የአደጋ ጊዜ ሠራተኞች እስካሁን የ19 ሰዎችን አስከሬን ከወንዙ ማውጣታቸውን ገልፀዋል። 300 ገደማ የአደጋ ጊዜ ሠራተኞች አደጋ በደረሰበት ሥፍራ አሰሳ በማካሄድ ላይ ናቸው።

በአካባቢው ባለው ከባድ ቅዝቃዜ ምክንያት የአደጋ ጊዜ ሥራው እጅግ አስቸጋሪ እንደሆ ተነግሯል። በአውሮፕላኑ ተሳፋሪ ከነበሩ ግለሰቦች መካከል ሁለት ሩሲያዊያን 'የስኬቲንግ' ስፖርተኞች እንደሚገኙበት ሮይተርስ የዜና ወኪል ዘግቧል።

ፖሊስ እና ጠላቂዎች በጀልባ ታግዘው ወንዝ ውስጥ ከአደጋው የተረፉ ሰዎች መኖራቸውን ለማጣራት አሰሳ እያካሄዱ ሲሆን የአሜሪካ ባለሥልጣናት የአደጋውን መንስዔ እየመረመሩ ይገኛሉ።

የፌዴራል አቪየሽን ባለሥልጣን እንዳለው አደጋው የተከሰተው በአካባቢው ሰዓት አቆጣጠር ከምሽቱ 3፡00 ገደማ ሲሆን አውሮፕላኑ ሬገን ዋሺንግተን የሀገር ውስጥ አየር ማረፊያ ለማረፍ እየተቃረበ ነበር።

የአሜሪካው ፕሬዝደንት ዶናልድ ትራምፕ ስለአደጋው ማብራሪያ እንደተሰጣቸው ገልፀው "መጥፎ አደጋ" ሲሉ ገልፀውታል።

የበረራ ቁጥሩ ፒኤስኤ ኤርላይንስ 5342 የሆነው ቦምባርዲዬር አውሮፕላን የአሜሪካ ጦር ንብረት ከሆነው ብላክ ሆክ ጋር መጋጨቱን አንድ ወታደራዊ ባለሥልጣን አረጋግጠዋል።

በቅርቡ የተሾሙት የአሜሪካ መከላከያ ሚኒስትር ፒት ሄግሴዝ በሰጡት መግለጫ ፔንታገን ሁኔታውን "በተጠንቀቅ እየተከታተለ ነው" ብለዋል።

የአሜሪካ መገናኝ ብዙኃን እንደዘገቡት የአሜሪካን ኤርላይንስ ንብረት የሆነው አውሮፕላን በአደጋው ምክንያተ ለሁለት የተከፈለ ሲሆን ሄሊኮፕተሩ ደግሞ ተገልብጦ ወንዝ ላይ ተገኝቷል።

እስካሁን በአደጋው ምክንያት የሞቱ ሰዎች ቁጥር በግልፅ ባይታወቅም የ19 ሰዎች አስከሬን ከወንዝ ወጥቷል። ነገር ግን በሥፍራው የነበሩ የዓይን እማኞችን አደጋው አየር ላይ ሲከሰት "ደማቅ ብርሀን" ማየታቸውን ኤንቢሲ ለተባለው ጣቢያ ተናግረዋል።

ሬገን አውሮፕላን ማረፊያ በአደጋው ምክንያት በረራ ማስተናገድ ያቆመ ሲሆን አውሮፕላኖች በአቅራቢያ ወደሚገኘው ዳለስ አየር መንገድ እንዲያቀኑ ተደርገዋል