ባለፉት 6 ወራት ብቻ ከ721ሺህ በላይ ፓስፖርት መሰራጨት መቻሉ ተገለፀ
የኢሚግሬሽን እና ዜግነት አገልግሎት ባለፉት 6 ወራት ከ721ሺህ በላይ የተለያዩ ፓስፖርት ተዘጋጅቶ ለዜጎች መሰራጨቱን የተቋሙ ዋና ዳይሬክተር ወ/ሮ ሰላማዊት ዳዊት ገልፀዋል።ይህ ከአምናው ተመሳሳይ የበጀት ዘመን ጋር ሲነፃፀር የ31% ብልጫ ያለው መሆኑን ማወቅ ተችሏል።
ዋና ዳይሬክተሯ የተቋሙን የ6 ወራት የስራ አፈፃፀም በሚመለከት ዛሬ ለሚዲያ በሰጡት መግላጫ ላይ ከተሰራጩ ፓስፖርቶች በተጨማሪ ተቋሙ በግማሽ ዓመቱ የአስቸኳይ ፓስፖርት አገልግሎትን ከዋና መስሪያ ቤት በተጨማሪ በክልል በሚገኙ 7 ቅርንጫፍ ጽ/ቤቶች ማለትም በደሴ፣ ሐዋሳ፣ ጅማ፣ ባህርዳር፣ ድሬደዋ፣ አዳማ እና ሆሳዕና ቅርንጫፍ ላይ መስጠት መቻሉን አስታውቀዋል።በዋና መስሪያ ቤትና በቅርንጫፎች በሳምንት ከ3,400 በላይ አስቸኳይ ፓስፖርት አመልካቾችን ማስተናገድ የሚያስችል ስርዓት መዘርጋቱንም ወና ዳይሬክተሯ አያይዘው ጠቅሰዋል።
ከቪዛ አገልግሎት አንፃር አገሪቱን የቱሪዝምና የኢንቨስትመንት ማዕከልነት ለማድረግ የሚደረገውን ጥረት ከፍ ለማድረግ 188 ሀገራት የመዳረሻ ቪዛ አገልግሎት የማስተናገድ አቅማቸው እየተሻሻለ መምጣቱን በዚህም በአየርና በየብስ
ከ3.3 ሚሊየን በላይ ለሚሆኑ መንገደኞች አገልግሎት መሰጠት መቻሉን አሳውቀዋል። አክለውም የቪዛ አገልግሎት ተደራሽ ለማድረግ በተሰራው ስራ በኢ-ቪዛ 323,850፣ በመዳረሻ ቪዛ 129,856፣ የታደሰ 24,253 እና በቆንስላ ደረጃ 6,872 አጠቃላይ 484,837 ቪዛዎችን ለመስጠት መቻሉን አሳውቀዋል።
ዋና ዳይሬክተሯ በግማሽ አመቱ የስራ አፈፃፀም ተቋማዊ የአገልግሎት ገቢን በተመለከተ 10 ቢሊየን ብር ለመሰብሰብ በእቅድ ተይዞ 16.3 ቢሊየን ብር መሰብሰብ መቻሉን እና ከዚህም ውስጥ 79.2 ሚሊየን በውጭ ምንዛሬ የተሰበሰበ መሆኑንን ገልፀዋል፡፡
ከአሰራር ስርአት ማሻሻያ እና ቴክኖሎጂ አጠቃቀም ጋር በሰጡት ማብራሪያ የኢ-ፓስፖርት ምርት ሂደት ተጠናቆ ሰራተኞችን የማሰልጠን እና የሲስተም ትግበራ ሙከራ እየተከናወነ መሆኑን ገልፀው የቪዛ ስቲከር፣ የትውልደ ኢትዮጲያዊ እና የመኖሪያ ፈቃድ የመታወቂያ ካርዶች በዘመናዊ መልኩ ተዘጋጀተው በሚቀጥለው ሩብ አመት ውስጥ ወደ ስራ እንደገቡም አስታውቀዋል፡፡
ተቋሙን በብቁና አገሪቱን በሚመመስል የሰው ሀይል ለማጠናከር እየተሰራ ያለውን ስራ ሲጠቅሱም አዲስ የሰራተኛ ደንብ እንዲፀድቅ በማድረግ በአሁን ሰዓት ከ900 በላይ ሰራተኞችን ለመቅጠር ይፋዊ ማስታወቂያ በማውጣት በሁሉም ክልሎችና የከተማ አስተዳደሮች ምዝገባ መካሄዱን አስታውሰዋል። በመሆኑም በቀጣይ ህጋዊ የቅጥር ሂደት በማካሄድ ተቋሙን በብቁ ባለሙያ የማጠናከር ስራ እንደሚካሄድ አረጋግጠዋል።
የአገልግሎት ተደራሽነቱን ይበልጥ ለማስፋትና ወደ ህብረተሰቡ በቅርበት ለማድረስ ከሚመለከታቸው የክልል እና የከተማ አስተዳደር አካላት ጋር በመግባባት
14 አዳዲስ ቅርንጫፎችን ለመክፈት ለቢሮ የሚሆን ቦታዎችን መረከብ መቻሉን የጠቆሙ ሲሆን በተጨማሪም በድሬደዋ፣ በሃዋሳ፣ በባህርዳር እና ጅማ ከተማዎች ላይ ሁለተኛ ዋና መስሪያ ቤት ለመክፈት አስፈላጊው ዝግጅት በመከናወን ላይ እንደሚገኝ ተናግረዋል፡፡
ህገወጥ እንቅስቃሴዎችን ከመከላከል ረገድ:- አገልግሎቱን በሚያደናቅፉ የድለላ ስራዎች ላይ የተሰማሩ፤ በተለያየ የማጭበርበር እና የማታለል ተግባርና በሌሎችም ህገወጥ ተግባር ላይ ተሰማርተው የተገኙ 126 ተጠርጣሪዎችን
ከብሄራዊ የመረጃና ደህንነት አገልግሎት እና ከአዲስ አበባ ፖሊስ ኮሚሽን ጋር በመቀናጀት በህግ ቁጥጥር ስር እንዲውሉ መደረጉን ገልፀዋል። ከዚህ በተጨማሪም ህጋዊ አሰራርን ባልተከተለ አግባብ ለማጭበርበር የሞከሩና የተጭበረበረ የጉዞ ሰነዶችን በመያዝ የተቋሙን አገልግሎት ለማገኘት ሲንቀሳቀሱ የነበሩ 13,322 ዜጎች በመያዝ አስፈላጊውን አስተዳደራዊ እርምጃዎች እንዲወሰድባቸው መደረጉን ዋና ዳይሬከሰተሯ ገልፀዋል፡፡
ከሲቪል ምዝገባ ስራ ጋር በተያያዘም በግማሽ አመቱ 1,598,271 ኩነቶች የተመዘገቡ ሲሆን ከዚህ ዉስጥ 1,597,393 /99.9%/ ተገልጋዮች የምስክር ወረቀት እንዲወስዱ ማድረግ መቻሉን ገልፀው የሲቪል እና የቤተሰብ ምዝገባን ወጥ በሆነ የቴክኖሎጂ ስርዓት እንዲመራ ጥናቶች በመከናወን ላይ እንደሚገኙ አብራርተዋል።
የኢሚግሬሽንና ዜግነት አገልግሎት
--
Telegram:
https://t.me/ICS_EthiopiaFacebook:
https://www.facebook.com/ICSEthiopiaTwitter:
https://twitter.com/ics_ethiopiaTikTok:
https://www.tiktok.com/@ics_ethiopiaLinkedIn:
https://www.linkedin.com/company/icsethiopiaYouTube:
https://www.youtube.com/@Ics_Ethiopia
