“ዘመናቸውን የጨረሱ የምርጫ ቦርድ አመራሮች ከሃላፊነታቸው ሊነሱ ይገባል” ገዳ ቢሊሱማ ፓርቲ

ማክሰኞ ህዳር 10 ቀን 2017 (አዲስ ማለዳ) ዘመናቸውን የጨረሱ የምርጫ ቦርድ አባላት ከሃላፊነት ሊነሱ ይገባል ሲል ከሰሞኑ ፍቃዱ የተሰረዘው ገዳ ቢሊሱማ ፓርቲ ከሷል፡፡

የኢትዮጵያ ምርጫ ቦርድ የፓርቲዎችን ፍቃድ በመሰረዝ የሰላማዊ ትግል በርን እየዘጋ ነው ያለው ፓርቲው፣ ይህ ደግሞ ሆን ብሎ የሚከናወን ነው ሲል አብራርቷል፡፡

ከሰሞኑ ከታገዱ የ11 የፖለቲካ ፓርቲዎች መካከል አንዱ የሆነው ገዳ ቢሊሱማ ፓርቲ ለአዲስ ማለዳ እንደገለጸው ምርጫ ቦርድ ህግን ባልጠበቀ መንገድ የፖለቲካ ፓርቲዎችን ፍቃድ በማገድና በመሰረዝ የፖለቲካ እንቅስቃሴን እየዘጋ ነው ያለ ሲሆን ፤ ይህም በተለይ በበህሄር የተደራጁ ፓርቲዎችን ሆን ብሎ ለማጥፋት ያለመ ነው ብሏል፡፡

የቦርዱ አመራሮች 11 የፖለቲካ ፓርቲዎችን ፍቃድ በማገድ እና በኢትዮጵያ የፖለቲካ ፓርቲዎች የጋራ ምክር ቤት ጉባኤ ላይ እንዳይገኙ በመከልከል የጋራ ምክር ቤቱን እንዲፈርስ ወይም ለሶስት ቦታ እንዲሰነጠቅ አድርገዋል በማለትም ፓርቲው ወቅሷል፡፡

ይህ ሂደት ከፓርቲ ስራ ባለፈ በአገራዊ ምክክር ኮሚሽኑ ተካተው ውይይት ሲያደርጉ የነበሩ ፓርቲዎችን ጭምር የጎዳ ነው በማለትም ዘመናቸውን የጨረሱ የምርጫ ቦርድ አመራሮች ከሃላፊነት መነሳት አለባቸው ሲልም ሃሳቡን ሰንዝሯል፡፡

አዲስ ማለዳ የፓርቲውን ክስ በሚመለከት ከኢትዮጵያ ብሄራዊ ምርጫ ቦርድ መልስ ለማገኘት በተደጋጋሚ ያደረገችው ጥረት ያልተሳካ ሲሆን በቀጣይ ቦርዱ ምላሽ በሚሰጥበት ወቅት የዘገባ ሽፋን የምንሰጥ ይሆናል፡፡