሊጋባው በየነ” የሚለውን ዘፈን በራሱ ቃና ዘፍኖ አስደምሞኝ ነበር ፤ ዛሬ ደግሞ ሸገር ውስጥ በስደተኝነት የሚኖር ሶርያዊ ዘፋኝ “ ለዚህ ለዚህማ ምናለኝ አገሬ “ የሚለውን የጌቴ አንላይን ዘፈን ዘፍኖ አስለቀሰኝ።

ወደ ፌስቡክ ተመለስኩ፤ ባለፈው አንዱ “ ላጤ” የሚለውን ግሩፕ እንድቀላቀል መጥርያ ልኮልኝ ነበር ፤ ያለሁበትን ተጨባጭ ሁኔታ ለመሰለል ፈልጎ ይመስለኛል፤ እኔም ግሩፑን ቀስ ብየ በለሆሳስ እየተራመድኩ ሰለልኩት፤ ፍቅር የተራቡ ” ሆርኒ” ወጣቶች የተደራጁበት ቡድን መሆኑን ደረስኩበት፤ ብዙም ሳይቆይ አንዲት ወይዘሮ ‘ በትዳራችን ጉዳይ እንመካከር “ የሚል ግሩፕ ላይ እንድሳተፍ መጥርያ ሰደደችልኝ ፤ ይሄ ግሩፕ የመጨረሻ ተመቸኝ፤የመጀመርያም ተመቸኝ ። አብዛኞቹ የግሩፑ አባላት ፥ የፍቅር ታሪካቸውን ተርከው ፤ በትዳራቸው ላይ የገጠማቸውን ችግር ዘርዝረው፥ ካንባቢ ምክርና መፍትሄ ያማትራሉ፤ እንሆ እኔም ተሞክሮየን ለማካፈል ወሰንኩ ፥

በውቄ እባላለሁ፤ ከባለቤቴ ጋራ የተገናኘነው ባጋጣሚ ነው፤ በጊዜው እሷ ሚስ ኢትዯጵያ ተብላ በቁንጅና ስትመረጥ እኔ አወዳደሪው ነበርኩ። የመጀመርያዎቹ ሀያ አመታት የትዳር ቆይታችን ጎረቤት የሚያስቀና ነበር ። ከቢሮ ስመጣ በደስታ በፈገግታና በውዝዋዜ ትቀበለኛለች፤ ኮቴን አውልቃ ወደላውንደሪው አፍ እየጨመረች “ ምሳ እስኪደርስ ፤ ክትፎ በቆጮ እየቀማመስክ ቆይ “ ትለኛለች። ከምሳ በሁዋላ ሶፋው ሳፋ እሲከመስል ድረስ ፍቅር እንሰራለን፤

በዙም ሳይቆይ ጸነሰች ፤ ከዘጠኝ ወራት ላልበለጠ ጊዜ በርግዝና ቆየች ። ያለ ብዙ ምጥ ወንድ ልጅ ተገላገለች፤ ልጃችንም ያለ ብዙ ለቅሶ ተገረዘ ! ልጃቸን በተወለደ በአንድ አመቱ ዶንኪቲዩብ ላይ እየቀረበ ለኢትዮጵያ ህዝብ ጠቃሚ ምክር መለገስ እና አቅጣጫ ማስቀመጥ ጀመረ። ሰባት አመት ሲሞላው ካሮጌ ቅጥቅጥ ሚኒባስ ሂሊኮፍተር ሰራ ። አሁን ካዲስ አበባ ብሾፍቱ ራይድ እየሰራበት ይገኛል።

ከጥቂት ጊዜ በሁዋላ ባለቤቱ ጸባይ መቀየር ጀመረ። የገቢ ምንጯና ለኔ ያላት ፍቅር በፍጥነት እየጨመረ ሄደ፤ ለልደቴ ፍልውሃ ያለውን ፓርክ ገዝታ በስጦታ አበረከተችልኝ ።

በዚህ አይነት ሁሉን የሚያስቀና ትዳር ውስጥ እየኖርን እጅግ የሚያሳዝን ነገር ተከሰተ፤ ሄቲ ውስጥ የመሬት መንቀጥቀጥ ደረሰ ! ታሊባን አፍጋኒስታን መልሶ ተቆጣጠረ፤ ይህ ግን በፍቅራችን ላይ የፈጠረው አሉታዊ ተጽኖ አልነበረውም ።
አንባቢ ሆይ !! ትዳራችን ፈረሰ የሚለውን ለመስማት፥ ምክርና ከንፈር መጠጣ ለማዋጣት ሰፍ ብለህ እየጠበቅህ ነውን ? በቃ ሼም የለህም? ለምን የሟርተኞችና የክፉ ታሪክ ናፋቂዎች ግሩፕ አታቋቁምም ?

**** **** * *

"ኢትዮጵያዊነት በርቱዓዊነት" ተመረጠ! በርቱዓዊነት መርሕ፥ ፉክክሩ ሲያበቃ ትብብሩ ይጀምራል!

በ6ኛው ዙር ሀገራዊ ምርጫ፣ የአዲስ አበባ ከተማ ምርጫ ክልል 28፣ የሕዝብ ተወካዮች ምክር ቤት።፣ በግል ዕጩነት ድምጽ ማግኘቴን የኢትዮጵያ ብሔራዊ ምርጫ ቦርድ ገልጿል።

በ"ሐ" የምርጫ ምልክት እና "ኢትዮጵያዊነት በርቱዓዊነት" በሚል መርሕ፣ የምርጫ ቅስቀሳ አስተባባሪ ኮሚቴ በማቋቋም ለወራት ባደረግነው እንቅስቃሴ በልዩ ልዩ ድጋፎች የተራዳችኹኝን፣ በምርጫ ኮሚቴነትና በታዛቢነት ያገለገላችሁትን፣ የገጠማችኹን ችግሮች ኹሉ ታግሣችኹ ድምፃችኹን የሰጣችኹኝን መራጮቼን በሙሉ ከልብ አመሰግናለኹ።

ይህ ምርጫ ምርጫ እንዲሆን ዋጋ የከፈላችሁ ተፎካካሪ ፓርቲዎች ታሪክ በደማቅ ቀለም ይጽፋችኋል። የተሸነፋችሁም አንዱንና ዋናውን የኢትዮጵያ ጎደሎ ሞልታችኋል። ኢትዮጵያ በፖለቲካ ፉክክር የተሸናፊ እንጂ የአሸናፊ እጥረት አልነበረባትም። እናንተ ይሄንን በመሙላት አሸንፋችኋል። የምርጫ አስፈጻሚዎች፣ ሚዲያዎች፣ ታዛቢዎችና የጸጥታ አካላት ሁሉ ኢትዮጵያ እንድታሸንፍ የከፈላችሁት መሥዋዕትነት የሀገራችን የክንድ ንቅሳት ሆኖ የሚኖር ነው።

ከሁሉም በላይ ለ12 ሰዓት እንደ ሰዓታት ቋሚ፣ ከዘረጋ ሳያጥፍ ቆሞ የመረጠው ሕዝብ፣ ጠላትን ሐሞቱ ያለቀ፣ ወገንን ልቡ የሞቀ የሚያደርግ ነበር።

አኹን የፉክክር ወቅት አብቅቷል። ቀጣዩ ጊዜ ለመረጣችኹኝም ላልመረጣችኹኝም ኢትዮጵያውያን ወገኖቼ በርቱዓዊነት የመተባበር ኢትዮጵያዊ መንፈስ ብቁ የሕዝብ ወኪል እና እንደራሴ ለመኾን የበኩሌን ጥረት የማደርግበት ነውና ጸሎታችኹ እና ድጋፋችኹ እንዳይለየኝ አደራ እላለኹ።

‹‹እግዚአብሔር ለሚረሱት ሁልጊዜ ማስታወሻ ይልካል›› "በሕይወት እምሻው"

ብዙዎቻችን፣ ከልጅነታችን አንስቶ ‹‹ የጭንቅ ጊዜ ሳይመጣ በጉብዝናችሁ ወራት ፈጣሪያችሁን አስቡ›› ብንባልም አንደበታችን ለፀሎት፣ ጉልበታችን ለስግደት የሚዘጋጀው መከራ ከፊታችን ሲደቀን ብቻ ነው።
አመዛኙ ፀሎታችን ‹‹ከዚህ ፈተና አውጣኝ››፣
አብዛኛው ልመናችን ‹‹ይሄን የመከራ ጊዜ በድል አሻግረኝ›› ነው።
ሲጎድለን ‹‹ይሄን ጨምርልኝ›› ክፍተት ሲታየን ‹‹ይሄንን ሙላልኝ ›› እንጂ ሲሞላልን የምስጋና ፣ ሲተርፈን የማካፈል፣ ፈጣሪን የማስደሰት ዝንባሌው የለንም ።
በዚህ ዓለምን አንድ ባደረገ አስጨናቂ ወረርሽኝ ሰአትም የምናየው ይሄን ይመስለኛል። እግዚአብሔር እንደ ልማዱ ለረሱት ማስታወሻ መላኩም ይመስለኛል።
ማስታወሻው ሰርቷልና የጭንቅ ጊዜ መጥቷልና ስለ ፈጣሪያቸው የሚያስቡ በዝተዋል፣ ለፀሎት የሚንበረከኩ ጉልበቶች ጨምረዋል፣ ምህረትን የሚለምኑ በቁጥር ልቀዋል።
ስለዚህ ነገር ሳስብ የዳኛቸው ወርቁ ‹‹አደፍርስ›› መፅሃፍ ላይ ወይዘሮ አሰጋሽ ተቸግሮ ሊበደር ፊታቸው ኩስስ ብሎ ለቆመ ጭሰኛቸው የነገሩት ትዝ አለኝ…ቃል በቃል ባይሆንም ለዚህ ይስማማል የምለውን ቀንጭቤ እና ቅርፅ አስይዤ ከታች አስቀምጬዋለሁ
‹‹…እግዚአብሔር …ሁሉን ያያል…ሁሉን ያውቃል…አዎ…አንዳንዴ የማይሰማ የማያውቅ መስሎ መታየትን ይመርጣል። የበደሉትን ሰዎች እግሮች ተምበርክኮ ያጥባል- እንደፈለጋችሁ- …እንደ ስሜታችሁ ኑሩ የሚል ይመስላል….
….አንድ ቀን የእሱን ታላቅነት፣ የእሱን ወሰን የለሽነት፣ የእሱን አይመረመሬነት፤ ዘንጋ ያልን ጊዜ ግን ድራሻችንን ሊያጠፋ። ሊያመጣው ውርጅብኙን።
…..ስልጣናችሁን በሚገባ አልተጠቀማችሁበትም- ለክብሬ የሚገባኝን አላቀረባችሁልኝም- ከምታገኙት ገንዘብ ጥቂት ጥቂት እያነሳችሁ ጧፍ እና ዕጣን፣ ….መገበሪያና ዣንጥላ በማቅረብ ፈንታ በሙሉ ተጫወታችሁበት…ለጠጅ አደረጋችሁት…ስለዚህ እኔም የምሰራውን አውቃለሁ ሊለን…
….አንበጣ፣ አመዳይ እና ቸነፈር የምትበሉትን አሳጥተው ችጋር እንዲነዙባችሁ.አደርጋለሁ ሊለን…
…ጥጋብ የነፋውን… ዱለኛውን…..ጭራውን እንደውሻ እንዲወሽቅ አደርጋለሁ ሊለን…….!
ሊያመጣው የጭቃ ጅራፉን!….››
ብቻ ምን ዋጋ አለው? …ዛሬ ላይ ይሄ ሁሉ የገባን ፣ ግርማ ሞገሳችንን ከትከሻችን ስለተገፈፈ፣ ውጥናችን በእንጥልጥል ስለቀረ፣ ኑሯችን በድንገት ስለተመሳቀለ እንጂ ነገር ሁሉ እንደ ነበር ቢቀጥል ኖሮ ያው…እንደ ለመድነው ኩራት እንደነፋን እንኖር ነበር…
ይሄኛውንም የመከራ ጊዜ በምህረቱ ብዛት እናልፍና…
እንደ ልማዳችን በእብሪት ተሞልተን ፈጣሪን እንዘነጋና፣ እግዚአብሔር ደግሞ ሌላ ማስታወሻ ለመላክ ይገደድ ይሆናል…

@diakon_daniel
@diakon_daniel
@diakon_daniel

ደህና ብር ስንት ነው?
"በአሌክስ አብርሃም"

ይሄ የምሰራበት ድርጅት የሆነ ችግር አለበት ….ከምር!! ፀዳ ፀዳ ያሉ ስልጠናዎችና ስብሰባዎች ሲኖሩ እኔን አይልከኝም …( ፀዳ ያለ ስብሰባ ማለት አጀንዳው ምንም ይሁን ጥሩ የውሎ አበል የሚከፍል ማለት ነው) የዛሬ ወር የአየር ብክልት ምናምን የሚሉ ነጮች መጥተው ካሳንችስ አካባቢ ወደሚገኝ የሆነ ትልቅ ሆቴልሰው ላኩ ተባልን። “በቃ ጉዳዩ በቀጥታ እኔን ይመለከታል” ብየ ስዘጋጅ ሃላፊያችን ጋሽ አሰፋን እንድልካቸው አዘዘኝ። እስቲ ጋሽ አሰፋና የአየር ብክለት ምን አገናኛቸው … እሳቸው የድርጅታችን ካሸር ናቸው።
ቢሆንም አንጀቴ እያረረ እንደታዘዝኩት ጋሽ አሰፋን ላኳቸው። ጋሽ አሰፋ ይሄው አንድ ወር ሙሉ አንዲት ቃል ስለአየር ብክለት ሲያወሩ አልሰማሁም! በተገናኘን ቁጥር ‹‹አይ ምግብ …ቦፌው ብቻ ለዓይ የሚያጠግብ ›› ይሉኛል ….እንደውም መቸ ለታ ነው …
‹‹አብርሃም ሌላ ስብሰባ የለም እንዴ?….. በተለይ የአየር ንብረት ጋር የተያያዘ ጥሪ ከመጣ አደራ እንዳትዘለኝ …. በዛች አበል እንዴት ያለ ሙሉ ልብስ ገዛሁ መሰለህ ›› ሲሉኝ ነበር።
የዛሬ አስራ አምስት ቀን ደግሞ ስነተዋልዶ ጋር የተያያዘ አንድ ስልጠና መጣና ሁለት የድርጅቱን ሰራተኞች ለሶስት ቀን አዳማ እንድንልክ የሆነ ኤን ጅ ኦ በደብዳቤ ጠየቀ። ይሄስ አያልፈኝም ብየ ደስ ሲለኝ ሃላፊየ ኮስተር ብለው ‹‹አብርሽ …ሮዳስንና በየነን ላካቸው›› አለኝ …እንዴ ይሄ ሰውየ ለስነተዋልዶ መሞከሪያ ወጣቶች ላኩ የተባለ መስሎት ይሆን እንዴ …..ሮዳስና በየነ …. ያውም አዳማ …ያውም ለሶስት ቀን ተልከው ታየኝኮ ሲሰለጥኑ።
እዚህ የድርጅቱ ካፌ ውስጥ እንኳን ለምሳም ለሻይም ተዛዝለው ነው የሚውሉት ….ለማንኛውም ሮዳስና በየነ ለስልጠና ተላኩ … ስልጠናው ካበቃ በኋላ ሁለቱም የዓመት ረፍት ጠይቀው ሁለት ቀን ጨምረው ዘና ሲሉ ከርመው እየተፍለቀለቁ መጡ! ስለስነተዋልዶ የሰለጠኑትን ያካፍሉናል ብየ አይን አይናቸውን ባይ …ወፍ የለም! እንደውም አዳማ ያሳለፉትን አስደሳች ጊዜ ይተርኩ ጀመረ …. ፍቅራቸው ከፍ ብሎ መጡ! ጫጉላ ልከናቸው ምን ያድርጉ ….ስብሰባ የጣመረውን ማን ይለየዋል ወገኖቸ እንኳን ግለሰብ የፖለቲካ ግንባር የሚፈጠረው በስብሰባኮነው! ‹‹አብርሽ ሌላ ስልጠና ከመጣ አደራ …በተለይ ከከተማ ወጣ ካለ›› ይሉኛል ባገኙኝ ቁጥር …ወቸ ጉድ! ‹‹ስብሰባን እንደሶደሬ››
ከዚህ ሁሉ በኋላ ትላንት እጣው ለእኔ ወጣ …. (የጭቁኖችን እንባ የሚያብስ ሰማኝ አልኩ) አንድ በአለም ዙሪያ እየዞረ ‹ስራ ፍጠሩ› የሚል ስራ ፈት የጀርመን ድርጅት ባዘጋጀው ስልጠና ላይ እንድሳተፍ ድርጅቴን ወክየ ሄድኩ …. ምነው ልሄድ እግሬን ሳነሳ እግሬን በሰበረው!! ወይ ጥጋብ እናተ ….
ከተማው ውስጥ የቀረ ሃብታም የለምኮ!! ታፍኘ ልሞት ….በዛ ላይ እንዲች ብለው …ተስቷቸው እንኳን ስለሽ ብር አያወሩም ሚሊየን ብቻ ! ነጥብ ብቻ ….ምናምን ነጥብ ምንትስ ሚሊየን ዶላር ይላል አንዱ ….ሌላኛው ቅብርጥስ ሚሊየን ኢንቨስት ማድረግ ይላል ….. እኔ ይሄ የእግር ኳስ የዝውውር መስኮት ምናምን የሚባለው ነገር እዛ አዳራሽ ውስጥ ብርግድ ብሎ የተከፈተ ነው የመሰለኝ ..ተጨዋች ምናምን የሚሸጥበት ዋጋ የሚጠሩ አይነት ….ሚሊየን ዶላር ፓውንድ … ይች ሚሊየን እንዴት ነው የቀለለችው ….እ?
ለሻይ ስንወጣ … ከማን ጋር ልሁን ብየ ወዲያ ብዞር ቦርጫም …ወዲህ ብዞር በወፍራሙ የሚስቅ ሃብታም ያላበው ማጅራቱን አንሶላ በሚያህል ማህረም የሚጠራርግ ሃሃሃሃሃሃ አትለኝም …ሄድ ድድድ ሃሃሃሃሃሃ የሚል …..‹‹ዛሬ ገና አልባሌ ቦታ ዋልኩ›› ብየ ቢጤየን ፍለጋ ሳማትር አንድ ቅጭጭ ያለ አናቱ የከበደው ሚስኪን ላብ አደር ከሩቅ አየሁ ውሃ እየጠጣ … ሂጀ ሰላም አልኩት። በአክብሮት ከመቀመጫው እንደመነሳት ብሎ ሰላም አለኝ (ትህትና የደሀ ሀብት ) ተቀመጥኩ። አንጀት የራቀው ነገር ነው እንደኔ የሚሊየን ወሬ ተጫጭኖት ነው መሰል ፊቱ ላይ ድካም ይነበባል … ስልኩ ራሱ አራት መቶ ብር የምትሸጠው ኖኪያ ነበረች ! ይሄማ ብድር ሁሉ ይጠይቀኝ ይሆናል ብያለሁ በሆዴ!
በቃ ይሄ እንደኔው እግር ጥሎት የመጣ መሆን አለበት ብየ ዘና አልኩ! ወዲያው አንድ አካሄዱም ድምፁም የለበሰው ቀይ ኮትና ቀይ ኮፍያ ጋር ተዳምሮ ‹ሲኖ ትራክ› የመሰለ ቦርጫም ሰው ሁለት ሰዎች ጋር እኛ ወደተቀመጥንበት መጣ …..እንዲህ አለ ወደከሲታው ወዳጀ ለሰዎቹ እየጠቆመ
‹‹ይሄ ነው እከሌ ማለት ….ባለፈው ያንን የሪል እስቴቱን መቶ አምሳ ሚሊየን ብር ያስያዘልን ….ብሎ እርፍ! ኮስማናው ….ኮስምየ …ኮስሚቲ …አልኩ በሆዴ ቀድረ ቀላሉን ሚሊየነር እየተመለከትኩ! ከዛማ የሚሊየን ወጋቸውን ይጠርቁት ገቡ! ወይ ጉድድድ ይሄ ሚሊየን ከምንጊዜው ከመንፈስነት ወርዶ ስጋ ለበሰ …..
ከሻይ መልስ አሰልጣኛችን ፈገግ ብሎ አንድ ጥያቄ ወረወረ……
‹‹ እስቲ ከእናተ መሃል ቢያንስ አንድ ሚሊየን ብር የሌለው እጁን ያውጣ … ›› አሰልጣኙ በዚህ ሊያቆም መሰላችሁ …..‹‹አለማችን በአሁኑ ሰዓት ለአንድ እና ሁለት ሚሊየን ብር ቦታ የላትም …. ደህና ብር ኢንቨስት ማድረግ ይኖርባችኋል በብዛት መስጠትና እጅግ በብዛት መቀበል ይሄው ነው የአለም ወቅታዊ የቢዝነስ ኮንሴፕት …..››
ደህና ብር ?….ደህና ብር ስንት ነው? … የሚያሳቅቅ ያሳቃችሁ እቴ ! ምድረ ጥጋበኛ …. ምንስ ቢሆን ካሳንችስ መሆናችን ተረሳ እንዴ? ….ምንስ ቢሆን ኢትዮጲያ መሆናችን ተረሳ እንዴ? …. እኔ ለረዢም ጊዜ ሚሊየን የማውቀው ሰማኒያ ሚሊየን ነው …ህዝብ !!

@diakon_daniel
@diakon_daniel
@diakon_daniel

ክትባት እንዴት እንዳመለጠኝ "በዕውቀቱ ስዩም"

አበሻ ገራሚ ህብረተሰብ ነው! ማስክ ገድግደህ ሲያይህ” ይሄን ያህል ትንቦቀቦቃለህ እንዴ” እያለ ያሸማቅቅሀል ፤ ከዚያ አጅሬው አስተኝቶ ለሳምንታት ያክል አበራይቶ ትቶት ይሄዳል፤ ከዚያ እንዴት ነህ? ስትለው” በዝሆን እግሩ ረግጦ አድቅቆ ለቀቀኝ በማለት ፈንታ” ይዞ ለቀቀኝ “ በማለት አቃሎ ይነግርሃል፤ ከህመሙ በረከት እንዲደርስህ ወጥሮ ያበረታታሀል፤ ስለክትባት ስታነሳበት “ ቺፕስ ሊያስገቡብን” ነው ይልሀል፤ ባለፈው አንዱ “ ፈረንጆች ቺፕስ ክንዴ ላይ ቀረቀሩብኝ “ እያለ የዝግባ ፍልጥ የመሰለ ክንዱን ለታዳሚው ሲያስጎበኝ በሆነ ዩቲውብ ቻናል ላይ አየሁት ፤ አነጣጥሬ ስሾፈው ክንዱ ላይ ያለው ኮረሪማ እሚያክል ኪንታሮት ነው፤
እኔ ያለሁበት ከተማ ውስጥ የክትባት እደላ ቢጀመርም ምዝገባውና ወረፋው አይቀመስም ፤ አንድ ቀን ግን ዝም ብየ በድንኩዋን ሰበራ ጎራ አልሁ፤
“ምን ፈልገህ ነው?” ሲሉኝ
“የማትፈልጉት ክትባት ይኖራችሁዋል? ” አልኩ ራሴን እያከክሁ’
“እድሜህ ስንት ነው?” አለቺኝ ነርሲቱ
“ኦፊሻል እድሜየ አርባ ይገመታል ፤”
“አዝናለሁ! አሁን እየከተብን ያለነው ካምሳ አመት በላይ የሆኑትን ነው“ አለችኝ።
“የሰባ አመት አዛውንት አተነፋፈስ ነው ያለኝ ፤ እንደምንም አጠጋግተሽ አስገቢኝ” ብየ ተማፀንኩዋት፤
“ኦኬ፤ ተመዝግቦ የቀረ ሰው ካለ፤ በምትኩ ትከተባለህ”
“እጅሽን ከቁርጥማት ይሰውርልኝ” በማለት መርቂያት ቁጭ አልኩ
ጥበቃው እንዳይታክተኝ አጠገቤ ከተቀመጠው ሰውየ ጋ ላውጋ ብየ ዞር አልሁ፤ በሁለት ከዘራ መሀል ጎብጦ የሚንቀጠቀጥ አዛዛዛዛውንት አይቼ
“ስንት አመትዎ ነው?’ በማለት ጠየኩት፤
“ ምን አልከኝ ? ” አለኝ፤
ከኪሴ ማይክ አውጥቼ
“ቼክ ማይክ! ዋን ፥ቱ ፥ ትሪ ! ስንት አመት ሆነዎት? “
“ባለፈው ሳምንት መቶ አመት ሞላኝ “
“እና ርስዎም ክትባቱን ይፈልጉታል?”
“አይ ለኔ አይደለም! አባቴን ላስከትብ መጥቼ ነው”
በመጨረሻ ተጠራሁ፤
ነርሲቱ ፥ ክንዴን አፈፍ አድርጋ ይዛ እንደ ጥጥ ስታባዝተው ከቆየች በሁዋላ፤
“የደም ስርህ ላገኘው አልቻልኩም” አለቺኝ ፤
“ የደምስሬ wireless ነው፤ በቀላሉ አይገኝም“ አልኩዋት
“አትቀልድ ፤ በዚህ ሁኔታ መርፌ ለመጠቀም ያስቸግረኛል”
“እንደ ልጅነት ልምሻ ክትባት ለምን አፌ ላይ ጠብ አታረጊልኝም?”
“ብዙ ጊዜ የምትመገበው ምግብ ምንድነው ?” ስትል ጠየቀችኝ፤
“ሩዝ ! ይገርምሻል ሩዝ አብዝቼ ከመውደዴ የተነሳ ወዳጆቼ ‘ ሩዝቤልት’ የሚል ቅፅል ስም አውጥተውልኛል”
“በል አሁን ወደ ቤትህ ተመልሰህ፤ ገንቢ ምግብ ብላ፤ ዳምፔል አንሳ! ፑሽ አፕ ስራ ፤ ከዚያ ከሁለት ወር በሁዋላ ተመለስ”
ይህን ስትለኝ ይሄን ልላት ብየ ተውኩት፤
“ሴት!Yo! ልትከትቢኝ ነው ወይስ ቦዲጋርድ ልትቀጥሪኝ ነው የምትፈልጊኝ? ”

@diakon_daniel
@diakon_daniel
@diakon_daniel

እያረምን ወይስ እያበድን እንሂድ

#Ethiopia | ሙሐዘ ጥበባት ዲያቆን ዳንኤል ክብረት

ገበሬው ለሙግት ወደ ሸንጎ ሄዶ ሲመጣ የገዛ ወዳጆቹ የዘራውን እህል ሳያርሙ፣ ሳይኮተኩቱ ጠበቁት፡፡ ማሳውን እያየ ያብዳል፡፡ እንዴት እንደዚህ ይደረጋል? ይህን ያደረጉት እነ እንቶኔ ናቸው? ይህን ያደረጉት እኔን ሊጎዱ ነው? ድሮም እነርሱ አይወዱኝም ነበር፤ በቃ የሰው ነገር መጨረሻው እንደዚህ ሆነ ማለት ነው? በቃ የእርሻዬ ነገር አበቃለት ማለት ነው? እያለ ፀጉሩን እየነጨ ያብዳል፡፡

አንድ ሽማግሌ ከሩቅ አይተዉት መጡ፡፡ እየዛበረ የሚናገረውን ሰሙ፡፡ ከዚያም ‹እባክህ ረጋ በል› አሉት፡፡ ‹ምን ረጋ እላለሁ፤ እንዲህ ሲሆን እያዩት፤ ከዚህ በኋላ ምን ተስፋ አለኝ› እያለ ሲጮኽ ሽማግሌው ሰሙትና ‹ወዳጄ ይህ ሁሉ ቢሆንም፣ እያረምን እንጂ እያበድን መሄድ አለብን እንዴ› አሉት አሉ፡፡

ኢትዮጵያም እንዲህ ነው እየሆነች ያለችው፡፡ አንዱ ስንዴ፣ ሌላው እንክርዳድ ይዘራል፤ አንዱ ያቀናውን ሌላው ሊያጣምመው ይተጋል፡፡ በዚህ ሲደፈን በዚያ ይቦተረፋል፤ ራስ ሲነቃ እግ ይጎተታል፤ ብዙዎቻችን እንደዚያ ገበሬ የምናየውና የምንሰማው ለዕብደት እየዳረገን ነው፡፡ ማበድ ግን ሀገር አያቀናም፡፡ መቆጨት እንጂ መናደድ መፍትሔ አያመጣም፡፡ አበቃ፣ አለቀ፣ ደቀቀ፣ ሞተ ተቀበረ፣ ሄደ፣ አከተመ፤ ነጠፈ፣ ተሟጠጠ እያሉ ማልቀስ ነገሩን አይቀይረውም፡፡

አርበኞቻችን ሀገራችንን ከጣልያን ቀንበር ሊያላቅቁ ላይ ታች ሲሉ አያሌ ተስፋ አስቆራጭ ነገሮች ገጥመዋቸዋል፡፡ የንጉሡ መሄድ፣ የአንዳንድ ታዋቂ ሰዎች ከጣልያን ጋር ማበር፤ ሌላው ቀርቶ ታላላቅ የሃይማኖት አባቶች ሳይቀሩ ከጣልያን ጎን መቆማቸው፤ ለገንዘብና ለሹመት ሲል መረጃ እየሰጠ የሚሾልከው ባንዳ፤ በእነርሱ ላይ የሚወረወረው ፕሮፓጋንዳ፤ ስንቅና ትጥቅ ሲያልቅበት ተስፋ የሚቆርጠው ጭፍራ፤ ጣልያን እያሸነፈ ነው እያለ የሚቦተርፈው ወሬ በጉንጩ፤ የአንዳንድ ጀግና ዐርበኞች በጊዜ መሠዋት መክፈል፤ መንገዱን ረዥም ትግሉን መራራ አድርጎባቸው ነበር፡፡

የሀገር ነጻነት እንኳንስ ለማየት ለመስማት የሚቀርብ አይመስልም ነበር፡፡ ዓለም በሙሉ ከጣልያን ጋር ያበረ ነበር የሚመስለው፡፡ ንጉሡ በዓለም ማኅበር ያቀረቡትን ተማጽኖ ሊሰማ የወደደ አልነበረም፡፡ እየዋለ እያደረ ሲሄድ ደግሞ ነገሩ ሁሉ የተቆረጠና ያለቀ ይመስል ነበር፡፡

ያንን የመከራ ዘመን የተሻገርነው ማረም እንጂ ማበድ እንደማያዋጣ በገባቸው ዐርበኞች ትከሻ ነው፡፡ መቼምና ምንም ቢሆን የኢትዮጵያ ነጻነት የማይቀር እውነት መሆኑ ገብቷቸው፣ ከሚያጋጥማቸው ፈተና ይልቅ የሚገኙትን ድል በሚያስቡ ዐርበኞች ነው፡፡ አንድ ጥግ ይዞ ከመቆዘምና ፀጉር ከመንጨት ይልቅ ወደ መፍትሔው የሚደርስ አንዳች ነገር ማድረግ የተሻለ መሆኑን በተረዱ ዐርበኞች ክንድ ነው የተሻገርነው፡፡

የዐርበኞች ትግል ከተናጠል ወደ ኅብረት፣ ከኅብረት ወደ ትብብር፣ ከትብብር ወደ ግንባር እያደገ መጣ፡፡ በመጀመሪያው ዓመት የነበሩትን ነገሮች እያረሙ፤ የተሻለም መንገድ እየተለሙ ተጓዙ፡፡ ሌሎች በመቶ ሃምሳ ዓመት ያልገፉትን ቅኝ ገዥ እነርሱ በአምስት ዓመት አሰናበቱት፡፡ እገሌ እንዲህ አለ፤ እዚህ ቦታ እንዲህ ተዘፈነ፤ እገሌ ለጣልያን ገባ፤ እገሌም ከዐርበኞች ከዳ፤ እገሌ ደግሞ ወደ ዐርበኞች መጣ፤ እነ እገሌ ዐርበኞችን ደምስሰን ሀገሪቱን እንቆጣጠራለን አሉ፤ እነ እገሌም በመሣሪያ ኃይል ተደራጅተው ሊዘምቱብን ነው፤ የሚለውን ሐሞት አፍሳሽ ወሬ መስማት ተው፡፡

የማይሠሩትን ትተው ከሚሠሩት ጋር ብቻ ለመተባባር፤ ስለ ጠላት ከማሰብ ስለ ወገን ብርታትና ጥንካሬ ለማሰብ፤ ከማበድ እያረሙ ለመሄድ በመቁረጣቸው ከ1930 ዓ.ም. በኋላ የዐርበኞች ትግል እየተጠናከረና መልክ እየያዘ መጣ፡፡ የጸሎት ዐርበኞችና የጦር ዐርበኞች ተባብረው ባደረጉትም ትግል ኢትዮጵያ ቀንበሯን ሰበረች፡፡

ዛሬም የሚያስፈልገን እንደዚያ ይመስለኛል፡፡ በትንሽ በትልቁ በማለቃቀስና በማበድ ጉልበታችንን ሁሉ ለልቅሶና ለዕብደት ከምናውለው፤ ስሕተቱን እያረምን፤ ሰውን እያተረፍን መጓዝ ነው ያለብን፡፡ መሬቱ ላይ የበቀለ አረም ካለ አረሙን እናርማለን፡፡ መሬቱን ግን እንፈልገዋለን፡፡ ዛሬ አረም አበቀለ ማለት ለአረም የተፈጠረ መሬት ነው ማለት አይደለም፡፡ እነ እገሌ እንዲህ አደረጉ፣ እንዲህ ሆኑ፣ እንዲህ አሉ እያልን የተራረፈ ወሬ እየለቃቀምን የተጣለልን የአጀንዳ ፍርፋሪ እያነሣን ልባችንን አናድክመው፡፡ በራሳችን ዕቅድ ወደምንፈልገው ዓላማ እንሂድ፡፡ ኢትዮጵያን መድረስ ወዳለባት ሠገነት ለማድረስ የማንም ቡራኬና ፈቃድ አያስፈልገንም፡፡ ‹እህ›ም ተባለ ‹አሃ› መንገዳችንን አይለውጠውም፡፡ እያረምን እንጂ እያበድን አንሄድም፡፡