“ስምምዕነት ፕሪቶርያ ዘፍርስ ተጀሚሩ ዘሎ ምንቅስቓስ ደው ክብል ይግባእ”

ፕረዚደንት ጌታቸው ረዳ

ፕረዚደንት ግዝያዊ ምምሕዳር ትግራይ ኣይተ ጌታቸው ረዳ፣ነዚ ዝበሉ ካብ ጋዜጠኛታት ንዝቐረቡሎም ሕቶታት ይህብዎ ኣብ ዘለው መብርሂ እዩ።

ፕረዚደንት ጌታቸው ፣ጊዝያዊ ምምሕዳር ኣብ ታሕቲ እግሪ ከይተኽል ዝግበር ዝነበረ መንገዲ ሐዚ ሓይልታት ፀጥታ ትግራይ እውን ተጠቒምካ ስልጣን ብሓይሊ ንምሓዝ ማህተም ናብ ምምንጣል ከምዝዓበየ ኣመላኺቶም።

ላዕለዎት ሓለፍቲ ሓይልታት ፀጥታ ዝገብርዎ ዘለው ምንቅስቓስ ደው ከብልዎ ዘተሓሳሰቡ ፕረዚደንት ጌታቸው ረዳ፣እቲ ዝግበር ዘሎ ምንቅስቓስ ሓድነት እቲ ስራዊት ዝዘርግ ኩነታት ይፈጥር ከምዘሎ እውን ኣመላኺቶም።

ብሓይሊ ስልጣን ንምሓዝ ዝግበር ዘሎ ውሳነ ላዕለዎት ኣዘዝቲ ሓይልታት ፀጥታ ትግራይ ዘሕለፍዎ ውሳነ ካቢኔ ግዝያዊ ምምሕዳር ትግራይ ዘትዩ ደው ክብል ከምዝወሰነ ድማ ኣዘኻኪሮም።

መንግስቲ ናይ ምፍጻም ዓቅሙ ክዳከም ተገይሩ እዩ ዝበሉ ፕረዚደንት ጌታቸው ረዳ፣ሐዚ ድማ ብሓይሊ ምምሕዳራት ንምልዋጥ ሓይልታት ፀጥታ ትግራይ ማህተም ክምንጥሉ ናብ ጣብያታት ክወርዱ ምግባር ሓላፍነት ዝጎደሎ ተግባር ከምዘሎ ገሊጾም።

መንግስቲ ዝልወጠሉ ዓርሱ ዝኸኣለ መንገዲ ከምዘሎ ዝገለጹ ፕረዚደንት ጌታቸው ረዳ፣ክግበር ዝድለ ለውጢ ብስርዓትን ሕግን ጥራሕ እዩ ክኸውን ዘለዎ ኢሎም።

ስምምዕነት ፕሪቶርያ ዘፍርስ ተግባር ደው ክብል ከምዘለዎ ዘመላኸቱ ፕረዚደንት ጌታቸው ረዳ፣ሐዚ ዝምዕብል ዘሎ ዞባዊ ፀጥታዊ ኩነታት ተንቲንካ ከመይ ይፀልወና ኣብ ዝብል ከነተኹር እዩ ዝግባእ ኢሎም።

ክብራትን ክቡራትን ምሉእ ትሕዝቶ እቲ መግለፂ ኣብ ቴሌቪዥንን ሬድዮን ኢሉ እውን ኣብ ኩሎም ኣማራፅታት ማሕበራዊ ሚድያ ክቐርብ እዩ።

@ASCENTIG