የኢትዮጵያን ባህል፣ የፖለቲካ ስነ ምህዳርና የውጭ ጉዳይ ፖሊሲን ያገናዘበ ዘገባን በተመለከተ ለመገናኛ ብዙኃን ባለሙያዎች ስልጠና ተሰጠ

 ጥር፣ 17/2017  ዓ.ም  (ኢ.መ.ብ.ባ)

የኢትዮጵያ መገናኛ ብዙኃን ባለሥልጣን ከአዲስ አበባ ዩኒቨርሲቲ ጋር በመተባበር የኢትዮጵያን ባህል፣ የፖለቲካ ስነ ምህዳርና የውጭ ጉዳይ ፖሊሲን ያገናዘበ ዘገባን በተመለከተ ለመገናኛ ብዙኃን ባለሙያዎች ስልጠና ሰጥቷል።

በመድረኩ ተገኝተው የመክፈቻ ንግግር ያደረጉት የኢትዮጵያ መገናኛ ብዙኃን ባለሥልጣን ም/ ዋና ዳይሬክተር አቶ ግዛው ተስፋዬ፤ ባለሥልጣን መስሪያ ቤቱ የመገናኛ ብዙኃን ዘርፉን የተሻለ እንዲሆን በርካታ ስራዎች ከሚመለከታቸው አካላት ጋር ተቀናጅቶ እየሰራ እንደሆነ ገልፀው፤ በሚዲያው ዘርፍ የሚስተዋሉ ችግሮችን በዘላቂነት ለመፍታት ጥናትና ምርምር ስራዎችን ከመስራት በተጨማሪ ተከታታይነት ያለው የአቅም ግንባታ ስልጠናዎችና የውይይት መድረኮች በማመቻቸት ችግር ፈች ስራዎችን እየሰራ እንደሚገኝ ተናግረዋል።

አቶ ግዛው አክለውም፤ ስልጠናው የኢትዮጵያን ባህል፣ የፖለቲካ ስነ ምህዳርና የውጭ ጉዳይ ፖሊሲን ያገናዘበ ዘገባ በምን ዓይነት መልኩ ቢዘገቡ ውጤት ማምጣት ይችላሉ በሚለው ላይ ውይይት በማድረግ ለቀጣይ ስራዎች አቅም የሚሆኑ ዕውቀቶችን የምንይዝበትና የእርስ በእርስ ቁጥጥርን የምናጠናክርበት መድረክ ነው ሲሉ ተናግረዋል።

በመድረኩ የኢትዮጵያ ባህል፣ የፖለቲካ ስነ ምህዳርና የውጭ ጉዳይ ፖሊሲ ያገናዘበ ዘገባ ላይ ያተኮሩ ሰነዶች በአዲስ አበባ ዩኒቨርስቲ መምህራን ቀርበው ሐሳብ እና አስተያየቶች ተነስተው ውይይት ተደርጎባቸዋል።

በመጨረሻም የመገናኛ ብዙኃን ባለሙያዎች የአዲስ አበባ ዩኒቨርሲቲ ሙዚየምን እንዲጎበኙ ተደርጓል።