YeneTube

'GTNA' ለሚድያ መገንቢያ የተሰጠውን 5 ሺህ ካሬ ሜትር ቦታ በ1 ቢልዮን ብር ሊሸጥ እያስማማ መሆኑ ታወቀ

- ቦታው ለጋንዲ መታሰቢያ ሆስፒታል ማስፋፊያ ተብሎ የተያዘ ነበር

ግሎባል ቴሌቭዥን ኔትዎርክ ኦፍ አፍሪካ (GTNA) በሚል ስያሜ የተቋቋመው እና በአፍሪካ ግዙፉ የሚድያ ተቋም ይሆናል የተባለለት ድርጅት ከአዲስ አበባ ከተማ አስተዳደር በሊዝ የተረከበውን 5ሺ ካሬ ሜትር ቦታ በደላሎች አማካኝነት ሊሸጥ መሆኑ ታውቋል።

GTNA መሬቱን ከተረከበ ሶስት አመት እንዳለፈው የጠቆሙት ምንጮቻችን አሁን ላይ ጋንዲ ሆስፒታል አካባቢ የሚገኘው ቦታው ታጥሮ ለመኪና ፓርኪንግ አገልግሎት ብቻ እየዋለ መሆኑን ከምስሎች እና ቪድዮዎች ጋር አያይዘው ለመሠረት ሚድያ ልከዋል።

"በመጀመርያ በደላሎች አማካኝነት ለሽያጭ የቀረበው በ1.4 ቢልዮን ብር ነበር፣ ገዢ ስላልተገኘ አሁን ላይ እስከ 1 ቢልዮን ብር እየተጠራበት ነው" የሚሉት ምንጮች አፍሪካን ማዕከል አድርጎ የአፍሪካን እውነት ለአለም ያሳውቃል የተባለለት ተቋም መሬቱን ለምን እንደሚሸጥ እንደማያውቁ ተናግረዋል።

አንድ የከተማ አስተዳደሩ ባልደረባ ግን መሬቱ ለሽያጭ መቅረቡን እንደሚያውቁ ለሚድያችን ገልፀው "በዲዛይኑ ላይ የተቀመጠውን ግዙፍ መንትያ ህንፃዎች ለመገንባት አበዳሪ ባንክ አልተገኘም፣ ምናልባት ሀብት ለማሰባሰብ ይሆናል" ብለዋል።

ግሩም ጫላ በተባለ ግለሰብ አማካኝነት በአፍሪካ ትልቅ ሚዲያ  ሊገነባ እንደሆነ በርካታ ሚድያዎች ከሶስት አመት በፊት መዘገባቸው ይታወሳል። ለሚድያው ዋና መስሪያ ቤት የሚውለው ቁልፍ ቦታ ከጋንዲ መታሰቢያ ሆስፒታል ይዞታ ጭምር ተወስዶ እንደተሰጠ ምንጮቻችን ጠቁመዋል።

"መንግሥት ለጋንዲ መታሠቢያ ሆስፒታል የማስፋፊያ ህንፃዎች ግንባታ የሚሆን ሰፊ ቦታ አዘጋጅቶ ነበር፣ ይሁንና ከሆስፒታሉ ይዞታ ላይ 5,000 ካሬ ሜትር የሚሆን ቦታ በቂርቆስ ወረዳ 07 የግንባታ ፈቃድ ከሚሰጡ ሰዎች ጋር በተደረገ ውል በሆስፒታሉ ካርታ ላይ ሌላ አዲስ ካርታ ተሰርቷል" የሚሉት እኚህ የከተማ አስተዳደሩ ሰራተኛ በአንድ አጋጣሚ ለምን ብለው በጠየቁ የሆስፒታሉ ሰራተኞች ላይ ማስፈራራት ደርሶባቸው ነበርም ብለዋል።

ከጋንዲ ሆስፒታል ያገኘነው ተጨማሪ መረጃ እንደሚጠቁመው ሆስፒታሉ ለወላድ እናቶች አገልግሎት የሚውል የከርሰ ምድር ውሃ አስቆፍሮ የነበረ ሲሆን እሱም በGTNA ይዞታ ስር ሊሆን ይገባል የሚል አምባጓሮ ተነስቶ በመጨረሻም በ GTNA ይዞታ ስር እንደተጠቃለለ ታውቋል።

@Yenetube @Fikerassefa

ሙሉ አዞ እስከ 300 ዶላር ድረስ የሚሸጥበት የአዞ ሥጋ ሬስቶራንት በኢትዮጵያ ሊከፈት ነው!

በአርባ ምንጭ ከተማ የአዞ ሥጋ ሬስቶራንት በቀጣይ ዓመት ወደ ሥራ እንደሚገባና በርካታ የውጭ ጎብኚዎችን ወደ ሀገር ውስጥ በመሳብ ተጨማሪ ገቢ ለማግኘት እየተሠራ መሆኑን በከተማዋ የሚገኘው የአዞ እርባታ ተቋም ለአሐዱ አስታውቋል።

በ1976 ዓ.ም የተቋቋመው ይህ የአዞ እርባታ ጣቢያ ከ2002 ዓ.ም ጀምሮ የማስፋፍያና የማሻሻያ ሥራዎች ተደርገውለት ከ10,000 በላይ አዞዎችን እያሳደገ መሆኑን የገለጹት የአርባ ምንጭ አዞ እርባታ ሥራ አስኪያጅ አቶ ዳዊት ዳኜ፤ በውጭ ሀገር ጎብኚዎች ፍላጎት መሠረት ሬስቶራንቱን ለመገንባት መታሰቡን ተናግረዋል።

አክለውም የውጪ ሀገር ቱሪስቶች የአዞ ስጋ ለመመገብ የሚጠይቁ መሆኑን የገለጹ ሲሆን፤ ጥናቱ ተጠናቆ በቀጣይ ዓመት ሆቴሉ ወደ ሥራ እንደሚገባም ጠቁመዋል።በጥናቱ መሠረት የአንዱ ሙሉ የአዞ ዋጋ ለውጪ ዜጎች እስከ 300 ዶላር እንዲሁም ለሀገር ውስጥ ተጠቃሚዎች ከ35 ሺሕ ብር ጀምሮ ለእርድ እንደሚቀርብ ነግረውናል።

የጎብኚውን ፍላጎት ለሟሟላት በተቋሙ ከአዞ ውጭ፣ የከርከሮ፣ የአሳማ እርባታን በማስፋፋት ለገበያ እንደሚቀርቡም አክለዋል።

እድሜያቸው ከ3 ዓመት በላይ የሆኑ ለእርድ አዞዎች የሚቀርቡ መሆናቸውንም ሥራ አስኪያጁ ለአሐዱ ተናግረዋል።ሆቴሉም ከአዞ ማራቢያ ራንች ከከተማዋ በ7 ኪ.ሜ ርቀት ከአውሮፕላን ማረፊያው በስተቀኝ በአባያ ሀይቅ ዳርቻ አካባቢ እንደሚገነባም አብራርተዋል።

ሆቴሉ ወደ ሥራ ሲገባ ከኢኮኖሚያዊ ፋይዳው በተጨማሪ የሥራ ዕድል እንደሚፈጠርም አብራርተዋል።ተቋሙ በጫሞ ሀይቅ ላይ የሚገኘውን ግዙፍ የናይል አዞ በማርባት በአዞ ቆዳ አቅርቦት ላይ እየሰራ እንደሚገኝ ጠቁመዋል።

ሥራ አስኪያጁ አያይዘውም፤ ከሆቴሉ ግንባታ በፊት የውጭ ጎብኚዎች በተለይም ላንቲ አሜሪካዊያን፣ ስፔኖች ግዢ በመፈጸም በየግላቸው እርድ እንደሚያካሄዱ አስታውሰዋል። ይህንን የዘፈቀደ እርድ በማስቀረትም ግንባታው መጀመሩን አብራርተዋል።

Via Ahadu
@YeneTube @FikerAssefa

በሸገር ከተማ አስተዳደር በርካታ መምህራን የሥራ ማቆም አድማ ላይ ናቸው!

በኦሮሚያ ክልል በሸገር ከተማ አስተዳደር ሥር በሚገኙ በርካታ ትምህርት ቤቶች የሚያስተምሩ መምህራን፣ ከትላንት ረቡዕ፣ የካቲት 26 ቀን 2017 ዓ.ም. ጀምሮ በሥራ ማቆም አድማ ላይ እንደሚገኙ፣ አስተያየታቸውን ለአሜሪካ ድምፅ የሰጡ መምህራንና የተማሪ ወላጆች ተናግረዋል፡፡መምህራኑ፣ ለሥራ ማቆም አድማው መነሻ የኾነው፣ “ጥያቄዎቻችን ምላሽ አለማግኘታቸውና ጥቅማችንን የሚጎዳ አሠራር መጀመሩ ነው፤” ብለዋል፡፡

ለደኅንነታቸው እንደሚሰጉ በመግለጽ ስማቸው እንዳይጠቀስ የጠየቁን አስተያየት ሰጪዎቹ፣ አድማው ከአንደኛ እስከ ኹለተኛ ደረጃ እና መሰናዶ ድረስ ባሉ በርካታ ትምህርት ቤቶች ውስጥ፣ የመማር ማስተማር ሒደቱ እንዲቋረጥና እንዲስተጓጎል ማድረጉን ገልጸዋል፡፡ከሸገር ከተማ አስተዳደር 12 ክፍላተ ከተማ ውስጥ፦ ኮዬ ፈጬ፣ ገላን፣ ፉሪ፣ ሰበታ እና ለገጣፎ ለገዳዲ በርካታ መምህራን የሥራ ማቆም አድማ ያደረጉባቸው ክፍላተ ከተማ ሲኾኑ፣ አድማው በከፊል የሚካሔድባቸው ክፍላተ ከተማም መኖራቸውን ከተለያዩ አስተያየት ሰጪዎች ያገኘነው መረጃ ያመለክታል፡፡

የሥራ ማቆም አድማው ለሦስት ቀናት እንደሚቆይ የገለጹት አስተያየታቸውን የሰጡን መምህራን፣ በእነዚኽ ቀናት ውስጥ ምላሽ ካላገኙ፣ አቤቱታቸውን በጋራ ለክልሉ ፕሬዝደንት ጽሕፈት ቤት ለማቅረብ ወደዚያው እንደሚያመሩ ጠቁመዋል፡፡በሥራ ማቆም አድማው ምክንያት፣ በኦሮሚያ ክልል የሸገር ከተማ አስተዳደር ሥር በሚገኙ በርካታ ትምህርት ቤቶች፣ ከትላንት ረቡዕ ጀምሮ የመማር ማስተማር ሒደቱ መስተጓጎሉን፣ መምህራንና የተማሪ ወላጆች ተናግረዋል።በጉዳዩ ላይ አስተያየታቸውን የጠየቅናቸው የከተማ አስተዳደሩ መምህራን ማኅበር ፕሬዝደንት አቶ ግርማ፣ “የሥራ ማቆም አድማ መኖሩን እናውቃለን፤ ነገር ግን ማኅበሩ ተወያይቶ ያሳለፈው ውሳኔ አይደለም፤” ከማለት ያለፈ አስተያየት ለመስጠት ፈቃደኛ አልኾኑም።

Via VoA
@YeneTube @FikerAssefa