#Siidaa_Jaalalaa_dhaabnaa!

Meeqa akka jiraattu
Natti himi mee umurii kee
Carraan kee fuula duraa
Maal ta'aamee dhumni kee?

Gaafa yoomiimmo duuta
Guyyaan du'a kee yoomii?
Bor ga'uu keef ragaa
Mee nama tokko waami.

Du'atu si beellamee
Mana keetti dhufamoo
Situ qullaa itti fiigee
Miila satti kufa immoo?
Mee yoom duuta
Gaafa awwaalcha keeti
Eenyuutu iyyee caraana?
Gammachuu du'a keeti
kamtu ijan wal waaraana?

Waa'ee guyyaa ishee borii
waan beektu qabdaa akkamii?
Yoo quba wal qaabaattan
Nagaa koo itti naaf himii.
Yoo quba hin qaabaannee
Deebii kanaa naaf himii.

Guyyaa du'a kee beekta
Hagam akka jiraattu
moo callisteetumaa
kan hidhii natti nyaattu
Kan afaan natti bantuu?

Mee maaltu galaan
Gammachuu koo gadditee
Jiraachuu koo jibitaa?
Garummaa koo dhoksiitee
Mudaa koo yeedaleessuun
sirba baaste sirbitaa?

Yeroon ani milkaa'uu
maaliif hidhii of nyaatta
maaliif taata oraatii
maalumaaf akka Xaddee
Qaamni kee gutummaansaa
Gadi yaasa qoraatti?

Mana koo jiraachuun koo
Nagaan bahee galuun koo
Naaf gubee si qammata
Yeroo waa'ee koo yaadduu
maa jinniin dhufee
Halkaan abjuun si ammaata?

Ati mana kee teessaa
Anis mana koon jira
Jireenyi lamaan keenya
Harka waaqayyo jira.

Takkaa harka kee miciiree
Fudhaadhe nyaadhe hin beeku
Sababa an jiraadhuuf
Hin beeloftu, hin deegduu.

Maaf boolla naaf qotaree
Maaf natti gurta dhagaa
Namaan antee siin jedhu
Maaf natti taata alagaa?

Ilaa hin bo'in gaafan du'u
Ano siin dhagaa'uu
Akka ati na jaallattuus
Ka'ee dhugaa siin ba'uu.
Ammaa gaarii Maaf yaadi
Isa galmaan nu ga'uu.

Dhiisi argaa koo hin jibbiin
Qaamni ofii wal hin looluu
Aarsan kees foolii bada
Fuula waaqatti hin toluu
Dinummaatu biqiilee
Jibbaatu hiddaa yaafataa
Seexanatu killaa banee
Ammeenya bobaafataa.

Dhiisi garba cubbuu hin taanu
Hin baannuu tullaa jibbaa
Dhiifama waaliif goona
sila hin jiraannuu dhibba

Boolla naaf qottee sana
Biqiltu keessaa dhaabnaa
Jibbaa kokolfaa awwaallee
#Siidaa jaalalaa dhaabnaa!

@Kuusa_Walaloo!

Jaalaattoonni aartii Walaloo afaan Oromoo mimmiidhagoo garaagaraa argachuuf channel keenyaaf maatii ta'aa.

link kino👇
@Kuusa_Walaloo
@Kuusa_Walaloo!