አይኤምኤፍ ለኢትዮጵያ ተጨማሪ 248 ሚ. ዶላር ብድር አጸደቀ

ዓለማቀፉ የገንዘብ ድርጅት (አይኤምኤፍ)፣ ሁለተኛውን የኢትዮጵያ የተራዘመ ብድር ግምገማ በማጠናቀቅ፣ ለአገር በቀል የኢኮኖሚ ማሻሻያ መርሃ ግብሩ፣ ትናንት ተጨማሪ 248 ሚሊዮን ዶላር ብድር ማጽደቁ ተነገረ፡፡

ድርጅቱ ለኢትዮጵያ 3. 4 ቢሊዮን ዶላር ብድር ባለፈው ሐምሌ ያጸደቀ ሲሆን፤ ከዚያ ወዲህ እስከ ትናንት ድረስ የለቀቀው ብድር 1.6 ቢሊዮን ዶላር መድረሱ ታውቋል፡፡ መንግሥት ለማኅበራዊ ሴፍቲ ኔት መርሃ ግብሮች የሚሰጠው ድጎማ ከተጠበቀው በታች መሆኑን የገመገመው ድርጅቱ፤ ለጉዳት ተጋላጭ ለሆኑ የህብረተሰብ ክፍሎች የሴፍቲ ኔት ድጋፎችን ማጎልበት እንደሚያስፈልግ መክሯል።

ድርጅቱ፣ የነዳጅ ዋጋ የመንግሥትን ወጪ ሙሉ በሙሉ ሊመልስ በሚችል ደረጃ መስተካከል እንዳለበትም ምክረ ሃሳቡን አቅርቧል፡፡