የታህሳስ 19 የቅዱስ ገብርኤል ማኅሌት

ሰላም ለጉርዔክሙ ስቴ አንብዐ ሰብእ ዘኀሠሠ
ብዑላነ ሞገስ ሥላሴ ኢታንድዩኒ ሞገሰ
እመ ትትኀየዩኒሰ ወታኀድጉኒ ጽኑሰ
ሚካኤልኑ ለአውጽኦ ሥጋየ ጌሠ
ወእመ አኮ ገብርኤል ወሀበኒ ነፍሰ ።
ዚቅ
አድኅነነ እግዚኦ አምላክነ  ረዳኤ ኩነነ ወኢትግድፈነ
ወኢትትኃየየነ በዕለተ ምንዳቤነ  ርድአነ በኃይለ መላዕክቲከ
ከመ ኢንትሐፈር በቅድሜከ።
ወረብ
ኢትግድፈነ ወኢትትኃየየነ በዕለተ ምንዳቤነ
ርድአነ በኀይለ መላእክቲከ ሚካኤል ወገብርኤል
ነግስ
ሰላም ለከ ገብርኤል ላእክ
ትስብእተ ፈጣሪ ዘትሰብክ
ኀበ ማርያም ልደተ አምላክ
ለዳንኤል ዘገሠስኮ ጊዜ መሥዋዕተ ሠርክ
ምስዋዒነ ለለሳዑ ባርከ ባርክ።
ዚቅ
እስም ተለዐለ ዕበየ ስብሐቲከ መልዕልተ ሰማያት
እምአፈ ደቂቅ ወሕጻናት አስተዳሎከ ስብሐተ
ባርካ እግዚኦ ለዛቲ መካን
ነግሥ
ሚካኤል ዘትቀውም በየማና ለማርያም ድንግል
ወበጸጋማ ገብርኤል አብሣሬ ትስብእቱ ለቃል
ዕቀቡነ ዘልፈ ለለመዋዕል
እንዘ ትሰፍሑ አክናፊክሙ ዘነበልባል
ወረድኤትክሙ አድኅኖ ዘይክል
ዚቅ
አብሠራ ገብርኤል ለማርያም ወይቤላ
ትወልዲ ወልደ
ሚካኤል መልአክ በክነፍ ፆራ
መንጦላዕተ ደመና ሠወራ
ንጽሕት በድንግልና አልባቲ ሙስና
ወልድ ተወልደ እምኔሃ
+++
መልክአ ገብርኤል
ሰላም ለዝክረ ስምከ ዘኢይተረጐም  ምስጢር
ባሕቱ ይመስል ብሂለ እግዚእ ወገብር
ገብርኤል ኪሩብ ፀዋሬ ዓቢይ መንበር
ሕዝቅኤል ዘነፀረከ በአምሳለ ብእሲ ክቡር
ምስለ ገጸ ላህም ወእንስሳ ወቀሊለ ንስር ።
ዚቅ
ገብርኤል ብሂል ብእሲ ወአምላክ
እምኀበ እግዚአብሔር ዘተፈነወ ላእክ
ሥጋዌ ቃል ለድንግል ይስብክ ።
ወረብ
ገብርኤል ብሂል ብእሲ ወአምላክ፤
እምሀበ እግዚአብሔር ዘተፈነወ ላእክ
+++
ሰላም ለአእዛኒከ ኆኅያተ ቃለ አብ ሕያው
ወለመላትሒከ ልሑያት አምሳላተ ጽጌ ዘበድው
ኦ ገብርኤል መልአከ አድኅኖ ፍንው
አድኅነኒ ዘአድኀንኮሙ በአክናፊከ ምንትው
አመ ውስተ እሳተ ተወድዩ  ፫ቱ  ዕደው ።
ወረብ
አድኅነኒ ዘአድኀንኮሙ ሊቀ መላእክት አድኅነኒ ሊቀ መላእክት ዘአድኀንኮሙ
፫ቱ ዕደው አመ ውስተ እሳተ ተወድዩ ዘአድኀንኮሙ
ዚቅ
ዘአድኃኖሙ እምዕቶነ እሳት
ለአናንያ ወአዛርያ ወሚሳኤል
ከማሆሙ ያድኅነነ እምኩሉ  ዘይትቃረነነ ።
ወረብ
እምቶነ እሳት ዘአድሃኖሙ ዘአድሃኖሙ ገብርኤል ሊቀ መላእክት፤
ሠለስቱ እደው አመ ውስተ እሳት ተወድዩ ዘአድኃንኮሙ
+++
ሰላም ለአቍያጺከ ወለአብራኪከ ገሃደ
እለ ያቄርባ ወትረ ለአምላከ ሰማይ ሰጊደ
እግዚአ አእምሮ ገብርኤል ዘኢትፈቅድ ዕበደ
ጥበበ ሐነጸት በወርኅከ ውስተ ልበ አብዳን ማኅፈደ
ወአቀመት ላቲ ፯ተ አዕማደ ።
ዚቅ
እግዚአ አእምሮ ገብርኤል ወዜናዌ ጥበብ ዘከሰተ ለነ
ዘኮነ ስውረ ውስተ ማዕምቀ ጽልመት
ወሀቤ ቃለ ትፍስሕት ለእለ ይሰብኩ ዕበየ ኃይልከ ።
ወረብ
እግዚአ አእምሮ ገብርኤል ወዜናዌ ጥበብ ዘከሰተ ለነ፤
ዘኮነ ዘኮነ ስውረ
+++
አልቦ እምሰብእ  ዘከማየ ዘይቴክዝ ነግሀ ወሠርከ
ወአልቦ እመላእክት ናዛዜ ኅዙናን ዘከማከ
ወበእንተዝ ኀሠሥኩ አእሚርየ ኪያከ
ኦ ገብርኤል ናዝዘኒ ወአስምዐኒ ቃለከ
ዕሴተ ጸሎትየ ዝንቱ ዘአቅረብኩ ለከ።
ወረብ
ወበእንተዝ ኀሠሥኩ አዕሚርየ ኪያከ፤
ኦ ገብርኤል ናዝዘኒ ወአስምዐኒ ቃለከ
ዚቅ
ሃሌ ሃሌ ሉያ ሃሌ ሉያ
አርዕየኒ ገጸከ አርዕየኒ ገጸከ ወአስምዐኒ ቃለከ
ነፍስየ ጥቀ ኀሠሠት ኪያከ ።
ወረብ
ሃሌ ሃሌ ሉያ ሃሌ ሉያ ገጸከ አርዕየኒ ፤
ወአስምዐኒ ቃለከ ሊቀ መላእክት።
ማኅሌተ ጽጌ
ፈትለ ወርቅ ወፈትለ ሜላት አመ በአፅባዕትኪ ተባየጹ
አምሳለ መለኮት ወትስብእት እንዘ ኢየሐፁ
ተአምረ ብርሃን ማርያም ለፀሐየ ጽድቅ አንቀጹ
ጸገይኪዮ እንበለ አብ በሰሚዐ ቃሉ ወድምጹ
ለገብርኤል መልአክኪ ዘፍሡሕ ገጹ ።
ወረብ
አንቀጹ አንቀጹ ለፀሐየ ጽድቅ ጸገይኪዮ እንበለ አብ፤
በሰሚዐ ቃሉ ወድምፁ ለገብርኤል መልአክኪ ዘፍሱሕ ገጹ ሊቀ መላእክት።
ዚቅ
መልአከ ኃይል ቅዱስ ገብርኤል
መልአከ ፍስሐ በእሳት ሥዑል
ሰበካ ለድንግል ምጽአቶ ለቃል
ወርቀ ወሜላተ እንዘ ትፈትል ።
አመ .ዘዚቅ
መልአከ ኃይል ቅዱስ ገብርኤል መልአከ ኃይል
መልአከ ፍስሐ በእሳት ሥዑል
ወረብ
ቅዱስ ገብርኤል መልአከ ኃይል መልአከ ፍስሐ በእሳት ሥዑል
ሰበካ ለድንግል ምጽአቶ ለቃል ወርቀ ወሜላተ እንዘ ትፈትል

ምልጣን
ወእንዘ ትፈትል ወርቀ ወሜላተ አስተርአያ ገብርኤል ግብተ
ወይቤላ እስመ ረከብኪ ሞገሰ በኀበ እግዚአብሔር
ወትቤሎ ይኩነኒ በከመ ትቤለኒ ።
ወረብ
ወእንዘ ትፈትል ወእንዘ ትፈትል ወርቀ ወሜላተ፤
አስተርአያ ገብርኤል አስተርአያ ለማርያም
+++
እስመ ለዓለም
ክብሮሙ ለመላእክት ከመ መንኮራኵር
ወረደ መልአከ  እግዚአብሔር ኀበ ማርያም ድንግል
ዘተናገሮ ለሙሴ በኀበ ዕፀ ጳጦስ
ዕፀ ጳጦስ ይእቲ ማርያም ገብርኤል ሰበከ ላ ዜና
ዘለአኮ ኵሎ ነገራ ።
አመ ዘእስ.
ገብርኤል ሰበከ ላ ዜና ገብርኤል ሰበከ
ዘለአኮ ኵሎ ነገራ ዘለአኮ ኵሎ ነገራ
ወረብ
ክብሮሙ ለመላእክት ከመ መንኮራኵር ወረደ መልአከ እግዚአብሔር፤
ኀበ ማርያም ድንግል ዘተናገሮ ለሙሴ በኀበ ዕፀ ጳጦስ
ሰላም
ገብርኤል አብሠራ ለማርያም ወይቤላ ትወልዲ ወልደ ወይነግሥ ለቤተ ያዕቆብ ለዓለም ወአልቦ ማኅለቅት ለሰላሙ ።
https://youtu.be/eMCBsXqlhZo?si=wuRf4MRK8oB57WsP