ዛሬ ኀሙስ ነው!

ያሬድ ጌታቸው (ጃጆ)

በሰዎች የሚደረግ፣ የሚነገር በጎ ቃል፥ መልካም ሃሳብ ሁሉ የፈጣሪ መልኩ ነው ።

አንድ የፌስቡክ ወዳጄ በውስጥ መስመር እንዲህ አለችኝ ...

"ሀሳብህ ከሀዘን መልሶኛል ፈጣሪ ጥበብን ይጨምርልህ"

ከዛማ አሜን አልኩ ጥበብ ያለው ሰው እንዴት ፈጣሪውን እንዲፈራ፣ እንዴት በማስተዋል እንዲራመድ ያውቃል፤ እንዴት በእውቀት በሕይወት መንገድ እንዲራመድ ... ምኑ ተዘርዝሮ ያልቃል ጥበብ ሲጨመርልህ እንዴት በኑረት ውስጥ ያሉ ሰዋዊ መስተጋብሮችን፣ ትናንትንና ዛሬን እንደምን ከነገ ጋር በእውቀት በማስተዋል አስታርቆ መሄድ እንዲቻል ፣ ፈተናንም ተቋቁሞ እንዴት እንዲታለፍ መንገዱ፥ ዘዴው ይብዛልህ እንደማለት እኮ ነው። ይኼ ሁሉ የጎደለውና ያነሰው ሰው ታድያ እነዚህ ሁሉ ይብዙልህ ተብሎ መመረቅ የት ይገኛል ?

ምንም እንኳ ሀዘን የሕይወት አንዱ መልኳ ቢሆንም ከሀዘን መንገድ መመለስ፣ ከሀዘን መፅናናት፣ መበርታት፥ብርታትን ሊበረታ ሊጠገን ራሱን ያዘጋጀ ልብና አበርቺ ቃልን ይፈልጋል። በሰዎች የሚደረግ፣ የሚነገር በጎ ቃል፣ መልካም ሃሳብ የፈጣሪ መልኩ ነው። በዛው ልክ ተቃርኖውን ስናደርግ ደግሞ ከሰይጣን ምድራዊ ተልዕኮ እዝ ስር እንደሆንን ነው።

የዛሬ ሳምንት በፃፍኩት የ"ዛሬ ኀሙስ ነው!" ሀሳብ፥ ከሀዘኗ መመለሷን ስትነግረኝ የምር ደስ አለኝ። ለራስ የተመከረ ምክር ከራስ አልፎ ሌሎች ገንዘባቸው ሲያደርጉት ወደ ደስታ ተለውጦ ማየት ልብን ያሞቃል።

ሐዘን፥ለእንባም ለመብሰልሰልም ልክ ካልተበጀለት የት ይዞን እንዲሄድ አናውቅም ከዚያ አድካሚ መንገድ መመለስ ድብቁን አቅም መጠቀምና የአይቻልምን መንፈስ ድል ማድረግ ነው።

የበረታንበት ...
ሁሉም ቀን ደስ ይላል!