ከስነ-ፅሁፍ ዓለም

ስለ ተፈሪ መኮንን ትምህርት ቤት መከፈት
═══════❁═══════

ልዑል አልጋ ወራሽ ተፈሪ መኮንን ከጃንሜዳ በስተሰሜን በኩል በሚገኝና የወይራ ዛፍ በሞላበት በአንድ ቦታ ላይ ዘመናዊ ትምህርት ቤት ለማሰራት ስላሰቡ ከሁለት ዓመት በፊት ህንፃውን አስጀምረው ነበር።

በዚህም ዓመት ህንፃው ተጠናቆ ስላለቀ በስማቸው የሰየሙትን የተፈሪ መኮንን ትምህርት ቤት ሚያዝያ 19 ቀን 1917 ዓ.ም. ሰኞ በ10 ሰዓት መርቀው ከፈቱት።

ለምረቃው በዓል የየሌጋሲዮኑ ሚኒስትሮችና ቆንስሎች ተጠርተው መጥተው ነበር። እኔም ለግዕዝና ለአማርኛ አስተማሪነት ትምህርት በአስተማሪነት ተመድቤ ታዝዤ በስፍራው ላይ ነበርኩና ስለ በዓሉ ሁናቴ ያየሁትን በሚከተለው እገልጻለሁ።

የትምህርት ቤቱ ሹም ሐኪም ወርቅነህ ከ15 ቀን ጀምረው የመዘገቧቸውን አዳሪዎችና ተመላላሾች ተማሪዎች በአንድ በኩል አሰልፈው፣ አስተማሪዎቹንም በሌላው በኩል አቁመው ሲጠባበቁ ቆዩ። አርባዎቹ የአርመን ልጆችም በትምህርት ቤቱ ደጃፍ ላይ ተሰልፈው ግቢውን በሙዚቃ ዜማ አደመቁት።

ከዚህ በኋላ ልዑል አልጋ ወራሽ በመኳንንት ታጅበው መጡና ከትምህርት ቤቱ በር ላይ ሲደርሱ ሹሙ ሐኪም ወርቅነህና ዲሬክተሩ ሙሴ ጒዮን ከአስተማሪዎችና ከተማሪዎች ጋር ሆነው ሰላምታ ሰጥተው ተቀበሏቸው። የአርመን ልጆችም "ማርሽ ተፈሪ" የሚባለውን አዲሱን መዝሙር በሙዚቃ ዘመሩላቸው። ይህ መዝሙር በዚያ ዘመን ገና መጀመሩ ነበር።

ልዑል አልጋ ወራሽ ከትምህርት ቤቱ አዳራሽ ገብተው በተለይ በተዘጋጀው ወምበር ሲቀመጡ መኳንንቱና የተጠሩት እንግዶች በቀኝና በግራ በየማዕርጋቸው ስፍራ ስፍራቸውን ይዘው ተቀመጡ። ከኢትዮጵያ መኳንንት ራስ ስዩም፣ ፊታውራሪ ደስታ ዳምጠው፣ ቀኛዝማች ዓምዴ፣ ከንቲባ ነሲቡ ዛማኔል፣ ብላታ ኅሩይ ወልደ ሥላሴና አቶ ሳህሌ ፀዳሉ ነበሩ።

ከዚህ በኋላ ሐኪም ወርቅነህ በልዑል አልጋ ወራሽ ፊት ቆመው ንግግር አደረጉ። ከዚያም ቀጥሎ ልዑል አልጋ ወራሽ ስለ ትምህርት ነገር ከፍ ያለ ኃይለ ቃል ያለበትን ታሪካዊ ንግግር አደረጉ። ...

ልዑል አልጋ ወራሽ ተናግረው ሲጨርሱ ሦስት ጊዜ ከፍ ያለ ጭብጨባ ተጨበጨበ። ከዚያም ቀጥሎ የሻይና የብስኩት የሻምፓኝም ግብዣ ተደረገ። ለተማሪዎቹም ብስኩት ታደላቸውና በየክፍላቸው እየገቡ ተቀመጡ። ከዚህ በኋላ ልዑል አልጋ ወራሽ መኳንንቱንና እንግዶችን አስከትለው የትምህርት ክፍሎችንና መኝታ ቤቶችን ጎብኝተው ሲመለሱ የበዓሉ ፍፃሜ ሆነ።

በማግስቱ ሚያዝያ 20 ማክሰኞ የትምህርቱ ሥራ ተጀመረ። በዚያ በመጀመሪያው ጊዜ የተመዘገቡት ተማሪዎች 32 አዳሪዎችና 40 ያህል ተመላላሾች ነበሩ። በኋላ ግን የአዳሪዎቹም ሆነ የተመላላሾቹም ቁጥር በየቀኑ እያደገ የሚሄድ ሆኗል።
>>>
━━━━━━━━━━━
✍ መርስዔ ኀዘን ወልደ ቂርቆስ
📔 ትዝታዬ ስለራሴ የማስታውሰው
ከ1891 - 1923
📄 137 - 141
━━━━━━━━━━━
* ማስታወሻ፦ ይህ ትምህርት ቤት በደርግ ዘመነ መንግሥት "እንጦጦ የቀለም የቴክኒክና ሙያ ትምህርት ቤት"፤ በኋላም "እንጦጦ ፖሊ ቴክኒክ ኮሌጅ" በመባል ሲጠራ ቆይቶ አሁን 100ኛ ዓመቱን ሲያከብር በቀድሞ ስሙ "ተፈሪ መኮንን" ተብሎ የሚጠራ ሆኗል!!!
📖 📖 📖 📖 📖
https://t.me/Ethiobooks

ጭር ሲል አልወድም!
═══•✦•═══
✍ አይዳ ታደሰ
'
አልወድም ዝምታ
     ሲሆን ያለ ቦታ!!
ሕይወትን ያለ ሳቅ
     ሀዘንን ያለ ማቅ፣
ለደስታ እንባ ሳይፈስ
     ካ'ንጀቴ ጥግ አይደርስ።

ዝምታ እወዳለሁ
     ውስጠቴን አያለሁ፣
በፀጥታ ዜማ
     የልቤን ስሰማ
የምደርስ ያኔ ነው
     ከእውነታው ማማ።

አንዴ ከደረስኩኝ፣
ከሃቁ ዳገት ጫፍ
     ቧጥጬ ከቆምኩኝ
ዝምታን አ'ለምድም
ፍትህ እስኪወለድ
     "ጭር" ሲል አልወድም!!
══════════ 
📔 "አልጽፍም"
🗓 2016 ዓ.ም.
📖 📖 📖 📖 📖
https://t.me/Ethiobooks

ዕንቁላል እና ፋሲካ
═══🥚═══

🥚
በእኛ ሀገር ዓመት በዓል ሲታሰብ ዶሮ ወጥ፤ ዶሮ ወጥ ሲባል ደግሞ ዕንቁላል አብሮ መነሳቱ አይቀርም። በእርግጥ በኛ ሀገር የዶሮ ወጥ ውስጥ ዕንቁላል ለመጀመሪያ ጊዜ የጨመረችው ወይዘሪት/ወይዘሮ ማንነት ባይታወቅም፣ በመላው ዓለም በተለያዩ ባህሎች ለዓመት በዓል ከዕንቁላል የተለያዩ ምግቦችን ማዘጋጀት የተለመደ ነው።

🥚
በዚህ በኩል በተለይም በክርስትናው ዓለም ከፋሲካ ጋር የተያያዘ ዕንቁላልን የማስዋብ፣ ዕንቁላል የመገባበዝና የመመገብ ባህል እንዳለ የታወቀ ነው። በተለይ በምሥራቅ አውሮፓ በተለያየ ሁኔታ ያሸበረቁ ዕንቁላሎችን ለፋሲካ በዓል ማዘጋጀት የተወደደ ተግባር ነው።

🥚
ለፋሲካ ዕንቁላልን አሸብርቆ መስጠትን በተመለከተ የተለያዩ መላ ምቶች ያሉ ሲሆን፣ ከእነሱ ውስጥ አንዱ ከሮማ ኢምፓየር ንጉሥ ከማርክ አውሬሊዮ ጋር የተያያዘ ነው። በዚህ አፈ-ታሪክ ንጉሡ በተወለደበት ቀን፣ አንድ የእናቱ ዶሮ ቀይ ነጠብጣብ ያለበት ዕንቁላል በመጣሏ ይህም ልክ የመልካም ብሥራት መገለጫ ወይም አመላካች ተደርጎ በመወሰዱ፣ ከዚያን ወዲህ ሕዝቡ ለመልካም ምኞት መግለጫ ተጠቀመበት የሚል ሲሆን፤ ሌላኛው ከክርስቶስ ሞት እና ትንሣኤ ጋር የተያያዘ ነው።

🥚
በዚህም ታሪክ ክርስቶስ እንደሞተ አንድ ይሁዳዊ ቤተሰብ ግብዣ ላይ የተለያዩ ምግቦች ቀርበው፣ (ዶሮም ዕንቁላልም ከምግቡ ውስጥ ነበሩ) ሲጨዋወቱ ከታዳሚዎቹ፣ ስለ ክርስቶስ አንስቶ 'ከሦስት ቀን በኋላ ይነሳል' ማለት፤ ሌላኛው ደግሞ 'አሁን ፊታችን ያለው ዶሮ ነፍስ ከዘራ ዕንቁላሎቹም ቀይ ከሆኑ፣ ያኔ በክርስቶስ መነሳት አምናለሁ' ብሎ ሳይጨርስ ያኔውኑ ዶሮዋ ነፍስ ዘራች ዕንቁላሉም ቀይ ሆነ።

🥚
ከዚያን ጊዜ ጀምሮ ቀይ ዕንቁላል የትንሣኤ ምልክት ማረጋገጫ ተደርጎ ተወሰደ፣ ባህልም ሆኖ ተዛመተ። እኛም ምንም እንኳ ቀይ ቀለም ባንቀባውም፣ እንደ አቅሚቲ ቀይ ወጥ ውስጥ በመጨመር የጀመርነው ከዚህ ጋር በተያያዘ ይሆን?
━━━━━━━━
✍ ዶ/ር ብርሃኔ ረዳኢ
📔 ጤና ነገር እና ጉዳይ
🗓 2007 ዓ.ም.
📄 85
📖 📖 📖 📖 📖
https://t.me/Ethiobooks